7.1 - ପ୍ରଜନନଂ ଜ୍ଯୋତିରଗ୍ନିଃ - କୃଷ୍ଣ ଯଜୁର୍ଵେଦ ତୈତ୍ତିରୀଯ ସଂହିତା ପାଠଃ

କୃଷ୍ଣ ଯଜୁର୍ଵେଦୀଯ ତୈତ୍ତିରୀଯ ସଂହିତାଯାଂ ସପ୍ତମକାଣ୍ଡେ ପ୍ରଥମଃ ପ୍ରଶ୍ନଃ- ଅଶ୍ଵମେଧଗତମନ୍ତ୍ରାଣାମଭିଧାନଂ
ଓ-ନ୍ନମଃ ପରମାତ୍ମନେ, ଶ୍ରୀ ମହାଗଣପତଯେ ନମଃ,
ଶ୍ରୀ ଗୁରୁଭ୍ଯୋ ନମଃ । ହ॒ରିଃ॒ ଓମ୍ ॥
ପ୍ର॒ଜନ॑ନ॒-ଞ୍ଜ୍ଯୋତି॑ର॒ଗ୍ନି-ର୍ଦେ॒ଵତା॑ନା॒-ଞ୍ଜ୍ଯୋତି॑ର୍ଵି॒ରାଟ୍ ଛନ୍ଦ॑ସା॒-ଞ୍ଜ୍ଯୋତି॑ର୍ଵି॒ରା-ଡ୍ଵା॒ଚୋ᳚-ଽଗ୍ନୌ ସ-ନ୍ତି॑ଷ୍ଠତେ ଵି॒ରାଜ॑ମ॒ଭି ସମ୍ପ॑ଦ୍ଯତେ॒ ତସ୍ମା॒-ତ୍ତଜ୍ଜ୍ଯୋତି॑ରୁଚ୍ଯତେ॒ ଦ୍ଵୌ ସ୍ତୋମୌ᳚ ପ୍ରାତସ୍ସଵ॒ନଂ-ଵଁ॑ହତୋ॒ ଯଥା᳚ ପ୍ରା॒ଣଶ୍ଚା॑-ଽପା॒ନଶ୍ଚ॒ ଦ୍ଵୌ ମାଦ୍ଧ୍ଯ॑ଦିନ୍ନ॒ଗ୍ଂ॒ ସଵ॑ନଂ॒-ଯଁଥା॒ ଚକ୍ଷୁ॑ଶ୍ଚ॒ ଶ୍ରୋତ୍ର॑-ଞ୍ଚ॒ ଦ୍ଵୌ ତୃ॑ତୀଯସଵ॒ନଂ-ଯଁଥା॒ ଵାକ୍ଚ॑ ପ୍ରତି॒ଷ୍ଠା ଚ॒ ପୁରୁ॑ଷସମ୍ମିତୋ॒ ଵା ଏ॒ଷ ଯ॒ଜ୍ଞୋ-ଽସ୍ଥୂ॑ରି॒- [ଯ॒ଜ୍ଞୋ-ଽସ୍ଥୂ॑ରିଃ, ଯ-ଙ୍କାମ॑-ଙ୍କା॒ମଯ॑ତେ॒] 1
-ର୍ଯ-ଙ୍କାମ॑-ଙ୍କା॒ମଯ॑ତେ॒ ତମେ॒ତେନା॒ଭ୍ଯ॑ଶ୍ଞୁତେ॒ ସର୍ଵ॒ଗ୍ଗ୍॒ ହ୍ଯସ୍ଥୂ॑ରିଣା-ଽଭ୍ଯଶ୍ଞୁ॒ତେ᳚ ଽଗ୍ନିଷ୍ଟୋ॒ମେନ॒ ଵୈ ପ୍ର॒ଜାପ॑ତିଃ ପ୍ର॒ଜା ଅ॑ସୃଜତ॒ ତା ଅ॑ଗ୍ନିଷ୍ଟୋ॒ମେନୈ॒ଵ ପର୍ଯ॑ଗୃହ୍ଣା॒-ତ୍ତାସା॒-ମ୍ପରି॑ଗୃହୀତାନା-ମଶ୍ଵତ॒ରୋ-ଽତ୍ଯ॑ପ୍ରଵତ॒ ତସ୍ଯା॑ନୁ॒ହାଯ॒ରେତ॒ ଆ-ଽଦ॑ତ୍ତ॒ ତ-ଦ୍ଗ॑ର୍ଦ॒ଭେ ନ୍ଯ॑ମା॒ର୍-ଟ୍ତସ୍ମା᳚-ଦ୍ଗର୍ଦ॒ଭୋ ଦ୍ଵି॒ରେତା॒ ଅଥୋ॑ ଆହୁ॒ର୍ଵଡ॑ବାଯା॒-ନ୍ନ୍ଯ॑ମା॒ର୍ଡିତି॒ ତସ୍ମା॒-ଦ୍ଵଡ॑ବା ଦ୍ଵି॒ରେତା॒ ଅଥୋ॑ ଆହୁ॒-ରୋଷ॑ଧୀଷୁ॒- [ଆହୁ॒-ରୋଷ॑ଧୀଷୁ, ନ୍ଯ॑ମା॒ର୍ଡିତି॒] 2
-ନ୍ଯ॑ମା॒ର୍ଡିତି॒ ତସ୍ମା॒ଦୋଷ॑ଧ॒ଯୋ ଽନ॑ଭ୍ଯକ୍ତା ରେଭ॒ନ୍ତ୍ଯଥୋ॑ ଆହୁଃ ପ୍ର॒ଜାସୁ॒ ନ୍ଯ॑ମା॒ର୍ଡିତି॒ ତସ୍ମା᳚-ଦ୍ଯ॒ମୌ ଜା॑ଯେତେ॒ ତସ୍ମା॑ଦଶ୍ଵତ॒ରୋ ନ ପ୍ର ଜା॑ଯତ॒ ଆତ୍ତ॑ରେତା॒ ହି ତସ୍ମା᳚-ଦ୍ବ॒ର୍॒ହିଷ୍ଯନ॑ଵକୢପ୍ତ-ସ୍ସର୍ଵଵେଦ॒ସେ ଵା॑ ସ॒ହସ୍ରେ॒ ଵା-ଽଵ॑ କୢ॒ପ୍ତୋ-ଽତି॒ ହ୍ଯପ୍ର॑ଵତ॒ ଯ ଏ॒ଵଂ-ଵିଁ॒ଦ୍ଵାନ॑ଗ୍ନିଷ୍ଟୋ॒ମେନ॒ ଯଜ॑ତେ॒ ପ୍ରାଜା॑ତାଃ ପ୍ର॒ଜା ଜ॒ନଯ॑ତି॒ ପରି॒ ପ୍ରଜା॑ତା ଗୃହ୍ଣାତି॒ ତସ୍ମା॑ଦାହୁର୍ଜ୍ଯେଷ୍ଠଯ॒ଜ୍ଞ ଇତି॑ [ ] 3
ପ୍ର॒ଜାପ॑ତି॒ର୍ଵାଵ ଜ୍ଯେଷ୍ଠ॒-ସ୍ସ ହ୍ଯେ॑ତେନାଗ୍ରେ-ଽଯ॑ଜତ ପ୍ର॒ଜାପ॑ତିରକାମଯତ॒ ପ୍ର ଜା॑ଯେ॒ଯେତି॒ ସ ମୁ॑ଖ॒ତସ୍ତ୍ରି॒ଵୃତ॒-ନ୍ନିର॑ମିମୀତ॒ ତମ॒ଗ୍ନିର୍ଦେ॒ଵତା ଽନ୍ଵ॑ସୃଜ୍ଯତ ଗାଯ॒ତ୍ରୀ ଛନ୍ଦୋ॑ ରଥନ୍ତ॒ରଗ୍ଂ ସାମ॑ ବ୍ରାହ୍ମ॒ଣୋ ମ॑ନୁ॒ଷ୍ଯା॑ଣାମ॒ଜଃ ପ॑ଶୂ॒ନା-ନ୍ତସ୍ମା॒-ତ୍ତେ ମୁଖ୍ଯା॑ ମୁଖ॒ତୋ ହ୍ଯସୃ॑ଜ୍ଯ॒ନ୍ତୋର॑ସୋ ବା॒ହୁଭ୍ଯା᳚-ମ୍ପଞ୍ଚଦ॒ଶ-ନ୍ନିର॑ମିମୀତ॒ ତମିନ୍ଦ୍ରୋ॑ ଦେ॒ଵତା ଽନ୍ଵ॑ସୃଜ୍ଯତ ତ୍ରି॒ଷ୍ଟୁ-ପ୍ଛନ୍ଦୋ॑ ବୃ॒ହ- [ବୃ॒ହତ୍, ସାମ॑ ରାଜ॒ନ୍ଯୋ॑] 4
-ଥ୍ସାମ॑ ରାଜ॒ନ୍ଯୋ॑ ମନୁ॒ଷ୍ଯା॑ଣା॒ମଵିଃ॑ ପଶୂ॒ନା-ନ୍ତସ୍ମା॒-ତ୍ତେ ଵୀ॒ର୍ଯା॑ଵନ୍ତୋ ଵୀ॒ର୍ଯା᳚ଦ୍ଧ୍ଯସୃ॑ଜ୍ଯନ୍ତ ମଦ୍ଧ୍ଯ॒ତ-ସ୍ସ॑ପ୍ତଦ॒ଶ-ନ୍ନିର॑ମିମୀତ॒ ତଂ-ଵିଁଶ୍ଵେ॑ ଦେ॒ଵା ଦେ॒ଵତା॒ ଅନ୍ଵ॑ସୃଜ୍ଯନ୍ତ॒ ଜଗ॑ତୀ॒ ଛନ୍ଦୋ॑ ଵୈ ରୂ॒ପଗ୍ଂ ସାମ॒ ଵୈଶ୍ଯୋ॑ ମନୁ॒ଷ୍ଯା॑ଣା॒-ଙ୍ଗାଵଃ॑ ପଶୂ॒ନା-ନ୍ତସ୍ମା॒-ତ୍ତ ଆ॒ଦ୍ଯା॑ ଅନ୍ନ॒ଧାନା॒ଦ୍ଧ୍ଯ ସୃ॑ଜ୍ଯନ୍ତ॒ ତସ୍ମା॒-ଦ୍ଭୂଯାଗ୍ଂ॑ସୋ॒ ଽନ୍ଯେଭ୍ଯୋ॒ ଭୂଯି॑ଷ୍ଠା॒ ହି ଦେ॒ଵତା॒ ଅନ୍ଵସୃ॑ଜ୍ଯନ୍ତ ପ॒ତ୍ତ ଏ॑କଵି॒ଗ୍ଂ॒ ଶ-ନ୍ନିର॑ମିମୀତ॒ ତମ॑ନୁ॒ଷ୍ଟୁ-ପ୍ଛନ୍ଦୋ- [ତମ॑ନୁ॒ଷ୍ଟୁ-ପ୍ଛନ୍ଦଃ॑, ଅନ୍ଵ॑ସୃଜ୍ଯତ] 5
-ଽନ୍ଵ॑ସୃଜ୍ଯତ ଵୈରା॒ଜଗ୍ଂ ସାମ॑ ଶୂ॒ଦ୍ରୋ ମ॑ନୁ॒ଷ୍ଯା॑ଣା॒-ମଶ୍ଵଃ॑ ପଶୂ॒ନା-ନ୍ତସ୍ମା॒-ତ୍ତୌ ଭୂ॑ତସ-ଙ୍କ୍ରା॒ମିଣା॒ଵଶ୍ଵ॑ଶ୍ଚ ଶୂ॒ଦ୍ରଶ୍ଚ॒ ତସ୍ମା᳚ଚ୍ଛୂ॒ଦ୍ରୋ ଯ॒ଜ୍ଞେ-ଽନ॑ଵକୢପ୍ତୋ॒ ନ ହି ଦେ॒ଵତା॒ ଅନ୍ଵସୃ॑ଜ୍ଯତ॒ ତସ୍ମା॒-ତ୍ପାଦା॒ଵୁପ॑ ଜୀଵତଃ ପ॒ତ୍ତୋ ହ୍ଯସୃ॑ଜ୍ଯେତା-ମ୍ପ୍ରା॒ଣା ଵୈ ତ୍ରି॒ଵୃଦ॑ର୍ଧମା॒ସାଃ ପ॑ଞ୍ଚଦ॒ଶଃ ପ୍ର॒ଜାପ॑ତି-ସ୍ସପ୍ତଦ॒ଶସ୍ତ୍ରଯ॑ ଇ॒ମେ ଲୋ॒କା ଅ॒ସାଵା॑ଦି॒ତ୍ଯ ଏ॑କଵି॒ଗ୍ଂ॒ଶ ଏ॒ତସ୍ମି॒ନ୍ ଵା ଏ॒ତେ ଶ୍ରି॒ତା ଏ॒ତସ୍ମି॒-ନ୍ପ୍ରତି॑ଷ୍ଠିତା॒ ଯ ଏ॒ଵଂ-ଵେଁଦୈ॒ତସ୍ମି॑ନ୍ନେ॒ଵ ଶ୍ର॑ଯତ ଏ॒ତସ୍ମି॒-ନ୍ପ୍ରତି॑ ତିଷ୍ଠତି ॥ 6 ॥

(ଅସ୍ଥୂ॑ରି॒ - ରୋଷ॑ଧୀଷୁ - ଜ୍ଯେଷ୍ଠଯ॒ଜ୍ଞ ଇତି॑ - ବୃ॒ହ - ଦ॑ନୁ॒ଷ୍ଟୁ-ପ୍ଛନ୍ଦଃ॒ - ପ୍ରତି॑ଷ୍ଠିତା॒ - ନଵ॑ ଚ) (ଅ. 1)
