নারাযণীযং দশক 10 - সৃষ্টিবৈবিধ্যম্

বৈকুণ্ঠ বর্ধিতবলোঽথ ভবত্প্রসাদা-
দম্ভোজযোনিরসৃজত্ কিল জীবদেহান্ ।
স্থাস্নূনি ভূরুহমযানি তথা তিরশ্চাং
জাতিং মনুষ্যনিবহানপি দেবভেদান্ ॥1॥

মিথ্যাগ্রহাস্মিমতিরাগবিকোপভীতি-
রজ্ঞানবৃত্তিমিতি পঞ্চবিধাং স সৃষ্ট্বা ।
উদ্দামতামসপদার্থবিধানদূন -
স্তেনে ত্বদীযচরণস্মরণং বিশুদ্ধ্যৈ ॥2॥

তাবত্ সসর্জ মনসা সনকং সনন্দং
ভূযঃ সনাতনমুনিং চ সনত্কুমারম্ ।
তে সৃষ্টিকর্মণি তু তেন নিযুজ্যমানা-
স্ত্বত্পাদভক্তিরসিকা জগৃহুর্ন বাণীম্ ॥3॥

তাবত্ প্রকোপমুদিতং প্রতিরুন্ধতোঽস্য
ভ্রূমধ্যতোঽজনি মৃডো ভবদেকদেশঃ ।
নামানি মে কুরু পদানি চ হা বিরিঞ্চে-
ত্যাদৌ রুরোদ কিল তেন স রুদ্রনামা ॥4॥

একাদশাহ্বযতযা চ বিভিন্নরূপং
রুদ্রং বিধায দযিতা বনিতাশ্চ দত্বা ।
তাবন্ত্যদত্ত চ পদানি ভবত্প্রণুন্নঃ
প্রাহ প্রজাবিরচনায চ সাদরং তম্ ॥5॥

রুদ্রাভিসৃষ্টভযদাকৃতিরুদ্রসঙ্ঘ-
সম্পূর্যমাণভুবনত্রযভীতচেতাঃ ।
মা মা প্রজাঃ সৃজ তপশ্চর মঙ্গলাযে-
ত্যাচষ্ট তং কমলভূর্ভবদীরিতাত্মা ॥6॥

তস্যাথ সর্গরসিকস্য মরীচিরত্রি-
স্তত্রাঙিগরাঃ ক্রতুমুনিঃ পুলহঃ পুলস্ত্যঃ ।
অঙ্গাদজাযত ভৃগুশ্চ বসিষ্ঠদক্ষৌ
শ্রীনারদশ্চ ভগবন্ ভবদঙ্ঘ্রিদাসঃ ॥7॥

ধর্মাদিকানভিসৃজন্নথ কর্দমং চ
বাণীং বিধায বিধিরঙ্গজসঙ্কুলোঽভূত্ ।
ত্বদ্বোধিতৈস্সনকদক্ষমুখৈস্তনূজৈ-
রুদ্বোধিতশ্চ বিররাম তমো বিমুঞ্চন্ ॥8॥

বেদান্ পুরাণনিবহানপি সর্ববিদ্যাঃ
কুর্বন্ নিজাননগণাচ্চতুরাননোঽসৌ ।
পুত্রেষু তেষু বিনিধায স সর্গবৃদ্ধি-
মপ্রাপ্নুবংস্তব পদাম্বুজমাশ্রিতোভূত্ ॥9॥

জানন্নুপাযমথ দেহমজো বিভজ্য
স্রীপুংসভাবমভজন্মনুতদ্বধূভ্যাম্ ।
তাভ্যাং চ মানুষকুলানি বিবর্ধযংস্ত্বং
গোবিন্দ মারুতপুরেশ নিরুন্ধি রোগান্ ॥10॥