ദേവീമാഹാത്മ്യമ്

॥ ദേവീ മാഹാത്മ്യമ് ॥
॥ ശ്രീ ॥
॥ ശ്രീചണ്ഡികാധ്യാനമ് ॥
ഓം ബന്ധൂകകുസുമാഭാസാം പഞ്ചമുണ്ഡാധിവാസിനീമ് ।
സ്ഫുരച്ചന്ദ്രകലാരത്നമുകുടാം മുണ്ഡമാലിനീമ് ॥
ത്രിനേത്രാം രക്തവസനാം പീനോന്നതഘടസ്തനീമ് ।
പുസ്തകം ചാക്ഷമാലാം ച വരം ചാഭയകം ക്രമാത് ॥
ദധതീം സംസ്മരേന്നിത്യമുത്തരാമ്നായമാനിതാമ് ।
അഥവാ
യാ ചണ്ഡീ മധുകൈടഭാദിദൈത്യദലനീ യാ മാഹിഷോന്മൂലിനീ
യാ ധൂമ്രേക്ഷണചണ്ഡമുണ്ഡമഥനീ യാ രക്തബീജാശനീ ।
ശക്തിഃ ശുമ്ഭനിശുമ്ഭദൈത്യദലനീ യാ സിദ്ധിദാത്രീ പരാ
സാ ദേവീ നവകോടിമൂര്തിസഹിതാ മാം പാതു വിശ്വേശ്വരീ ॥

ഓം അസ്യ ശ്രീഅര്ഗലാസ്തോത്രമന്ത്രസ്യ വിഷ്ണുരൃഷിഃ,
അനുഷ്ടുപ് ഛന്ദഃ, ശ്രീമഹാലക്ഷ്മീര്ദേവതാ,
ശ്രീജഗദമ്ബാപ്രീതയേ സപ്തശതിപാഠാങ്ഗത്വേന ജപേ വിനിയോഗഃ ।
ഓം നമശ്ചണ്ഡികായൈ ।
മാര്കണ്ഡേയ ഉവാച।
ഓം ജയ ത്വം ദേവി ചാമുണ്ഡേ ജയ ഭൂതാപഹാരിണി ।
ജയ സര്വഗതേ ദേവി കാലരാത്രി നമോഽസ്തു തേ ॥ ൧॥
ജയന്തീ മങ്ഗലാ കാലീ ഭദ്രകാലീ കപാലിനീ ।
ദുര്ഗാ ശിവാ ക്ഷമാ ധാത്രീ സ്വാഹാ സ്വധാ നമോഽസ്തു തേ ॥ ൨॥
മധുകൈടഭവിധ്വംസി വിധാതൃവരദേ നമഃ ।
രൂപം ദേഹി ജയം ദേഹി യശോ ദേഹി ദ്വിഷോ ജഹി ॥ ൩॥
മഹിഷാസുരനിര്നാശി ഭക്താനാം സുഖദേ നമഃ ।
രൂപം ദേഹി ജയം ദേഹി യശോ ദേഹി ദ്വിഷോ ജഹി ॥ ൪॥
ധൂമ്രനേത്രവധേ ദേവി ധര്മകാമാര്ഥദായിനി ।
രൂപം ദേഹി ജയം ദേഹി യശോ ദേഹി ദ്വിഷോ ജഹി ॥ ൫॥
രക്തബീജവധേ ദേവി ചണ്ഡമുണ്ഡവിനാശിനി ।
രൂപം ദേഹി ജയം ദേഹി യശോ ദേഹി ദ്വിഷോ ജഹി ॥ ൬॥
നിശുമ്ഭശുമ്ഭനിര്നാശി ത്രൈലോക്യശുഭദേ നമഃ ।
രൂപം ദേഹി ജയം ദേഹി യശോ ദേഹി ദ്വിഷോ ജഹി ॥ ൭॥
വന്ദിതാങ്ഘ്രിയുഗേ ദേവി സര്വസൌഭാഗ്യദായിനി ।
രൂപം ദേഹി ജയം ദേഹി യശോ ദേഹി ദ്വിഷോ ജഹി ॥ ൮॥
അചിന്ത്യരൂപചരിതേ സര്വശത്രുവിനാശിനി ।
രൂപം ദേഹി ജയം ദേഹി യശോ ദേഹി ദ്വിഷോ ജഹി ॥ ൯॥
നതേഭ്യഃ സര്വദാ ഭക്ത്യാ ചാപര്ണേ ദുരിതാപഹേ ।
രൂപം ദേഹി ജയം ദേഹി യശോ ദേഹി ദ്വിഷോ ജഹി ॥ ൧൦॥
സ്തുവദ്ഭ്യോ ഭക്തിപൂര്വം ത്വാം ചണ്ഡികേ വ്യാധിനാശിനി ।
രൂപം ദേഹി ജയം ദേഹി യശോ ദേഹി ദ്വിഷോ ജഹി ॥ ൧൧॥
ചണ്ഡികേ സതതം യുദ്ധേ ജയന്തി പാപനാശിനി ।
രൂപം ദേഹി ജയം ദേഹി യശോ ദേഹി ദ്വിഷോ ജഹി ॥ ൧൨॥
ദേഹി സൌഭാഗ്യമാരോഗ്യം ദേഹി ദേവി പരം സുഖമ് ।
രൂപം ദേഹി ജയം ദേഹി യശോ ദേഹി ദ്വിഷോ ജഹി ॥ ൧൩॥
വിധേഹി ദേവി കല്യാണം വിധേഹി വിപുലാം ശ്രിയമ് ।
രൂപം ദേഹി ജയം ദേഹി യശോ ദേഹി ദ്വിഷോ ജഹി ॥ ൧൪॥
വിധേഹി ദ്വിഷതാം നാശം വിധേഹി ബലമുച്ചകൈഃ ।
രൂപം ദേഹി ജയം ദേഹി യശോ ദേഹി ദ്വിഷോ ജഹി ॥ ൧൫॥
സുരാസുരശിരോരത്നനിഘൃഷ്ടചരണേഽമ്ബികേ ।
രൂപം ദേഹി ജയം ദേഹി യശോ ദേഹി ദ്വിഷോ ജഹി ॥ ൧൬॥
വിദ്യാവന്തം യശസ്വന്തം ലക്ഷ്മീവന്തഞ്ച മാം കുരു ।
രൂപം ദേഹി ജയം ദേഹി യശോ ദേഹി ദ്വിഷോ ജഹി ॥ ൧൭॥
ദേവി പ്രചണ്ഡദോര്ദണ്ഡദൈത്യദര്പനിഷൂദിനി ।
രൂപം ദേഹി ജയം ദേഹി യശോ ദേഹി ദ്വിഷോ ജഹി ॥ ൧൮॥
പ്രചണ്ഡദൈത്യദര്പഘ്നേ ചണ്ഡികേ പ്രണതായ മേ ।
രൂപം ദേഹി ജയം ദേഹി യശോ ദേഹി ദ്വിഷോ ജഹി ॥ ൧൯॥
ചതുര്ഭുജേ ചതുര്വക്ത്രസംസ്തുതേ പരമേശ്വരി ।
രൂപം ദേഹി ജയം ദേഹി യശോ ദേഹി ദ്വിഷോ ജഹി ॥ ൨൦॥
കൃഷ്ണേന സംസ്തുതേ ദേവി ശശ്വദ്ഭക്ത്യാ സദാമ്ബികേ ।
രൂപം ദേഹി ജയം ദേഹി യശോ ദേഹി ദ്വിഷോ ജഹി ॥ ൨൧॥
ഹിമാചലസുതാനാഥസംസ്തുതേ പരമേശ്വരി ।
രൂപം ദേഹി ജയം ദേഹി യശോ ദേഹി ദ്വിഷോ ജഹി ॥ ൨൨॥
ഇന്ദ്രാണീപതിസദ്ഭാവപൂജിതേ പരമേശ്വരി ।
രൂപം ദേഹി ജയം ദേഹി യശോ ദേഹി ദ്വിഷോ ജഹി ॥ ൨൩॥
ദേവി ഭക്തജനോദ്ദാമദത്താനന്ദോദയേഽമ്ബികേ ।
രൂപം ദേഹി ജയം ദേഹി യശോ ദേഹി ദ്വിഷോ ജഹി ॥ ൨൪॥
ഭാര്യാം മനോരമാം ദേഹി മനോവൃത്താനുസാരിണീമ് ।
രൂപം ദേഹി ജയം ദേഹി യശോ ദേഹി ദ്വിഷോ ജഹി ॥ ൨൫॥
താരിണി ദുര്ഗസംസാരസാഗരസ്യാചലോദ്ഭവേ ।
രൂപം ദേഹി ജയം ദേഹി യശോ ദേഹി ദ്വിഷോ ജഹി ॥ ൨൬॥
ഇദം സ്തോത്രം പഠിത്വാ തു മഹാസ്തോത്രം പഠേന്നരഃ ।
സപ്തശതീം സമാരാധ്യ വരമാപ്നോതി ദുര്ലഭമ് ॥ ൨൭॥
॥ ഇതി ശ്രീമാര്കണ്ഡേയപുരാണേ അര്ഗലാസ്തോത്രം സമാപ്തമ് ॥

ഓം അസ്യ ശ്രീകീലകമന്ത്രസ്യ ശിവഋഷിഃ, അനുഷ്ടുപ് ഛന്ദഃ,
ശ്രീമഹാസരസ്വതീ ദേവതാ, ശ്രീജഗദമ്ബാപ്രീത്യര്ഥം
സപ്തശതീപാഠാങ്ഗത്വേന ജപേ വിനിയോഗഃ ।
ഓം നമശ്ചണ്ഡികായൈ ।