ପ୍ରା॒ତ॒ସ୍ସ॒ଵ॒ନେ ଵୈ ଗା॑ଯ॒ତ୍ରେଣ॒ ଛନ୍ଦ॑ସା ତ୍ରି॒ଵୃତେ॒ ସ୍ତୋମା॑ଯ॒ ଜ୍ଯୋତି॒ର୍ଦଧ॑ଦେତି ତ୍ରି॒ଵୃତା᳚ ବ୍ରହ୍ମଵର୍ଚ॒ସେନ॑ ପଞ୍ଚଦ॒ଶାଯ॒ ଜ୍ଯୋତି॒ର୍ଦଧ॑ଦେତି ପଞ୍ଚଦ॒ଶେନୌଜ॑ସା ଵୀ॒ର୍ଯେ॑ଣ ସପ୍ତଦ॒ଶାଯ॒ ଜ୍ଯୋତି॒ର୍ଦଧ॑ଦେତି ସପ୍ତଦ॒ଶେନ॑ ପ୍ରାଜାପ॒ତ୍ଯେନ॑ ପ୍ର॒ଜନ॑ନେନୈକଵି॒ଗ୍ଂ॒ଶାଯ॒ ଜ୍ଯୋତି॒ର୍ଦଧ॑ଦେତି॒ ସ୍ତୋମ॑ ଏ॒ଵ ତ-ଥ୍ସ୍ତୋମା॑ଯ॒ ଜ୍ଯୋତି॒ର୍ଦଧ॑ଦେ॒ତ୍ଯଥୋ॒ ସ୍ତୋମ॑ ଏ॒ଵ ସ୍ତୋମ॑ମ॒ଭି ପ୍ର ଣ॑ଯତି॒ ଯାଵ॑ନ୍ତୋ॒ ଵୈ ସ୍ତୋମା॒ସ୍ତାଵ॑ନ୍ତଃ॒ କାମା॒ସ୍ତାଵ॑ନ୍ତୋ ଲୋ॒କା -ସ୍ତାଵ॑ନ୍ତି॒ ଜ୍ଯୋତୀଗ୍॑ଷ୍ଯେ॒ତାଵ॑ତ ଏ॒ଵ ସ୍ତୋମା॑ନେ॒ତାଵ॑ତଃ॒ କାମା॑ନେ॒ତାଵ॑ତୋ ଲୋ॒କାନେ॒ତାଵ॑ନ୍ତି॒ ଜ୍ଯୋତୀ॒ଗ୍॒ଷ୍ଯଵ॑ ରୁନ୍ଧେ ॥ 7 ॥

(ତାଵ॑ନ୍ତୋ ଲୋ॒କା - ସ୍ତ୍ରଯୋ॑ଦଶ ଚ) (ଅ. 2)
ବ୍ର॒ହ୍ମ॒ଵା॒ଦିନୋ॑ ଵଦନ୍ତି॒ ସ ତ୍ଵୈ ଯ॑ଜେତ॒ ଯୋ᳚-ଽଗ୍ନିଷ୍ଟୋ॒ମେନ॒ ଯଜ॑ମା॒ନୋ-ଽଥ॒ ସର୍ଵ॑ସ୍ତୋମେନ॒ ଯଜେ॒ତେତି॒ ଯସ୍ଯ॑ ତ୍ରି॒ଵୃତ॑ମନ୍ତ॒ର୍ଯନ୍ତି॑ ପ୍ରା॒ଣାଗ୍​-ସ୍ତସ୍ଯା॒ନ୍ତର୍ଯ॑ନ୍ତି ପ୍ରା॒ଣେଷୁ॒ ମେ-ଽପ୍ଯ॑ସ॒ଦିତି॒ ଖଲୁ॒ ଵୈ ଯ॒ଜ୍ଞେନ॒ ଯଜ॑ମାନୋ ଯଜତେ॒ ଯସ୍ଯ॑ ପଞ୍ଚଦ॒ଶମ॑ନ୍ତ॒ର୍ଯନ୍ତି॑ ଵୀ॒ର୍ଯ॑-ନ୍ତସ୍ଯା॒ନ୍ତର୍ଯ॑ନ୍ତି ଵୀ॒ର୍ଯେ॑ ମେ-ଽପ୍ଯ॑ସ॒ଦିତି॒ ଖଲୁ॒ ଵୈ ଯ॒ଜ୍ଞେନ॒ ଯଜ॑ମାନୋ ଯଜତେ॒ ଯସ୍ଯ॑ ସପ୍ତଦ॒ଶ-ମ॑ନ୍ତ॒ର୍ଯନ୍ତି॑ [ ] 8
ପ୍ର॒ଜା-ନ୍ତସ୍ଯା॒ନ୍ତର୍ଯ॑ନ୍ତି ପ୍ର॒ଜାଯା॒-ମ୍ମେ-ଽପ୍ଯ॑ସ॒ଦିତି॒ ଖଲୁ॒ ଵୈ ଯ॒ଜ୍ଞେନ॒ ଯଜ॑ମାନୋ ଯଜତେ॒ ଯସ୍ଯୈ॑କଵି॒ଗ୍ଂ॒ଶମ॑ନ୍ତ॒ର୍ଯନ୍ତି॑ ପ୍ରତି॒ଷ୍ଠା-ନ୍ତସ୍ଯା॒ନ୍ତର୍ଯ॑ନ୍ତି ପ୍ରତି॒ଷ୍ଠାଯା॒-ମ୍ମେ-ଽପ୍ଯ॑ସ॒ଦିତି॒ ଖଲୁ॒ ଵୈ ଯ॒ଜ୍ଞେନ॒ ଯଜ॑ମାନୋ ଯଜତେ॒ ଯସ୍ଯ॑ ତ୍ରିଣ॒ଵମ॑ନ୍ତ॒ର୍ଯନ୍ତ୍ଯୃ॒ତୂଗ୍​ଶ୍ଚ॒ ତସ୍ଯ॑ ନକ୍ଷ॒ତ୍ରିଯା᳚-ଞ୍ଚ ଵି॒ରାଜ॑ମ॒ନ୍ତର୍ଯ॑ନ୍ତ୍ଯୃ॒ତୁଷୁ॒ ମେ-ଽପ୍ଯ॑ସନ୍ନକ୍ଷ॒ତ୍ରିଯା॑ଯା-ଞ୍ଚ ଵି॒ରାଜୀତି॒ [ଵି॒ରାଜୀତି॑, ଖଲୁ॒ ଵୈ] 9
ଖଲୁ॒ ଵୈ ଯ॒ଜ୍ଞେନ॒ ଯଜ॑ମାନୋ ଯଜତେ॒ ଯସ୍ଯ॑ ତ୍ରଯସ୍ତ୍ରି॒ଗ୍ଂ॒ଶମ॑ନ୍ତ॒ର୍ଯନ୍ତି॑ ଦେ॒ଵତା॒ସ୍ତସ୍ଯା॒ନ୍ତର୍ଯ॑ନ୍ତି ଦେ॒ଵତା॑ସୁ॒ ମେ-ଽପ୍ଯ॑ସ॒ଦିତି॒ ଖଲୁ॒ ଵୈ ଯ॒ଜ୍ଞେନ॒ ଯଜ॑ମାନୋ ଯଜତେ॒ ଯୋ ଵୈ ସ୍ତୋମା॑ନାମଵ॒ମ-ମ୍ପ॑ର॒ମତା॒-ଙ୍ଗଚ୍ଛ॑ନ୍ତଂ॒-ଵେଁଦ॑ ପର॒ମତା॑ମେ॒ଵ ଗ॑ଚ୍ଛତି ତ୍ରି॒ଵୃଦ୍ଵୈ ସ୍ତୋମା॑ନାମଵ॒ମସ୍ତ୍ରି॒ଵୃ-ତ୍ପ॑ର॒ମୋ ଯ ଏ॒ଵଂ-ଵେଁଦ॑ ପର॒ମତା॑ମେ॒ଵ ଗ॑ଚ୍ଛତି ॥ 10 ॥

(ସ॒ପ୍ତ॒ଦ॒ଶମ॑ନ୍ତ॒ର୍ଯନ୍ତି॑ - ଵି॒ରାଜୀତି॒ - ଚତୁ॑ଶ୍ଚତ୍ଵାରିଗ୍ଂଶଚ୍ଚ) (ଅ. 3)
ଅଙ୍ଗି॑ରସୋ॒ ଵୈ ସ॒ତ୍ରମା॑ସତ॒ ତେ ସୁ॑ଵ॒ର୍ଗଂ-ଲୋଁ॒କମା॑ଯ॒-ନ୍ତେଷାଗ୍ଂ॑ ହ॒ଵିଷ୍ମାଗ୍॑ଶ୍ଚ ହଵି॒ଷ୍କୃଚ୍ଚା॑-ଽହୀଯେତା॒-ନ୍ତାଵ॑କାମଯେତାଗ୍ଂ ସୁଵ॒ର୍ଗଂ-ଲୋଁ॒କମି॑ଯା॒ଵେତି॒ ତାଵେ॒ତ-ନ୍ଦ୍ଵି॑ରା॒ତ୍ରମ॑ପଶ୍ଯତା॒-ନ୍ତମା-ଽହ॑ରତା॒-ନ୍ତେନା॑ଯଜେତା॒-ନ୍ତତୋ॒ ଵୈ ତୌ ସୁ॑ଵ॒ର୍ଗଂ-ଲୋଁ॒କମୈ॑ତାଂ॒-ଯଁ ଏ॒ଵଂ-ଵିଁ॒ଦ୍ଵା-ନ୍ଦ୍ଵି॑ରା॒ତ୍ରେଣ॒ ଯଜ॑ତେ ସୁଵ॒ର୍ଗମେ॒ଵ ଲୋ॒କମେ॑ତି॒ ତାଵୈତା॒-ମ୍ପୂର୍ଵେ॒ଣାହ୍ନା ଽଗ॑ଚ୍ଛତା॒-ମୁତ୍ତ॑ରେଣା- [-ମୁତ୍ତ॑ରେଣ, ଅ॒ଭି॒ପ୍ଲ॒ଵଃ ପୂର୍ଵ॒] 11
-ଭିପ୍ଲ॒ଵଃ ପୂର୍ଵ॒-ମହ॑ର୍ଭଵତି॒ ଗତି॒ରୁତ୍ତ॑ର॒-ଞ୍ଜ୍ଯୋତି॑ଷ୍ଟୋମୋ-ଽଗ୍ନିଷ୍ଟୋ॒ମଃ ପୂର୍ଵ॒ମହ॑ର୍ଭଵତି॒ ତେଜ॒ସ୍ତେନାଵ॑ ରୁନ୍ଧେ॒ ସର୍ଵ॑ସ୍ତୋମୋ-ଽତିରା॒ତ୍ର ଉତ୍ତ॑ର॒ଗ୍ଂ॒ ସର୍ଵ॒ସ୍ଯା-ଽଽପ୍ତ୍ଯୈ॒ ସର୍ଵ॒ସ୍ଯା-ଽଵ॑ରୁଦ୍ଧ୍ଯୈ ଗାଯ॒ତ୍ର-ମ୍ପୂର୍ଵେ-ଽହ॒ନ୍​ଥ୍ସାମ॑ ଭଵତି॒ ତେଜୋ॒ ଵୈ ଗା॑ଯ॒ତ୍ରୀ ଗା॑ଯ॒ତ୍ରୀ ବ୍ର॑ହ୍ମଵର୍ଚ॒ସ-ନ୍ତେଜ॑ ଏ॒ଵ ବ୍ର॑ହ୍ମଵର୍ଚ॒ସମା॒ତ୍ମ-ନ୍ଧ॑ତ୍ତେ॒ ତ୍ରୈଷ୍ଟୁ॑ଭ॒ମୁତ୍ତ॑ର॒ ଓଜୋ॒ ଵୈ ଵୀ॒ର୍ଯ॑-ନ୍ତ୍ରି॒ଷ୍ଟୁଗୋଜ॑ ଏ॒ଵ ଵୀ॒ର୍ଯ॑ମା॒ତ୍ମ-ନ୍ଧ॑ତ୍ତେ ରଥନ୍ତ॒ର-ମ୍ପୂର୍ଵେ॑- [ରଥନ୍ତ॒ର-ମ୍ପୂର୍ଵେ᳚, ଅହ॒ନ୍-ଥ୍ସାମ॑] 12
-ଽହ॒ନ୍-ଥ୍ସାମ॑ ଭଵତୀ॒ଯଂ-ଵୈଁ ର॑ଥନ୍ତ॒ରମ॒ସ୍ଯାମେ॒ଵ ପ୍ରତି॑ ତିଷ୍ଠତି ବୃ॒ହଦୁତ୍ତ॑ରେ॒-ଽସୌ ଵୈ ବୃ॒ହଦ॒ମୁଷ୍ଯା॑ମେ॒ଵ ପ୍ରତି॑ ତିଷ୍ଠତି॒ ତଦା॑ହୁଃ॒ କ୍ଵ॑ ଜଗ॑ତୀ ଚା-ଽନୁ॒ଷ୍ଟୁ-ପ୍ଚେତି॑ ଵୈଖାନ॒ସ-ମ୍ପୂର୍ଵେ-ଽହ॒ନ୍-ଥ୍ସାମ॑ ଭଵତି॒ ତେନ॒ ଜଗ॑ତ୍ଯୈ॒ ନୈତି॑ ଷୋଡ॒ଶ୍ଯୁତ୍ତ॑ରେ॒ ତେନା॑ନୁ॒ଷ୍ଟୁଭୋ-ଽଥା॑ ଽଽହୁ॒ର୍ଯ-ଥ୍ସ॑ମା॒ନେ᳚-ଽର୍ଧମା॒ସେ ସ୍ଯାତା॑-ମନ୍ଯତ॒ରସ୍ଯାହ୍ନୋ॑ ଵୀ॒ର୍ଯ॑ମନୁ॑ ପଦ୍ଯେ॒ତେତ୍ଯ॑-ମାଵା॒ସ୍ଯା॑ଯା॒-ମ୍ପୂର୍ଵ॒ମହ॑-ର୍ଭଵ॒ତ୍ଯୁତ୍ତ॑ରସ୍ମି॒-ନ୍ନୁତ୍ତ॑ର॒-ନ୍ନାନୈ॒ଵା ଽର୍ଧ॑ମା॒ସଯୋ᳚ର୍ଭଵତୋ॒ ନାନା॑ଵୀର୍ଯେ ଭଵତୋ ହ॒ଵିଷ୍ମ॑ନ୍ନିଧନ॒-ମ୍ପୂର୍ଵ॒ମହ॑ର୍ଭଵତି ହଵି॒ଷ୍କୃନ୍ନି॑ଧନ॒-ମୁତ୍ତ॑ର॒-ମ୍ପ୍ରତି॑ଷ୍ଠିତ୍ଯୈ ॥ 13 ॥
