2.1 - agnihotrabrāhmaṇam - kṛṣṇa yajurveda taittirīya brāhmaṇa pāṭhaḥ - aṅgiraso vai

kṛṣṇa yajurvedīya taittirīya brāhmaṇe dvitīyāṣṭake prathamaḥ prapāṭhakaḥ - agnihotrabrāhmaṇam
o-nnamaḥ paramātmane, śrī mahāgaṇapataye namaḥ,

śrī gurubhyo namaḥ | ha॒riḥ॒ om ||
anuvākaṃ 1 - agnihotrasyopoddhātaḥ

aṅgi̭raso॒ vai sa॒tramā̭sata | teṣā॒-mpṛśni̭-rgharma॒dhugā̭sīt | sarjī॒ṣeṇā̭jīvat | te᳚-'bruvann | kasmai॒ nu sa॒tramā᳚smahe | ye᳚-'syā oṣa̭dhī॒rna ja॒nayā̭ma॒ iti̭ | te di॒vo vṛṣṭi̭-masṛjanta | yāva̭nta-ssto॒kā a॒vāpa̭dyanta | tāva̭tī॒roṣa̭dhayo 'jāyanta || tā jā॒tāḥ pi॒taro̭ vi॒ṣeṇā̭limpann || 1 ||
tāsā᳚-ñja॒gdhvā rupya॒ntyait | te᳚-'bruvann | ka i॒dami॒ttha-ma̭ka॒riti̭ | va॒ya-mbhā̭ga॒dheya̭-mi॒cchamā̭nā॒ iti̭ pi॒taro᳚-'bruvann | kiṃ-vo~̭ bhāga॒dheya॒miti̭ | a॒gni॒ho॒tra e॒va no-'pya॒stvitya̭-bruvann | tebhya̭ e॒ta-dbhā̭ga॒dheya॒-mprāya̭cchann | yaddhu॒tvā ni॒mār​ṣṭi̭ | tato॒ vai ta oṣa̭dhīra-svadayann || ya e॒vaṃ-ve~da̭ || 2 ||
svada̭nte-'smā॒ oṣa̭dhayaḥ | te va॒thsamu॒-pāvā̭sṛjann | i॒da-nno̭ ha॒vya-mpradā̭pa॒yeti̭ | so᳚-'bravī॒dvaraṃ̭-vṛ~ṇai | daśa̭ mā॒ rātrī᳚rjā॒ta-nna do̭hann | ā॒sa॒ṅga॒va-mmā॒trā sa॒ha ca̭rā॒ṇīti̭ | tasmā᳚-dva॒thsa-ñjā॒ta-ndaśa॒ rātrī॒rna dṷhanti | ā॒sa॒ṅga॒va-mmā॒trā sa॒ha cara̭ti | vārḙvṛta॒gg॒hya̭sya | tasmā᳚-dva॒thsagṃ sagṃ̭sṛṣṭadha॒yagṃ ru॒dro ghātṷkaḥ | ati॒ hi sa॒ndhā-ndhaya̭ti || 3 ||