മാര്കണ്ഡേയ ഉവാച।
ഓം വിശുദ്ധജ്ഞാനദേഹായ ത്രിവേദീദിവ്യചക്ഷുഷേ ।
ശ്രേയഃപ്രാപ്തിനിമിത്തായ നമഃ സോമാര്ധധാരിണേ ॥ ൧॥
സര്വമേതദ്വിജാനീയാന്മന്ത്രാണാമപി കീലകമ് ।
സോഽപി ക്ഷേമമവാപ്നോതി സതതം ജപ്യതത്പരഃ ॥ ൨॥
സിദ്ധ്യന്ത്യുച്ചാടനാദീനി കര്മാണി സകലാന്യപി ।
ഏതേന സ്തുവതാം ദേവീം സ്തോത്രവൃന്ദേന ഭക്തിതഃ ॥ ൩॥
ന മന്ത്രോ നൌഷധം തസ്യ ന കിഞ്ചിദപി വിദ്യതേ ।
വിനാ ജപ്യേന സിദ്ധ്യേത്തു സര്വമുച്ചാടനാദികമ് ॥ ൪॥
സമഗ്രാണ്യപി സേത്സ്യന്തി ലോകശങ്കാമിമാം ഹരഃ ।
കൃത്വാ നിമന്ത്രയാമാസ സര്വമേവമിദം ശുഭമ് ॥ ൫॥
സ്തോത്രം വൈ ചണ്ഡികായാസ്തു തച്ച ഗുഹ്യം ചകാര സഃ ।
സമാപ്നോതി സ പുണ്യേന താം യഥാവന്നിമന്ത്രണാമ് ॥ ൬॥
സോഽപി ക്ഷേമമവാപ്നോതി സര്വമേവ ന സംശയഃ ।
കൃഷ്ണായാം വാ ചതുര്ദശ്യാമഷ്ടമ്യാം വാ സമാഹിതഃ ॥ ൭॥
ദദാതി പ്രതിഗൃഹ്ണാതി നാന്യഥൈഷാ പ്രസീദതി ।
ഇത്ഥം രൂപേണ കീലേന മഹാദേവേന കീലിതമ് ॥ ൮॥
യോ നിഷ്കീലാം വിധായൈനാം ചണ്ഡീം ജപതി നിത്യശഃ ।
സ സിദ്ധഃ സ ഗണഃ സോഽഥ ഗന്ധര്വോ ജായതേ ധ്രുവമ് ॥ ൯॥
ന ചൈവാപാടവം തസ്യ ഭയം ക്വാപി ന ജായതേ ।
നാപമൃത്യുവശം യാതി മൃതേ ച മോക്ഷമാപ്നുയാത് ॥ ൧൦॥
ജ്ഞാത്വാ പ്രാരഭ്യ കുര്വീത ഹ്യകുര്വാണോ വിനശ്യതി ।
തതോ ജ്ഞാത്വൈവ സമ്പൂര്ണമിദം പ്രാരഭ്യതേ ബുധൈഃ ॥ ൧൧॥
സൌഭാഗ്യാദി ച യത്കിഞ്ചിദ് ദൃശ്യതേ ലലനാജനേ ।
തത്സര്വം തത്പ്രസാദേന തേന ജപ്യമിദം ശുഭമ് ॥ ൧൨॥
ശനൈസ്തു ജപ്യമാനേഽസ്മിന് സ്തോത്രേ സമ്പത്തിരുച്ചകൈഃ ।
ഭവത്യേവ സമഗ്രാപി തതഃ പ്രാരഭ്യമേവ തത് ॥ ൧൩॥
ഐശ്വര്യം തത്പ്രസാദേന സൌഭാഗ്യാരോഗ്യമേവ ച ।
ശത്രുഹാനിഃ പരോ മോക്ഷഃ സ്തൂയതേ സാ ന കിം ജനൈഃ ॥ ൧൪॥
ചണ്ഡികാം ഹൃദയേനാപി യഃ സ്മരേത് സതതം നരഃ ।
ഹൃദ്യം കാമമവാപ്നോതി ഹൃദി ദേവീ സദാ വസേത് ॥ ൧൫॥
അഗ്രതോഽമും മഹാദേവകൃതം കീലകവാരണമ് ।
നിഷ്കീലഞ്ച തഥാ കൃത്വാ പഠിതവ്യം സമാഹിതൈഃ ॥ ൧൬॥
॥ ഇതി ശ്രീഭഗവത്യാഃ കീലകസ്തോത്രം സമാപ്തമ് ॥

അസ്യ ശ്രീചണ്ഡീകവചസ്യ ബ്രഹ്മാ ഋഷിഃ , അനുഷ്ടുപ് ഛന്ദഃ ,
ചാമുണ്ഡാ ദേവതാ , അങ്ഗന്യാസോക്തമാതരോ ബീജമ് ,
ദിഗ്ബന്ധദേവതാസ്തത്വമ് , ശ്രീജഗദമ്ബാപ്രീത്യര്ഥേ ജപേ വിനിയോഗഃ ।
ഓം നമശ്ചണ്ഡികായൈ ।
മാര്കണ്ഡേയ ഉവാച।
ഓം യദ്ഗുഹ്യം പരമം ലോകേ സര്വരക്ഷാകരം നൃണാമ് ।
യന്ന കസ്യചിദാഖ്യാതം തന്മേ ബ്രൂഹി പിതാമഹ ॥ ൧॥
ബ്രഹ്മോവാച ।
അസ്തി ഗുഹ്യതമം വിപ്ര സര്വഭൂതോപകാരകമ് ।
ദേവ്യാസ്തു കവചം പുണ്യം തച്ഛൃണുഷ്വ മഹാമുനേ ॥ ൨॥
പ്രഥമം ശൈലപുത്രീതി ദ്വിതീയം ബ്രഹ്മചാരിണീ ।
തൃതീയം ചന്ദ്രഘണ്ടേതി കൂഷ്മാണ്ഡേതി ചതുര്ഥകമ് ॥ ൩॥
പഞ്ചമം സ്കന്ദമാതേതി ഷഷ്ഠം കാത്യായനീ തഥാ ।
സപ്തമം കാലരാത്രിശ്ച മഹാഗൌരീതി ചാഷ്ടമമ് ॥ ൪॥
നവമം സിദ്ധിദാത്രീ ച നവദുര്ഗാഃ പ്രകീര്തിതാഃ ।
ഉക്താന്യേതാനി നാമാനി ബ്രഹ്മണൈവ മഹാത്മനാ ॥ ൫॥
അഗ്നിനാ ദഹ്യമാനാസ്തു ശത്രുമധ്യഗതാ രണേ ।
വിഷമേ ദുര്ഗമേ ചൈവ ഭയാര്താഃ ശരണം ഗതാഃ ॥ ൬।
ന തേഷാം ജായതേ കിഞ്ചിദശുഭം രണസങ്കടേ ।
ആപദം ന ച പശ്യന്തി ശോകദുഃഖഭയങ്കരീമ് ॥ ൭॥
യൈസ്തു ഭക്ത്യാ സ്മൃതാ നിത്യം തേഷാം വൃദ്ധിഃ പ്രജായതേ ।
യേ ത്വാം സ്മരന്തി ദേവേശി രക്ഷസി താന്ന സംശയഃ ॥ ൮॥
പ്രേതസംസ്ഥാ തു ചാമുണ്ഡാ വാരാഹീ മഹിഷാസനാ ।
ഐന്ദ്രീ ഗജസമാരൂഢാ വൈഷ്ണവീ ഗരുഡാസനാ ॥ ൯॥
നാരസിംഹീ മഹാവീര്യാ ശിവദൂതീ മഹാബലാ ।
മാഹേശ്വരീ വൃഷാരൂഢാ കൌമാരീ ശിഖിവാഹനാ ॥ ൧൦॥
ലക്ഷ്മീഃ പദ്മാസനാ ദേവീ പദ്മഹസ്താ ഹരിപ്രിയാ ।
ശ്വേതരൂപധരാ ദേവീ ഈശ്വരീ വൃഷവാഹനാ ॥ ൧൧॥
ബ്രാഹ്മീ ഹംസസമാരൂഢാ സര്വാഭരണഭൂഷിതാ ।
ഇത്യേതാ മാതരഃ സര്വാഃ സര്വയോഗസമന്വിതാഃ ॥ ൧൨॥
നാനാഭരണശോഭാഢ്യാ നാനാരത്നോപശോഭിതാഃ ।
ശ്രൈഷ്ഠൈശ്ച മൌക്തികൈഃ സര്വാ ദിവ്യഹാരപ്രലമ്ബിഭിഃ ॥ ൧൩॥
ഇന്ദ്രനീലൈര്മഹാനീലൈഃ പദ്മരാഗൈഃ സുശോഭനൈഃ ।
ദൃശ്യന്തേ രഥമാരൂഢാ ദേവ്യഃ ക്രോധസമാകുലാഃ ॥ ൧൪॥
ശങ്ഖം ചക്രം ഗദാം ശക്തിം ഹലം ച മുസലായുധമ് ।
ഖേടകം തോമരം ചൈവ പരശും പാശമേവ ച ॥ ൧൫॥
കുന്തായുധം ത്രിശൂലം ച ശാര്ങ്ഗമായുധമുത്തമമ് ।
ദൈത്യാനാം ദേഹനാശായ ഭക്താനാമഭയായ ച ॥ ൧൬॥
ധാരയന്ത്യായുധാനീത്ഥം ദേവാനാം ച ഹിതായ വൈ ।
നമസ്തേഽസ്തു മഹാരൌദ്രേ മഹാഘോരപരാക്രമേ ॥ ൧൭॥
മഹാബലേ മഹോത്സാഹേ മഹാഭയവിനാശിനി ।