(ଉତ୍ତ॑ରେଣ - ରଥନ୍ତ॒ର-ମ୍ପୂର୍ଵେ - ଽନ୍ଵେ - କ॑ଵିଗ୍ଂଶତିଶ୍ଚ) (ଅ. 4)
ଆପୋ॒ ଵା ଇ॒ଦମଗ୍ରେ॑ ସଲି॒ଲମା॑ସୀ॒-ତ୍ତସ୍ମି॑-ନ୍ପ୍ର॒ଜାପ॑ତି-ର୍ଵା॒ଯୁର୍ଭୂ॒ତ୍ଵା ଽଚ॑ର॒-ଥ୍ସ ଇ॒ମାମ॑ପଶ୍ଯ॒-ତ୍ତାଂ-ଵଁ॑ରା॒ହୋ ଭୂ॒ତ୍ଵା-ଽହ॑ର॒-ତ୍ତାଂ-ଵିଁ॒ଶ୍ଵକ॑ର୍ମା ଭୂ॒ତ୍ଵା ଵ୍ଯ॑ମା॒ଟ୍ର୍-ଥ୍ସା-ଽପ୍ର॑ଥତ॒ ସା ପୃ॑ଥି॒ଵ୍ଯ॑ଭଵ॒-ତ୍ତ-ତ୍ପୃ॑ଥି॒ଵ୍ଯୈ ପୃ॑ଥିଵି॒ତ୍ଵ-ନ୍ତସ୍ଯା॑ମଶ୍ରାମ୍ଯ-ତ୍ପ୍ର॒ଜାପ॑ତି॒-ସ୍ସ ଦେ॒ଵାନ॑ସୃଜତ॒ ଵସୂ᳚-ନ୍ରୁ॒ଦ୍ରାନା॑ଦି॒ତ୍ଯା-ନ୍ତେ ଦେ॒ଵାଃ ପ୍ର॒ଜାପ॑ତିମବ୍ରୁଵ॒-ନ୍ପ୍ରଜା॑ଯାମହା॒ ଇତି॒ ସୋ᳚-ଽବ୍ରଵୀ॒- [ସୋ᳚-ଽବ୍ରଵୀତ୍, ଯଥା॒-ଽହଂ-] 14
-ଦ୍ଯଥା॒-ଽହଂ-ଯୁଁ॒ଷ୍ମାଗ୍​ସ୍ତପ॒ସା ଽସୃ॑କ୍ଷ୍ଯେ॒ଵ-ନ୍ତପ॑ସି ପ୍ର॒ଜନ॑ନ-ମିଚ୍ଛଦ୍ଧ୍ଵ॒ମିତି॒ ତେଭ୍ଯୋ॒-ଽଗ୍ନିମା॒ଯତ॑ନ॒-ମ୍ପ୍ରା-ଽଯ॑ଚ୍ଛଦେ॒ତେନା॒-ଽଽଯତ॑ନେନ ଶ୍ରାମ୍ଯ॒ତେତି॒ ତେ᳚-ଽଗ୍ନିନା॒-ଽଽଯତ॑ନେନା-ଽ-ଶ୍ରାମ୍ଯ॒-ନ୍ତେ ସଂ॑​ଵଁଥ୍ସ॒ର ଏକା॒-ଙ୍ଗାମ॑ସୃଜନ୍ତ॒ ତାଂ-ଵଁସୁ॑ଭ୍ଯୋ ରୁ॒ଦ୍ରେଭ୍ଯ॑ ଆଦି॒ତ୍ଯେଭ୍ଯଃ॒ ପ୍ରା-ଽଯ॑ଚ୍ଛନ୍ନେ॒ତାଗ୍ଂ ର॑କ୍ଷଦ୍ଧ୍ଵ॒ମିତି॒ ତାଂ-ଵଁସ॑ଵୋ ରୁ॒ଦ୍ରା ଆ॑ଦି॒ତ୍ଯା ଅ॑ରକ୍ଷନ୍ତ॒ ସା ଵସୁ॑ଭ୍ଯୋ ରୁ॒ଦ୍ରେଭ୍ଯ॑ ଆଦି॒ତ୍ଯେଭ୍ଯଃ॒ ପ୍ରାଜା॑ଯତ॒ତ୍ରୀଣି॑ ଚ [ ] 15
ଶ॒ତାନି॒ ତ୍ରଯ॑ସ୍ତ୍ରିଗ୍ଂଶତ॒-ଞ୍ଚାଥ॒ ସୈଵ ସ॑ହସ୍ରତ॒ମ୍ଯ॑ଭଵ॒-ତ୍ତେ ଦେ॒ଵାଃ ପ୍ର॒ଜାପ॑ତିମବ୍ରୁଵନ୍-ଥ୍ସ॒ହସ୍ରେ॑ଣ ନୋ ଯାଜ॒ଯେତି॒ ସୋ᳚-ଽଗ୍ନିଷ୍ଟୋ॒ମେନ॒ ଵସୂ॑ନଯାଜଯ॒-ତ୍ତ ଇ॒ମଂ-ଲୋଁ॒କମ॑ଜଯ॒-ନ୍ତଚ୍ଚା॑ଦଦୁ॒-ସ୍ସ ଉ॒କ୍ଥ୍ଯେ॑ନ ରୁ॒ଦ୍ରାନ॑ଯାଜଯ॒-ତ୍ତେ᳚-ଽନ୍ତରି॑କ୍ଷମଜଯ॒-ନ୍ତଚ୍ଚା॑ଦଦୁ॒-ସ୍ସୋ॑-ଽତିରା॒ତ୍ରେଣା॑-ଽଽଦି॒ତ୍ଯାନ॑ଯାଜଯ॒-ତ୍ତେ॑-ଽମୁଂ-ଲୋଁ॒କମ॑ଜଯ॒-ନ୍ତଚ୍ଚା॑-ଽଦଦୁ॒-ସ୍ତଦ॒ନ୍ତରି॑କ୍ଷଂ॒- [-ସ୍ତଦ॒ନ୍ତରି॑କ୍ଷମ୍, ଵ୍ଯଵୈ᳚ର୍ଯତ॒] 16
-ଁଵ୍ଯଵୈ᳚ର୍ଯତ॒ ତସ୍ମା᳚-ଦ୍ରୁ॒ଦ୍ରା ଘାତୁ॑କା ଅନାଯତ॒ନା ହି ତସ୍ମା॑ଦାହୁ-ଶ୍ଶିଥି॒ଲଂ-ଵୈଁ ମ॑ଦ୍ଧ୍ଯ॒ମ-ମହ॑ସ୍ତ୍ରିରା॒ତ୍ରସ୍ଯ॒ ଵି ହି ତଦ॒ଵୈର୍ଯ॒ତେତି॒ ତ୍ରୈଷ୍ଟୁ॑ଭ-ମ୍ମଦ୍ଧ୍ଯ॒ମସ୍ଯାହ୍ନ॒ ଆଜ୍ଯ॑-ମ୍ଭଵତି ସଂ॒​ଯାଁନା॑ନି ସୂ॒କ୍ତାନି॑ ଶଗ୍ଂସତି ଷୋଡ॒ଶିନଗ୍ଂ॑ ଶଗ୍ଂସ॒ତ୍ଯହ୍ନୋ॒ ଧୃତ୍ଯା॒ ଅଶି॑ଥିଲମ୍ଭାଵାଯ॒ ତସ୍ମା᳚-ତ୍ତ୍ରିରା॒ତ୍ରସ୍ଯା᳚ଗ୍ନିଷ୍ଟୋ॒ମ ଏ॒ଵ ପ୍ର॑ଥ॒ମମହଃ॑ ସ୍ଯା॒ଦଥୋ॒କ୍ଥ୍ଯୋ ଽଥା॑-ଽତିରା॒ତ୍ର ଏ॒ଷାଂ-ଲୋଁ॒କାନାଂ॒-ଵିଁଧୃ॑ତ୍ଯୈ॒ ତ୍ରୀଣି॑ତ୍ରୀଣି ଶ॒ତା-ନ୍ଯ॑ନୂଚୀନା॒ହ-ମଵ୍ଯ॑ଵଚ୍ଛିନ୍ନାନି ଦଦା- [ଦଦାତି, ଏ॒ଷାଂ-ଲୋଁ॒କାନା॒-] 17
-ତ୍ଯେ॒ଷାଂ-ଲୋଁ॒କାନା॒-ମନୁ॒ ସନ୍ତ॑ତ୍ଯୈ ଦ॒ଶତ॒-ନ୍ନ ଵିଚ୍ଛି॑ନ୍ଦ୍ଯା-ଦ୍ଵି॒ରାଜ॒-ନ୍ନେଦ୍ଵି॑ଚ୍ଛି॒ନଦା॒ନୀତ୍ଯଥ॒ ଯା ସ॑ହସ୍ରତ॒ମ୍ଯାସୀ॒-ତ୍ତସ୍ଯା॒ମିନ୍ଦ୍ର॑ଶ୍ଚ॒ ଵିଷ୍ଣୁ॑ଶ୍ଚ॒ ଵ୍ଯାଯ॑ଚ୍ଛେତା॒ଗ୍ଂ॒ ସ ଇନ୍ଦ୍ରୋ॑-ଽମନ୍ଯତା॒ନଯା॒ ଵା ଇ॒ଦଂ-ଵିଁଷ୍ଣୁଃ॑ ସ॒ହସ୍ରଂ॑-ଵଁର୍କ୍ଷ୍ଯତ॒ ଇତି॒ ତସ୍ଯା॑ମକଲ୍ପେତା॒-ନ୍ଦ୍ଵିଭା॑ଗ॒ ଇନ୍ଦ୍ର॒ସ୍ତୃତୀ॑ଯେ॒ ଵିଷ୍ଣୁ॒ସ୍ତଦ୍ଵା ଏ॒ଷା-ଽଭ୍ଯନୂ᳚ଚ୍ଯତ ଉ॒ଭା ଜି॑ଗ୍ଯଥୁ॒ରିତି॒ ତାଂ-ଵାଁ ଏ॒ତାମ॑ଚ୍ଛାଵା॒କ [ଏ॒ତାମ॑ଚ୍ଛାଵା॒କଃ, ଏ॒ଵ] 18
ଏ॒ଵ ଶଗ୍ଂ॑ସ॒ତ୍ଯଥ॒ ଯା ସ॑ହସ୍ରତ॒ମୀ ସା ହୋତ୍ରେ॒ ଦେଯେତି॒ ହୋତା॑ରଂ॒-ଵାଁ ଅ॒ଭ୍ଯତି॑ରିଚ୍ଯତେ॒ ଯଦ॑ତି॒ରିଚ୍ଯ॑ତେ॒ ହୋତା ଽନା᳚ପ୍ତସ୍ଯା-ଽଽପଯି॒ତା ଽଥା॑-ଽହୁରୁନ୍ନେ॒ତ୍ରେ ଦେଯେତ୍ଯତି॑ରିକ୍ତା॒ ଵା ଏ॒ଷା ସ॒ହସ୍ର॒ସ୍ଯାତି॑ରିକ୍ତ ଉନ୍ନେ॒ତର୍ତ୍ଵିଜା॒ମଥା॑-ଽଽହୁ॒-ସ୍ସର୍ଵେ᳚ଭ୍ଯ-ସ୍ସଦ॒ସ୍ଯେ᳚ଭ୍ଯୋ॒ ଦେଯେତ୍ଯଥା॑-ଽଽହୁରୁଦା॒ କୃତ୍ଯା॒ ସା ଵଶ॑-ଞ୍ଚରେ॒ଦିତ୍ଯଥା॑-ଽଽହୁର୍ବ୍ର॒ହ୍ମଣେ॑ ଚା॒ଗ୍ନୀଧେ॑ ଚ॒ ଦେଯେତି॒ [ଦେଯେତି, ଦ୍ଵିଭା॑ଗ-] 19
ଦ୍ଵିଭା॑ଗ-ମ୍ବ୍ର॒ହ୍ମଣେ॒ ତୃତୀ॑ଯମ॒ଗ୍ନୀଧ॑ ଐ॒ନ୍ଦ୍ରୋ ଵୈ ବ୍ର॒ହ୍ମା ଵୈ᳚ଷ୍ଣ॒ଵୋ᳚-ଽଗ୍ନୀଦ୍ଯଥୈ॒ଵ ତାଵକ॑ଲ୍ପେତା॒ମିତ୍ଯଥା॑ ଽଽହୁ॒ର୍ଯା କ॑ଲ୍ଯା॒ଣୀ ବ॑ହୁରୂ॒ପା ସା ଦେଯେତ୍ଯଥା॑ ଽଽହୁ॒ର୍ଯା ଦ୍ଵି॑ରୂ॒ପୋଭ॒ଯତ॑ଏନୀ॒ ସା ଦେଯେତି॑ ସ॒ହସ୍ର॑ସ୍ଯ॒ ପରି॑ଗୃହୀତ୍ଯୈ॒ ତଦ୍ଵା ଏ॒ତ-ଥ୍ସ॒ହସ୍ର॒ସ୍ଯା-ଽଯ॑ନଗ୍ଂ ସ॒ହସ୍ରଗ୍ଗ୍॑ ସ୍ତୋ॒ତ୍ରୀଯା᳚-ସ୍ସ॒ହସ୍ର॒-ନ୍ଦକ୍ଷି॑ଣା-ସ୍ସ॒ହସ୍ର॑ସମ୍ମିତ-ସ୍ସୁଵ॒ର୍ଗୋ ଲୋ॒କ-ସ୍ସୁ॑ଵ॒ର୍ଗସ୍ଯ॑ ଲୋ॒କସ୍ଯା॒ଭିଜି॑ତ୍ଯୈ ॥ 20 ॥
(ଅ॒ବ୍ର॒ଵୀ॒ - ଚ୍ଚ॒ - ତଦ॒ନ୍ତରି॑କ୍ଷଂ - ଦଦାତ୍ଯ - ଚ୍ଛାଵା॒କ - ଶ୍ଚ॒ ଦେଯେତି॑ - ସ॒ପ୍ତଚ॑ତ୍ଵାରିଗ୍ଂଶଚ୍ଚ) (ଅ. 5)