(a॒li॒mpa॒n - veda॒ - ghātṷka॒ eka̭-ñca) (a. 1)
anuvākaṃ 2 - agnihotranirūpaṇam

pra॒jāpa̭ti-ra॒gni-ma̭sṛjata | ta-mpra॒jā anva̭sṛjyanta | tama̭bhā॒ga upā᳚sta | so᳚-'sya pra॒jābhi॒-rapā᳚krāmat | tama̭va॒rurṷ-thsamā॒no-'nvai᳚t | tama̭va॒rudha॒-nnāśa̭knot | sa tapo̭ 'tapyata | so᳚-'gni-rupā̭rama॒tātā̭pi॒ vai sya pra॒jāpa̭ti॒riti̭ | sa ra॒rāṭā॒duda̭mṛṣṭa || 4 ||
ta-dghṛ॒tama̭bhavat | tasmā॒dyasya̭ dakṣiṇa॒taḥ keśā॒ unmṛ̭ṣṭāḥ | tā-ñjye᳚ṣṭhala॒kṣmī prā̭jāpa॒tyetyā̭huḥ | ya-dra॒rāṭā̭du॒damṛ̭ṣṭa | tasmā᳚-dra॒rāṭe॒ keśā॒ na sa̭nti | tada॒gnau prāgṛ̭hṇāt | tadvya̭ciki॒thsat | ju॒havā॒nī(3) mā hau॒ṣā(3)miti̭ | ta-dvi̭ciki॒thsāyai॒ janma̭ || ya e॒vaṃ-vi~॒dvān. vi̭ci॒kithsa̭ti || 5 ||
vasī̭ya e॒va cḙtayate || taṃ-vā~ga॒bhya̭vada-jju॒hudhīti̭ | so᳚-'bravīt | kastvama॒sīti̭ | svaiva te॒ vāgitya̭bravīt | so̭-'juho॒-thsvāheti̭ | tathsvā̭hākā॒rasya॒ janma̭ || ya e॒vagg​ svā̭hākā॒rasya॒ janma॒ veda̭ | ka॒roti̭ svāhākā॒reṇa̭ vī॒rya᳚m || yasyai॒vaṃ-vi~॒duṣaḥ̭ svāhākā॒reṇa॒ juhva̭ti || 6 ||
bhogā̭yai॒vāsya̭ hu॒ta-mbha̭vati || tasyā॒ āhṷtyai॒ purṷṣa-masṛjata | dvi॒tīya̭-majuhot | so-'śva̭-masṛjata | tṛ॒tīya̭-majuhot | sa gāma̭sṛjata | ca॒tu॒rtha-ma̭juhot | so-'vi̭masṛjata | pa॒ñca॒ma-ma̭juhot | so̭-'jāma̭sṛjata || 7 ||
so᳚-'gni-ra̭bibhet | āhṷtībhi॒rvai mā᳚-''pno॒tīti̭ | sa pra॒jāpa̭ti॒-mpunaḥ॒ prāvi̭śat | ta-mpra॒jāpa̭ti-rabravīt | jāya॒sveti̭ | so᳚-'bravīt | ki-mbhā̭ga॒dheya̭ma॒bhi ja̭niṣya॒ iti̭ | tubhya̭me॒vedagṃ hṷ̄yātā॒ itya̭bravīt | sa e॒ta-dbhā̭ga॒dheya̭ma॒bhya̭jāyata | yada̭gniho॒tram || 8 ||
tasmā̭dagniho॒tra-mṷcyate || taddhū॒yamā̭na-mādi॒tyo᳚-'bravīt | mā haṷṣīḥ | u॒bhayo॒rvai-nā̭ve॒taditi̭ | so᳚-'gni-ra̭bravīt | ka॒tha-nnaṷ hoṣya॒ntīti̭ | sā॒yame॒va tubhya̭-ñju॒havanṋ | prā॒tarmahya॒-mitya̭bravīt | tasmā̭da॒gnayḙ sā॒yagṃ hṷ̄yate | sūryā̭ya prā॒taḥ || 9 ||
ā॒gne॒yī vai rātriḥ̭ | ai॒ndramahaḥ̭ | yadanṷdite॒ sūrye᳚ prā॒tarjṷhu॒yāt | u॒bhaya̭me॒vāgne॒yagg​ syā᳚t | udi̭te॒ sūrye᳚ prā॒tarjṷhoti | tathā॒-'gnayḙ sā॒yagṃ hṷ̄yate | sūryā̭ya prā॒taḥ || rātriṃ॒-vā~ anṷ pra॒jāḥ pra jā̭yante | ahnā॒ prati̭ tiṣṭhanti | yathsā॒ya-ñju॒hoti̭ || 10 ||
praiva tena̭ jāyate | udi̭te॒ sūrye᳚ prā॒ta-rjṷhoti | pratye॒va tena̭ tiṣṭhati || pra॒jāpa̭tira-kāmayata॒ prajā̭ye॒yeti̭ | sa e॒tada̭gniho॒tra-mmi̭thu॒na-ma̭paśyat | tadudi̭te॒ sūryḙ-'juhot | yajṷṣā॒ 'nyat | tū॒ṣṇīma॒nyat | tato॒ vai sa prājā̭yata | yasyai॒vaṃ-vi~॒duṣa॒ udi̭te॒ sūrye᳚-'gniho॒tra-ñjuhva̭ti || 11 ||
praiva jā̭yate | atho॒ yathā॒ divā᳚ prajā॒nanneti̭ | tā॒dṛge॒va tat || atho॒ khalvā̭huḥ | yasya॒ vai dvau puṇyaṷ gṛ॒he vasa̭taḥ | yastayo̭ra॒nyagṃ rā॒dhaya̭tya॒nya-nna | u॒bhau vāva sa tāvṛ̭ccha॒tīti̭ | a॒gniṃ-vā~vādi॒tya-ssā॒ya-mpravi̭śati | tasmā̭da॒gnirdū॒rānnakta̭-ndadṛśe |

u॒bhe hi teja̭sī sa॒pandyḙte || 12 ||
u॒dyantaṃ॒-vā~vādi॒tya-ma॒gniranṷ sa॒māro̭hati | tasmā᳚ddhū॒ma e॒vāgnerdivā̭ dadṛśe | yada॒gnayḙ sā॒ya-ñjṷhu॒yāt | ā sūryā̭ya vṛścyeta | yathsūryā̭ya prā॒ta-rjṷhu॒yāt | ā-'gnayḙ vṛścyeta | de॒vatā᳚bhya-ssa॒mada̭-ndaddhyāt | a॒gnirjyoti॒-rjyoti॒-ssūrya॒-ssvāhetye॒va sā॒yagṃ ho̭ta॒vya᳚m | sūryo॒ jyoti॒-rjyoti̭ra॒gni-ssvāheti̭ prā॒taḥ | tatho॒bhābhyāgṃ̭ sā॒yagṃ hṷ̄yate || 13 ||
u॒bhābhyā᳚-mprā॒taḥ | na de॒vatā᳚bhya-ssa॒mada̭-ndadhāti || a॒gnirjyoti॒rityā̭ha | a॒gnirvai rḙto॒dhāḥ || pra॒jā jyoti॒rityā̭ha | pra॒jā e॒vāsmai॒ pra ja̭nayati || sūryo॒ jyoti॒rityā̭ha | pra॒jāsve॒va prajā̭tāsu॒ reto̭ dadhāti || jyoti̭ra॒gni-ssvāhetyā̭ha | pra॒jā e॒va prajā̭tā a॒syā-mprati̭ṣṭhāpayati || 14 ||
tū॒ṣṇīmutta̭rā॒-māhṷti-ñjuhoti | mi॒thu॒na॒tvāya॒ prajā᳚tyai || yadudi̭te॒ sūrye᳚ prā॒ta-rjṷhu॒yāt | yathā-'ti̭thaye॒ pradrṷtāya śū॒nyāyā̭vasa॒thā-yā̭hā॒ryagṃ̭ hara̭nti | tā॒dṛge॒va tat |

kvāha॒ tata॒sta-dbhava॒tītyā̭huḥ | yathsa na veda̭ | yasmai॒ taddhara॒ntīti̭ | tasmā॒-dyadaṷṣa॒sa-ñju॒hoti̭ | tade॒va sa̭pra॒nti | atho॒ yathā॒ prārtha̭mauṣa॒sa-mpa̭ri॒ veve᳚ṣṭi | tā॒dṛge॒va tat || 15 ||