ത്രാഹി മാം ദേവി ദുഷ്പ്രേക്ഷ്യേ ശത്രൂണാം ഭയവര്ധിനി ॥ ൧൮॥
പ്രാച്യാം രക്ഷതു മാമൈന്ദ്രീ ആഗ്നേയ്യാമഗ്നിദേവതാ ।
ദക്ഷിണേഽവതു വാരാഹീ നൈരൃത്യാം ഖഡ്ഗധാരിണീ ॥ ൧൯॥
പ്രതീച്യാം വാരുണീ രക്ഷേദ്വായവ്യാം മൃഗവാഹിനീ ।
ഉദീച്യാം പാതു കൌബേരീ ഈശാന്യാം ശൂലധാരിണീ ॥ ൨൦॥
ഊര്ധ്വം ബ്രഹ്മാണീ മേ രക്ഷേദധസ്താദ്വൈഷ്ണവീ തഥാ ।
ഏവം ദശ ദിശോ രക്ഷേച്ചാമുണ്ഡാ ശവവാഹനാ ॥ ൨൧॥
ജയാ മാമഗ്രതഃ പാതു വിജയാ പാതു പൃഷ്ഠതഃ ।
അജിതാ വാമപാര്ശ്വേ തു ദക്ഷിണേ ചാപരാജിതാ ॥ ൨൨॥
ശിഖാം മേ ദ്യോതിനീ രക്ഷേദുമാ മൂര്ധ്നി വ്യവസ്ഥിതാ ।
മാലാധരീ ലലാടേ ച ഭ്രുവൌ രക്ഷേദ്യശസ്വിനീ ॥ ൨൩॥
നേത്രയോശ്ചിത്രനേത്രാ ച യമഘണ്ടാ തു പാര്ശ്വകേ ।
ത്രിനേത്രാ ച ത്രിശൂലേന ഭ്രുവോര്മധ്യേ ച ചണ്ഡികാ ॥ ൨൪॥
ശങ്ഖിനീ ചക്ഷുഷോര്മധ്യേ ശ്രോത്രയോര്ദ്വാരവാസിനീ ।
കപോലൌ കാലികാ രക്ഷേത് കര്ണമൂലേ തു ശങ്കരീ ॥ ൨൫॥
നാസികായാം സുഗന്ധാ ച ഉത്തരോഷ്ഠേ ച ചര്ചികാ ।
അധരേ ചാമൃതാബാലാ ജിഹ്വായാം ച സരസ്വതീ ॥ ൨൬॥
ദന്താന് രക്ഷതു കൌമാരീ കണ്ഠദേശേ തു ചണ്ഡികാ ।
ഘണ്ടികാം ചിത്രഘണ്ടാ ച മഹാമായാ ച താലുകേ ॥ ൨൭॥
കാമാക്ഷീ ചിബുകം രക്ഷേദ്വാചം മേ സര്വമങ്ഗലാ ।
ഗ്രീവായാം ഭദ്രകാലീ ച പൃഷ്ഠവംശേ ധനുര്ധരീ ॥ ൨൮॥
നീലഗ്രീവാ ബഹിഃ കണ്ഠേ നലികാം നലകൂബരീ ।
സ്കന്ധയോഃ ഖഡ്ഗിനീ രക്ഷേദ് ബാഹൂ മേ വജ്രധാരിണീ ॥ ൨൯॥
ഹസ്തയോര്ദണ്ഡിനീ രക്ഷേദമ്ബികാ ചാങ്ഗുലീഷു ച ।
നഖാഞ്ഛൂലേശ്വരീ രക്ഷേത് കുക്ഷൌ രക്ഷേന്നരേശ്വരീ ॥ ൩൦॥
സ്തനൌ രക്ഷേന്മഹാദേവീ മനഃശോകവിനാശിനീ ।
ഹൃദയേ ലലിതാ ദേവീ ഉദരേ ശൂലധാരിണീ ॥ ൩൧॥
നാഭൌ ച കാമിനീ രക്ഷേദ് ഗുഹ്യം ഗുഹ്യേശ്വരീ തഥാ ।
മേഢ്രം രക്ഷതു ദുര്ഗന്ധാ പായും മേ ഗുഹ്യവാഹിനീ ॥ ൩൨॥
കട്യാം ഭഗവതീ രക്ഷേദൂരൂ മേ മേഘവാഹനാ ।
ജങ്ഘേ മഹാബലാ രക്ഷേത് ജാനൂ മാധവനായികാ ॥ ൩൩॥
ഗുല്ഫയോര്നാരസിംഹീ ച പാദപൃഷ്ഠേ തു കൌശികീ ।
പാദാങ്ഗുലീഃ ശ്രീധരീ ച തലം പാതാലവാസിനീ ॥ ൩൪॥
നഖാന് ദംഷ്ട്രകരാലീ ച കേശാംശ്ചൈവോര്ധ്വകേശിനീ ।
രോമകൂപേഷു കൌമാരീ ത്വചം യോഗീശ്വരീ തഥാ ॥ ൩൫॥
രക്തമജ്ജാവസാമാംസാന്യസ്ഥിമേദാംസി പാര്വതീ ।
അന്ത്രാണി കാലരാത്രിശ്ച പിത്തം ച മുകുടേശ്വരീ ॥ ൩൬॥
പദ്മാവതീ പദ്മകോശേ കഫേ ചൂഡാമണിസ്തഥാ ।
ജ്വാലാമുഖീ നഖജ്വാലാമഭേദ്യാ സര്വസന്ധിഷു ॥ ൩൭॥
ശുക്രം ബ്രഹ്മാണീ മേ രക്ഷേച്ഛായാം ഛത്രേശ്വരീ തഥാ ।
അഹങ്കാരം മനോ ബുദ്ധിം രക്ഷേന്മേ ധര്മധാരിണീ ॥ ൩൮॥
പ്രാണാപാനൌ തഥാ വ്യാനമുദാനം ച സമാനകമ് ।
വജ്രഹസ്താ ച മേ രക്ഷേത് പ്രാണാന് കല്യാണശോഭനാ ॥ ൩൯॥
രസേ രൂപേ ച ഗന്ധേ ച ശബ്ദേ സ്പര്ശേ ച യോഗിനീ ।
സത്ത്വം രജസ്തമശ്ചൈവ രക്ഷേന്നാരായണീ സദാ ॥ ൪൦॥
ആയൂ രക്ഷതു വാരാഹീ ധര്മം രക്ഷതു പാര്വതീ ।
യശഃ കീര്തിം ച ലക്ഷ്മീം ച സദാ രക്ഷതു വൈഷ്ണവീ ॥ ൪൧॥
ഗോത്രമിന്ദ്രാണീ മേ രക്ഷേത് പശൂന് രക്ഷേച്ച ചണ്ഡികാ ।
പുത്രാന് രക്ഷേന്മഹാലക്ഷ്മീര്ഭാര്യാം രക്ഷതു ഭൈരവീ ॥ ൪൨॥
ധനേശ്വരീ ധനം രക്ഷേത് കൌമാരീ കന്യകാം തഥാ ।
പന്ഥാനം സുപഥാ രക്ഷേന്മാര്ഗം ക്ഷേമങ്കരീ തഥാ ॥ ൪൩॥
രാജദ്വാരേ മഹാലക്ഷ്മീര്വിജയാ സതത സ്ഥിതാ ।
രക്ഷാഹീനം തു യത് സ്ഥാനം വര്ജിതം കവചേന തു ॥ ൪൪॥
തത്സര്വം രക്ഷ മേ ദേവി ജയന്തീ പാപനാശിനീ ।
സര്വരക്ഷാകരം പുണ്യം കവചം സര്വദാ ജപേത് ॥ ൪൫॥
ഇദം രഹസ്യം വിപ്രര്ഷേ ഭക്ത്യാ തവ മയോദിതമ് ।
പാദമേകം ന ഗച്ഛേത് തു യദീച്ഛേച്ഛുഭമാത്മനഃ ॥ ൪൬॥
കവചേനാവൃതോ നിത്യം യത്ര യത്രൈവ ഗച്ഛതി ।
തത്ര തത്രാര്ഥലാഭശ്വ വിജയഃ സാര്വകാലികഃ ॥ ൪൭॥
യം യം ചിന്തയതേ കാമം തം തം പ്രാപ്നോതി നിശ്ചിതമ് ।
പരമൈശ്വര്യമതുലം പ്രാപ്സ്യതേ ഭൂതലേ പുമാന് ॥ ൪൮॥
നിര്ഭയോ ജായതേ മര്ത്യഃ സങ്ഗ്രാമേഷ്വപരാജിതഃ ।
ത്രൈലോക്യേ തു ഭവേത്പൂജ്യഃ കവചേനാവൃതഃ പുമാന് ॥ ൪൯॥
ഇദം തു ദേവ്യാഃ കവചം ദേവാനാമപി ദുര്ലഭമ് ।
യഃ പഠേത്പ്രയതോ നിത്യം ത്രിസന്ധ്യം ശ്രദ്ധയാന്വിതഃ ॥ ൫൦॥
ദൈവീകലാ ഭവേത്തസ്യ ത്രൈലോക്യേ ചാപരാജിതഃ ।
ജീവേദ്വര്ഷശതം സാഗ്രമപമൃത്യുവിവര്ജിതഃ ॥ ൫൧॥
നശ്യന്തി വ്യാധയഃ സര്വേ ലൂതാവിസ്ഫോടകാദയഃ ।
സ്ഥാവരം ജങ്ഗമം ചൈവ കൃത്രിമം ചൈവ യദ്വിഷമ് ॥ ൫൨॥
അഭിചാരാണി സര്വാണി മന്ത്രയന്ത്രാണി ഭൂതലേ ।