ସୋମୋ॒ ଵୈ ସ॒ହସ୍ର॑ମଵିନ୍ଦ॒-ତ୍ତମିନ୍ଦ୍ରୋ ଽନ୍ଵ॑ଵିନ୍ଦ॒-ତ୍ତୌ ଯ॒ମୋ ନ୍ଯାଗ॑ଚ୍ଛ॒-ତ୍ତାଵ॑ବ୍ରଵୀ॒ଦସ୍ତୁ॒ ମେ-ଽତ୍ରା-ଽପୀତ୍ଯସ୍ତୁ॒ ହୀ(3) ଇତ୍ଯ॑ବ୍ରୂତା॒ଗ୍ଂ॒ ସ ଯ॒ମ ଏକ॑ସ୍ଯାଂ-ଵୀଁ॒ର୍ଯ॑-ମ୍ପର୍ଯ॑ପଶ୍ଯଦି॒ଯଂ-ଵାଁ ଅ॒ସ୍ଯ ସ॒ହସ୍ର॑ସ୍ଯ ଵୀ॒ର୍ଯ॑-ମ୍ବିଭ॒ର୍ତୀତି॒ ତାଵ॑ବ୍ରଵୀଦି॒ଯ-ମ୍ମମାସ୍ତ୍ଵେ॒ତ-ଦ୍ଯୁ॒ଵଯୋ॒ରିତି॒ ତାଵ॑ବ୍ରୂତା॒ଗ୍ଂ॒ ସର୍ଵେ॒ ଵା ଏ॒ତଦେ॒ତସ୍ଯାଂ᳚-ଵୀଁ॒ର୍ଯ॑- [ଏ॒ତଦେ॒ତସ୍ଯାଂ᳚-ଵୀଁ॒ର୍ଯ᳚ମ୍, ପରି॑] 21
-ମ୍ପରି॑ ପଶ୍ଯା॒ମୋ-ଽଗ୍ଂଶ॒ମା ହ॑ରାମହା॒ ଇତି॒ ତସ୍ଯା॒ମଗ୍ଂଶ॒ମା-ଽହ॑ରନ୍ତ॒ ତାମ॒ଫ୍ସୁ ପ୍ରା-ଽଵେ॑ଶଯ॒ନ୍-ଥ୍ସୋମା॑ଯୋ॒ଦେହୀତି॒ ସା ରୋହି॑ଣୀ ପିଙ୍ଗ॒ଲୈକ॑ହାଯନୀ ରୂ॒ପ-ଙ୍କୃ॒ତ୍ଵା ତ୍ରଯ॑ସ୍ତ୍ରିଗ୍ଂଶତା ଚ ତ୍ରି॒ଭିଶ୍ଚ॑ ଶ॒ତୈ-ସ୍ସ॒ହୋଦୈ-ତ୍ତସ୍ମା॒-ଦ୍ରୋହି॑ଣ୍ଯା ପିଙ୍ଗ॒ଲଯୈକ॑ହାଯନ୍ଯା॒ ସୋମ॑-ଙ୍କ୍ରୀଣୀଯା॒ଦ୍ଯ ଏ॒ଵଂ-ଵିଁ॒ଦ୍ଵା-ନ୍ରୋହି॑ଣ୍ଯା ପିଙ୍ଗ॒ଲଯୈକ॑ହାଯନ୍ଯା॒ ସୋମ॑-ଙ୍କ୍ରୀ॒ଣାତି॒ ତ୍ରଯ॑ସ୍ତ୍ରିଗ୍ଂଶତା ଚୈ॒ଵାସ୍ଯ॑ ତ୍ରି॒ଭିଶ୍ଚ॑ [ ] 22
ଶ॒ତୈ-ସ୍ସୋମଃ॑ କ୍ରୀ॒ତୋ ଭ॑ଵତି॒ ସୁକ୍ରୀ॑ତେନ ଯଜତେ॒ ତାମ॒ଫ୍ସୁ ପ୍ରାଵେ॑ଶଯ॒-ନ୍ନିନ୍ଦ୍ରା॑ଯୋ॒ଦେହୀତି॒ ସା ରୋହି॑ଣୀ ଲକ୍ଷ୍ମ॒ଣା ପ॑ଷ୍ଠୌ॒ହୀ ଵାର୍ତ୍ର॑ଘ୍ନୀ ରୂ॒ପ-ଙ୍କୃ॒ତ୍ଵା ତ୍ରଯ॑ସ୍ତ୍ରିଗ୍ଂଶତା ଚ ତ୍ରି॒ଭିଶ୍ଚ॑ ଶ॒ତୈ-ସ୍ସ॒ହୋଦୈ-ତ୍ତସ୍ମା॒-ଦ୍ରୋହି॑ଣୀଂ-ଲଁକ୍ଷ୍ମ॒ଣା-ମ୍ପ॑ଷ୍ଠୌ॒ହୀଂ-ଵାଁର୍ତ୍ର॑ଘ୍ନୀ-ନ୍ଦଦ୍ଯା॒ଦ୍ଯ ଏ॒ଵଂ-ଵିଁ॒ଦ୍ଵା-ନ୍ରୋହି॑ଣୀଂ-ଲଁକ୍ଷ୍ମ॒ଣା-ମ୍ପ॑ଷ୍ଠୌ॒ହୀଂ-ଵାଁର୍ତ୍ର॑ଘ୍ନୀ॒-ନ୍ଦଦା॑ତି॒ ତ୍ରଯ॑ସ୍ତ୍ରିଗ୍ଂଶଚ୍ଚୈ॒ଵାସ୍ଯ॒ ତ୍ରୀଣି॑ ଚ ଶ॒ତାନି॒ ସା ଦ॒ତ୍ତା [ଦ॒ତ୍ତା, ଭ॒ଵ॒ତି॒ ତାମ॒ଫ୍ସୁ] 23
ଭ॑ଵତି॒ ତାମ॒ଫ୍ସୁ ପ୍ରାଵେ॑ଶଯନ୍ ଯ॒ମାଯୋ॒ଦେହୀତି॒ ସା ଜର॑ତୀ ମୂ॒ର୍ଖା ତ॑ଜ୍ଜଘ॒ନ୍ଯା ରୂ॒ପ-ଙ୍କୃ॒ତ୍ଵା ତ୍ରଯ॑ସ୍ତ୍ରିଗ୍ଂଶତା ଚ ତ୍ରି॒ଭିଶ୍ଚ॑ ଶ॒ତୈ-ସ୍ସ॒ହୋଦୈ-ତ୍ତସ୍ମା॒ଜ୍ଜର॑ତୀ-ମ୍ମୂ॒ର୍ଖା-ନ୍ତ॑ଜ୍ଜଘ॒ନ୍ଯା-ମ॑ନୁ॒ସ୍ତର॑ଣୀ-ଙ୍କୁର୍ଵୀତ॒ ଯ ଏ॒ଵଂ-ଵିଁ॒ଦ୍ଵାଞ୍ଜର॑ତୀ-ମ୍ମୂ॒ର୍ଖା-ନ୍ତ॑ଜ୍ଜଘ॒ନ୍ଯା-ମ॑ନୁ॒ସ୍ତର॑ଣୀ-ଙ୍କୁରୁ॒ତେ ତ୍ରଯ॑ସ୍ତ୍ରିଗ୍ଂଶଚ୍ଚୈ॒ଵାସ୍ଯ॒ ତ୍ରୀଣି॑ ଚ ଶ॒ତାନି॒ ସା-ଽମୁଷ୍ମି॑ଁଲ୍ଲୋ॒କେ ଭ॑ଵତି॒ ଵାଗେ॒ଵ ସ॑ହସ୍ରତ॒ମୀ ତସ୍ମା॒- [ତସ୍ମା᳚ତ୍, ଵରୋ॒ ଦେଯ॒-ସ୍ସା] 24
-ଦ୍ଵରୋ॒ ଦେଯ॒-ସ୍ସା ହି ଵରଃ॑ ସ॒ହସ୍ର॑ମସ୍ଯ॒ ସା ଦ॒ତ୍ତା ଭ॑ଵତି॒ ତସ୍ମା॒-ଦ୍ଵରୋ॒ ନ ପ୍ର॑ତି॒ଗୃହ୍ଯ॒-ସ୍ସା ହି ଵରଃ॑ ସ॒ହସ୍ର॑ମସ୍ଯ॒ ପ୍ରତି॑ଗୃହୀତ-ମ୍ଭଵତୀ॒ଯଂ-ଵଁର॒ ଇତି॑ ବ୍ରୂଯା॒ଦଥା॒ନ୍ଯା-ମ୍ବ୍ରୂ॑ଯାଦି॒ଯ-ମ୍ମମେତି॒ ତଥା᳚-ଽସ୍ଯ॒ ତ-ଥ୍ସ॒ହସ୍ର॒-ମପ୍ର॑ତିଗୃହୀତ-ମ୍ଭଵତ୍ଯୁଭଯତଏ॒ନୀ ସ୍ଯା॒-ତ୍ତଦା॑ହୁରନ୍ଯତ ଏ॒ନୀ ସ୍ଯା᳚-ଥ୍ସ॒ହସ୍ର॑-ମ୍ପ॒ରସ୍ତା॒ଦେତ॒ମିତି॒ ଯୈଵ ଵରଃ॑ [ଵରଃ॑, କ॒ଲ୍ଯା॒ଣୀ ରୂ॒ପସ॑ମୃଦ୍ଧା॒ ସା] 25
କଲ୍ଯା॒ଣୀ ରୂ॒ପସ॑ମୃଦ୍ଧା॒ ସା ସ୍ଯା॒-ଥ୍ସା ହି ଵର॒-ସ୍ସମୃ॑ଦ୍ଧ୍ଯୈ॒ ତାମୁତ୍ତ॑ରେ॒ଣା-ଽଽଗ୍ନୀ᳚ଦ୍ଧ୍ର-ମ୍ପର୍ଯା॒ଣୀଯା॑-ଽଽହଵ॒ନୀଯ॒ସ୍ଯାନ୍ତେ᳚ ଦ୍ରୋଣକଲ॒ଶମଵ॑ ଘ୍ରାପଯେ॒ଦା ଜି॑ଘ୍ର କ॒ଲଶ॑-ମ୍ମହ୍ଯୁ॒ରୁଧା॑ରା॒ ପଯ॑ସ୍ଵ॒ତ୍ଯା ତ୍ଵା॑ ଵିଶ॒ନ୍ତ୍ଵିନ୍ଦ॑ଵ-ସ୍ସମୁ॒ଦ୍ରମି॑ଵ॒ ସିନ୍ଧ॑ଵ॒-ସ୍ସା ମା॑ ସ॒ହସ୍ର॒ ଆ ଭ॑ଜ ପ୍ର॒ଜଯା॑ ପ॒ଶୁଭିଃ॑ ସ॒ହ ପୁନ॒ର୍ମା ଽଽଵି॑ଶତା-ଦ୍ର॒ଯିରିତି॑ ପ୍ର॒ଜଯୈ॒ଵୈନ॑-ମ୍ପ॒ଶୁଭୀ॑ ର॒ଯ୍ଯା ସ- [ର॒ଯ୍ଯା ସମ୍, ଅ॒ର୍ଧ॒ଯ॒ତି॒ ପ୍ର॒ଜାଵା᳚-] 26
-ମ॑ର୍ଧଯତି ପ୍ର॒ଜାଵା᳚-ନ୍ପଶୁ॒ମା-ନ୍ର॑ଯି॒ମା-ନ୍ଭ॑ଵତି॒ ଯ ଏ॒ଵଂ-ଵେଁଦ॒ ତଯା॑ ସ॒ହା-ଽଽଗ୍ନୀ᳚ଦ୍ଧ୍ର-ମ୍ପ॒ରେତ୍ଯ॑ ପୁ॒ରସ୍ତା᳚-ତ୍ପ୍ର॒ତୀଚ୍ଯା॒-ନ୍ତିଷ୍ଠ॑ନ୍ତ୍ଯା-ଞ୍ଜୁହୁଯାଦୁ॒ଭା ଜି॑ଗ୍ଯଥୁ॒ର୍ନ ପରା॑ ଜଯେଥେ॒ ନ ପରା॑ ଜିଗ୍ଯେ କତ॒ରଶ୍ଚ॒ନୈନୋଃ᳚ । ଇନ୍ଦ୍ର॑ଶ୍ଚ ଵିଷ୍ଣୋ॒ ଯଦପ॑ସ୍ପୃଧେଥା-ନ୍ତ୍ରେ॒ଧା ସ॒ହସ୍ରଂ॒-ଵିଁ ତଦୈ॑ରଯେଥା॒ମିତି॑, ତ୍ରେଧାଵିଭ॒କ୍ତଂ-ଵୈଁ ତ୍ରି॑ରା॒ତ୍ରେ ସ॒ହସ୍ରଗ୍ଂ॑ ସାହ॒ସ୍ରୀମେ॒ଵୈନା᳚-ଙ୍କରୋତି ସ॒ହସ୍ର॑ସ୍ଯୈ॒ଵୈନା॒-ମ୍ମାତ୍ରା᳚- [-ମ୍ମାତ୍ରା᳚ମ୍, କ॒ରୋ॒ତି॒ ରୂ॒ପାଣି॑ ଜୁହୋତି] 27
-ଙ୍କରୋତି ରୂ॒ପାଣି॑ ଜୁହୋତି ରୂ॒ପୈରେ॒ଵୈନା॒ଗ୍ଂ॒ ସମ॑ର୍ଧଯତି॒ ତସ୍ଯା॑ ଉପୋ॒ତ୍ଥାଯ॒ କର୍ଣ॒ମା ଜ॑ପେ॒ଦିଡେ॒ ରନ୍ତେ-ଽଦି॑ତେ॒ ସର॑ସ୍ଵତି॒ ପ୍ରିଯେ॒ ପ୍ରେଯ॑ସି॒ ମହି॒ ଵିଶ୍ରୁ॑ତ୍ଯେ॒ତାନି॑ ତେ ଅଘ୍ନିଯେ॒ ନାମା॑ନି ସୁ॒କୃତ॑-ମ୍ମା ଦେ॒ଵେଷୁ॑ ବ୍ରୂତା॒ଦିତି॑ ଦେ॒ଵେଭ୍ଯ॑ ଏ॒ଵୈନ॒ମା ଵେ॑ଦଯ॒ତ୍ଯନ୍ଵେ॑ନ-ନ୍ଦେ॒ଵା ବୁ॑ଦ୍ଧ୍ଯନ୍ତେ ॥ 28 ॥