(a॒mṛ॒ṣṭa॒ - vi॒ci॒kithsa̭ti॒ - juhva̭ - tya॒jāma̭sṛja - tāgniho॒tragṃ - sūryā̭ya prā॒ta--r ju॒hoti॒ - juhva̭ti - sa॒mpadyḙte - hūyate - sthāpayati - sampra॒ti dve ca̭) (a. 2)
anuvākaṃ 3 - upayokṣyamāṇasya haviṣa-ssaṃskāraḥ

ru॒dro vā e॒ṣaḥ | yada॒gniḥ | patnī᳚ sthā॒lī | yanmaddhye॒-'gne-ra̭dhi॒śraye᳚t | ru॒drāya॒ patnī॒mapi̭ daddhyāt | pra॒māyṷkā syāt | udī॒co-'ṅgā̭rānni॒rūhyādhi̭ śrayati | patni̭yai gopī॒thāya̭ || vya̭ntān karoti | tathā॒ patnya-pra̭māyukā bhavati || 16 ||
gha॒rmo vā e॒ṣo-'śā᳚ntaḥ | aha̭rahaḥ॒ pravṛ̭jyate | yada̭gniho॒tram | prati̭ṣiñce-tpa॒śukā̭masya | śā॒ntami̭va॒ hi pa̭śa॒vya᳚m || na prati̭ṣiñce-dbrahmavarca॒sakā̭masya | sami̭ddhamiva॒ hi bra̭hmavarca॒sam || atho॒ khalṷ | pra॒ti॒ṣicya̭me॒va | yat-pra̭tiṣi॒ñcati̭ || 17 ||
tat-pa̭śa॒vya᳚m | yajju॒hoti̭ | tadbra̭hmavarca॒si | u॒bhaya̭me॒vākaḥ̭ || pracyṷtaṃ॒-vā~ e॒tada॒smā-llo॒kāt | aga̭ta-ndevalo॒kam | yacchṛ॒tagṃ ha॒virana̭bhighāritam | a॒bhidyo̭tayati | a॒bhyḙvaina̭dghārayati | atho̭ deva॒traivaina̭-dgamayati || 18 ||
parya̭gni karoti | rakṣa̭sā॒-mapa̭hatyai || triḥ parya̭gni karoti | tryā̭vṛ॒ddhi ya॒jñaḥ | atho̭ meddhya॒tvāya̭ || yat-prā॒cīna̭-mudvā॒saye᳚t | yaja̭mānagṃ śu॒cā 'rpa̭yet | ya-dda̭kṣi॒ṇā | pi॒tṛ॒de॒va॒tyagg̭ syāt | yat-pra॒tyak || 19 ||
patnīgṃ̭ śu॒cā 'rpa̭yet | u॒dī॒cīna॒-mudvā̭sayati | e॒ṣā vai dḙvamanu॒ṣyāṇāgṃ̭ śā॒ntā dik | tāme॒vaina॒danū-dvā̭sayati॒ śāntyai᳚ || vartma̭ karoti | ya॒jñasya॒ santa̭tyai || niṣṭa̭pati | upai॒va tathstṛ̭ṇāti || ca॒turunna̭yati | catṷṣpādaḥ pa॒śavaḥ̭ || 20 ||
pa॒śūne॒vā-va̭rundhe || sarvā᳚n-pū॒rṇānunna̭yati | sarve॒ hi puṇyā̭ rā॒ddhāḥ || a॒nūca॒ unna̭yati | pra॒jāyā̭ anūcīna॒tvāya̭ | a॒nūcye॒vāsya̭ pra॒jā 'rdhṷkā bhavati || sa-mmṛ̭śati॒ vyāvṛ̭ttyai || nāho᳚ṣya॒nnupa̭ sādayet | yadaho᳚ṣyannupa sā॒daye᳚t | yathā॒ 'nyasmā̭ upani॒dhāya̭ || 21 ||
a॒nyasmai᳚ pra॒yaccha̭ti | tā॒dṛge॒va tat | ā-'smai̭ vṛścyeta | yade॒va gār​ha̭patye-'dhi॒śraya̭ti | tena॒ gār​ha̭patya-mprīṇāti || a॒gnira̭bibhet | āhṷtayo॒ mā-'tye᳚ṣya॒ntīti̭ | sa e॒tāgṃ sa॒midha̭-mapaśyat | tāmā-'dha̭tta | tato॒ vā a॒gnāvāhṷtayo-'ddhriyanta || 22 ||
yadḙnagṃ sa॒maya̭cchat | tathsa॒midhaḥ̭ sami॒ttvam | sa॒midha॒māda̭dhāti | same॒vainaṃ̭-ya~cchati | āhṷtīnā॒-ndhṛtyai᳚ | atho̭ agniho॒trame॒veddhmava̭t-karoti | āhṷtīnā॒-mprati̭ṣṭhityai || bra॒hma॒vā॒dino̭ vadanti | yadekāgṃ̭ sa॒midha̭mā॒dhāya॒ dve āhṷtī ju॒hoti̭ | atha॒ kasyāgṃ̭ sa॒midhi̭ dvi॒tīyā॒-māhṷti-ñjuho॒tīti̭ || 23 ||
ya-ddve sa॒midhā̭vāda॒ddhyāt | bhrātṛ̭vyamasmai janayet | ekāgṃ̭ sa॒midha̭mā॒dhāya̭ | yajṷṣā॒ 'nyāmāhṷti-ñjuhoti | u॒bhe e॒va sa॒midva̭tī॒ āhṷtī juhoti | nāsmai॒ bhrātṛ̭vya-ñjanayati || ādī᳚ptāyā-ñjuhoti | sami̭ddhamiva॒ hi bra̭hmavarca॒sam | atho॒ yathā-'ti̭thi॒-ñjyoti̭ṣkṛ॒tvā pa̭ri॒veve᳚ṣṭi | tā॒dṛge॒va tat || ca॒turunna̭yati | dvirjṷhoti | tasmā᳚-ddvi॒pā-ccatṷṣpādamatti | atho᳚ dvi॒padye॒va catṷṣpadaḥ॒ prati̭ṣṭhāpayati || 24 ||