ഭൂചരാഃ ഖേചരാശ്ചൈവ കുലജാശ്ചൌപദേശികാഃ ॥ ൫൩॥
സഹജാ കുലജാ മാലാ ഡാകിനീ ശാകിനീ തഥാ ।
അന്തരിക്ഷചരാ ഘോരാ ഡാകിന്യശ്ച മഹാരവാഃ ॥ ൫൪॥
ഗ്രഹഭൂതപിശാചാശ്ച യക്ഷഗന്ധര്വരാക്ഷസാഃ ।
ബ്രഹ്മരാക്ഷസവേതാലാഃ കൂഷ്മാണ്ഡാ ഭൈരവാദയഃ ॥ ൫൫॥
നശ്യന്തി ദര്ശനാത്തസ്യ കവചേനാവൃതോ ഹി യഃ ।
മാനോന്നതിര്ഭവേദ്രാജ്ഞസ്തേജോവൃദ്ധിഃ പരാ ഭവേത് ॥ ൫൬॥
യശോവൃദ്ധിര്ഭവേത് പുംസാം കീര്തിവൃദ്ധിശ്ച ജായതേ ।
തസ്മാത് ജപേത് സദാ ഭക്തഃ കവചം കാമദം മുനേ ॥ ൫൭॥
ജപേത് സപ്തശതീം ചണ്ഡീം കൃത്വാ തു കവചം പുരാ ।
നിര്വിഘ്നേന ഭവേത് സിദ്ധിശ്ചണ്ഡീജപസമുദ്ഭവാ ॥ ൫൮॥
യാവദ്ഭൂമണ്ഡലം ധത്തേ സശൈലവനകാനനമ് ।
താവത്തിഷ്ഠതി മേദിന്യാം സന്തതിഃ പുത്രപൌത്രികീ ॥ ൫൯॥
ദേഹാന്തേ പരമം സ്ഥാനം സുരൈരപി സുദുര്ലഭമ് ।
പ്രാപ്നോതി പുരുഷോ നിത്യം മഹാമായാപ്രസാദതഃ ॥ ൬൦॥
തത്ര ഗച്ഛതി ഗത്വാസൌ പുനശ്ചാഗമനം നഹി ।
ലഭതേ പരമം സ്ഥാനം ശിവേന സമതാം വ്രജേത് ॥ ൬൧॥
॥ ഇതി ശ്രീമാര്കണ്ഡേയപുരാണേ ഹരിഹരബ്രഹ്മവിരചിതം
ദേവീകവചം സമാപ്തമ് ॥

%
॥ ശ്രീദുര്ഗായൈ നമഃ ॥
॥ അഥ ശ്രീദുര്ഗാസപ്തശതീ ॥

വിനിയോഗഃ
അസ്യ ശ്രീ പ്രഥമചരിത്രസ്യ । ബ്രഹ്മാ ഋഷിഃ ।
മഹാകാലീ ദേവതാ । ഗായത്രീ ഛന്ദഃ । നന്ദാ ശക്തിഃ ।
രക്തദന്തികാ ബീജമ് । അഗ്നിസ്തത്ത്വമ് ।
ഋഗ്വേദഃ സ്വരൂപമ് । ശ്രീമഹാകാലീപ്രീത്യര്ഥേ
പ്രഥമചരിത്രജപേ വിനിയോഗഃ ।
। ധ്യാനമ് ।
ഓം ഖഡ്ഗം ചക്രഗദേഷുചാപപരിഘാഞ്ഛൂലം ഭുശുണ്ഡീം ശിരഃ
ശങ്ഖം സന്ദധതീം കരൈസ്ത്രിനയനാം സര്വാങ്ഗഭൂഷാവൃതാമ് ।
നീലാശ്മദ്യുതിമാസ്യപാദദശകാം സേവേ മഹാകാലികാം
യാമസ്തൌത്സ്വപിതേ ഹരൌ കമലജോ ഹന്തും മധും കൈടഭമ് ॥
ഓം നമശ്ചണ്ഡികായൈ ॥
ഓം ഐം മാര്കണ്ഡേയ ഉവാച॥ ൧.൧॥
സാവര്ണിഃ സൂര്യതനയോ യോ മനുഃ കഥ്യതേഽഷ്ടമഃ ।
നിശാമയ തദുത്പത്തിം വിസ്തരാദ്ഗദതോ മമ ॥ ൧.൨॥
മഹാമായാനുഭാവേന യഥാ മന്വന്തരാധിപഃ ।
സ ബഭൂവ മഹാഭാഗഃ സാവര്ണിസ്തനയോ രവേഃ ॥ ൧.൩॥
സ്വാരോചിഷേഽന്തരേ പൂര്വം ചൈത്രവംശസമുദ്ഭവഃ ।
സുരഥോ നാമ രാജാഭൂത്സമസ്തേ ക്ഷിതിമണ്ഡലേ ॥ ൧.൪॥
തസ്യ പാലയതഃ സമ്യക് പ്രജാഃ പുത്രാനിവൌരസാന് ।
ബഭൂവുഃ ശത്രവോ ഭൂപാഃ കോലാവിധ്വംസിനസ്തദാ ॥ ൧.൫॥
തസ്യ തൈരഭവദ് യുദ്ധമതിപ്രബലദണ്ഡിനഃ ।
ന്യൂനൈരപി സ തൈര്യുദ്ധേ കോലാവിധ്വംസിഭിര്ജിതഃ ॥ ൧.൬॥
തതഃ സ്വപുരമായാതോ നിജദേശാധിപോഽഭവത് ।
ആക്രാന്തഃ സ മഹാഭാഗസ്തൈസ്തദാ പ്രബലാരിഭിഃ ॥ ൧.൭॥
അമാത്യൈര്ബലിഭിര്ദുഷ്ടൈര്ദുര്ബലസ്യ ദുരാത്മഭിഃ ।
കോശോ ബലം ചാപഹൃതം തത്രാപി സ്വപുരേ തതഃ ॥ ൧.൮॥
തതോ മൃഗയാവ്യാജേന ഹൃതസ്വാമ്യഃ സ ഭൂപതിഃ ।
ഏകാകീ ഹയമാരുഹ്യ ജഗാമ ഗഹനം വനമ് ॥ ൧.൯॥
സ തത്രാശ്രമമദ്രാക്ഷീദ്ദ്വിജവര്യസ്യ മേധസഃ ।
പ്രശാന്തശ്വാപദാകീര്ണം മുനിശിഷ്യോപശോഭിതമ് ॥ ൧.൧൦॥
തസ്ഥൌ കഞ്ചിത്സ കാലം ച മുനിനാ തേന സത്കൃതഃ ।
ഇതശ്ചേതശ്ച വിചരംസ്തസ്മിന് മുനിവരാശ്രമേ ॥ ൧.൧൧॥
സോഽചിന്തയത്തദാ തത്ര മമത്വാകൃഷ്ടമാനസഃ ।
മത്പൂര്വൈഃ പാലിതം പൂര്വം മയാ ഹീനം പുരം ഹി തത് ॥ ൧.൧൨॥
മദ്ഭൃത്യൈസ്തൈരസദ്വൃത്തൈര്ധര്മതഃ പാല്യതേ ന വാ ।
ന ജാനേ സ പ്രധാനോ മേ ശൂരോ ഹസ്തീ സദാമദഃ ॥ ൧.൧൩॥
മമ വൈരിവശം യാതഃ കാന് ഭോഗാനുപലപ്സ്യതേ ।
യേ മമാനുഗതാ നിത്യം പ്രസാദധനഭോജനൈഃ ॥ ൧.൧൪॥
അനുവൃത്തിം ധ്രുവം തേഽദ്യ കുര്വന്ത്യന്യമഹീഭൃതാമ് ।
അസമ്യഗ്വ്യയശീലൈസ്തൈഃ കുര്വദ്ഭിഃ സതതം വ്യയമ് ॥ ൧.൧൫॥
സഞ്ചിതഃ സോഽതിദുഃഖേന ക്ഷയം കോശോ ഗമിഷ്യതി ।
ഏതച്ചാന്യച്ച സതതം ചിന്തയാമാസ പാര്ഥിവഃ ॥ ൧.൧൬॥
തത്ര വിപ്രാശ്രമാഭ്യാശേ വൈശ്യമേകം ദദര്ശ സഃ ।
സ പൃഷ്ടസ്തേന കസ്ത്വം ഭോ ഹേതുശ്ചാഗമനേഽത്ര കഃ ॥ ൧.൧൭॥
സശോക ഇവ കസ്മാത്ത്വം ദുര്മനാ ഇവ ലക്ഷ്യസേ ।
ഇത്യാകര്ണ്യ വചസ്തസ്യ ഭൂപതേഃ പ്രണയോദിതമ് ॥ ൧.൧൮॥
പ്രത്യുവാചസ തം വൈശ്യഃ പ്രശ്രയാവനതോ നൃപമ് ॥ ൧.൧൯॥
വൈശ്യ ഉവാച॥ ൧.൨൦॥
സമാധിര്നാമ വൈശ്യോഽഹമുത്പന്നോ ധനിനാം കുലേ ॥ ൧.൨൧॥
പുത്രദാരൈര്നിരസ്തശ്ച ധനലോഭാദസാധുഭിഃ ।
വിഹീനശ്ച ധനൈര്ദാരൈഃ പുത്രൈരാദായ മേ ധനമ് ॥ ൧.൨൨॥
വനമഭ്യാഗതോ ദുഃഖീ നിരസ്തശ്ചാപ്തബന്ധുഭിഃ ।
സോഽഹം ന വേദ്മി പുത്രാണാം കുശലാകുശലാത്മികാമ് ॥ ൧.൨൩॥
പ്രവൃത്തിം സ്വജനാനാം ച ദാരാണാം ചാത്ര സംസ്ഥിതഃ ।
കിം നു തേഷാം ഗൃഹേ ക്ഷേമമക്ഷേമം കിം നു സാമ്പ്രതമ് ॥ ൧.൨൪॥
