ନାରାଯଣୀଯଂ ଦଶକ 33 - ଅମ୍ବରୀଷଚରିତମ୍

ଵୈଵସ୍ଵତାଖ୍ଯମନୁପୁତ୍ରନଭାଗଜାତ-
ନାଭାଗନାମକନରେନ୍ଦ୍ରସୁତୋଽମ୍ବରୀଷଃ ।
ସପ୍ତାର୍ଣଵାଵୃତମହୀଦଯିତୋଽପି ରେମେ
ତ୍ଵତ୍ସଙ୍ଗିଷୁ ତ୍ଵଯି ଚ ମଗ୍ନମନାସ୍ସଦୈଵ ॥1॥

ତ୍ଵତ୍ପ୍ରୀତଯେ ସକଲମେଵ ଵିତନ୍ଵତୋଽସ୍ଯ
ଭକ୍ତ୍ଯୈଵ ଦେଵ ନଚିରାଦଭୃଥାଃ ପ୍ରସାଦମ୍ ।
ଯେନାସ୍ଯ ଯାଚନମୃତେଽପ୍ଯଭିରକ୍ଷଣାର୍ଥଂ
ଚକ୍ରଂ ଭଵାନ୍ ପ୍ରଵିତତାର ସହସ୍ରଧାରମ୍ ॥2॥

ସ ଦ୍ଵାଦଶୀଵ୍ରତମଥୋ ଭଵଦର୍ଚନାର୍ଥଂ
ଵର୍ଷଂ ଦଧୌ ମଧୁଵନେ ଯମୁନୋପକଣ୍ଠେ ।
ପତ୍ନ୍ଯା ସମଂ ସୁମନସା ମହତୀଂ ଵିତନ୍ଵନ୍
ପୂଜାଂ ଦ୍ଵିଜେଷୁ ଵିସୃଜନ୍ ପଶୁଷଷ୍ଟିକୋଟିମ୍ ॥3॥

ତତ୍ରାଥ ପାରଣଦିନେ ଭଵଦର୍ଚନାନ୍ତେ
ଦୁର୍ଵାସସାଽସ୍ଯ ମୁନିନା ଭଵନଂ ପ୍ରପେଦେ ।
ଭୋକ୍ତୁଂ ଵୃତଶ୍ଚସ ନୃପେଣ ପରାର୍ତିଶୀଲୋ
ମନ୍ଦଂ ଜଗାମ ଯମୁନାଂ ନିଯମାନ୍ଵିଧାସ୍ଯନ୍ ॥4॥

ରାଜ୍ଞାଽଥ ପାରଣମୁହୂର୍ତସମାପ୍ତିଖେଦା-
ଦ୍ଵାରୈଵ ପାରଣମକାରି ଭଵତ୍ପରେଣ ।
ପ୍ରାପ୍ତୋ ମୁନିସ୍ତଦଥ ଦିଵ୍ଯଦୃଶା ଵିଜାନନ୍
କ୍ଷିପ୍ଯନ୍ କ୍ରୁଧୋଦ୍ଧୃତଜଟୋ ଵିତତାନ କୃତ୍ଯାମ୍ ॥5॥

କୃତ୍ଯାଂ ଚ ତାମସିଧରାଂ ଭୁଵନଂ ଦହନ୍ତୀ-
ମଗ୍ରେଽଭିଵୀକ୍ଷ୍ଯନୃପତିର୍ନ ପଦାଚ୍ଚକମ୍ପେ ।
ତ୍ଵଦ୍ଭକ୍ତବାଧମଭିଵୀକ୍ଷ୍ଯ ସୁଦର୍ଶନଂ ତେ
କୃତ୍ଯାନଲଂ ଶଲଭଯନ୍ ମୁନିମନ୍ଵଧାଵୀତ୍ ॥6॥

ଧାଵନ୍ନଶେଷଭୁଵନେଷୁ ଭିଯା ସ ପଶ୍ଯନ୍
ଵିଶ୍ଵତ୍ର ଚକ୍ରମପି ତେ ଗତଵାନ୍ ଵିରିଞ୍ଚମ୍ ।
କଃ କାଲଚକ୍ରମତିଲଙ୍ଘଯତୀତ୍ଯପାସ୍ତଃ
ଶର୍ଵଂ ଯଯୌ ସ ଚ ଭଵନ୍ତମଵନ୍ଦତୈଵ ॥7॥

ଭୂଯୋ ଭଵନ୍ନିଲଯମେତ୍ଯ ମୁନିଂ ନମନ୍ତଂ
ପ୍ରୋଚେ ଭଵାନହମୃଷେ ନନୁ ଭକ୍ତଦାସଃ ।
ଜ୍ଞାନଂ ତପଶ୍ଚ ଵିନଯାନ୍ଵିତମେଵ ମାନ୍ଯଂ
ଯାହ୍ଯମ୍ବରୀଷପଦମେଵ ଭଜେତି ଭୂମନ୍ ॥8॥

ତାଵତ୍ସମେତ୍ଯ ମୁନିନା ସ ଗୃହୀତପାଦୋ
ରାଜାଽପସୃତ୍ଯ ଭଵଦସ୍ତ୍ରମସାଵନୌଷୀତ୍ ।
ଚକ୍ରେ ଗତେ ମୁନିରଦାଦଖିଲାଶିଷୋଽସ୍ମୈ
ତ୍ଵଦ୍ଭକ୍ତିମାଗସି କୃତେଽପି କୃପାଂ ଚ ଶଂସନ୍ ॥9॥

ରାଜା ପ୍ରତୀକ୍ଷ୍ଯ ମୁନିମେକସମାମନାଶ୍ଵାନ୍
ସମ୍ଭୋଜ୍ଯ ସାଧୁ ତମୃଷିଂ ଵିସୃଜନ୍ ପ୍ରସନ୍ନମ୍ ।
ଭୁକ୍ତ୍ଵା ସ୍ଵଯଂ ତ୍ଵଯି ତତୋଽପି ଦୃଢଂ ରତୋଽଭୂ-
ତ୍ସାଯୁଜ୍ଯମାପ ଚ ସ ମାଂ ପଵନେଶ ପାଯାଃ ॥10॥