(bha॒va॒ti॒ - pra॒ti॒ṣi॒ñcati̭ - gamayati - pra॒tyak - pa॒śava̭ - upani॒dhā - yā᳚dghriya॒n - teti॒ - tacca॒tvāri̭ ca) (a. 3)
anuvākaṃ 4 - upayuktasya haviṣa-ssaṃskāraḥ

u॒tta॒rāva̭tīṃ॒-vai~ de॒vā āhṷti॒majṷhavuḥ | avā̭cī॒masṷrāḥ | tato̭ de॒vā abha̭vann | parā-'sṷrāḥ | ya-ṅkā॒mayḙta॒ vasī̭yān-thsyā॒diti̭ | kanī̭ya॒stasya॒ pūrvagṃ̭ hu॒tvā | utta̭ra॒-mbhūyo̭ juhuyāt | e॒ṣā vā ṷtta॒rāva॒tyāhṷtiḥ | tā-nde॒vā a̭juhavuḥ | tata॒stḙ-'bhavann || 25 ||
yasyai॒va-ñjuhva̭ti | bhava̭tye॒va || ya-ṅkā॒mayḙta॒ pāpī̭yān-thsyā॒diti̭ | bhūya॒stasya॒ pūrvagṃ̭ hu॒tvā | utta̭ra॒-ṅkanī̭yo juhuyāt | e॒ṣā vā avā॒cyāhṷtiḥ | tāmasṷrā ajuhavuḥ | tata॒ste parā̭-'bhavann | yasyai॒va-ñjuhva̭ti | parai॒va bha̭vati || 26 ||
hu॒tvopa̭ sādaya॒tyajā̭mitvāya | atho॒ vyāvṛ̭ttyai || gār​ha̭patya॒-mpratī᳚kṣate | ana̭nuddhyāyina-me॒vaina̭-ṅkaroti || a॒gni॒ho॒trasya॒ vai sthā॒ṇura̭sti | taṃ-ya~ ṛ॒cchet | ya॒jña॒sthā॒ṇumṛ̭cchet | e॒ṣa vā a̭gniho॒trasya̭ sthā॒ṇuḥ | yat-pūrvā-''hṷtiḥ | tāṃ-ya~dutta̭rayā॒-'bhi jṷhu॒yāt || 27 ||
ya॒jña॒sthā॒ṇu-mṛ̭cchet | a॒ti॒hāya॒ pūrvā॒māhṷti-ñjuhoti | ya॒jña॒sthā॒ṇume॒va pari̭ vṛṇakti | atho॒ bhrātṛ̭vyame॒vāptvā 'ti̭krāmati || a॒vā॒cīnagṃ̭ sā॒yamupa̭ mār​ṣṭi | reta̭ e॒va ta-dda̭dhāti | ū॒rdhva-mprā॒taḥ | pra ja̭nayatye॒va tat || bra॒hma॒vā॒dino̭ vadanti | ca॒turunna̭yati || 28 ||
dvirjṷhoti | atha॒ kva̭ dve āhṷtī bhavata॒ iti̭ | a॒gnau vai᳚śvāna॒ra iti̭ brūyāt | e॒ṣa vā a॒gnirvai᳚śvāna॒raḥ | yadbrā᳚hma॒ṇaḥ | hu॒tvā dviḥ prāśñā̭ti | a॒gnāve॒va vai᳚śvāna॒re dve āhṷtī juhoti || dvirju॒hoti̭ | dvirnimā᳚r​ṣṭi | dviḥ prāśñā̭ti || 29 ||
ṣaṭ-thsampa̭dyante | ṣaḍvā ṛ॒tavaḥ̭ | ṛ॒tūne॒va prī̭ṇāti | bra॒hma॒vā॒dino̭ vadanti | ki॒-nde॒va॒tya̭-magniho॒tramiti̭ | vai॒śva॒de॒vamiti̭ brūyāt | ya-dyajṷṣā ju॒hoti̭ | tadai᳚ndrā॒gnam | yat-tū॒ṣṇīm | tat-prā̭jāpa॒tyam || 30 ||
yanni॒mār​ṣṭi̭ | tadoṣa̭dhīnām | yaddvi॒tīya᳚m | tat-pi̭tṛ॒ṇām | yat-prāśñā̭ti | ta-dgarbhā̭ṇām | tasmā॒-dgarbhā॒ ana̭śnanto vardhante | yadā॒cāma̭ti | tanma̭nu॒ṣyā̭ṇām || uda̭mparyā॒vṛtyācā̭mati || 31 ||
ā॒tmano̭ gopī॒thāya̭ || nirṇḙnekti॒ śuddhyai᳚ || niṣṭa̭pati sva॒gākṛ̭tyai | u-ddi̭śati | sa॒pta॒r॒ṣīne॒va prī̭ṇāti || da॒kṣi॒ṇā pa॒ryāva̭rtate | svame॒va vī॒rya̭manṷ pa॒ryāva̭rtate | tasmā॒-ddakṣi॒ṇo-'rdha̭ ā॒tmano̭ vī॒ryā̭vattaraḥ | atho̭ ādi॒tyasyai॒vāvṛta॒manṷ pa॒ryāva̭rtate || hu॒tvopa॒ sami̭ndhe || 32 ||
bra॒hma॒va॒rca॒sasya॒ sami̭ddhyai || na ba॒ra॒ḥiranu॒ pra ha̭ret | asagg̭sthito॒ vā e॒ṣa ya॒jñaḥ | yada̭gniho॒tram | yada̭nu pra॒hare᳚t | ya॒jñaṃ-vi~cchi̭ndyāt | tasmā॒nnānṷ pra॒hṛtya᳚m | ya॒jñasya॒ santa̭tyai || a॒po ni na̭yati | a॒va॒bhṛ॒thasyai॒va rū॒pama̭kaḥ || 33 ||

