નારાયણીયં દશક 22 - અજામિલોપાખ્યાનમ્

અજામિલો નામ મહીસુરઃ પુરા
ચરન્ વિભો ધર્મપથાન્ ગૃહાશ્રમી ।
ગુરોર્ગિરા કાનનમેત્ય દૃષ્ટવાન્
સુધૃષ્ટશીલાં કુલટાં મદાકુલામ્ ॥1॥

સ્વતઃ પ્રશાન્તોઽપિ તદાહૃતાશયઃ
સ્વધર્મમુત્સૃજ્ય તયા સમારમન્ ।
અધર્મકારી દશમી ભવન્ પુન-
ર્દધૌ ભવન્નામયુતે સુતે રતિમ્ ॥2॥

સ મૃત્યુકાલે યમરાજકિઙ્કરાન્
ભયઙ્કરાંસ્ત્રીનભિલક્ષયન્ ભિયા ।
પુરા મનાક્ ત્વત્સ્મૃતિવાસનાબલાત્
જુહાવ નારાયણનામકં સુતમ્ ॥3॥

દુરાશયસ્યાપિ તદાત્વનિર્ગત-
ત્વદીયનામાક્ષરમાત્રવૈભવાત્ ।
પુરોઽભિપેતુર્ભવદીયપાર્ષદાઃ
ચતુર્ભુજાઃ પીતપટા મનોરમાઃ ॥4॥

અમું ચ સમ્પાશ્ય વિકર્ષતો ભટાન્
વિમુઞ્ચતેત્યારુરુધુર્બલાદમી ।
નિવારિતાસ્તે ચ ભવજ્જનૈસ્તદા
તદીયપાપં નિખિલં ન્યવેદયન્ ॥5॥

ભવન્તુ પાપાનિ કથં તુ નિષ્કૃતે
કૃતેઽપિ ભો દણ્ડનમસ્તિ પણ્ડિતાઃ ।
ન નિષ્કૃતિઃ કિં વિદિતા ભવાદૃશા-
મિતિ પ્રભો ત્વત્પુરુષા બભાષિરે ॥6॥

શ્રુતિસ્મૃતિભ્યાં વિહિતા વ્રતાદયઃ
પુનન્તિ પાપં ન લુનન્તિ વાસનામ્ ।
અનન્તસેવા તુ નિકૃન્તતિ દ્વયી-
મિતિ પ્રભો ત્વત્પુરુષા બભાષિરે ॥7॥

અનેન ભો જન્મસહસ્રકોટિભિઃ
કૃતેષુ પાપેષ્વપિ નિષ્કૃતિઃ કૃતા ।
યદગ્રહીન્નામ ભયાકુલો હરે-
રિતિ પ્રભો ત્વત્પુરુષા બભાષિરે ॥8॥

નૃણામબુદ્ધ્યાપિ મુકુન્દકીર્તનં
દહત્યઘૌઘાન્ મહિમાસ્ય તાદૃશઃ ।
યથાગ્નિરેધાંસિ યથૌષધં ગદા -
નિતિ પ્રભો ત્વત્પુરુષા બભાષિરે ॥9॥

ઇતીરિતૈર્યામ્યભટૈરપાસૃતે
ભવદ્ભટાનાં ચ ગણે તિરોહિતે ।
ભવત્સ્મૃતિં કઞ્ચન કાલમાચરન્
ભવત્પદં પ્રાપિ ભવદ્ભટૈરસૌ ॥10॥

સ્વકિઙ્કરાવેદનશઙ્કિતો યમ-
સ્ત્વદઙ્ઘ્રિભક્તેષુ ન ગમ્યતામિતિ ।
સ્વકીયભૃત્યાનશિશિક્ષદુચ્ચકૈઃ
સ દેવ વાતાલયનાથ પાહિ મામ્ ॥11॥