കഥം തേ കിം നു സദ്വൃത്താ ദുര്വൃത്താഃ കിം നു മേ സുതാഃ ॥ ൧.൨൫॥
രാജോവാച ॥ ൧.൨൬॥
യൈര്നിരസ്തോ ഭവാഁല്ലുബ്ധൈഃ പുത്രദാരാദിഭിര്ധനൈഃ ॥ ൧.൨൭॥
തേഷു കിം ഭവതഃ സ്നേഹമനുബധ്നാതി മാനസമ് ॥ ൧.൨൮॥
വൈശ്യ ഉവാച॥ ൧.൨൯॥
ഏവമേതദ്യഥാ പ്രാഹ ഭവാനസ്മദ്ഗതം വചഃ ॥ ൧.൩൦॥
കിം കരോമി ന ബധ്നാതി മമ നിഷ്ഠുരതാം മനഃ ।
യൈഃ സന്ത്യജ്യ പിതൃസ്നേഹം ധനലുബ്ധൈര്നിരാകൃതഃ ॥ ൧.൩൧॥
പതിസ്വജനഹാര്ദം ച ഹാര്ദിതേഷ്വേവ മേ മനഃ ।
കിമേതന്നാഭിജാനാമി ജാനന്നപി മഹാമതേ ॥ ൧.൩൨॥
യത്പ്രേമപ്രവണം ചിത്തം വിഗുണേഷ്വപി ബന്ധുഷു ।
തേഷാം കൃതേ മേ നിഃശ്വാസോ ദൌര്മനസ്യം ച ജായതേ ॥ ൧.൩൩॥
കരോമി കിം യന്ന മനസ്തേഷ്വപ്രീതിഷു നിഷ്ഠുരമ് ॥ ൧.൩൪॥
മാര്കണ്ഡേയ ഉവാച॥ ൧.൩൫॥
തതസ്തൌ സഹിതൌ വിപ്ര തം മുനിം സമുപസ്ഥിതൌ ॥ ൧.൩൬॥
സമാധിര്നാമ വൈശ്യോഽസൌ സ ച പാര്ഥിവസത്തമഃ ।
കൃത്വാ തു തൌ യഥാന്യായം യഥാര്ഹം തേന സംവിദമ് ॥ ൧.൩൭॥
ഉപവിഷ്ടൌ കഥാഃ കാശ്ചിച്ചക്രതുര്വൈശ്യപാര്ഥിവൌ ॥ ൧.൩൮॥
രാജോവാച ॥ ൧.൩൯॥
ഭഗവംസ്ത്വാമഹം പ്രഷ്ടുമിച്ഛാമ്യേകം വദസ്വ തത് ॥ ൧.൪൦॥
ദുഃഖായ യന്മേ മനസഃ സ്വചിത്തായത്തതാം വിനാ ।
മമത്വം ഗതരാജ്യസ്യ രാജ്യാങ്ഗേഷ്വഖിലേഷ്വപി ॥ ൧.൪൧॥
ജാനതോഽപി യഥാജ്ഞസ്യ കിമേതന്മുനിസത്തമ ।
അയം ച നികൃതഃ പുത്രൈര്ദാരൈര്ഭൃത്യൈസ്തഥോജ്ഝിതഃ ॥ ൧.൪൨॥
സ്വജനേന ച സന്ത്യക്തസ്തേഷു ഹാര്ദീ തഥാപ്യതി ।
ഏവമേഷ തഥാഹം ച ദ്വാവപ്യത്യന്തദുഃഖിതൌ ॥ ൧.൪൩॥
ദൃഷ്ടദോഷേഽപി വിഷയേ മമത്വാകൃഷ്ടമാനസൌ ।
തത്കിമേതന്മഹാഭാഗ യന്മോഹോ ജ്ഞാനിനോരപി ॥ ൧.൪൪॥
മമാസ്യ ച ഭവത്യേഷാ വിവേകാന്ധസ്യ മൂഢതാ ॥ ൧.൪൫॥
ഋഷിരുവാച ॥ ൧.൪൬॥
ജ്ഞാനമസ്തി സമസ്തസ്യ ജന്തോര്വിഷയഗോചരേ ॥ ൧.൪൭॥
വിഷയാശ്ച മഹാഭാഗ യാന്തി ചൈവം പൃഥക്പൃഥക് ।
ദിവാന്ധാഃ പ്രാണിനഃ കേചിദ്രാത്രാവന്ധാസ്തഥാപരേ ॥ ൧.൪൮॥
കേചിദ്ദിവാ തഥാ രാത്രൌ പ്രാണിനസ്തുല്യദൃഷ്ടയഃ ।
ജ്ഞാനിനോ മനുജാഃ സത്യം കിം തു തേ ന ഹി കേവലമ് ॥ ൧.൪൯॥
യതോ ഹി ജ്ഞാനിനഃ സര്വേ പശുപക്ഷിമൃഗാദയഃ ।
ജ്ഞാനം ച തന്മനുഷ്യാണാം യത്തേഷാം മൃഗപക്ഷിണാമ് ॥ ൧.൫൦॥
മനുഷ്യാണാം ച യത്തേഷാം തുല്യമന്യത്തഥോഭയോഃ ।
ജ്ഞാനേഽപി സതി പശ്യൈതാന് പതങ്ഗാഞ്ഛാവചഞ്ചുഷു ॥ ൧.൫൧॥
കണമോക്ഷാദൃതാന് മോഹാത്പീഡ്യമാനാനപി ക്ഷുധാ ।
മാനുഷാ മനുജവ്യാഘ്ര സാഭിലാഷാഃ സുതാന് പ്രതി ॥ ൧.൫൨॥
ലോഭാത് പ്രത്യുപകാരായ നന്വേതാന് കിം ന പശ്യസി ।
തഥാപി മമതാവര്ത്തേ മോഹഗര്തേ നിപാതിതാഃ ॥ ൧.൫൩॥
മഹാമായാപ്രഭാവേണ സംസാരസ്ഥിതികാരിണാ ।
തന്നാത്ര വിസ്മയഃ കാര്യോ യോഗനിദ്രാ ജഗത്പതേഃ ॥ ൧.൫൪॥
മഹാമായാ ഹരേശ്ചൈഷാ തയാ സമ്മോഹ്യതേ ജഗത് ।
ജ്ഞാനിനാമപി ചേതാംസി ദേവീ ഭഗവതീ ഹി സാ ॥ ൧.൫൫॥
ബലാദാകൃഷ്യ മോഹായ മഹാമായാ പ്രയച്ഛതി ।
തയാ വിസൃജ്യതേ വിശ്വം ജഗദേതച്ചരാചരമ് ॥ ൧.൫൬॥
സൈഷാ പ്രസന്നാ വരദാ നൃണാം ഭവതി മുക്തയേ ।
സാ വിദ്യാ പരമാ മുക്തേര്ഹേതുഭൂതാ സനാതനീ ॥ ൧.൫൭॥
സംസാരബന്ധഹേതുശ്ച സൈവ സര്വേശ്വരേശ്വരീ ॥ ൧.൫൮॥
രാജോവാച ॥ ൧.൫൯॥
ഭഗവന് കാ ഹി സാ ദേവീ മഹാമായേതി യാം ഭവാന് ॥ ൧.൬൦॥
ബ്രവീതി കഥമുത്പന്നാ സാ കര്മാസ്യാശ്ച കിം ദ്വിജ ।
യത്പ്രഭാവാ ച സാ ദേവീ യത്സ്വരൂപാ യദുദ്ഭവാ ॥ ൧.൬൧॥
തത്സര്വം ശ്രോതുമിച്ഛാമി ത്വത്തോ ബ്രഹ്മവിദാം വര ॥ ൧.൬൨॥
ഋഷിരുവാച ॥ ൧.൬൩॥
നിത്യൈവ സാ ജഗന്മൂര്തിസ്തയാ സര്വമിദം തതമ് ॥ ൧.൬൪॥
തഥാപി തത്സമുത്പത്തിര്ബഹുധാ ശ്രൂയതാം മമ ।
ദേവാനാം കാര്യസിദ്ധ്യര്ഥമാവിര്ഭവതി സാ യദാ ॥ ൧.൬൫॥
ഉത്പന്നേതി തദാ ലോകേ സാ നിത്യാപ്യഭിധീയതേ ।
യോഗനിദ്രാം യദാ വിഷ്ണുര്ജഗത്യേകാര്ണവീകൃതേ ॥ ൧.൬൬॥
ആസ്തീര്യ ശേഷമഭജത് കല്പാന്തേ ഭഗവാന് പ്രഭുഃ ।
തദാ ദ്വാവസുരൌ ഘോരൌ വിഖ്യാതൌ മധുകൈടഭൌ ॥ ൧.൬൭॥
വിഷ്ണുകര്ണമലോദ്ഭൂതൌ ഹന്തും ബ്രഹ്മാണമുദ്യതൌ ।
സ നാഭികമലേ വിഷ്ണോഃ സ്ഥിതോ ബ്രഹ്മാ പ്രജാപതിഃ ॥ ൧.൬൮॥
ദൃഷ്ട്വാ താവസുരൌ ചോഗ്രൌ പ്രസുപ്തം ച ജനാര്ദനമ് ।
തുഷ്ടാവ യോഗനിദ്രാം താമേകാഗ്രഹൃദയഃ സ്ഥിതഃ ॥ ൧.൬൯॥
വിബോധനാര്ഥായ ഹരേര്ഹരിനേത്രകൃതാലയാമ് ।
വിശ്വേശ്വരീം ജഗദ്ധാത്രീം സ്ഥിതിസംഹാരകാരിണീമ് ॥ ൧.൭൦॥
നിദ്രാം ഭഗവതീം വിഷ്ണോരതുലാം തേജസഃ പ്രഭുഃ ॥ ൧.൭൧॥
ബ്രഹ്മോവാച ॥ ൧.൭൨॥