(a॒bha॒va॒n - bha॒va॒ti॒ - ju॒hu॒yān - na̭yati - mār​ṣṭi॒ dviḥ prāśñā̭ti - prājāpa॒tya - mācā̭matī - ndhe - 'kaḥ) (a. 4)
anuvākaṃ 5 - kāmyāni homadravyāṇi

bra॒hma॒vā॒dino̭ vadanti | a॒gni॒ho॒traprā̭yaṇā ya॒jñāḥ | ki-mprā̭yaṇa-magniho॒tramiti̭ | va॒thso vā a̭gniho॒trasya॒ prāya̭ṇam | a॒gni॒ho॒traṃ-ya~̭jñānā᳚m || tasya̭ pṛthi॒vī sadaḥ̭ | a॒ntari̭kṣa॒-māgnī᳚ddhram | dyaur-ha̭vi॒rdhāna᳚m | di॒vyā āpaḥ॒ prokṣa̭ṇayaḥ | oṣa̭dhayo ba॒ra॒ḥiḥ || 34 ||

vana॒spata̭ya i॒ddhmaḥ | diśaḥ̭ pari॒dhayaḥ̭ | ā॒di॒tyo yūpaḥ̭ | yaja̭mānaḥ pa॒śuḥ | sa॒mu॒dro̭-'vabhṛ॒thaḥ | saṃ॒​va~॒thsa॒ra-ssva̭gākā॒raḥ | tasmā॒dāhi̭tāgne॒-ssarva̭me॒va ba̭r​hi॒ṣya̭-nda॒tta-mbha̭vati | ya-thsā॒ya-ñju॒hoti̭ | rātri̭me॒va tena̭ dakṣi॒ṇyā᳚-ṅkurute | yat-prā॒taḥ || 35 ||
aha̭re॒va tena̭ dakṣi॒ṇya̭-ṅkurute | yat-tato॒ dadā̭ti | sā dakṣi̭ṇā || yāva̭nto॒ vai de॒vā ahṷta॒mādanṋ | te parā̭-'bhavann | ta e॒tada̭gniho॒tragṃ sarva̭syai॒va sa̭mava॒dāyā̭juhavuḥ | tasmā̭dāhuḥ | a॒gni॒ho॒traṃ-vai~ de॒vā gṛ॒hāṇā॒-nniṣkṛ̭ti-mapaśya॒nniti̭ | ya-thsā॒ya-ñju॒hoti̭ | rātri̭yā e॒va taddhu॒tādyā̭ya || 36 ||
yaja̭māna॒syā-pa̭rābhāvāya | yat-prā॒taḥ | ahna̭ e॒va taddhu॒tādyā̭ya | yaja̭māna॒syā-pa̭rābhāvāya | yat-tato॒-'śnāti̭ | hu॒tame॒va tat || dvayoḥ॒ paya̭sā juhuyāt-pa॒śukā̭masya | e॒tadvā a̭gniho॒tra-mmi̭thu॒nam | ya e॒vaṃ-ve~da̭ | pra pra॒jayā̭ pa॒śubhi̭-rmithu॒nai-rjā̭yate || 37 ||
i॒māme॒va pūrva̭yā du॒he | a॒mūmutta̭rayā | a॒dhi॒śrityotta̭ra॒mā na̭yati | yonā̭ve॒va ta-dretaḥ̭ siñcati pra॒jana̭ne || ājyḙna juhuyā॒t-teja̭skāmasya | tejo॒ vā ājya᳚m | te॒ja॒svyḙva bha̭vati | paya̭sā pa॒śukā̭masya | e॒tadvai pa̭śū॒nāgṃ rū॒pam | rū॒peṇai॒vāsmai̭ pa॒śūnava̭ rundhe || 38 ||
pa॒śu॒māne॒va bha̭vati | da॒ddhnendri॒ya kā̭masya | i॒ndri॒yaṃ-vai~ dadhi̭ | i॒ndri॒yā॒vyḙva bha̭vati | ya॒vā॒gvā᳚ grāma̭kāmasyauṣa॒dhā vai ma̭nu॒ṣyāḥ᳚ | bhā॒ga॒dheyḙnai॒vāsmai̭ sajā॒tānava̭-rundhe | grā॒myḙva bha̭vati ||