( ଏ॒ତଦେ॒ତସ୍ଯାଂ᳚-ଵୀଁ॒ର୍ଯ॑ - ମସ୍ଯ ତ୍ରି॒ଭିଶ୍ଚ॑ - ଦ॒ତ୍ତା - ସ॑ହସ୍ରତ॒ମୀ ତସ୍ମା॑ - ଦେ॒ଵ ଵରଃ॒ - ସଂ - ମାତ୍ରା॒ - ମେକା॒ନ୍ନଚ॑ତ୍ଵାରି॒ଗ୍ଂ॒ଶଚ୍ଚ॑) (ଅ. 6)
ସ॒ହ॒ସ୍ର॒ତ॒ମ୍ଯା॑ ଵୈ ଯଜ॑ମାନ-ସ୍ସୁଵ॒ର୍ଗଂ-ଲୋଁ॒କମେ॑ତି॒ ସୈନଗ୍ଂ॑ ସୁଵ॒ର୍ଗଂ-ଲୋଁ॒କ-ଙ୍ଗ॑ମଯତି॒ ସା ମା॑ ସୁଵ॒ର୍ଗଂ-ଲୋଁ॒କ-ଙ୍ଗ॑ମ॒ଯେତ୍ଯା॑ହ ସୁଵ॒ର୍ଗମେ॒ଵୈନଂ॑-ଲୋଁ॒କ-ଙ୍ଗ॑ମଯତି॒ ସା ମା॒ ଜ୍ଯୋତି॑ଷ୍ମନ୍ତଂ-ଲୋଁ॒କ-ଙ୍ଗ॑ମ॒ଯେତ୍ଯା॑ହ॒ ଜ୍ଯୋତି॑ଷ୍ମନ୍ତମେ॒ଵୈନଂ॑-ଲୋଁ॒କ-ଙ୍ଗ॑ମଯତି॒ ସା ମା॒ ସର୍ଵା॒-ନ୍ପୁଣ୍ଯା᳚-​ଲ୍ଲୋଁ॒କା-ନ୍ଗ॑ମ॒ଯେତ୍ଯା॑ହ॒ ସର୍ଵା॑ନେ॒ଵୈନ॒-ମ୍ପୁଣ୍ଯା᳚-​ଲ୍ଲୋଁ॒କା-ନ୍ଗ॑ମଯତି॒ ସା [ସା, ମା॒ ପ୍ର॒ତି॒ଷ୍ଠା-ଙ୍ଗ॑ମଯ ପ୍ର॒ଜଯା॑] 29
ମା᳚ ପ୍ରତି॒ଷ୍ଠା-ଙ୍ଗ॑ମଯ ପ୍ର॒ଜଯା॑ ପ॒ଶୁଭିଃ॑ ସ॒ହ ପୁନ॒ର୍ମା-ଽଽ ଵି॑ଶତା-ଦ୍ର॒ଯିରିତି॑ ପ୍ର॒ଜଯୈ॒ଵୈନ॑-ମ୍ପ॒ଶୁଭୀ॑ ର॒ଯ୍ଯା-ମ୍ପ୍ରତି॑ ଷ୍ଠାପଯତି ପ୍ର॒ଜାଵା᳚-ନ୍ପଶୁ॒ମା-ନ୍ର॑ଯି॒ମା-ନ୍ଭ॑ଵତି॒ ଯ ଏ॒ଵଂ-ଵେଁଦ॒ ତାମ॒ଗ୍ନୀଧେ॑ ଵା ବ୍ର॒ହ୍ମଣେ॑ ଵା॒ ହୋତ୍ରେ॑ ଵୋଦ୍ଗା॒ତ୍ରେ ଵା᳚-ଽଦ୍ଧ୍ଵ॒ର୍ଯଵେ॑ ଵା ଦଦ୍ଯା-ଥ୍ସ॒ହସ୍ର॑ମସ୍ଯ॒ ସା ଦ॒ତ୍ତା ଭ॑ଵତି ସ॒ହସ୍ର॑ମସ୍ଯ॒ ପ୍ରତି॑ଗୃହୀତ-ମ୍ଭଵତି॒ ଯସ୍ତାମଵି॑ଦ୍ଵା- [ଯସ୍ତାମଵି॑ଦ୍ଵାନ୍, ପ୍ର॒ତି॒ଗୃ॒ହ୍ଣାତି॒] 30
-ନ୍ପ୍ରତିଗୃ॒ହ୍ଣାତି॒ ତା-ମ୍ପ୍ରତି॑ଗୃହ୍ଣୀଯା॒ଦେକା॑-ଽସି॒ ନ ସ॒ହସ୍ର॒ମେକା᳚-ନ୍ତ୍ଵା ଭୂ॒ତା-ମ୍ପ୍ରତି॑ ଗୃହ୍ଣାମି॒ ନ ସ॒ହସ୍ର॒ମେକା॑ ମା ଭୂ॒ତା-ଽଽ ଵି॑ଶ॒ ମା ସ॒ହସ୍ର॒ମିତ୍ଯେକା॑ମେ॒ଵୈନା᳚-ମ୍ଭୂ॒ତା-ମ୍ପ୍ରତି॑ଗୃହ୍ଣାତି॒ ନ ସ॒ହସ୍ରଂ॒-ଯଁ ଏ॒ଵଂ-ଵେଁଦ॑ ସ୍ଯୋ॒ନା-ଽସି॑ ସୁ॒ଷଦା॑ ସୁ॒ଶେଵା᳚ ସ୍ଯୋ॒ନା ମା ଽଽଵି॑ଶ ସୁ॒ଷଦା॒ ମା ଽଽଵି॑ଶ ସୁ॒ଶେଵା॒ ମା ଽଽଵି॒ଶେ- [ମା ଽଽଵି॑ଶ, ଇତ୍ଯା॑ହ] 31
-ତ୍ଯା॑ହ ସ୍ଯୋ॒ନୈଵୈନଗ୍ଂ॑ ସୁ॒ଷଦା॑ ସୁ॒ଶେଵା॑ ଭୂ॒ତା-ଽଽ ଵି॑ଶତି॒ ନୈନଗ୍ଂ॑ ହିନସ୍ତି ବ୍ରହ୍ମଵା॒ଦିନୋ॑ ଵଦନ୍ତି ସ॒ହସ୍ରଗ୍ଂ॑ ସହସ୍ରତ॒ମ୍ଯନ୍ଵେ॒ତୀ(3) ସ॑ହସ୍ରତ॒ମୀଗ୍ଂ ସ॒ହସ୍ରା(3)ମିତି॒ ଯ-ତ୍ପ୍ରାଚୀ॑ମୁ-ଥ୍ସୃ॒ଜେ-ଥ୍ସ॒ହସ୍ରଗ୍ଂ॑ ସହସ୍ରତ॒ମ୍ଯନ୍ଵି॑ଯା॒-ତ୍ତ-ଥ୍ସ॒ହସ୍ର॑ମପ୍ରଜ୍ଞା॒ତ୍ରଗ୍ଂ ସୁ॑ଵ॒ର୍ଗଂ-ଲୋଁ॒କ-ନ୍ନ ପ୍ର ଜା॑ନୀଯା-ତ୍ପ୍ର॒ତୀଚୀ॒-ମୁଥ୍ସୃ॑ଜତି॒ ତାଗ୍ଂ ସ॒ହସ୍ର॒ମନୁ॑ ପ॒ର୍ଯାଵ॑ର୍ତତେ॒ ସା ପ୍ର॑ଜାନ॒ତୀ ସୁ॑ଵ॒ର୍ଗଂ-ଲୋଁ॒କମେ॑ତି॒ ଯଜ॑ମାନ -ମ॒ଭ୍ଯୁ-ଥ୍ସୃ॑ଜତି କ୍ଷି॒ପ୍ରେ ସ॒ହସ୍ର॒-ମ୍ପ୍ର ଜା॑ଯତ ଉତ୍ତ॒ମା ନୀ॒ଯତେ᳚ ପ୍ରଥ॒ମା ଦେ॒ଵା-ନ୍ଗ॑ଚ୍ଛତି ॥ 32 ॥
(ଲୋ॒କା-ନ୍ଗ॑ମଯତି॒ ସା - ଽଵି॑ଦ୍ଵାନ୍ଥ୍ - ସୁ॒ଶେଵା॒ ମା-ଽଽ ଵି॑ଶ॒ - ଯଜ॑ମାନଂ॒ - ଦ୍ଵାଦ॑ଶ ଚ) (ଅ. 7)
ଅତ୍ରି॑ରଦଦା॒ଦୌର୍ଵା॑ଯ ପ୍ର॒ଜା-ମ୍ପୁ॒ତ୍ରକା॑ମାଯ॒ ସ ରି॑ରିଚା॒ନୋ॑-ଽମନ୍ଯତ॒ ନିର୍ଵୀ᳚ର୍ଯ-ଶ୍ଶିଥି॒ଲୋ ଯା॒ତଯା॑ମା॒ ସ ଏ॒ତ-ଞ୍ଚ॑ତୂରା॒ତ୍ର-ମ॑ପଶ୍ଯ॒-ତ୍ତମା-ଽହ॑ର॒-ତ୍ତେନା॑ଯଜତ॒ ତତୋ॒ ଵୈ ତସ୍ଯ॑ ଚ॒ତ୍ଵାରୋ॑ ଵୀ॒ରା ଆ-ଽଜା॑ଯନ୍ତ॒ ସୁହୋ॑ତା॒ ସୂ᳚ଦ୍ଗାତା॒ ସ୍ଵ॑ଦ୍ଧ୍ଵର୍ଯୁ॒-ସ୍ସୁସ॑ଭେଯୋ॒ ଯ ଏ॒ଵଂ-ଵିଁ॒ଦ୍ଵାଗ୍​ଶ୍ଚ॑ତୂରା॒ତ୍ରେଣ॒ ଯଜ॑ତ॒ ଆ-ଽସ୍ଯ॑ ଚ॒ତ୍ଵାରୋ॑ ଵୀ॒ରା ଜା॑ଯନ୍ତେ॒ ସୁହୋ॑ତା॒ ସୂ᳚ଦ୍ଗାତା॒ ସ୍ଵ॑ଦ୍ଧ୍ଵର୍ଯୁ॒-ସ୍ସୁସ॑ଭେଯୋ॒ ଯେ ଚ॑ତୁର୍ଵି॒ଗ୍ଂ॒ଶାଃ ପଵ॑ମାନା ବ୍ରହ୍ମଵର୍ଚ॒ସ-ନ୍ତ- [ବ୍ରହ୍ମଵର୍ଚ॒ସ-ନ୍ତତ୍, ଯ ଉ॒ଦ୍ଯନ୍ତ॒-] 33
-ଦ୍ଯ ଉ॒ଦ୍ଯନ୍ତ॒-ସ୍ସ୍ତୋମା॒-ଶ୍ଶ୍ରୀ-ସ୍ସା ଽତ୍ରିଗ୍ଗ୍॑ ଶ୍ର॒ଦ୍ଧାଦେ॑ଵଂ॒-ଯଁଜ॑ମାନ-ଞ୍ଚ॒ତ୍ଵାରି॑ ଵୀ॒ର୍ଯା॑ଣି॒ ନୋପା॑-ଽନମ॒-ନ୍ତେଜ॑ ଇନ୍ଦ୍ରି॒ଯ-ମ୍ବ୍ର॑ହ୍ମଵର୍ଚ॒ସ-ମ॒ନ୍ନାଦ୍ଯ॒ଗ୍ଂ॒ ସ ଏ॒ତାଗ୍​ଶ୍ଚ॒ତୁର॒ଶ୍ଚତୁ॑ଷ୍ଟୋମା॒ନ୍-ଥ୍ସୋମା॑ନ-ପଶ୍ଯ॒-ତ୍ତାନା-ଽହ॑ର॒-ତ୍ତୈର॑ଯଜତ॒ ତେଜ॑ ଏ॒ଵ ପ୍ର॑ଥ॒ମେନା ଽଵା॑ରୁନ୍ଧେନ୍ଦ୍ରି॒ଯ-ନ୍ଦ୍ଵି॒ତୀଯେ॑ନ ବ୍ରହ୍ମଵର୍ଚ॒ସ-ନ୍ତୃ॒ତୀଯେ॑ନା॒ନ୍ନାଦ୍ଯ॑-ଞ୍ଚତୁ॒ର୍ଥେନ॒ ଯ ଏ॒ଵଂ-ଵିଁ॒ଦ୍ଵାଗ୍​ଶ୍ଚ॒ତୁର॒ଶ୍ଚତୁ॑ଷ୍ଟୋମା॒ନ୍-ଥ୍ସୋମା॑ନା॒ହର॑ତି॒ ତୈର୍ଯଜ॑ତେ॒ ତେଜ॑ ଏ॒ଵ ପ୍ର॑ଥ॒ମେନାଵ॑ ରୁନ୍ଧ ଇନ୍ଦ୍ରି॒ଯ-ନ୍ଦ୍ଵି॒ତୀଯେ॑ନ ବ୍ରହ୍ମଵର୍ଚ॒ସ-ନ୍ତୃ॒ତୀଯେ॑ନା॒-ଽନ୍ନାଦ୍ଯ॑-ଞ୍ଚତୁ॒ର୍ଥେନ॒ ଯାମେ॒ଵାତ୍ରି॒ର୍॒ ଋଦ୍ଧି॒ମାର୍ଧ୍ନୋ॒-ତ୍ତାମେ॒ଵ ଯଜ॑ମାନ ଋଦ୍ଧ୍ନୋତି ॥ 34 ॥
( ତତ୍-ତେଜ॑ ଏ॒ଵା-ଷ୍ଟାଦ॑ଶ ଚ) (ଅ. 8)