ത്വം സ്വാഹാ ത്വം സ്വധാ ത്വം ഹി വഷട്കാരഃ സ്വരാത്മികാ ॥ ൧.൭൩॥
സുധാ ത്വമക്ഷരേ നിത്യേ ത്രിധാ മാത്രാത്മികാ സ്ഥിതാ ।
അര്ധമാത്രാ സ്ഥിതാ നിത്യാ യാനുച്ചാര്യാവിശേഷതഃ ॥ ൧.൭൪॥
ത്വമേവ സന്ധ്യാ സാവിത്രീ ത്വം ദേവി ജനനീ പരാ ।
ത്വയൈതദ്ധാര്യതേ വിശ്വം ത്വയൈതത് സൃജ്യതേ ജഗത് ॥ ൧.൭൫॥
ത്വയൈതത് പാല്യതേ ദേവി ത്വമത്സ്യന്തേ ച സര്വദാ ।
വിസൃഷ്ടൌ സൃഷ്ടിരൂപാ ത്വം സ്ഥിതിരൂപാ ച പാലനേ ॥ ൧.൭൬॥
തഥാ സംഹൃതിരൂപാന്തേ ജഗതോഽസ്യ ജഗന്മയേ ।
മഹാവിദ്യാ മഹാമായാ മഹാമേധാ മഹാസ്മൃതിഃ ॥ ൧.൭൭॥
മഹാമോഹാ ച ഭവതീ മഹാദേവീ മഹേശ്വരീ ।
പ്രകൃതിസ്ത്വം ച സര്വസ്യ ഗുണത്രയവിഭാവിനീ ॥ ൧.൭൮॥
കാലരാത്രിര്മഹാരാത്രിര്മോഹരാത്രിശ്ച ദാരുണാ ।
ത്വം ശ്രീസ്ത്വമീശ്വരീ ത്വം ഹ്രീസ്ത്വം ബുദ്ധിര്ബോധലക്ഷണാ ॥ ൧.൭൯॥
ലജ്ജാ പുഷ്ടിസ്തഥാ തുഷ്ടിസ്ത്വം ശാന്തിഃ ക്ഷാന്തിരേവ ച ।
ഖഡ്ഗിനീ ശൂലിനീ ഘോരാ ഗദിനീ ചക്രിണീ തഥാ ॥ ൧.൮൦॥
ശങ്ഖിനീ ചാപിനീ ബാണഭുശുണ്ഡീപരിഘായുധാ ।
സൌമ്യാ സൌമ്യതരാശേഷസൌമ്യേഭ്യസ്ത്വതിസുന്ദരീ ॥ ൧.൮൧॥
പരാപരാണാം പരമാ ത്വമേവ പരമേശ്വരീ ।
യച്ച കിഞ്ചിത്ക്വചിദ്വസ്തു സദസദ്വാഖിലാത്മികേ ॥ ൧.൮൨॥
തസ്യ സര്വസ്യ യാ ശക്തിഃ സാ ത്വം കിം സ്തൂയസേ മയാ ।
യയാ ത്വയാ ജഗത്സ്രഷ്ടാ ജഗത്പാത്യത്തി യോ ജഗത് ॥ ൧.൮൩॥
സോഽപി നിദ്രാവശം നീതഃ കസ്ത്വാം സ്തോതുമിഹേശ്വരഃ ।
വിഷ്ണുഃ ശരീരഗ്രഹണമഹമീശാന ഏവ ച ॥ ൧.൮൪॥
കാരിതാസ്തേ യതോഽതസ്ത്വാം കഃ സ്തോതും ശക്തിമാന് ഭവേത് ।
സാ ത്വമിത്ഥം പ്രഭാവൈഃ സ്വൈരുദാരൈര്ദേവി സംസ്തുതാ ॥ ൧.൮൫॥
മോഹയൈതൌ ദുരാധര്ഷാവസുരൌ മധുകൈടഭൌ ।
പ്രബോധം ച ജഗത്സ്വാമീ നീയതാമച്യുതോ ലഘു ॥ ൧.൮൬॥
ബോധശ്ച ക്രിയതാമസ്യ ഹന്തുമേതൌ മഹാസുരൌ ॥ ൧.൮൭॥
ഋഷിരുവാച ॥ ൧.൮൮॥
ഏവം സ്തുതാ തദാ ദേവീ താമസീ തത്ര വേധസാ ॥ ൧.൮൯॥
വിഷ്ണോഃ പ്രബോധനാര്ഥായ നിഹന്തും മധുകൈടഭൌ ।
നേത്രാസ്യനാസികാബാഹുഹൃദയേഭ്യസ്തഥോരസഃ ॥ ൧.൯൦॥
നിര്ഗമ്യ ദര്ശനേ തസ്ഥൌ ബ്രഹ്മണോഽവ്യക്തജന്മനഃ ।
ഉത്തസ്ഥൌ ച ജഗന്നാഥസ്തയാ മുക്തോ ജനാര്ദനഃ ॥ ൧.൯൧॥
ഏകാര്ണവേഽഹിശയനാത്തതഃ സ ദദൃശേ ച തൌ ।
മധുകൈടഭൌ ദുരാത്മാനാവതിവീര്യപരാക്രമൌ ॥ ൧.൯൨॥
ക്രോധരക്തേക്ഷണാവത്തും ബ്രഹ്മാണം ജനിതോദ്യമൌ ।
സമുത്ഥായ തതസ്താഭ്യാം യുയുധേ ഭഗവാന് ഹരിഃ ॥ ൧.൯൩॥
പഞ്ചവര്ഷസഹസ്രാണി ബാഹുപ്രഹരണോ വിഭുഃ ।
താവപ്യതിബലോന്മത്തൌ മഹാമായാവിമോഹിതൌ ॥ ൧.൯൪॥
ഉക്തവന്തൌ വരോഽസ്മത്തോ വ്രിയതാമിതി കേശവമ് ॥ ൧.൯൫॥
ശ്രീഭഗവാനുവാച ॥ ൧.൯൬॥
ഭവേതാമദ്യ മേ തുഷ്ടൌ മമ വധ്യാവുഭാവപി ॥ ൧.൯൭॥
കിമന്യേന വരേണാത്ര ഏതാവദ്ധി വൃതം മയാ ॥ ൧.൯൮॥
ഋഷിരുവാച ॥ ൧.൯൯॥
വഞ്ചിതാഭ്യാമിതി തദാ സര്വമാപോമയം ജഗത് ॥ ൧.൧൦൦॥
വിലോക്യ താഭ്യാം ഗദിതോ ഭഗവാന് കമലേക്ഷണഃ ।
ആവാം ജഹി ന യത്രോര്വീ സലിലേന പരിപ്ലുതാ ॥ ൧.൧൦൧॥
ഋഷിരുവാച ॥ ൧.൧൦൨॥
തഥേത്യുക്ത്വാ ഭഗവതാ ശങ്ഖചക്രഗദാഭൃതാ ।
കൃത്വാ ചക്രേണ വൈ ഛിന്നേ ജഘനേ ശിരസീ തയോഃ ॥ ൧.൧൦൩॥
ഏവമേഷാ സമുത്പന്നാ ബ്രഹ്മണാ സംസ്തുതാ സ്വയമ് ।
പ്രഭാവമസ്യാ ദേവ്യാസ്തു ഭൂയഃ ശ‍ൃണു വദാമി തേ ॥ ൧.൧൦൪॥
। ഐം ഓം ।
॥ സ്വസ്തി ശ്രീമാര്കണ്ഡേയപുരാണേ സാവര്ണികേ മന്വന്തരേ ദേവീമാഹാത്മ്യേ
മധുകൈടഭവധോ നാമ പ്രഥമോഽധ്യായഃ ॥ ൧॥
ഉവാച൧൪, അര്ധശ്ലോകാഃ ൨൪, ശ്ലോകാഃ ൬൬, ഏവമാദിതഃ ॥ ൧൦൪॥

വിനിയോഗഃ
അസ്യ ശ്രീ മധ്യമചരിത്രസ്യ വിഷ്ണുരൃഷിഃ ।
ശ്രീമഹാലക്ഷ്മീര്ദേവതാ ।
ഉഷ്ണിക് ഛന്ദഃ । ശാകമ്ഭരീ ശക്തിഃ । ദുര്ഗാ ബീജമ് ।
വായുസ്തത്ത്വമ് ।
യജുര്വേദഃ സ്വരൂപമ് । ശ്രീമഹാലക്ഷ്മീപ്രീത്യര്ഥേ
മധ്യമചരിത്രജപേ വിനിയോഗഃ ।
। ധ്യാനമ് ।
ഓം അക്ഷസ്രക്പരശൂ ഗദേഷുകുലിശം പദ്മം ധനുഃ കുണ്ഡികാം
ദണ്ഡം ശക്തിമസിം ച ചര്മ ജലജം ഘണ്ടാം സുരാഭാജനമ് ।
ശൂലം പാശസുദര്ശനേ ച ദധതീം ഹസ്തൈഃ പ്രവാലപ്രഭാം
സേവേ സൈരിഭമര്ദിനീമിഹ മഹാലക്ഷ്മീം സരോജസ്ഥിതാമ് ॥
ഓം ഹ്രീം ഋഷിരുവാച ॥ ൨.൧॥
ദേവാസുരമഭൂദ്യുദ്ധം പൂര്ണമബ്ദശതം പുരാ ।
മഹിഷേഽസുരാണാമധിപേ ദേവാനാം ച പുരന്ദരേ ॥ ൨.൨॥
തത്രാസുരൈര്മഹാവീര്യൈര്ദേവസൈന്യം പരാജിതമ് ।
ജിത്വാ ച സകലാന് ദേവാനിന്ദ്രോഽഭൂന്മഹിഷാസുരഃ ॥ ൨.൩॥
തതഃ പരാജിതാ ദേവാഃ പദ്മയോനിം പ്രജാപതിമ് ।
പുരസ്കൃത്യ ഗതാസ്തത്ര യത്രേശഗരുഡധ്വജൌ ॥ ൨.൪॥