aya̭jño॒ vā e॒ṣaḥ | yo̭sā॒mā || 39 ||
ca॒turunna̭yati | catṷrakṣaragṃ rathanta॒ram | ra॒tha॒nta॒rasyai॒ṣa varṇaḥ̭ | u॒parī̭va harati | a॒ntari̭kṣaṃ-vā~made॒vyam | vā॒ma॒de॒vyasyai॒ṣa varṇaḥ̭ | dvirjṷhoti | dvya̭kṣara-mbṛ॒hat | bṛ॒ha॒ta e॒ṣa varṇaḥ̭ | a॒gni॒ho॒trame॒va ta-thsāma̭nvat-karoti || 40 ||
yo vā a̭gniho॒trasyo̭pa॒sado॒ veda̭ | upai̭namupa॒sado̭ namanti | vi॒ndata̭ upasa॒ttāra᳚m | u॒nnīyopa̭ sādayati | pṛ॒thi॒vīme॒va prī̭ṇāti | ho॒ṣyannupa̭ sādayati | a॒ntari̭kṣame॒va prī̭ṇāti | hu॒tvopa̭ sādayati | diva̭me॒va prī̭ṇāti | e॒tā vā a̭gniho॒trasyo̭pa॒sadaḥ̭ || 41 ||
ya e॒vaṃ-ve~da̭ | upai̭na-mupa॒sado̭ namanti | vi॒ndata̭ upasa॒ttāra᳚m || yo vā a̭gniho॒trasyāśrā̭vita-mpra॒tyāśrā̭vita॒gṃ॒ hotā̭ra-mbra॒hmāṇaṃ̭-va~ṣaṭkā॒raṃ-ve~da̭ | tasya॒ tvḙva hu॒tam | prā॒ṇo vā a̭gniho॒trasyāśrā̭vitam | a॒pā॒naḥ pra॒tyāśrā̭vitam | mano॒ hotā᳚ | cakṣṷ-rbra॒hmā | ni॒me॒ṣo va̭ṣaṭkā॒raḥ || 42 ||
ya e॒vaṃ-ve~da̭ | tasya॒ tvḙva hu॒tam || sā॒yaṃ॒-yā~vā̭naśca॒ vai de॒vāḥ prā̭ta॒ryāvā̭ṇaścā-gniho॒triṇo̭ gṛ॒hamāga̭cchanti | tān. yanna ta॒rpaye᳚t | pra॒jayā᳚-'sya pa॒śubhi॒rvi ti̭ṣṭherann | yatta॒rpaye᳚t | tṛ॒ptā ḙna-mpra॒jayā̭ pa॒śubhi̭starpayeyuḥ || sa॒jūrde॒vai-ssā॒yaṃ-yā~va̭bhi॒riti̭ sā॒yagṃ sa-mmṛ̭śati | sa॒jūrde॒vaiḥ prā॒taryāva̭bhi॒riti̭ prā॒taḥ | ye cai॒va de॒vā-ssā̭yaṃ॒-yā~vā̭no॒ ye ca̭ prāta॒ryāvā̭ṇaḥ || 43 ||
tāne॒vobhayāg̭ starpayati | ta ḙna-ntṛ॒ptāḥ pra॒jayā̭ pa॒śubhi̭ starpayanti || a॒ru॒ṇo ha̭ smā॒haupa̭veśiḥ | a॒gni॒ho॒tra e॒vāhagṃ sā॒ya-mprā̭ta॒rvajra॒-mbhrātṛ̭vyebhyaḥ॒ pra ha̭rāmi | tasmā॒-nmatpāpī̭yāgṃso॒ bhrātṛ̭vyā॒ iti̭ | ca॒turunna̭yati | dvirjṷhoti | sa॒mi-thsa̭pta॒mī | sa॒ptapa̭dā॒ śakva̭rī | śā॒kva॒ro vajraḥ̭ | a॒gni॒ho॒tra e॒va tathsā॒ya-mprā̭ta॒rvajraṃ॒-ya~ja̭māno॒ bhrātṛ̭vyāya॒ pra ha̭rati | bhava̭tyā॒tmanā᳚ | parā᳚-'sya॒ bhrātṛ̭vyo bhavati || 44 ||

(ba॒r॒hiḥ - prā॒ta--r hu॒tādyā̭ya - jāyate - rundhe - 'sā॒mā - ka̭ro - tye॒tā vā a̭gniho॒trasyo̭ pa॒sado̭ - vaṣaṭkā॒ra - śca̭ prāta॒ryāvā̭ṇo॒ - vajra॒strīṇi̭ ca) (a. 5)
anuvākaṃ 6 - abhyuddravaṇam, homābhāvapratīkāraśca

pra॒jāpa̭ti-rakāmaya-tātma॒n vanmḙ jāye॒teti̭ | so̭-'juhot | tasyā᳚tma॒n vada̭jāyata | a॒gni-rvā॒yurā̭-di॒tyaḥ | te᳚-'bruvann | pra॒jāpa̭ti-rahauṣī-dātma॒n-vanmḙ jāye॒teti̭ | tasya̭ va॒yama̭janiṣmahi | jāya̭tā-nna ātma॒n-vaditi॒ tḙ-'juhavuḥ | prā॒ṇānā̭ma॒gniḥ | ta॒nuvai̭ vā॒yuḥ || 45 ||
cakṣṷṣa ādi॒tyaḥ | teṣāgṃ̭ hu॒tāda̭jāyata॒ gaure॒va || tasyai॒ paya̭si॒ vyāya̭cchanta | mama̭ hu॒tāda̭jani॒ mameti̭ | te pra॒jāpa̭ti-mpra॒śnamā̭yann | sa ā̭di॒tyo᳚-'gni-ma̭bravīt | ya॒ta॒ro nau॒ jayā᳚t | tannaṷ sa॒hāsa॒diti̭ | kasyai ko-'haṷṣī॒diti̭ pra॒jāpa̭ti-rabravī॒t-kasyai ka॒ iti̭ | prā॒ṇānā̭ma॒hamitya॒gniḥ || 46 ||
ta॒nuvā̭ a॒hamiti̭ vā॒yuḥ | cakṣṷṣo॒-'hamityā̭di॒tyaḥ | ya e॒va prā॒ṇānā॒mahaṷṣīt | tasya̭ hu॒tāda̭ja॒nīti̭ | a॒gner-hu॒tāda̭ja॒nīti̭ | tada̭gniho॒trasyā᳚-gnihotra॒tvam | gaurvā a̭gniho॒tram | ya e॒vaṃ-ve~da॒ gaura̭gniho॒tramiti̭ | prā॒ṇā॒pā॒nābhyā̭-me॒vāgnigṃ sama̭rdhayati | avya̭rdhukaḥ prāṇāpā॒nābhyā᳚-mbhavati || 47 ||
ya e॒vaṃ-ve~da̭ || tau vā॒yura̭bravīt | anu॒ mā bha̭jata॒miti̭ | yade॒va gār​ha̭patye-'dhi॒śrityā̭-hava॒nīya̭-ma॒bhyṷddravāṋ | tena॒ tvā-mprī̭ṇā॒nitya̭-brūtām | tasmā॒-dya-dgār​ha̭patye-'dhi॒-śrityā̭hava॒nīya̭-ma॒bhyṷddrava̭ti | vā॒yume॒va tena̭ prīṇāti || pra॒jāpa̭ti-rde॒vatā᳚-ssṛ॒jamā̭naḥ | a॒gnime॒va de॒vatā̭nā-mpratha॒ma-ma̭sṛjata | so᳚-'nyadā̭la॒m-bhya̭mavi̭ttvā || 48 ||
pra॒jāpa̭tima॒bhi pa॒ryāva̭rtata | sa mṛ॒tyo-ra̭bibhet | so̭-'mumā̭di॒tya-mā॒tmano॒ nira̭mimīta | tagṃhu॒tvā parā᳚mpa॒ryāva̭rtata | tato॒ vai sa mṛ॒tyumapā̭jayat | apa̭ mṛ॒tyu-ñja̭yati | ya e॒vaṃ-ve~da̭ || tasmā॒-dyasyai॒vaṃ-vi~॒duṣaḥ̭ | u॒taikā॒hamu॒ta dvya॒ha-nna juhva̭ti | hu॒tame॒vāsya̭ bhavati | a॒sau hyā̭di॒tyo᳚-'gniho॒tram || 49 ||

