ନାରାଯଣୀଯଂ ଦଶକ 31 - ବଲିଦର୍ପହରଣମ୍

ପ୍ରୀତ୍ଯା ଦୈତ୍ଯସ୍ତଵ ତନୁମହଃପ୍ରେକ୍ଷଣାତ୍ ସର୍ଵଥାଽପି
ତ୍ଵାମାରାଧ୍ଯନ୍ନଜିତ ରଚଯନ୍ନଞ୍ଜଲିଂ ସଞ୍ଜଗାଦ ।
ମତ୍ତଃ କିଂ ତେ ସମଭିଲଷିତଂ ଵିପ୍ରସୂନୋ ଵଦ ତ୍ଵଂ
ଵିତ୍ତଂ ଭକ୍ତଂ ଭଵନମଵନୀଂ ଵାଽପି ସର୍ଵଂ ପ୍ରଦାସ୍ଯେ ॥1॥

ତାମୀକ୍ଷଣାଂ ବଲିଗିରମୁପାକର୍ଣ୍ଯ କାରୁଣ୍ଯପୂର୍ଣୋଽ-
ପ୍ଯସ୍ଯୋତ୍ସେକଂ ଶମଯିତୁମନା ଦୈତ୍ଯଵଂଶଂ ପ୍ରଶଂସନ୍ ।
ଭୂମିଂ ପାଦତ୍ରଯପରିମିତାଂ ପ୍ରାର୍ଥଯାମାସିଥ ତ୍ଵଂ
ସର୍ଵଂ ଦେହୀତି ତୁ ନିଗଦିତେ କସ୍ଯ ହାସ୍ଯଂ ନ ଵା ସ୍ଯାତ୍ ॥2॥

ଵିଶ୍ଵେଶଂ ମାଂ ତ୍ରିପଦମିହ କିଂ ଯାଚସେ ବାଲିଶସ୍ତ୍ଵଂ
ସର୍ଵାଂ ଭୂମିଂ ଵୃଣୁ କିମମୁନେତ୍ଯାଲପତ୍ତ୍ଵାଂ ସ ଦୃପ୍ଯନ୍ ।
ଯସ୍ମାଦ୍ଦର୍ପାତ୍ ତ୍ରିପଦପରିପୂର୍ତ୍ଯକ୍ଷମଃ କ୍ଷେପଵାଦାନ୍
ବନ୍ଧଂ ଚାସାଵଗମଦତଦର୍ହୋଽପି ଗାଢୋପଶାନ୍ତ୍ଯୈ ॥3॥

ପାଦତ୍ରଯ୍ଯା ଯଦି ନ ମୁଦିତୋ ଵିଷ୍ଟପୈର୍ନାପି ତୁଷ୍ଯେ-
ଦିତ୍ଯୁକ୍ତେଽସ୍ମିନ୍ ଵରଦ ଭଵତେ ଦାତୁକାମେଽଥ ତୋଯମ୍ ।
ଦୈତ୍ଯାଚାର୍ଯସ୍ତଵ ଖଲୁ ପରୀକ୍ଷାର୍ଥିନଃ ପ୍ରେରଣାତ୍ତଂ
ମା ମା ଦେଯଂ ହରିରଯମିତି ଵ୍ଯକ୍ତମେଵାବଭାଷେ ॥4॥

ଯାଚତ୍ଯେଵଂ ଯଦି ସ ଭଗଵାନ୍ ପୂର୍ଣକାମୋଽସ୍ମି ସୋଽହଂ
ଦାସ୍ଯାମ୍ଯେଵ ସ୍ଥିରମିତି ଵଦନ୍ କାଵ୍ଯଶପ୍ତୋଽପି ଦୈତ୍ଯଃ ।
ଵିନ୍ଧ୍ଯାଵଲ୍ଯା ନିଜଦଯିତଯା ଦତ୍ତପାଦ୍ଯାଯ ତୁଭ୍ଯଂ
ଚିତ୍ରଂ ଚିତ୍ରଂ ସକଲମପି ସ ପ୍ରାର୍ପଯତ୍ତୋଯପୂର୍ଵମ୍ ॥5॥

