ନାରାଯଣୀଯଂ ଦଶକ 24 - ପ୍ରହ୍ଲାଦଚରିତମ୍

ହିରଣ୍ଯାକ୍ଷେ ପୋତ୍ରିପ୍ରଵରଵପୁଷା ଦେଵ ଭଵତା
ହତେ ଶୋକକ୍ରୋଧଗ୍ଲପିତଧୃତିରେତସ୍ଯ ସହଜଃ ।
ହିରଣ୍ଯପ୍ରାରମ୍ଭଃ କଶିପୁରମରାରାତିସଦସି
ପ୍ରତିଜ୍ଞମାତେନେ ତଵ କିଲ ଵଧାର୍ଥଂ ମଧୁରିପୋ ॥1॥

ଵିଧାତାରଂ ଘୋରଂ ସ ଖଲୁ ତପସିତ୍ଵା ନଚିରତଃ
ପୁରଃ ସାକ୍ଷାତ୍କୁର୍ଵନ୍ ସୁରନରମୃଗାଦ୍ଯୈରନିଧନମ୍ ।
ଵରଂ ଲବ୍ଧ୍ଵା ଦୃପ୍ତୋ ଜଗଦିହ ଭଵନ୍ନାଯକମିଦଂ
ପରିକ୍ଷୁନ୍ଦନ୍ନିନ୍ଦ୍ରାଦହରତ ଦିଵଂ ତ୍ଵାମଗଣଯନ୍ ॥2॥

ନିହନ୍ତୁଂ ତ୍ଵାଂ ଭୂଯସ୍ତଵ ପଦମଵାପ୍ତସ୍ଯ ଚ ରିପୋ-
ର୍ବହିର୍ଦୃଷ୍ଟେରନ୍ତର୍ଦଧିଥ ହୃଦଯେ ସୂକ୍ଷ୍ମଵପୁଷା ।
ନଦନ୍ନୁଚ୍ଚୈସ୍ତତ୍ରାପ୍ଯଖିଲଭୁଵନାନ୍ତେ ଚ ମୃଗଯନ୍
ଭିଯା ଯାତଂ ମତ୍ଵା ସ ଖଲୁ ଜିତକାଶୀ ନିଵଵୃତେ ॥3॥

ତତୋଽସ୍ଯ ପ୍ରହ୍ଲାଦଃ ସମଜନି ସୁତୋ ଗର୍ଭଵସତୌ
ମୁନେର୍ଵୀଣାପାଣେରଧିଗତଭଵଦ୍ଭକ୍ତିମହିମା ।
ସ ଵୈ ଜାତ୍ଯା ଦୈତ୍ଯଃ ଶିଶୁରପି ସମେତ୍ଯ ତ୍ଵଯି ରତିଂ
ଗତସ୍ତ୍ଵଦ୍ଭକ୍ତାନାଂ ଵରଦ ପରମୋଦାହରଣତାମ୍ ॥4॥

ସୁରାରୀଣାଂ ହାସ୍ଯଂ ତଵ ଚରଣଦାସ୍ଯଂ ନିଜସୁତେ
ସ ଦୃଷ୍ଟ୍ଵା ଦୁଷ୍ଟାତ୍ମା ଗୁରୁଭିରଶିଶିକ୍ଷଚ୍ଚିରମମୁମ୍ ।
ଗୁରୁପ୍ରୋକ୍ତଂ ଚାସାଵିଦମିଦମଭଦ୍ରାଯ ଦୃଢମି-
ତ୍ଯପାକୁର୍ଵନ୍ ସର୍ଵଂ ତଵ ଚରଣଭକ୍ତ୍ଯୈଵ ଵଵୃଧେ ॥ 5 ॥

ଅଧୀତେଷୁ ଶ୍ରେଷ୍ଠଂ କିମିତି ପରିପୃଷ୍ଟେଽଥ ତନଯେ
ଭଵଦ୍ଭକ୍ତିଂ ଵର୍ଯାମଭିଗଦତି ପର୍ଯାକୁଲଧୃତିଃ ।
ଗୁରୁଭ୍ଯୋ ରୋଷିତ୍ଵା ସହଜମତିରସ୍ଯେତ୍ଯଭିଵିଦନ୍
ଵଧୋପାଯାନସ୍ମିନ୍ ଵ୍ଯତନୁତ ଭଵତ୍ପାଦଶରଣେ ॥6॥

ସ ଶୂଲୈରାଵିଦ୍ଧଃ ସୁବହୁ ମଥିତୋ ଦିଗ୍ଗଜଗଣୈ-
ର୍ମହାସର୍ପୈର୍ଦଷ୍ଟୋଽପ୍ଯନଶନଗରାହାରଵିଧୁତଃ ।
ଗିରୀନ୍ଦ୍ରଵକ୍ଷିପ୍ତୋଽପ୍ଯହହ! ପରମାତ୍ମନ୍ନଯି ଵିଭୋ
ତ୍ଵଯି ନ୍ଯସ୍ତାତ୍ମତ୍ଵାତ୍ କିମପି ନ ନିପୀଡାମଭଜତ ॥7॥

ତତଃ ଶଙ୍କାଵିଷ୍ଟଃ ସ ପୁନରତିଦୁଷ୍ଟୋଽସ୍ଯ ଜନକୋ
ଗୁରୂକ୍ତ୍ଯା ତଦ୍ଗେହେ କିଲ ଵରୁଣପାଶୈସ୍ତମରୁଣତ୍ ।
ଗୁରୋଶ୍ଚାସାନ୍ନିଧ୍ଯେ ସ ପୁନରନୁଗାନ୍ ଦୈତ୍ଯତନଯାନ୍
ଭଵଦ୍ଭକ୍ତେସ୍ତତ୍ତ୍ଵଂ ପରମମପି ଵିଜ୍ଞାନମଶିଷତ୍ ॥8॥

ପିତା ଶୃଣ୍ଵନ୍ ବାଲପ୍ରକରମଖିଲଂ ତ୍ଵତ୍ସ୍ତୁତିପରଂ
ରୁଷାନ୍ଧଃ ପ୍ରାହୈନଂ କୁଲହତକ କସ୍ତେ ବଲମିତି ।
ବଲଂ ମେ ଵୈକୁଣ୍ଠସ୍ତଵ ଚ ଜଗତାଂ ଚାପି ସ ବଲଂ
ସ ଏଵ ତ୍ରୈଲୋକ୍ଯଂ ସକଲମିତି ଧୀରୋଽଯମଗଦୀତ୍ ॥9॥

ଅରେ କ୍ଵାସୌ କ୍ଵାସୌ ସକଲଜଗଦାତ୍ମା ହରିରିତି
ପ୍ରଭିନ୍ତେ ସ୍ମ ସ୍ତମ୍ଭଂ ଚଲିତକରଵାଲୋ ଦିତିସୁତଃ ।
ଅତଃ ପଶ୍ଚାଦ୍ଵିଷ୍ଣୋ ନ ହି ଵଦିତୁମୀଶୋଽସ୍ମି ସହସା
କୃପାତ୍ମନ୍ ଵିଶ୍ଵାତ୍ମନ୍ ପଵନପୁରଵାସିନ୍ ମୃଡଯ ମାମ୍ ॥10॥