ଜ॒ମଦ॑ଗ୍ନିଃ॒ ପୁଷ୍ଟି॑କାମ-ଶ୍ଚତୂରା॒ତ୍ରେଣା॑-ଯଜତ॒ ସ ଏ॒ତା-ନ୍ପୋଷାଗ୍ଂ॑ ଅପୁଷ୍ଯ॒-ତ୍ତସ୍ମା᳚-ତ୍ପଲି॒ତୌ ଜାମ॑ଦଗ୍ନିଯୌ॒ ନ ସ-ଞ୍ଜା॑ନାତେ ଏ॒ତାନେ॒ଵ ପୋଷା᳚-ନ୍ପୁଷ୍ଯତି॒ ଯ ଏ॒ଵଂ-ଵିଁ॒ଦ୍ଵାଗ୍​ଶ୍ଚ॑ତୂରା॒ତ୍ରେଣ॒ ଯଜ॑ତେ ପୁରୋଡା॒ଶିନ୍ଯ॑ ଉପ॒ସଦୋ॑ ଭଵନ୍ତି ପ॒ଶଵୋ॒ ଵୈ ପୁ॑ରୋ॒ଡାଶଃ॑ ପ॒ଶୂନେ॒ଵାଵ॑ ରୁ॒ନ୍ଧେ ଽନ୍ନଂ॒-ଵୈଁ ପୁ॑ରୋ॒ଡାଶୋ-ଽନ୍ନ॑ମେ॒ଵାଵ॑ ରୁନ୍ଧେ ଽନ୍ନା॒ଦଃ ପ॑ଶୁ॒ମା-ନ୍ଭ॑ଵତି॒ ଯ ଏ॒ଵଂ-ଵିଁ॒ଦ୍ଵାଗ୍​ଶ୍ଚ॑ତୂରା॒ତ୍ରେଣ॒ ଯଜ॑ତେ ॥ 35 ॥
(ଜ॒ମଦ॑ଗ୍ନି - ର॒ଷ୍ଟାଚ॑ତ୍ଵାରିଗ୍ଂଶତ୍) (ଅ. 9)
ସଂ॒​ଵଁ॒ଥ୍ସ॒ରୋ ଵା ଇ॒ଦମେକ॑ ଆସୀ॒-ଥ୍ସୋ॑-ଽକାମଯତ॒ର୍ତୂନ୍-ଥ୍ସୃ॑ଜେ॒ଯେତି॒ ସ ଏ॒ତ-ମ୍ପ॑ଞ୍ଚରା॒ତ୍ରମ॑ପଶ୍ଯ॒-ତ୍ତମା-ଽହ॑ର॒-ତ୍ତେନା॑ଯଜତ॒ ତତୋ॒ ଵୈ ସ ଋ॒ତୂନ॑ସୃଜତ॒ ଯ ଏ॒ଵଂ-ଵିଁ॒ଦ୍ଵା-ନ୍ପ॑ଞ୍ଚରା॒ତ୍ରେଣ॒ ଯଜ॑ତେ॒ ପ୍ରୈଵ ଜା॑ଯତେ॒ ତ ଋ॒ତଵଃ॑ ସୃ॒ଷ୍ଟା ନ ଵ୍ଯାଵ॑ର୍ତନ୍ତ॒ ତ ଏ॒ତ-ମ୍ପ॑ଞ୍ଚରା॒ତ୍ରମ॑ପଶ୍ଯ॒-ନ୍ତମା-ଽହ॑ର॒-ନ୍ତେନା॑ଯଜନ୍ତ॒ ତତୋ॒ ଵୈ ତେ ଵ୍ଯାଵ॑ର୍ତନ୍ତ॒ [ଵ୍ଯାଵ॑ର୍ତନ୍ତ, ଯ ଏ॒ଵଂ-ଵିଁ॒ଦ୍ଵା-ନ୍ପ॑ଞ୍ଚରା॒ତ୍ରେଣ॒] 36
ଯ ଏ॒ଵଂ-ଵିଁ॒ଦ୍ଵା-ନ୍ପ॑ଞ୍ଚରା॒ତ୍ରେଣ॒ ଯଜ॑ତେ॒ ଵି ପା॒ପ୍ମନା॒ ଭ୍ରାତୃ॑ଵ୍ଯେ॒ଣା-ଽଽ ଵ॑ର୍ତତେ॒ ସାର୍ଵ॑ସେନି-ଶ୍ଶୌଚେ॒ଯୋ॑-ଽକାମଯତ ପଶୁ॒ମାନ୍-ଥ୍ସ୍ଯା॒ମିତି॒ ସ ଏ॒ତ-ମ୍ପ॑ଞ୍ଚରା॒ତ୍ରମା-ଽହ॑ର॒-ତ୍ତେନା॑-ଽଯଜତ॒ ତତୋ॒ ଵୈ ସ ସ॒ହସ୍ର॑-ମ୍ପ॒ଶୂ-ନ୍ପ୍ରା-ଽଽପ୍ନୋ॒ଦ୍ଯ ଏ॒ଵଂ-ଵିଁ॒ଦ୍ଵା-ନ୍ପ॑ଞ୍ଚରା॒ତ୍ରେଣ॒ ଯଜ॑ତେ॒ ପ୍ର ସ॒ହସ୍ର॑-ମ୍ପ॒ଶୂନା᳚ପ୍ନୋତି ବବ॒ରଃ ପ୍ରାଵା॑ହଣି-ରକାମଯତ ଵା॒ଚଃ ପ୍ର॑ଵଦି॒ତା ସ୍ଯା॒ମିତି॒ ସ ଏ॒ତ-ମ୍ପ॑ଞ୍ଚରା॒ତ୍ରମା- [ଏ॒ତ-ମ୍ପ॑ଞ୍ଚରା॒ତ୍ରମା, ଆ॒ହ॒ର॒-ତ୍ତେନା॑-] 37
-ଽହ॑ର॒-ତ୍ତେନା॑-ଯଜତ॒ ତତୋ॒ ଵୈ ସ ଵା॒ଚଃ ପ୍ର॑ଵଦି॒ତା-ଽଭ॑ଵ॒ଦ୍ଯ ଏ॒ଵଂ-ଵିଁ॒ଦ୍ଵା-ନ୍ପ॑ଞ୍ଚରା॒ତ୍ରେଣ॒ ଯଜ॑ତେ ପ୍ରଵଦି॒ତୈଵ ଵା॒ଚୋ ଭ॑ଵ॒ତ୍ଯଥୋ॑ ଏନଂ-ଵାଁ॒ଚସ୍ପତି॒-ରିତ୍ଯା॑ହୁ॒ରନା᳚ପ୍ତ-ଶ୍ଚତୂରା॒ତ୍ରୋ-ଽତି॑ରିକ୍ତ-ଷ୍ଷଡ୍-ରା॒ତ୍ରୋ-ଽଥ॒ ଵା ଏ॒ଷ ସ॑ପ୍ର॒ନ୍ତି ଯ॒ଜ୍ଞୋ ଯ-ତ୍ପ॑ଞ୍ଚରା॒ତ୍ରୋ ଯ ଏ॒ଵଂ-ଵିଁ॒ଦ୍ଵା-ନ୍ପ॑ଞ୍ଚରା॒ତ୍ରେଣ॒ ଯଜ॑ତେ ସମ୍ପ୍ର॒ତ୍ଯେ॑ଵ ଯ॒ଜ୍ଞେନ॑ ଯଜତେ ପଞ୍ଚରା॒ତ୍ରୋ ଭ॑ଵତି॒ ପଞ୍ଚ॒ ଵା ଋ॒ତଵଃ॑ ସଂ​ଵଁଥ୍ସ॒ର [ଋ॒ତଵଃ॑ ସଂ​ଵଁଥ୍ସ॒ରଃ, ଋ॒ତୁଷ୍ଵେ॒ଵ ସଂ॑​ଵଁଥ୍ସ॒ରେ] 38
ଋ॒ତୁଷ୍ଵେ॒ଵ ସଂ॑​ଵଁଥ୍ସ॒ରେ ପ୍ରତି॑ ତିଷ୍ଠ॒ତ୍ଯଥୋ॒ ପଞ୍ଚା᳚କ୍ଷରା ପ॒ଙ୍କ୍ତିଃ ପାଙ୍କ୍ତୋ॑ ଯ॒ଜ୍ଞୋ ଯ॒ଜ୍ଞମେ॒ଵାଵ॑ ରୁନ୍ଧେ ତ୍ରି॒ଵୃଦ॑ଗ୍ନିଷ୍ଟୋ॒ମୋ ଭ॑ଵତି॒ ତେଜ॑ ଏ॒ଵାଵ॑ ରୁନ୍ଧେ ପଞ୍ଚଦ॒ଶୋ ଭ॑ଵତୀନ୍ଦ୍ରି॒ଯମେ॒ଵାଵ॑ ରୁନ୍ଧେ ସପ୍ତଦ॒ଶୋ ଭ॑ଵତ୍ଯ॒ନ୍ନାଦ୍ଯ॒ସ୍ଯା-ଵ॑ରୁଦ୍ଧ୍ଯା॒ ଅଥୋ॒ ପ୍ରୈଵ ତେନ॑ ଜାଯତେ ପଞ୍ଚଵି॒ଗ୍ଂ॒ଶୋ᳚ ଽଗ୍ନିଷ୍ଟୋ॒ମୋ ଭ॑ଵତି ପ୍ର॒ଜାପ॑ତେ॒ରାପ୍ତ୍ଯୈ॑ ମହାଵ୍ର॒ତଵା॑-ନ॒ନ୍ନାଦ୍ଯ॒ସ୍ଯା-ଵ॑ରୁଦ୍ଧ୍ଯୈ ଵିଶ୍ଵ॒ଜି-ଥ୍ସର୍ଵ॑ପୃଷ୍ଠୋ-ଽତିରା॒ତ୍ରୋ ଭ॑ଵତି॒ ସର୍ଵ॑ସ୍ଯା॒ଭିଜି॑ତ୍ଯୈ ॥ 39 ॥
(ତେ ଵ୍ଯାଵ॑ର୍ତନ୍ତ - ପ୍ରଵଦି॒ତା ସ୍ଯା॒ମିତି॒ ସ ଏ॒ତ-ମ୍ପ॑ଞ୍ଚରା॒ତ୍ରମା - ସଂ॑​ଵଁଥ୍ସ॒ରୋ॑- ଭିଜି॑ତ୍ଯୈ) (ଅ. 10)
ଦେ॒ଵସ୍ଯ॑ତ୍ଵା ସଵି॒ତୁଃ ପ୍ର॑ସ॒ଵେ᳚-ଽଶ୍ଵିନୋ᳚ର୍ବା॒ହୁଭ୍ଯା᳚-ମ୍ପୂ॒ଷ୍ଣୋ ହସ୍ତା᳚ଭ୍ଯା॒ମା ଦ॑ଦ ଇ॒ମାମ॑ଗୃଭ୍ଣ-ନ୍ରଶ॒ନାମୃ॒ତସ୍ଯ॒ ପୂର୍ଵ॒ ଆଯୁ॑ଷି ଵି॒ଦଥେ॑ଷୁ କ॒ଵ୍ଯା । ତଯା॑ ଦେ॒ଵା-ସ୍ସୁ॒ତମା ବ॑ଭୂଵୁର୍-ଋ॒ତସ୍ଯ॒ ସାମ᳚ନ୍-ଥ୍ସ॒ରମା॒ରପ॑ନ୍ତୀ ॥ ଅ॒ଭି॒ଧା ଅ॑ସି॒ ଭୁଵ॑ନମସି ଯ॒ନ୍ତା-ଽସି॑ ଧ॒ର୍ତା-ଽସି॒ ସୋ᳚-ଽଗ୍ନିଂ-ଵୈଁ᳚ଶ୍ଵାନ॒ରଗ୍ଂ ସପ୍ର॑ଥସ-ଙ୍ଗଚ୍ଛ॒ ସ୍ଵାହା॑କୃତଃ ପୃଥି॒ଵ୍ଯାଂ-ଯଁ॒ନ୍ତା ରାଡ୍ ଯ॒ନ୍ତା-ଽସି॒ ଯମ॑ନୋ ଧ॒ର୍ତା-ଽସି॑ ଧ॒ରୁଣଃ॑ କୃ॒ଷ୍ଯୈ ତ୍ଵା॒ କ୍ଷେମା॑ଯ ତ୍ଵା ର॒ଯ୍ଯୈ ତ୍ଵା॒ ପୋଷା॑ଯ ତ୍ଵା ପୃଥି॒ଵ୍ଯୈ ତ୍ଵା॒ ଽନ୍ତରି॑କ୍ଷାଯ ତ୍ଵା ଦି॒ଵେ ତ୍ଵା॑ ସ॒ତେ ତ୍ଵା-ଽସ॑ତେ ତ୍ଵା॒ଦ୍ଭ୍ଯସ୍ତ୍ଵୌ-ଷ॑ଧୀଭ୍ଯସ୍ତ୍ଵା॒ ଵିଶ୍ଵେ᳚ଭ୍ଯସ୍ତ୍ଵା ଭୂ॒ତେଭ୍ଯଃ॑ ॥ 40 ॥
(ଧ॒ରୁଣଃ॒ - ପଞ୍ଚ॑ଵିଗ୍ଂଶତିଶ୍ଚ) (ଅ. 11)
ଵି॒ଭୂର୍ମା॒ତ୍ରା ପ୍ର॒ଭୂଃ ପି॒ତ୍ରାଶ୍ଵୋ॑-ଽସି॒ ହଯୋ॒-ଽସ୍ଯତ୍ଯୋ॑-ଽସି॒ ନରୋ॒-ଽସ୍ଯର୍ଵା॑-ଽସି॒ ସପ୍ତି॑ରସି ଵା॒ଜ୍ଯ॑ସି॒ ଵୃଷା॑-ଽସି ନୃ॒ମଣା॑ ଅସି॒ ଯଯୁ॒ର୍ନାମା᳚ସ୍ଯାଦି॒ତ୍ଯାନା॒-ମ୍ପତ୍ଵାନ୍ଵି॑ହ୍ଯ॒ଗ୍ନଯେ॒ ସ୍ଵାହା॒ ସ୍ଵାହେ᳚ନ୍ଦ୍ରା॒ଗ୍ନିଭ୍ଯା॒ଗ୍॒ ସ୍ଵାହା᳚ ପ୍ର॒ଜାପ॑ତଯେ॒ ସ୍ଵାହା॒ ଵିଶ୍ଵେ᳚ଭ୍ଯୋ ଦେ॒ଵେଭ୍ଯ॒-ସ୍ସ୍ଵାହା॒ ସର୍ଵା᳚ଭ୍ଯୋ ଦେ॒ଵେତା᳚ଭ୍ଯ ଇ॒ହ ଧୃତି॒-ସ୍ସ୍ଵାହେ॒ହ ଵିଧୃ॑ତି॒-ସ୍ସ୍ଵାହେ॒ହ ରନ୍ତି॒-ସ୍ସ୍ଵାହେ॒ -ହ ରମ॑ତି॒-ସ୍ସ୍ଵାହା॒ ଭୂର॑ସି ଭୁ॒ଵେ ତ୍ଵା॒ ଭଵ୍ଯା॑ଯ ତ୍ଵା ଭଵିଷ୍ଯ॒ତେ ତ୍ଵା॒ ଵିଶ୍ଵେ᳚ଭ୍ଯସ୍ତ୍ଵା ଭୂ॒ତେଭ୍ଯୋ॒ ଦେଵା॑ ଆଶାପାଲା ଏ॒ତ-ନ୍ଦେ॒ଵେଭ୍ଯୋ-ଽଶ୍ଵ॒-ମ୍ମେଧା॑ଯ॒ ପ୍ରୋକ୍ଷି॑ତ-ଙ୍ଗୋପାଯତ ॥ 41 ॥
