ନାରାଯଣୀଯଂ ଦଶକ 27 - କ୍ଷୀରାବ୍ଧିମଥନଂ ତଥା କୂର୍ମାଵତାରମ୍

ଦୂର୍ଵାସାସ୍ସୁରଵନିତାପ୍ତଦିଵ୍ଯମାଲ୍ଯଂ
ଶକ୍ରାଯ ସ୍ଵଯମୁପଦାଯ ତତ୍ର ଭୂଯଃ ।
ନାଗେନ୍ଦ୍ରପ୍ରତିମୃଦିତେ ଶଶାପ ଶକ୍ରଂ
କା କ୍ଷାନ୍ତିସ୍ତ୍ଵଦିତରଦେଵତାଂଶଜାନାମ୍ ॥1॥

ଶାପେନ ପ୍ରଥିତଜରେଽଥ ନିର୍ଜରେନ୍ଦ୍ରେ
ଦେଵେଷ୍ଵପ୍ଯସୁରଜିତେଷୁ ନିଷ୍ପ୍ରଭେଷୁ ।
ଶର୍ଵାଦ୍ଯାଃ କମଲଜମେତ୍ଯ ସର୍ଵଦେଵା
ନିର୍ଵାଣପ୍ରଭଵ ସମଂ ଭଵନ୍ତମାପୁଃ ॥2॥

ବ୍ରହ୍ମାଦ୍ଯୈଃ ସ୍ତୁତମହିମା ଚିରଂ ତଦାନୀଂ
ପ୍ରାଦୁଷ୍ଷନ୍ ଵରଦ ପୁରଃ ପରେଣ ଧାମ୍ନା ।
ହେ ଦେଵା ଦିତିଜକୁଲୈର୍ଵିଧାଯ ସନ୍ଧିଂ
ପୀଯୂଷଂ ପରିମଥତେତି ପର୍ଯଶାସ୍ତ୍ଵମ୍ ॥3॥

ସନ୍ଧାନଂ କୃତଵତି ଦାନଵୈଃ ସୁରୌଘେ
ମନ୍ଥାନଂ ନଯତି ମଦେନ ମନ୍ଦରାଦ୍ରିମ୍ ।
ଭ୍ରଷ୍ଟେଽସ୍ମିନ୍ ବଦରମିଵୋଦ୍ଵହନ୍ ଖଗେନ୍ଦ୍ରେ
ସଦ୍ଯସ୍ତ୍ଵଂ ଵିନିହିତଵାନ୍ ପଯଃପଯୋଧୌ ॥4॥

ଆଧାଯ ଦ୍ରୁତମଥ ଵାସୁକିଂ ଵରତ୍ରାଂ
ପାଥୋଧୌ ଵିନିହିତସର୍ଵବୀଜଜାଲେ ।
ପ୍ରାରବ୍ଧେ ମଥନଵିଧୌ ସୁରାସୁରୈସ୍ତୈ-
ର୍ଵ୍ଯାଜାତ୍ତ୍ଵଂ ଭୁଜଗମୁଖେଽକରୋସ୍ସୁରାରୀନ୍ ॥5॥

କ୍ଷୁବ୍ଧାଦ୍ରୌ କ୍ଷୁଭିତଜଲୋଦରେ ତଦାନୀଂ
ଦୁଗ୍ଧାବ୍ଧୌ ଗୁରୁତରଭାରତୋ ନିମଗ୍ନେ ।
ଦେଵେଷୁ ଵ୍ଯଥିତତମେଷୁ ତତ୍ପ୍ରିଯୈଷୀ
ପ୍ରାଣୈଷୀଃ କମଠତନୁଂ କଠୋରପୃଷ୍ଠାମ୍ ॥6॥

ଵଜ୍ରାତିସ୍ଥିରତରକର୍ପରେଣ ଵିଷ୍ଣୋ
ଵିସ୍ତାରାତ୍ପରିଗତଲକ୍ଷଯୋଜନେନ ।
ଅମ୍ଭୋଧେଃ କୁହରଗତେନ ଵର୍ଷ୍ମଣା ତ୍ଵଂ
ନିର୍ମଗ୍ନଂ କ୍ଷିତିଧରନାଥମୁନ୍ନିନେଥ ॥7॥

ଉନ୍ମଗ୍ନେ ଝଟିତି ତଦା ଧରାଧରେନ୍ଦ୍ରେ
ନିର୍ମେଥୁର୍ଦୃଢମିହ ସମ୍ମଦେନ ସର୍ଵେ ।
ଆଵିଶ୍ଯ ଦ୍ଵିତଯଗଣେଽପି ସର୍ପରାଜେ
ଵୈଵଶ୍ଯଂ ପରିଶମଯନ୍ନଵୀଵୃଧସ୍ତାନ୍ ॥8॥

ଉଦ୍ଦାମଭ୍ରମଣଜଵୋନ୍ନମଦ୍ଗିରୀନ୍ଦ୍ର-
ନ୍ଯସ୍ତୈକସ୍ଥିରତରହସ୍ତପଙ୍କଜଂ ତ୍ଵାମ୍ ।
ଅଭ୍ରାନ୍ତେ ଵିଧିଗିରିଶାଦଯଃ ପ୍ରମୋଦା-
ଦୁଦ୍ଭ୍ରାନ୍ତା ନୁନୁଵୁରୁପାତ୍ତପୁଷ୍ପଵର୍ଷାଃ ॥9॥

ଦୈତ୍ଯୌଘେ ଭୁଜଗମୁଖାନିଲେନ ତପ୍ତେ
ତେନୈଵ ତ୍ରିଦଶକୁଲେଽପି କିଞ୍ଚିଦାର୍ତେ ।
କାରୁଣ୍ଯାତ୍ତଵ କିଲ ଦେଵ ଵାରିଵାହାଃ
ପ୍ରାଵର୍ଷନ୍ନମରଗଣାନ୍ନ ଦୈତ୍ଯସଙ୍ଘାନ୍ ॥10॥

ଉଦ୍ଭ୍ରାମ୍ଯଦ୍ବହୁତିମିନକ୍ରଚକ୍ରଵାଲେ
ତତ୍ରାବ୍ଧୌ ଚିରମଥିତେଽପି ନିର୍ଵିକାରେ ।
ଏକସ୍ତ୍ଵଂ କରଯୁଗକୃଷ୍ଟସର୍ପରାଜଃ
ସଂରାଜନ୍ ପଵନପୁରେଶ ପାହି ରୋଗାତ୍ ॥11॥