(ta॒nuvai̭ vā॒yu - ra॒gni--r bha̭va॒ - tyavi̭ttvā - bhava॒tyeka̭-ñca) (a. 6)
anuvākaṃ 7 - haviṣa-ssarvadevatāsambandhena praśaṃsā

rau॒dra-ṅgavi̭ | vā॒ya॒vya̭-mupa̭sṛṣṭam | ā॒śvi॒na-ndu॒hyamā̭nam | sau॒mya-ndu॒gdham | vā॒ru॒ṇamadhi̭śritam | vai॒śva॒de॒vā bhi॒ndavaḥ̭ | pau॒ṣṇamuda̭ntam | sā॒ra॒sva॒taṃ-vi~॒ṣyanda̭mānam | mai॒tragṃ śaraḥ̭ | dhā॒turudvā̭sitam | bṛha॒spate॒runnī̭tam | sa॒vi॒tuḥ prakrā᳚ntam | dyā॒vā॒pṛ॒thi॒vyagg̭ hri॒yamā̭ṇam | ai॒ndrā॒gna-mupa̭sannam | a॒gneḥ pūrvā ''hṷtiḥ | pra॒jāpa̭te॒-rutta̭rā | ai॒ndragṃ hu॒tam || 50 ||

(udvā̭sitagṃ sa॒pta ca̭) (a. 7)
anuvākaṃ 8 - dohanaprakāro-'gnihotrahotraśca

da॒kṣi॒ṇa॒ta upa̭ sṛjati | pi॒tṛ॒lo॒kame॒va tena̭ jayati || prācī॒māva̭rtayati | de॒va॒lo॒kame॒va tena̭ jayati | udī̭cīmā॒vṛtya̭ dogdhi | ma॒nu॒ṣya॒lo॒kame॒va tena̭ jayati || pūrvaṷ duhyājjye॒ṣṭhasya̭ jyaiṣṭhine॒yasya̭ | yo vā̭ ga॒taśrī॒-ssyāt | apa̭rau duhyāt-kani॒ṣṭhasya̭ kāniṣṭhine॒yasya̭ | yo vā॒ bubhṷ̄ṣet || 51 ||
na sa-mmṛ̭śati | pā॒pa॒va॒sya॒sasya॒ vyāvṛ̭ttyai || vā॒ya॒vyaṃ̭-vā~ e॒tadupa̭sṛṣṭam | ā॒śvi॒na-ndu॒hyamā̭nam | mai॒tra-ndu॒gdham | a॒rya॒mṇa ṷdvā॒syamā̭nam | tvā॒ṣṭra-mṷnnī॒yamā̭nam | bṛha॒spate॒-runnī̭tam | sa॒vi॒tuḥ prakrā᳚ntam | dyā॒vā॒pṛ॒thi॒vyagg̭ hri॒yamā̭ṇam || 52 ||
ai॒ndrā॒gnamupa̭ sāditam | sarvā᳚bhyo॒ vā e॒ṣa de॒vatā᳚bhyo juhoti | yo᳚-'gniho॒tra-ñju॒hoti̭ || yathā॒ khalu॒ vai dhe॒nu-ntī॒rthe ta॒rpaya̭ti | e॒vama̭gniho॒trī yaja̭māna-ntarpayati | tṛpya̭ti pra॒jayā̭ pa॒śubhiḥ̭ | prasṷva॒rgaṃ-lo~॒ka-ñjā̭nāti | paśya̭ti pu॒tram | paśya̭ti॒ pautra᳚m | pra pra॒jayā̭ pa॒śubhi̭-rmithu॒nai-rjā̭yate | yasyai॒vaṃ-vi~॒duṣo᳚-'gniho॒tra-ñjuhva̭ti | ya ṷ caina de॒vaṃ-ve~da̭ || 53 ||

(babhṷ̄ṣe- ddhri॒yamā̭ṇaṃ - jāyate॒ dve ca̭) (a. 8)
anuvākaṃ 9 - agnihotrasyāsaṃsṛṣṭahomamantrau