(ରନ୍ତି॒-ସ୍ସ୍ଵାହା॒ - ଦ୍ଵାଵିଗ୍ଂ॑ଶତିଶ୍ଚ) (ଅ. 12)
ଆଯ॑ନାଯ॒ ସ୍ଵାହା॒ ପ୍ରାଯ॑ଣାଯ॒ ସ୍ଵାହୋ᳚ଦ୍ଦ୍ରା॒ଵାଯ॒ ସ୍ଵାହୋଦ୍ଦ୍ରୁ॑ତାଯ॒ ସ୍ଵାହା॑ ଶୂକା॒ରାଯ॒ ସ୍ଵାହା॒ ଶୂକୃ॑ତାଯ॒ ସ୍ଵାହା॒ ପଲା॑ଯିତାଯ॒ ସ୍ଵାହା॒ ଽଽପଲା॑ଯିତାଯ॒ ସ୍ଵାହା॒ ଽଽଵଲ୍ଗ॑ତେ॒ ସ୍ଵାହା॑ ପରା॒ଵଲ୍ଗ॑ତେ॒ ସ୍ଵାହା॑ ଽଽଯ॒ତେ ସ୍ଵାହା᳚ ପ୍ରଯ॒ତେ ସ୍ଵାହା॒ ସର୍ଵ॑ସ୍ମୈ॒ ସ୍ଵାହା᳚ ॥ 42 ॥
(ଆଯ॑ନା॒ଯୋତ୍ତ॑ରମା॒ପଲା॑ଯିତାଯ॒ ଷଡ୍ଵିଗ୍ଂ॑ଶତିଃ) (ଅ. 13)
ଅ॒ଗ୍ନଯେ॒ ସ୍ଵାହା॒ ସୋମା॑ଯ॒ ସ୍ଵାହା॑ ଵା॒ଯଵେ॒ ସ୍ଵାହା॒ ଽପା-ମ୍ମୋଦା॑ଯ॒ ସ୍ଵାହା॑ ସଵି॒ତ୍ରେ ସ୍ଵାହା॒ ସର॑ସ୍ଵତ୍ଯୈ॒ ସ୍ଵାହେ-ନ୍ଦ୍ରା॑ଯ॒ ସ୍ଵାହା॒ ବୃହ॒ସ୍ପତ॑ଯେ॒ ସ୍ଵାହା॑ ମି॒ତ୍ରାଯ॒ ସ୍ଵାହା॒ ଵରୁ॑ଣାଯ॒ ସ୍ଵାହା॒ ସର୍ଵ॑ସ୍ମୈ॒ ସ୍ଵାହା᳚ ॥ 43 ॥
(ଅ॒ଗ୍ନଯେ॑ ଵା॒ଯଵେ॒-ଽପା-ମ୍ମୋଦା॒ଯେନ୍ଦ୍ରା॑ଯ॒ ତ୍ରଯୋ॑ଵିଗ୍ଂଶତିଃ) (ଅ. 14)
ପୃ॒ଥି॒ଵ୍ଯୈ ସ୍ଵାହା॒ ଽନ୍ତରି॑କ୍ଷାଯ॒ ସ୍ଵାହା॑ ଦି॒ଵେ ସ୍ଵାହା॒ ସୂର୍ଯା॑ଯ॒ ସ୍ଵାହା॑ ଚ॒ନ୍ଦ୍ରମ॑ସେ॒ ସ୍ଵାହା॒ ନକ୍ଷ॑ତ୍ରେଭ୍ଯ॒-ସ୍ସ୍ଵାହା॒ ପ୍ରାଚ୍ଯୈ॑ ଦି॒ଶେ ସ୍ଵାହା॒ ଦକ୍ଷି॑ଣାଯୈ ଦି॒ଶେ ସ୍ଵାହା᳚ ପ୍ର॒ତୀଚ୍ଯୈ॑ ଦି॒ଶେ ସ୍ଵାହୋ-ଦୀ᳚ଚ୍ଯୈ ଦି॒ଶେ ସ୍ଵାହୋ॒ର୍ଧ୍ଵାଯୈ॑ ଦି॒ଶେ ସ୍ଵାହା॑ ଦି॒ଗ୍ଭ୍ଯ-ସ୍ସ୍ଵାହା॑ ଽଵାନ୍ତରଦି॒ଶାଭ୍ଯ॒-ସ୍ସ୍ଵାହା॒ ସମା᳚ଭ୍ଯ॒-ସ୍ସ୍ଵାହା॑ ଶ॒ରଦ୍ଭ୍ଯ॒-ସ୍ସ୍ଵାହା॑ ଽହୋରା॒ତ୍ରେଭ୍ଯ॒-ସ୍ସ୍ଵାହା᳚ ଽର୍ଧମା॒ସେଭ୍ଯ॒-ସ୍ସ୍ଵାହା॒ ମାସେ᳚ଭ୍ଯ॒-ସ୍ସ୍ଵାହ॒ର୍ତୁଭ୍ଯ॒-ସ୍ସ୍ଵାହା॑ ସଂ​ଵଁଥ୍ସ॒ରାଯ॒ ସ୍ଵାହା॒ ସର୍ଵ॑ସ୍ମୈ॒ ସ୍ଵାହା᳚ ॥ 44 ॥
(ପୃ॒ଥି॒ଵ୍ଯୈ ସୂର୍ଯା॑ଯ॒ ନକ୍ଷ॑ତ୍ରେଭ୍ଯଃ॒ ପ୍ରାଚ୍ଯୈ॑ ସ॒ପ୍ତଚ॑ତ୍ଵାରିଗ୍ଂଶତ୍) (ଅ. 15)
ଅ॒ଗ୍ନଯେ॒ ସ୍ଵାହା॒ ସୋମା॑ଯ॒ ସ୍ଵାହା॑ ସଵି॒ତ୍ରେ ସ୍ଵାହା॒ ସର॑ସ୍ଵତ୍ଯୈ॒ ସ୍ଵାହା॑ ପୂ॒ଷ୍ଣେ ସ୍ଵାହା॒ ବୃହ॒ସ୍ପତ॑ଯେ॒ ସ୍ଵାହା॒ ଽପା-ମ୍ମୋଦା॑ଯ॒ ସ୍ଵାହା॑ ଵା॒ଯଵେ॒ ସ୍ଵାହା॑ ମି॒ତ୍ରାଯ॒ ସ୍ଵାହା॒ ଵରୁ॑ଣାଯ॒ ସ୍ଵାହା॒ ସର୍ଵ॑ସ୍ମୈ॒ ସ୍ଵାହା᳚ ॥ 45 ॥
(ଅ॒ଗ୍ନଯେ॑ ସଵି॒ତ୍ରେ ପୂ॒ଷ୍ଣେ॑-ଽପା-ମ୍ମୋଦା॑ଯ ଵା॒ଯଵେ॒ ତ୍ରଯୋ॑ଵିଗ୍ଂଶତିଃ) (ଅ. 16)
ପୃ॒ଥି॒ଵ୍ଯୈ ସ୍ଵାହା॒ ଽନ୍ତରି॑କ୍ଷାଯ॒ ସ୍ଵାହା॑ ଦି॒ଵେ ସ୍ଵାହା॒ ଽଗ୍ନଯେ॒ ସ୍ଵାହା॒ ସୋମା॑ଯ॒ ସ୍ଵାହା॒ ସୂର୍ଯା॑ଯ॒ ସ୍ଵାହା॑ ଚ॒ନ୍ଦ୍ରମ॑ସେ॒ ସ୍ଵାହା ଽହ୍ନେ॒ ସ୍ଵାହା॒ ରାତ୍ରି॑ଯୈ॒ ସ୍ଵାହ॒ର୍ଜଵେ॒ ସ୍ଵାହା॑ ସା॒ଧଵେ॒ ସ୍ଵାହା॑ ସୁକ୍ଷି॒ତ୍ଯୈ ସ୍ଵାହା᳚ କ୍ଷୁ॒ଧେ ସ୍ଵାହା॑ ଽଽଶିତି॒ମ୍ନେ ସ୍ଵାହା॒ ରୋଗା॑ଯ॒ ସ୍ଵାହା॑ ହି॒ମାଯ॒ ସ୍ଵାହା॑ ଶୀ॒ତାଯ॒ ସ୍ଵାହା॑ ଽଽତ॒ପାଯ॒ ସ୍ଵାହା ଽର॑ଣ୍ଯାଯ॒ ସ୍ଵାହା॑ ସୁଵ॒ର୍ଗାଯ॒ ସ୍ଵାହା॑ ଲୋ॒କାଯ॒ ସ୍ଵାହା॒ ସର୍ଵ॑ସ୍ମୈ॒ ସ୍ଵାହା᳚ ॥ 46 ॥
(ପୃ॒ଥି॒ଵ୍ଯା ଅ॒ଗ୍ନଯେ-ଽହ୍ନେ॒ ରାତ୍ରି॑ଯୈ॒ ଚତୁ॑ଶ୍ଚତ୍ଵାରିଗ୍ଂଶତ୍) (ଅ. 17)
ଭୁଵୋ॑ ଦେ॒ଵାନା॒-ଙ୍କର୍ମ॑ଣା॒-ଽପସ॒ର୍ତସ୍ଯ॑ ପ॒ଥ୍ଯା॑-ଽସି॒ ଵସୁ॑ଭି-ର୍ଦେ॒ଵେଭି॑-ର୍ଦେ॒ଵତ॑ଯା ଗାଯ॒ତ୍ରେଣ॑ ତ୍ଵା॒ ଛନ୍ଦ॑ସା ଯୁନଜ୍ମି ଵସ॒ନ୍ତେନ॑ ତ୍ଵ॒ର୍ତୁନା॑ ହ॒ଵିଷା॑ ଦୀକ୍ଷଯାମି ରୁ॒ଦ୍ରେଭି॑-ର୍ଦେ॒ଵେଭି॑-ର୍ଦେ॒ଵତ॑ଯା॒ ତ୍ରୈଷ୍ଟୁ॑ଭେନ ତ୍ଵା॒ ଛନ୍ଦ॑ସା ଯୁନଜ୍ମି ଗ୍ରୀ॒ଷ୍ମେଣ॑ ତ୍ଵ॒ର୍ତୁନା॑ ହ॒ଵିଷା॑ ଦୀକ୍ଷଯା-ମ୍ଯାଦି॒ତ୍ଯେଭି॑-ର୍ଦେ॒ଵେଭି॑-ର୍ଦେ॒ଵତ॑ଯା॒ ଜାଗ॑ତେନ ତ୍ଵା॒ ଛନ୍ଦ॑ସା ଯୁନଜ୍ମି ଵ॒ର୍॒ଷାଭି॑ସ୍ତ୍ଵ॒ର୍ତୁନା॑ ହ॒ଵିଷା॑ ଦୀକ୍ଷଯାମି॒ ଵିଶ୍ଵେ॑ଭି-ର୍ଦେ॒ଵେଭି॑-ର୍ଦେ॒ଵତ॒ଯା ଽଽନୁ॑ଷ୍ଟୁଭେନ ତ୍ଵା॒ ଛନ୍ଦ॑ସା ଯୁନଜ୍ମି [ ] 47
ଶ॒ରଦା᳚ ତ୍ଵ॒ର୍ତୁନା॑ ହ॒ଵିଷା॑ ଦୀକ୍ଷଯା॒ମ୍ଯଙ୍ଗି॑ରୋଭି-ର୍ଦେ॒ଵେଭି॑-ର୍ଦେ॒ଵତ॑ଯା॒ ପାଙ୍କ୍ତେ॑ନ ତ୍ଵା॒ ଛନ୍ଦ॑ସା ଯୁନଜ୍ମି ହେମନ୍ତଶିଶି॒ରାଭ୍ଯା᳚-ନ୍ତ୍ଵ॒ର୍ତୁନା॑ ହ॒ଵିଷା॑ ଦୀକ୍ଷଯା॒ମ୍ଯା-ଽହ-ନ୍ଦୀ॒କ୍ଷାମ॑ରୁହମୃ॒ତସ୍ଯ॒ ପତ୍ନୀ᳚-ଙ୍ଗାଯ॒ତ୍ରେଣ॒ ଛନ୍ଦ॑ସା॒ ବ୍ରହ୍ମ॑ଣା ଚ॒ର୍ତଗ୍ଂ ସ॒ତ୍ଯେ॑-ଽଧାଗ୍ଂ ସ॒ତ୍ଯମୃ॒ତେ॑-ଽଧାମ୍ ॥ ମ॒ହୀ ମୂ ॒ଷୁ >1ସୁ॒ତ୍ରାମା॑ଣ >2-ମି॒ହ ଧୃତି॒-ସ୍ସ୍ଵାହେ॒ହ ଵିଧୃ॑ତି॒-ସ୍ସ୍ଵାହେ॒ହ ରନ୍ତି॒-ସ୍ସ୍ଵାହେ॒ହ ରମ॑ତି॒-ସ୍ସ୍ଵାହା᳚ ॥ 48 ॥
