নারাযণীযং দশক 32 - মত্স্যাবতারম্

পুরা হযগ্রীবমহাসুরেণ ষষ্ঠান্তরান্তোদ্যদকাণ্ডকল্পে ।
নিদ্রোন্মুখব্রহ্মমুখাত্ হৃতেষু বেদেষ্বধিত্সঃ কিল মত্স্যরূপম্ ॥1॥

সত্যব্রতস্য দ্রমিলাধিভর্তুর্নদীজলে তর্পযতস্তদানীম্ ।
করাঞ্জলৌ সঞ্জ্বলিতাকৃতিস্ত্বমদৃশ্যথাঃ কশ্চন বালমীনঃ ॥2॥

ক্ষিপ্তং জলে ত্বাং চকিতং বিলোক্য নিন্যেঽম্বুপাত্রেণ মুনিঃ স্বগেহম্ ।
স্বল্পৈরহোভিঃ কলশীং চ কূপং বাপীং সরশ্চানশিষে বিভো ত্বম্ ॥3॥

যোগপ্রভাবাদ্ভবদাজ্ঞযৈব নীতস্ততস্ত্বং মুনিনা পযোধিম্ ।
পৃষ্টোঽমুনা কল্পদিদৃক্ষুমেনং সপ্তাহমাস্বেতি বদন্নযাসীঃ ॥4॥

প্রাপ্তে ত্বদুক্তেঽহনি বারিধারাপরিপ্লুতে ভূমিতলে মুনীন্দ্রঃ ।
সপ্তর্ষিভিঃ সার্ধমপারবারিণ্যুদ্ঘূর্ণমানঃ শরণং যযৌ ত্বাম্ ॥5॥

ধরাং ত্বদাদেশকরীমবাপ্তাং নৌরূপিণীমারুরুহুস্তদা তে
তত্কম্পকম্প্রেষু চ তেষু ভূযস্ত্বমম্বুধেরাবিরভূর্মহীযান্ ॥6॥

ঝষাকৃতিং যোজনলক্ষদীর্ঘাং দধানমুচ্চৈস্তরতেজসং ত্বাম্ ।
নিরীক্ষ্য তুষ্টা মুনযস্ত্বদুক্ত্যা ত্বত্তুঙ্গশৃঙ্গে তরণিং ববন্ধুঃ ॥7॥

আকৃষ্টনৌকো মুনিমণ্ডলায প্রদর্শযন্ বিশ্বজগদ্বিভাগান্ ।
সংস্তূযমানো নৃবরেণ তেন জ্ঞানং পরং চোপদিশন্নচারীঃ ॥8॥

কল্পাবধৌ সপ্তমুনীন্ পুরোবত্ প্রস্থাপ্য সত্যব্রতভূমিপং তম্ ।
বৈবস্বতাখ্যং মনুমাদধানঃ ক্রোধাদ্ হযগ্রীবমভিদ্রুতোঽভূঃ ॥9॥

স্বতুঙ্গশৃঙ্গক্ষতবক্ষসং তং নিপাত্য দৈত্যং নিগমান্ গৃহীত্বা ।
বিরিঞ্চযে প্রীতহৃদে দদানঃ প্রভঞ্জনাগারপতে প্রপাযাঃ ॥10॥