യഥാവൃത്തം തയോസ്തദ്വന്മഹിഷാസുരചേഷ്ടിതമ് ।
ത്രിദശാഃ കഥയാമാസുര്ദേവാഭിഭവവിസ്തരമ് ॥ ൨.൫॥
സൂര്യേന്ദ്രാഗ്ന്യനിലേന്ദൂനാം യമസ്യ വരുണസ്യ ച ।
അന്യേഷാം ചാധികാരാന്സ സ്വയമേവാധിതിഷ്ഠതി ॥ ൨.൬॥
സ്വര്ഗാന്നിരാകൃതാഃ സര്വേ തേന ദേവഗണാ ഭുവി ।
വിചരന്തി യഥാ മര്ത്യാ മഹിഷേണ ദുരാത്മനാ ॥ ൨.൭॥
ഏതദ്വഃ കഥിതം സര്വമമരാരിവിചേഷ്ടിതമ് ।
ശരണം വഃ പ്രപന്നാഃ സ്മോ വധസ്തസ്യ വിചിന്ത്യതാമ് ॥ ൨.൮॥
ഇത്ഥം നിശമ്യ ദേവാനാം വചാംസി മധുസൂദനഃ ।
ചകാര കോപം ശമ്ഭുശ്ച ഭ്രുകുടീകുടിലാനനൌ ॥ ൨.൯॥
തതോഽതികോപപൂര്ണസ്യ ചക്രിണോ വദനാത്തതഃ ।
നിശ്ചക്രാമ മഹത്തേജോ ബ്രഹ്മണഃ ശങ്കരസ്യ ച ॥ ൨.൧൦॥
അന്യേഷാം ചൈവ ദേവാനാം ശക്രാദീനാം ശരീരതഃ ।
നിര്ഗതം സുമഹത്തേജസ്തച്ചൈക്യം സമഗച്ഛത ॥ ൨.൧൧॥
അതീവ തേജസഃ കൂടം ജ്വലന്തമിവ പര്വതമ് ।
ദദൃശുസ്തേ സുരാസ്തത്ര ജ്വാലാവ്യാപ്തദിഗന്തരമ് ॥ ൨.൧൨॥
അതുലം തത്ര തത്തേജഃ സര്വദേവശരീരജമ് ।
ഏകസ്ഥം തദഭൂന്നാരീ വ്യാപ്തലോകത്രയം ത്വിഷാ ॥ ൨.൧൩॥
യദഭൂച്ഛാമ്ഭവം തേജസ്തേനാജായത തന്മുഖമ് ।
യാമ്യേന ചാഭവന് കേശാ ബാഹവോ വിഷ്ണുതേജസാ ॥ ൨.൧൪॥
സൌമ്യേന സ്തനയോര്യുഗ്മം മധ്യം ചൈന്ദ്രേണ ചാഭവത് ।
വാരുണേന ച ജങ്ഘോരൂ നിതമ്ബസ്തേജസാ ഭുവഃ ॥ ൨.൧൫॥
ബ്രഹ്മണസ്തേജസാ പാദൌ തദങ്ഗുല്യോഽര്കതേജസാ ।
വസൂനാം ച കരാങ്ഗുല്യഃ കൌബേരേണ ച നാസികാ ॥ ൨.൧൬॥
തസ്യാസ്തു ദന്താഃ സമ്ഭൂതാഃ പ്രാജാപത്യേന തേജസാ ।
നയനത്രിതയം ജജ്ഞേ തഥാ പാവകതേജസാ ॥ ൨.൧൭॥
ഭ്രുവൌ ച സന്ധ്യയോസ്തേജഃ ശ്രവണാവനിലസ്യ ച ।
അന്യേഷാം ചൈവ ദേവാനാം സമ്ഭവസ്തേജസാം ശിവാ ॥ ൨.൧൮॥
തതഃ സമസ്തദേവാനാം തേജോരാശിസമുദ്ഭവാമ് ।
താം വിലോക്യ മുദം പ്രാപുരമരാ മഹിഷാര്ദിതാഃ ।
തതോ ദേവാ ദദുസ്തസ്യൈ സ്വാനി സ്വാന്യായുധാനി ച ॥ ൨.൧൯॥
ശൂലം ശൂലാദ്വിനിഷ്കൃഷ്യ ദദൌ തസ്യൈ പിനാകധൃക് ।
ചക്രം ച ദത്തവാന് കൃഷ്ണഃ സമുത്പാട്യ സ്വചക്രതഃ ॥ ൨.൨൦॥
ശങ്ഖം ച വരുണഃ ശക്തിം ദദൌ തസ്യൈ ഹുതാശനഃ ।
മാരുതോ ദത്തവാംശ്ചാപം ബാണപൂര്ണേ തഥേഷുധീ ॥ ൨.൨൧॥
വജ്രമിന്ദ്രഃ സമുത്പാട്യ കുലിശാദമരാധിപഃ ।
ദദൌ തസ്യൈ സഹസ്രാക്ഷോ ഘണ്ടാമൈരാവതാദ്ഗജാത് ॥ ൨.൨൨॥
കാലദണ്ഡാദ്യമോ ദണ്ഡം പാശം ചാമ്ബുപതിര്ദദൌ ।
പ്രജാപതിശ്ചാക്ഷമാലാം ദദൌ ബ്രഹ്മാ കമണ്ഡലുമ് ॥ ൨.൨൩॥
സമസ്തരോമകൂപേഷു നിജരശ്മീന് ദിവാകരഃ ।
കാലശ്ച ദത്തവാന് ഖഡ്ഗം തസ്യൈ ചര്മ ച നിര്മലമ് ॥ ൨.൨൪॥
ക്ഷീരോദശ്ചാമലം ഹാരമജരേ ച തഥാമ്ബരേ ।
ചൂഡാമണിം തഥാ ദിവ്യം കുണ്ഡലേ കടകാനി ച ॥ ൨.൨൫॥
അര്ധചന്ദ്രം തഥാ ശുഭ്രം കേയൂരാന് സര്വബാഹുഷു ।
നൂപുരൌ വിമലൌ തദ്വദ് ഗ്രൈവേയകമനുത്തമമ് ॥ ൨.൨൬॥
അങ്ഗുലീയകരത്നാനി സമസ്താസ്വങ്ഗുലീഷു ച ।
വിശ്വകര്മാ ദദൌ തസ്യൈ പരശും ചാതിനിര്മലമ് ॥ ൨.൨൭॥
അസ്ത്രാണ്യനേകരൂപാണി തഥാഭേദ്യം ച ദംശനമ് ।
അമ്ലാനപങ്കജാം മാലാം ശിരസ്യുരസി ചാപരാമ് ॥ ൨.൨൮॥
അദദജ്ജലധിസ്തസ്യൈ പങ്കജം ചാതിശോഭനമ് ।
ഹിമവാന് വാഹനം സിംഹം രത്നാനി വിവിധാനി ച ॥ ൨.൨൯॥
ദദാവശൂന്യം സുരയാ പാനപാത്രം ധനാധിപഃ ।
ശേഷശ്ച സര്വനാഗേശോ മഹാമണിവിഭൂഷിതമ് ॥ ൨.൩൦॥
നാഗഹാരം ദദൌ തസ്യൈ ധത്തേ യഃ പൃഥിവീമിമാമ് ।
അന്യൈരപി സുരൈര്ദേവീ ഭൂഷണൈരായുധൈസ്തഥാ ॥ ൨.൩൧॥
സമ്മാനിതാ നനാദോച്ചൈഃ സാട്ടഹാസം മുഹുര്മുഹുഃ ।
തസ്യാ നാദേന ഘോരേണ കൃത്സ്നമാപൂരിതം നഭഃ ॥ ൨.൩൨॥
അമായതാതിമഹതാ പ്രതിശബ്ദോ മഹാനഭൂത് ।
ചുക്ഷുഭുഃ സകലാ ലോകാഃ സമുദ്രാശ്ച ചകമ്പിരേ ॥ ൨.൩൩॥
ചചാല വസുധാ ചേലുഃ സകലാശ്ച മഹീധരാഃ ।
ജയേതി ദേവാശ്ച മുദാ താമൂചുഃ സിംഹവാഹിനീമ് ॥ ൨.൩൪॥
തുഷ്ടുവുര്മുനയശ്ചൈനാം ഭക്തിനമ്രാത്മമൂര്തയഃ ।
ദൃഷ്ട്വാ സമസ്തം സങ്ക്ഷുബ്ധം ത്രൈലോക്യമമരാരയഃ ॥ ൨.൩൫॥
സന്നദ്ധാഖിലസൈന്യാസ്തേ സമുത്തസ്ഥുരുദായുധാഃ ।
ആഃ കിമേതദിതി ക്രോധാദാഭാഷ്യ മഹിഷാസുരഃ ॥ ൨.൩൬॥
അഭ്യധാവത തം ശബ്ദമശേഷൈരസുരൈര്വൃതഃ ।
സ ദദര്ശ തതോ ദേവീം വ്യാപ്തലോകത്രയാം ത്വിഷാ ॥ ൨.൩൭॥
പാദാക്രാന്ത്യാ നതഭുവം കിരീടോല്ലിഖിതാമ്ബരാമ് ।
ക്ഷോഭിതാശേഷപാതാലാം ധനുര്ജ്യാനിഃസ്വനേന താമ് ॥ ൨.൩൮॥
ദിശോ ഭുജസഹസ്രേണ സമന്താദ്വ്യാപ്യ സംസ്ഥിതാമ് ।
തതഃ പ്രവവൃതേ യുദ്ധം തയാ ദേവ്യാ സുരദ്വിഷാമ് ॥ ൨.൩൯॥
ശസ്ത്രാസ്ത്രൈര്ബഹുധാ മുക്തൈരാദീപിതദിഗന്തരമ് ।