trayo॒ vai prai̭yame॒dhā ā̭sann | teṣā॒-ntrireko᳚-'gniho॒tra-ma̭juhot | dvirekaḥ̭ | sa॒kṛdekaḥ̭ | teṣāṃ॒-ya~strirajṷhot | sa ṛ॒cā-'jṷhot | yo dviḥ | sa yajṷṣā | ya-ssa॒kṛt | sa tū॒ṣṇīm || 54 ||
yaśca॒ yaju॒ṣā 'jṷho॒dyaśca̭ tū॒ṣṇīm | tāvu॒bhāvā᳚rdhnutām | tasmā॒-dyaju॒ṣā ''hṷtiḥ॒ pūrvā̭ hota॒vyā᳚ | tū॒ṣṇīmutta̭rā | u॒bhe e॒vardhī ava̭rundhe | a॒gni-rjyoti॒-rjyoti̭ra॒gni-ssvāheti̭ sā॒ya-ñjṷhoti | reta̭ e॒va ta-dda̭dhāti | sūryo॒ jyoti॒-rjyoti॒-ssūrya॒-ssvāheti̭ prā॒taḥ | reta̭ e॒va hi॒ta-mpra ja̭nayati || reto॒ vā e॒tasya̭ hi॒ta-nna pra jā̭yate || 55 ||
yasyā᳚gniho॒tramahṷta॒gṃ॒ sūryo॒-'bhyṷdeti̭ | ya-dyante॒ syāt | u॒nnīya॒ prāṃu॒dādra̭vet | sa ṷpa॒sādyātami̭to-rāsīta | sa ya॒dā tāmye᳚t | atha॒ bhū-ssvāheti̭ juhuyāt | pra॒jāpa̭ti॒rvai bhū॒taḥ | tame॒vo-pā̭sarat | sa e॒vaina॒-ntata॒ unna̭yati | nārti॒mārccha̭ti॒ yaja̭mānaḥ || 56 ||

(tū॒ṣṇīṃ - jā̭yate॒ - yaja̭mānaḥ) (a. 9)
anuvākaṃ 10 - vahneravasthāviśeṣānusāreṇa homaḥ

yada॒gni-mu॒ddhara̭ti | vasa̭va॒star​hya॒gniḥ | tasmi॒n॒. yasya॒ tathā̭vidhe॒ juhva̭ti | vasṷṣve॒vāsyā᳚gniho॒tragṃ hu॒ta-mbha̭vati || nihi̭to dhūpā॒yañchḙte | ru॒drāstahya॒rgniḥ | tasmi॒n.॒ yasya॒ tathā̭vidhe॒ juhva̭ti | ru॒dreṣve॒vāsyā᳚gniho॒tragṃ hu॒ta-mbha̭vati || pra॒tha॒mami॒ddhmama॒rcirā la̭bhate | ā॒di॒tyāstar​hya॒gniḥ || 57 ||
tasmi॒n॒. yasya॒ tathā̭vidhe॒ juhva̭ti | ā॒di॒tyeṣve॒vāsyā᳚gniho॒tragṃ hu॒ta-mbha̭vati || sarva̭ e॒va sa̭rva॒śa i॒ddhma ādī᳚pto bhavati | viśvḙ de॒vāstahya॒rgniḥ | tasmi॒n॒. yasya॒ tathā̭vidhe॒ juhva̭ti | viśve᳚ṣve॒vāsya̭ de॒veṣva̭gniho॒tragṃ hu॒ta-mbha̭vati || ni॒ta॒rāma॒rciru॒pāvai̭ti lohi॒nīkḙva bhavati | indra॒star​hya॒gniḥ | tasmi॒n॒. yasya॒ tathā̭vidhe॒ juhva̭ti | indra̭ e॒vāsyā᳚gniho॒tragṃ hu॒ta-mbha̭vati || 58 ||
aṅgā̭rā bhavanti | tebhyo-'ṅgā̭rebhyo॒-'rcirudḙti | pra॒jāpa̭ti॒star​hya॒gniḥ | tasmi॒n॒. yasya॒ tathā̭vidhe॒ juhva̭ti | pra॒jāpa̭tāve॒vāsyā᳚gniho॒tragṃ hu॒ta-mbha̭vati || śaro-'ṅgā̭rā॒ addhyṷ̄hante | brahma॒-tar​hya॒gniḥ | tasmi॒n.॒ yasya॒ tathā̭vidhe॒ juhva̭ti | brahma̭nne॒vāsyā᳚gniho॒tragṃ hu॒ta-mbha̭vati || vasṷṣu ru॒dreṣvā̭di॒tyeṣu॒ viśvḙṣu de॒veṣṷ | indre᳚ pra॒jāpa̭tau॒ brahmanṋ | apa̭rivargame॒vāsyai॒tāsṷ de॒vatā̭su hu॒ta-mbha̭vati | yasyai॒vaṃ-vi~॒duṣo᳚-'gniho॒tra-ñjuhva̭ti | ya ṷ caina de॒vaṃ-ve~da̭ || 59 ||

(ā॒di॒tyāstar​hya॒gni--r indra̭ e॒vāsyā᳚gniho॒tragṃ hu॒ta-mbha̭vati - de॒veṣṷ ca॒tvāri̭ ca) (a. 10)
(yada॒gni-nnihi̭taḥ pratha॒magṃ sarva̭ e॒va ni̭ta॒rāmaṅgā̭rā॒-śśaro-'ṅgā̭rā॒

brahma॒vasṷṣva॒ṣṭau)
anuvākaṃ 11 - kālabhedena samantraka-mpariṣecanam

ṛ॒ta-ntvā̭ sa॒tyena॒ pari̭ṣiñcā॒mīti̭ sā॒ya-mpari̭ṣiñcati | sa॒tya-ntva॒rtena॒ pari̭ṣiñcā॒mīti̭ prā॒taḥ | a॒gnirvā ṛ॒tam | a॒sāvā̭di॒tya-ssa॒tyam | a॒gnime॒va tadā̭di॒tyena̭ sā॒ya-mpari̭ṣiñcati | a॒gninā̭ ''di॒tya-mprā॒tassaḥ | yāva̭dahorā॒tre bhava̭taḥ | tāva̭dasya lo॒kasya̭ | nārti॒rna riṣṭiḥ̭ | nānto॒ na pa̭rya॒nto᳚-'sti | yasyai॒vaṃ-vi~॒duṣo᳚-'gniho॒tra-ñjuhva̭ti | ya ṷ caina de॒vaṃ-ve~da̭ || 60 ||