ନାରାଯଣୀଯଂ ଦଶକ 37 - ଶ୍ରୀକୃଷ୍ଣାଵତାରୋପକ୍ରମମ୍

ସାନ୍ଦ୍ରାନନ୍ଦତନୋ ହରେ ନନୁ ପୁରା ଦୈଵାସୁରେ ସଙ୍ଗରେ
ତ୍ଵତ୍କୃତ୍ତା ଅପି କର୍ମଶେଷଵଶତୋ ଯେ ତେ ନ ଯାତା ଗତିମ୍ ।
ତେଷାଂ ଭୂତଲଜନ୍ମନାଂ ଦିତିଭୁଵାଂ ଭାରେଣ ଦୂରାର୍ଦିତା
ଭୂମିଃ ପ୍ରାପ ଵିରିଞ୍ଚମାଶ୍ରିତପଦଂ ଦେଵୈଃ ପୁରୈଵାଗତୈଃ ॥1॥

ହା ହା ଦୁର୍ଜନଭୂରିଭାରମଥିତାଂ ପାଥୋନିଧୌ ପାତୁକା-
ମେତାଂ ପାଲଯ ହନ୍ତ ମେ ଵିଵଶତାଂ ସମ୍ପୃଚ୍ଛ ଦେଵାନିମାନ୍ ।
ଇତ୍ଯାଦିପ୍ରଚୁରପ୍ରଲାପଵିଵଶାମାଲୋକ୍ଯ ଧାତା ମହୀଂ
ଦେଵାନାଂ ଵଦନାନି ଵୀକ୍ଷ୍ଯ ପରିତୋ ଦଧ୍ଯୌ ଭଵନ୍ତଂ ହରେ ॥2॥

ଊଚେ ଚାମ୍ବୁଜଭୂରମୂନଯି ସୁରାଃ ସତ୍ଯଂ ଧରିତ୍ର୍ଯା ଵଚୋ
ନନ୍ଵସ୍ଯା ଭଵତାଂ ଚ ରକ୍ଷଣଵିଧୌ ଦକ୍ଷୋ ହି ଲକ୍ଷ୍ମୀପତିଃ ।
ସର୍ଵେ ଶର୍ଵପୁରସ୍ସରା ଵଯମିତୋ ଗତ୍ଵା ପଯୋଵାରିଧିଂ
ନତ୍ଵା ତଂ ସ୍ତୁମହେ ଜଵାଦିତି ଯଯୁଃ ସାକଂ ତଵାକେତନମ୍ ॥3॥

ତେ ମୁଗ୍ଧାନିଲଶାଲିଦୁଗ୍ଧଜଲଧେସ୍ତୀରଂ ଗତାଃ ସଙ୍ଗତା
ଯାଵତ୍ତ୍ଵତ୍ପଦଚିନ୍ତନୈକମନସସ୍ତାଵତ୍ ସ ପାଥୋଜଭୂଃ ।
ତ୍ଵଦ୍ଵାଚଂ ହୃଦଯେ ନିଶମ୍ଯ ସକଲାନାନନ୍ଦଯନ୍ନୂଚିଵା-
ନାଖ୍ଯାତଃ ପରମାତ୍ମନା ସ୍ଵଯମହଂ ଵାକ୍ଯଂ ତଦାକର୍ଣ୍ଯତାମ୍ ॥4॥

ଜାନେ ଦୀନଦଶାମହଂ ଦିଵିଷଦାଂ ଭୂମେଶ୍ଚ ଭୀମୈର୍ନୃପୈ-
ସ୍ତତ୍କ୍ଷେପାଯ ଭଵାମି ଯାଦଵକୁଲେ ସୋଽହଂ ସମଗ୍ରାତ୍ମନା ।
ଦେଵା ଵୃଷ୍ଣିକୁଲେ ଭଵନ୍ତୁ କଲଯା ଦେଵାଙ୍ଗନାଶ୍ଚାଵନୌ
ମତ୍ସେଵାର୍ଥମିତି ତ୍ଵଦୀଯଵଚନଂ ପାଥୋଜଭୂରୂଚିଵାନ୍ ॥5॥