ନିସ୍ସନ୍ଦେହଂ ଦିତିକୁଲପତୌ ତ୍ଵଯ୍ଯଶେଷାର୍ପଣଂ ତଦ୍-
ଵ୍ଯାତନ୍ଵାନେ ମୁମୁଚୁଃ-ଋଷଯଃ ସାମରାଃ ପୁଷ୍ପଵର୍ଷମ୍ ।
ଦିଵ୍ଯଂ ରୂପଂ ତଵ ଚ ତଦିଦଂ ପଶ୍ଯତାଂ ଵିଶ୍ଵଭାଜା-
ମୁଚ୍ଚୈରୁଚ୍ଚୈରଵୃଧଦଵଧୀକୃତ୍ଯ ଵିଶ୍ଵାଣ୍ଡଭାଣ୍ଡମ୍ ॥6॥

ତ୍ଵତ୍ପାଦାଗ୍ରଂ ନିଜପଦଗତଂ ପୁଣ୍ଡରୀକୋଦ୍ଭଵୋଽସୌ
କୁଣ୍ଡୀତୋଯୈରସିଚଦପୁନାଦ୍ଯଜ୍ଜଲଂ ଵିଶ୍ଵଲୋକାନ୍ ।
ହର୍ଷୋତ୍କର୍ଷାତ୍ ସୁବହୁ ନନୃତେ ଖେଚରୈରୁତ୍ସଵେଽସ୍ମିନ୍
ଭେରୀଂ ନିଘ୍ନନ୍ ଭୁଵନମଚରଜ୍ଜାମ୍ବଵାନ୍ ଭକ୍ତିଶାଲୀ ॥7॥

ତାଵଦ୍ଦୈତ୍ଯାସ୍ତ୍ଵନୁମତିମୃତେ ଭର୍ତୁରାରବ୍ଧଯୁଦ୍ଧା
ଦେଵୋପେତୈର୍ଭଵଦନୁଚରୈସ୍ସଙ୍ଗତା ଭଙ୍ଗମାପନ୍ ।
କାଲାତ୍ମାଽଯଂ ଵସତି ପୁରତୋ ଯଦ୍ଵଶାତ୍ ପ୍ରାଗ୍ଜିତାଃ ସ୍ମଃ
କିଂ ଵୋ ଯୁଦ୍ଧୈରିତି ବଲିଗିରା ତେଽଥ ପାତାଲମାପୁଃ ॥8॥

ପାଶୈର୍ବଦ୍ଧଂ ପତଗପତିନା ଦୈତ୍ଯମୁଚ୍ଚୈରଵାଦୀ-
ସ୍ତାର୍ତ୍ତୀଯୀକଂ ଦିଶ ମମ ପଦଂ କିଂ ନ ଵିଶ୍ଵେଶ୍ଵରୋଽସି ।
ପାଦଂ ମୂର୍ଧ୍ନି ପ୍ରଣଯ ଭଗଵନ୍ନିତ୍ଯକମ୍ପଂ ଵଦନ୍ତଂ
ପ୍ରହ୍ଲାଦ୍ସ୍ତଂ ସ୍ଵଯମୁପଗତୋ ମାନଯନ୍ନସ୍ତଵୀତ୍ତ୍ଵାମ୍ ॥9॥

ଦର୍ପୋଚ୍ଛିତ୍ତ୍ଯୈ ଵିହିତମଖିଲଂ ଦୈତ୍ଯ ସିଦ୍ଧୋଽସି ପୁଣ୍ଯୈ-
ର୍ଲୋକସ୍ତେଽସ୍ତୁ ତ୍ରିଦିଵଵିଜଯୀ ଵାସଵତ୍ଵଂ ଚ ପଶ୍ଚାତ୍ ।
ମତ୍ସାଯୁଜ୍ଯଂ ଭଜ ଚ ପୁନରିତ୍ଯନ୍ଵଗୃହ୍ଣା ବଲିଂ ତଂ
ଵିପ୍ରୈସ୍ସନ୍ତାନିତମଖଵରଃ ପାହି ଵାତାଲଯେଶ ॥10॥