(ଆନୁ॑ଷ୍ଟୁଭେନ ତ୍ଵା॒ ଛନ୍ଦ॑ସା ଯୁନ॒ଜ୍ମ୍ଯେ - କା॒ନ୍ନ ପ॑ଞ୍ଚା॒ଶଚ୍ଚ॑) (ଅ. 18)
ଈ॒କାଂ॒ରାଯ॒ ସ୍ଵାହେ-ଙ୍କୃ॑ତାଯ॒ ସ୍ଵାହା॒ କ୍ରନ୍ଦ॑ତେ॒ ସ୍ଵାହା॑ ଽଵ॒କ୍ରନ୍ଦ॑ତେ॒ ସ୍ଵାହା॒ ପ୍ରୋଥ॑ତେ॒ ସ୍ଵାହା᳚ ପ୍ର॒ପ୍ରୋଥ॑ତେ॒ ସ୍ଵାହା॑ ଗ॒ନ୍ଧାଯ॒ ସ୍ଵାହା᳚ ଘ୍ରା॒ତାଯ॒ ସ୍ଵାହା᳚ ପ୍ରା॒ଣାଯ॒ ସ୍ଵାହା᳚ ଵ୍ଯା॒ନାଯ॒ ସ୍ଵାହା॑ ଽପା॒ନାଯ॒ ସ୍ଵାହା॑ ସନ୍ଦୀ॒ଯମା॑ନାଯ॒ ସ୍ଵାହା॒ ସନ୍ଦି॑ତାଯ॒ ସ୍ଵାହା॑ ଵିଚୃ॒ତ୍ଯମା॑ନାଯ॒ ସ୍ଵାହା॒ ଵିଚୃ॑ତ୍ତାଯ॒ ସ୍ଵାହା॑ ପଲାଯି॒ଷ୍ଯମା॑ଣାଯ॒ ସ୍ଵାହା॒ ପଲା॑ଯିତାଯ॒ ସ୍ଵାହୋ॑ପରଗ୍ଗ୍​ସ୍ଯ॒ତେ ସ୍ଵାହୋପ॑ରତାଯ॒ ସ୍ଵାହା॑ ନିଵେକ୍ଷ୍ଯ॒ତେ ସ୍ଵାହା॑ ନିଵି॒ଶମା॑ନାଯ॒ ସ୍ଵାହା॒ ନିଵି॑ଷ୍ଟାଯ॒ ସ୍ଵାହା॑ ନିଷଥ୍ସ୍ଯ॒ତେ ସ୍ଵାହା॑ ନି॒ଷୀଦ॑ତେ॒ ସ୍ଵାହା॒ ନିଷ॑ଣ୍ଣାଯ॒ ସ୍ଵାହା॑- [ନିଷ॑ଣ୍ଣାଯ॒ ସ୍ଵାହା᳚, ଆ॒ସି॒ଷ୍ଯ॒ତେ ସ୍ଵାହା] 49
-ଽଽସିଷ୍ଯ॒ତେ ସ୍ଵାହା ଽଽସୀ॑ନାଯ॒ ସ୍ଵାହା॑ ଽଽସି॒ତାଯ॒ ସ୍ଵାହା॑ ନିପଥ୍ସ୍ଯ॒ତେ ସ୍ଵାହା॑ ନି॒ପଦ୍ଯ॑ମାନାଯ॒ ସ୍ଵାହା॒ ନିପ॑ନ୍ନାଯ॒ ସ୍ଵାହା॑ ଶଯିଷ୍ଯ॒ତେ ସ୍ଵାହା॒ ଶଯା॑ନାଯ॒ ସ୍ଵାହା॑ ଶଯି॒ତାଯ॒ ସ୍ଵାହା॑ ସମ୍ମୀଲିଷ୍ଯ॒ତେ ସ୍ଵାହା॑ ସ॒ମୀଂ​ଲଁ॑ତେ॒ ସ୍ଵାହା॒ ସମ୍ମୀ॑ଲିତାଯ॒ ସ୍ଵାହା᳚ ସ୍ଵଫ୍ସ୍ଯ॒ତେ ସ୍ଵାହା᳚ ସ୍ଵପ॒ତେ ସ୍ଵାହା॑ ସୁ॒ପ୍ତାଯ॒ ସ୍ଵାହା᳚ ପ୍ରଭୋଥ୍ସ୍ଯ॒ତେ ସ୍ଵାହା᳚ ପ୍ର॒ବୁଦ୍ଧ୍ଯ॑ମାନାଯ॒ ସ୍ଵାହା॒ ପ୍ରବୁ॑ଦ୍ଧାଯ॒ ସ୍ଵାହା॑ ଜାଗରିଷ୍ଯ॒ତେ ସ୍ଵାହା॒ ଜାଗ୍ର॑ତେ॒ ସ୍ଵାହା॑ ଜାଗରି॒ତାଯ॒ ସ୍ଵାହା॒ ଶୁଶ୍ରୂ॑ଷମାଣାଯ॒ ସ୍ଵାହା॑ ଶୃଣ୍ଵ॒ତେ ସ୍ଵାହା᳚ ଶ୍ରୁ॒ତାଯ॒ ସ୍ଵାହା॑ ଵୀକ୍ଷିଷ୍ଯ॒ତେ ସ୍ଵାହା॒ [ଵୀକ୍ଷିଷ୍ଯ॒ତେ ସ୍ଵାହା᳚, ଵୀକ୍ଷ॑ମାଣାଯ॒ ସ୍ଵାହା॒] 50
ଵୀକ୍ଷ॑ମାଣାଯ॒ ସ୍ଵାହା॒ ଵୀକ୍ଷି॑ତାଯ॒ ସ୍ଵାହା॑ ସଗ୍ଂହାସ୍ଯ॒ତେ ସ୍ଵାହା॑ ସ॒ଜିଂହା॑ନାଯ॒ ସ୍ଵାହୋ॒-ଜ୍ଜିହା॑ନାଯ॒ ସ୍ଵାହା॑ ଵିଵର୍ଥ୍ସ୍ଯ॒ତେ ସ୍ଵାହା॑ ଵି॒ଵର୍ତ॑ମାନାଯ॒ ସ୍ଵାହା॒ ଵିଵୃ॑ତ୍ତାଯ॒ ସ୍ଵାହୋ᳚-ତ୍ଥାସ୍ଯ॒ତେ ସ୍ଵାହୋ॒ତ୍ତିଷ୍ଠ॑ତେ॒ ସ୍ଵାହୋତ୍ଥି॑ତାଯ॒ ସ୍ଵାହା॑ ଵିଧଵିଷ୍ଯ॒ତେ ସ୍ଵାହା॑ ଵିଧୂନ୍ଵା॒ନାଯ॒ ସ୍ଵାହା॒ ଵିଧୂ॑ତାଯ॒ ସ୍ଵାହୋ᳚-ତ୍କ୍ରଗ୍ଗ୍​ସ୍ଯ॒ତେ ସ୍ଵାହୋ॒ତ୍କ୍ରାମ॑ତେ॒ ସ୍ଵାହୋତ୍କ୍ରା᳚ନ୍ତାଯ॒ ସ୍ଵାହା॑ ଚଙ୍କ୍ରମିଷ୍ଯ॒ତେ ସ୍ଵାହା॑ ଚଙ୍କ୍ର॒ମ୍ଯମା॑ଣାଯ॒ ସ୍ଵାହା॑ ଚଙ୍କ୍ରମି॒ତାଯ॒ ସ୍ଵାହା॑ କଣ୍ଡୂଯିଷ୍ଯ॒ତେ ସ୍ଵାହା॑ କଣ୍ଡୂ॒ଯମା॑ନାଯ॒ ସ୍ଵାହା॑ କଣ୍ଡୂଯି॒ତାଯ॒ ସ୍ଵାହା॑ ନିକଷିଷ୍ଯ॒ତେ ସ୍ଵାହା॑ ନି॒କଷ॑ମାଣାଯ॒ ସ୍ଵାହା॒ ନିକ॑ଷିତାଯ॒ ସ୍ଵାହା॒ ଯଦତ୍ତି॒ ତସ୍ମୈ॒ ସ୍ଵାହା॒ ଯ-ତ୍ପିବ॑ତି॒ ତସ୍ମୈ॒ ସ୍ଵାହା॒ ଯନ୍ମେହ॑ତି॒ ତସ୍ମୈ॒ ସ୍ଵାହା॒ ଯଚ୍ଛକୃ॑-ତ୍କ॒ରୋତି॒ ତସ୍ମୈ॒ ସ୍ଵାହା॒ ରେତ॑ସେ॒ ସ୍ଵାହା᳚ ପ୍ର॒ଜାଭ୍ଯ॒-ସ୍ସ୍ଵାହା᳚ ପ୍ର॒ଜନ॑ନାଯ॒ ସ୍ଵାହା॒ ସର୍ଵ॑ସ୍ମୈ॒ ସ୍ଵାହା᳚ ॥ 51 ॥
(ନିଷ॑ଣ୍ଣାଯ॒ ସ୍ଵାହା॑ - ଵୀକ୍ଷିଷ୍ଯ॒ତେ ସ୍ଵାହା॑ - ନି॒କଷ॑ମାଣାଯ॒ ସ୍ଵାହା॑ - ସ॒ପ୍ତଵିଗ୍ଂ॑ଶତିଶ୍ଚ) (ଅ. 19)
ଅ॒ଗ୍ନଯେ॒ ସ୍ଵାହା॑ ଵା॒ଯଵେ॒ ସ୍ଵାହା॒ ସୂର୍ଯା॑ଯ॒ ସ୍ଵାହ॒ର୍ତ-ମ॑ସ୍ଯୃ॒ତସ୍ଯ॒ର୍ତମ॑ସି ସ॒ତ୍ଯମ॑ସି ସ॒ତ୍ଯସ୍ଯ॑ ସ॒ତ୍ଯ-ମ॑ସ୍ଯୃ॒ତସ୍ଯ॒ ପନ୍ଥା॑ ଅସି ଦେ॒ଵାନା᳚-ଞ୍ଛା॒ଯା-ଽମୃତ॑ସ୍ଯ॒ ନାମ॒ ତ-ଥ୍ସ॒ତ୍ଯଂ-ଯଁ-ତ୍ତ୍ଵ-ମ୍ପ୍ର॒ଜାପ॑ତି॒ରସ୍ଯଧି॒ ଯଦ॑ସ୍ମିନ୍ ଵା॒ଜିନୀ॑ଵ॒ ଶୁଭ॒-ସ୍ସ୍ପର୍ଧ॑ନ୍ତେ॒ ଦିଵ॒-ସ୍ସୂର୍ଯେ॑ଣ॒ ଵିଶୋ॒-ଽପୋ ଵୃ॑ଣା॒ନଃ ପ॑ଵତେ କ॒ଵ୍ଯ-ନ୍ପ॒ଶୁ-ନ୍ନ ଗୋ॒ପା ଇର୍ଯଃ॒ ପରି॑ଜ୍ମା ॥ 52 ॥
(ଅ॒ଗ୍ନଯେ॑ ଵା॒ଯଵେ॒ ସୂର୍ଯା॑ଯା॒ - ଽଷ୍ଟାଚ॑ତ୍ଵାରିଗ୍ଂଶତ୍) (ଅ. 20)
(ପ୍ର॒ଜନ॑ନଂ - ପ୍ରାତସ୍ସଵ॒ନେ ଵୈ - ବ୍ର॑ହ୍ମଵା॒ଦିନ॒-ସ୍ସ ତ୍ଵା - ଅଙ୍ଗି॑ରସ॒- ଆପୋ॒ ଵୈ - ସୋମୋ॒ ଵୈ - ସ॑ହସ୍ରତ॒ମ୍ଯା - ତ୍ରି॑ - ର୍ଜ॒ମଦ॑ଗ୍ନିଃ - ସଂ​ଵଁଥ୍ସ॒ରୋ - ଦେ॒ଵସ୍ଯ॑ -ଵି॒ଭୂ - ରାଯ॑ନାଯା॒- ଽଗ୍ନଯେ॑ - ପୃଥି॒ଵ୍ଯା - ଅ॒ଗ୍ନଯେ॑ - ପୃଥି॒ଵ୍ଯୈ - ଭୁଵ॑ - ଈକାଂ॒ରାଯା॒ - ଗ୍ନଯେ॑ ଵା॒ଯଵେ॒ ସୂର୍ଯା॑ଯ - ଵିଗ୍ଂଶ॒ତିଃ )
(ପ୍ର॒ଜନ॑ନ॒ - ମଙ୍ଗି॑ରସଃ॒ - ସୋମୋ॒ ଵୈ - ପ୍ର॑ତିଗୃ॒ହ୍ଣାତି॑ - ଵି॒ଭୂ - ର୍ଵୀକ୍ଷ॑ମାଣାଯ॒ - ଦ୍ଵିପ॑ଞ୍ଚା॒ଶତ୍)
(ପ୍ର॒ଜନ॑ନ॒, ମ୍ପରି॑ଜ୍ମା)
॥ ହରିଃ॑ ଓମ୍ ॥
॥ କୃଷ୍ଣ ଯଜୁର୍ଵେଦୀଯ ତୈତ୍ତିରୀଯ ସଂହିତାଯାଂ ସପ୍ତମକାଣ୍ଡେ ପ୍ରଥମଃ ପ୍ରଶ୍ନ-ସ୍ସମାପ୍ତଃ ॥