ଶ୍ରୁତ୍ଵା କର୍ଣରସାଯନଂ ତଵ ଵଚଃ ସର୍ଵେଷୁ ନିର୍ଵାପିତ-
ସ୍ଵାନ୍ତେଷ୍ଵୀଶ ଗତେଷୁ ତାଵକକୃପାପୀଯୂଷତୃପ୍ତାତ୍ମସୁ ।
ଵିଖ୍ଯାତେ ମଧୁରାପୁରେ କିଲ ଭଵତ୍ସାନ୍ନିଧ୍ଯପୁଣ୍ଯୋତ୍ତରେ
ଧନ୍ଯାଂ ଦେଵକନନ୍ଦନାମୁଦଵହଦ୍ରାଜା ସ ଶୂରାତ୍ମଜଃ ॥6॥

ଉଦ୍ଵାହାଵସିତୌ ତଦୀଯସହଜଃ କଂସୋଽଥ ସମ୍ମାନଯ-
ନ୍ନେତୌ ସୂତତଯା ଗତଃ ପଥି ରଥେ ଵ୍ଯୋମୋତ୍ଥଯା ତ୍ଵଦ୍ଗିରା ।
ଅସ୍ଯାସ୍ତ୍ଵାମତିଦୁଷ୍ଟମଷ୍ଟମସୁତୋ ହନ୍ତେତି ହନ୍ତେରିତଃ
ସନ୍ତ୍ରାସାତ୍ ସ ତୁ ହନ୍ତୁମନ୍ତିକଗତାଂ ତନ୍ଵୀଂ କୃପାଣୀମଧାତ୍ ॥7॥

ଗୃହ୍ଣାନଶ୍ଚିକୁରେଷୁ ତାଂ ଖଲମତିଃ ଶୌରେଶ୍ଚିରଂ ସାନ୍ତ୍ଵନୈ-
ର୍ନୋ ମୁଞ୍ଚନ୍ ପୁନରାତ୍ମଜାର୍ପଣଗିରା ପ୍ରୀତୋଽଥ ଯାତୋ ଗୃହାନ୍ ।
ଆଦ୍ଯଂ ତ୍ଵତ୍ସହଜଂ ତଥାଽର୍ପିତମପି ସ୍ନେହେନ ନାହନ୍ନସୌ
ଦୁଷ୍ଟାନାମପି ଦେଵ ପୁଷ୍ଟକରୁଣା ଦୃଷ୍ଟା ହି ଧୀରେକଦା ॥8॥

ତାଵତ୍ତ୍ଵନ୍ମନସୈଵ ନାରଦମୁନିଃ ପ୍ରୋଚେ ସ ଭୋଜେଶ୍ଵରଂ
ଯୂଯଂ ନନ୍ଵସୁରାଃ ସୁରାଶ୍ଚ ଯଦଵୋ ଜାନାସି କିଂ ନ ପ୍ରଭୋ ।
ମାଯାଵୀ ସ ହରିର୍ଭଵଦ୍ଵଧକୃତେ ଭାଵୀ ସୁରପ୍ରାର୍ଥନା-
ଦିତ୍ଯାକର୍ଣ୍ଯ ଯଦୂନଦୂଧୁନଦସୌ ଶୌରେଶ୍ଚ ସୂନୂନହନ୍ ॥9॥

ପ୍ରାପ୍ତେ ସପ୍ତମଗର୍ଭତାମହିପତୌ ତ୍ଵତ୍ପ୍ରେରଣାନ୍ମାଯଯା
ନୀତେ ମାଧଵ ରୋହିଣୀଂ ତ୍ଵମପି ଭୋଃସଚ୍ଚିତ୍ସୁଖୈକାତ୍ମକଃ ।
ଦେଵକ୍ଯା ଜଠରଂ ଵିଵେଶିଥ ଵିଭୋ ସଂସ୍ତୂଯମାନଃ ସୁରୈଃ
ସ ତ୍ଵଂ କୃଷ୍ଣ ଵିଧୂଯ ରୋଗପଟଲୀଂ ଭକ୍ତିଂ ପରାଂ ଦେହି ମେ ॥10॥