മഹിഷാസുരസേനാനീശ്ചിക്ഷുരാഖ്യോ മഹാസുരഃ ॥ ൨.൪൦॥
യുയുധേ ചാമരശ്ചാന്യൈശ്ചതുരങ്ഗബലാന്വിതഃ ।
രഥാനാമയുതൈഃ ഷഡ്ഭിരുദഗ്രാഖ്യോ മഹാസുരഃ ॥ ൨.൪൧॥
അയുധ്യതായുതാനാം ച സഹസ്രേണ മഹാഹനുഃ ।
പഞ്ചാശദ്ഭിശ്ച നിയുതൈരസിലോമാ മഹാസുരഃ ॥ ൨.൪൨॥
അയുതാനാം ശതൈഃ ഷഡ്ഭിര്ബാഷ്കലോ യുയുധേ രണേ ।
ഗജവാജിസഹസ്രൌഘൈരനേകൈഃ പരിവാരിതഃ ॥ ൨.൪൩॥
വൃതോ രഥാനാം കോട്യാ ച യുദ്ധേ തസ്മിന്നയുധ്യത ।
ബിഡാലാഖ്യോഽയുതാനാം ച പഞ്ചാശദ്ഭിരഥായുതൈഃ ॥ ൨.൪൪॥
യുയുധേ സംയുഗേ തത്ര രഥാനാം പരിവാരിതഃ ।
അന്യേ ച തത്രായുതശോ രഥനാഗഹയൈര്വൃതാഃ ॥ ൨.൪൫॥
യുയുധുഃ സംയുഗേ ദേവ്യാ സഹ തത്ര മഹാസുരാഃ ।
കോടികോടിസഹസ്രൈസ്തു രഥാനാം ദന്തിനാം തഥാ ॥ ൨.൪൬॥
ഹയാനാം ച വൃതോ യുദ്ധേ തത്രാഭൂന്മഹിഷാസുരഃ ।
തോമരൈര്ഭിന്ദിപാലൈശ്ച ശക്തിഭിര്മുസലൈസ്തഥാ ॥ ൨.൪൭॥
യുയുധുഃ സംയുഗേ ദേവ്യാ ഖഡ്ഗൈഃ പരശുപട്ടിശൈഃ ।
കേചിച്ച ചിക്ഷിപുഃ ശക്തീഃ കേചിത് പാശാംസ്തഥാപരേ ॥ ൨.൪൮॥
ദേവീം ഖഡ്ഗപ്രഹാരൈസ്തു തേ താം ഹന്തും പ്രചക്രമുഃ ।
സാപി ദേവീ തതസ്താനി ശസ്ത്രാണ്യസ്ത്രാണി ചണ്ഡികാ ॥ ൨.൪൯॥
ലീലയൈവ പ്രചിച്ഛേദ നിജശസ്ത്രാസ്ത്രവര്ഷിണീ ।
അനായസ്താനനാ ദേവീ സ്തൂയമാനാ സുരര്ഷിഭിഃ ॥ ൨.൫൦॥
മുമോചാസുരദേഹേഷു ശസ്ത്രാണ്യസ്ത്രാണി ചേശ്വരീ ।
സോഽപി ക്രുദ്ധോ ധുതസടോ ദേവ്യാ വാഹനകേസരീ ॥ ൨.൫൧॥
ചചാരാസുരസൈന്യേഷു വനേഷ്വിവ ഹുതാശനഃ ।
നിഃശ്വാസാന് മുമുചേ യാംശ്ച യുധ്യമാനാ രണേഽമ്ബികാ ॥ ൨.൫൨॥
ത ഏവ സദ്യഃ സമ്ഭൂതാ ഗണാഃ ശതസഹസ്രശഃ ।
യുയുധുസ്തേ പരശുഭിര്ഭിന്ദിപാലാസിപട്ടിശൈഃ ॥ ൨.൫൩॥
നാശയന്തോഽസുരഗണാന് ദേവീശക്ത്യുപബൃംഹിതാഃ ।
അവാദയന്ത പടഹാന് ഗണാഃ ശങ്ഖാംസ്തഥാപരേ ॥ ൨.൫൪॥
മൃദങ്ഗാംശ്ച തഥൈവാന്യേ തസ്മിന് യുദ്ധമഹോത്സവേ ।
തതോ ദേവീ ത്രിശൂലേന ഗദയാ ശക്തിവൃഷ്ടിഭിഃ ॥ ൨.൫൫॥
ഖഡ്ഗാദിഭിശ്ച ശതശോ നിജഘാന മഹാസുരാന് ।
പാതയാമാസ ചൈവാന്യാന് ഘണ്ടാസ്വനവിമോഹിതാന് ॥ ൨.൫൬॥
അസുരാന് ഭുവി പാശേന ബദ്ധ്വാ ചാന്യാനകര്ഷയത് ।
കേചിദ് ദ്വിധാകൃതാസ്തീക്ഷ്ണൈഃ ഖഡ്ഗപാതൈസ്തഥാപരേ ॥ ൨.൫൭॥
വിപോഥിതാ നിപാതേന ഗദയാ ഭുവി ശേരതേ ।
വേമുശ്ച കേചിദ്രുധിരം മുസലേന ഭൃശം ഹതാഃ ॥ ൨.൫൮॥
കേചിന്നിപതിതാ ഭൂമൌ ഭിന്നാഃ ശൂലേന വക്ഷസി ।
നിരന്തരാഃ ശരൌഘേണ കൃതാഃ കേചിദ്രണാജിരേ ॥ ൨.൫൯॥
ശ്യേനാനുകാരിണഃ പ്രാണാന് മുമുചുസ്ത്രിദശാര്ദനാഃ ।
കേഷാഞ്ചിദ് ബാഹവശ്ഛിന്നാശ്ഛിന്നഗ്രീവാസ്തഥാപരേ ॥ ൨.൬൦॥
ശിരാംസി പേതുരന്യേഷാമന്യേ മധ്യേ വിദാരിതാഃ ।
വിച്ഛിന്നജങ്ഘാസ്ത്വപരേ പേതുരുര്വ്യാം മഹാസുരാഃ ॥ ൨.൬൧॥
ഏകബാഹ്വക്ഷിചരണാഃ കേചിദ്ദേവ്യാ ദ്വിധാകൃതാഃ ।
ഛിന്നേഽപി ചാന്യേ ശിരസി പതിതാഃ പുനരുത്ഥിതാഃ ॥ ൨.൬൨॥
കബന്ധാ യുയുധുര്ദേവ്യാ ഗൃഹീതപരമായുധാഃ ।
നനൃതുശ്ചാപരേ തത്ര യുദ്ധേ തൂര്യലയാശ്രിതാഃ ॥ ൨.൬൩॥
കബന്ധാശ്ഛിന്നശിരസഃ ഖഡ്ഗശക്ത്യൃഷ്ടിപാണയഃ ।
തിഷ്ഠ തിഷ്ഠേതി ഭാഷന്തോ ദേവീമന്യേ മഹാസുരാഃ ॥ ൨.൬൪॥
പാതിതൈ രഥനാഗാശ്വൈരസുരൈശ്ച വസുന്ധരാ ।
അഗമ്യാ സാഭവത്തത്ര യത്രാഭൂത് സ മഹാരണഃ ॥ ൨.൬൫॥
ശോണിതൌഘാ മഹാനദ്യഃ സദ്യസ്തത്ര പ്രസുസ്രുവുഃ ।
മധ്യേ ചാസുരസൈന്യസ്യ വാരണാസുരവാജിനാമ് ॥ ൨.൬൬॥
ക്ഷണേന തന്മഹാസൈന്യമസുരാണാം തഥാമ്ബികാ ।
നിന്യേ ക്ഷയം യഥാ വഹ്നിസ്തൃണദാരുമഹാചയമ് ॥ ൨.൬൭॥
സ ച സിംഹോ മഹാനാദമുത്സൃജന് ധുതകേസരഃ ।
ശരീരേഭ്യോഽമരാരീണാമസൂനിവ വിചിന്വതി ॥ ൨.൬൮॥
ദേവ്യാ ഗണൈശ്ച തൈസ്തത്ര കൃതം യുദ്ധം തഥാസുരൈഃ ।
യഥൈഷാം തുതുഷുര്ദേവാഃ പുഷ്പവൃഷ്ടിമുചോ ദിവി ॥ ൨.൬൯॥
॥ സ്വസ്തി ശ്രീമാര്കണ്ഡേയപുരാണേ സാവര്ണികേ മന്വന്തരേ ദേവീമാഹാത്മ്യേ
മഹിഷാസുരസൈന്യവധോ നാമ ദ്വിതീയോഽധ്യായഃ ॥ ൨॥
ഉവാച൧, അര്ധശ്ലോകാഃ ൬൮, ശ്ലോകാഃ ൬൯, ഏവമാദിതഃ ॥ ൧൭൩॥

। ധ്യാനമ് ।
ഓം ഉദ്യദ്ഭാനുസഹസ്രകാന്തിമരുണക്ഷൌമാം ശിരോമാലികാം
രക്താലിപ്തപയോധരാം ജപവടീം വിദ്യാമഭീതിം വരമ് ।
ഹസ്താബ്ജൈര്ദധതീം ത്രിനേത്രവിലസദ്വക്ത്രാരവിന്ദശ്രിയം
ദേവീം ബദ്ധഹിമാംശുരത്നമുകുടാം വന്ദേഽരവിന്ദസ്ഥിതാമ് ।
ഓം ഋഷിരുവാച ॥ ൩.൧॥
നിഹന്യമാനം തത്സൈന്യമവലോക്യ മഹാസുരഃ ।
സേനാനീശ്ചിക്ഷുരഃ കോപാദ്യയൌ യോദ്ധുമഥാമ്ബികാമ് ॥ ൩.൨॥
സ ദേവീം ശരവര്ഷേണ വവര്ഷ സമരേഽസുരഃ ।
യഥാ മേരുഗിരേഃ ശ‍ൃങ്ഗം തോയവര്ഷേണ തോയദഃ ॥ ൩.൩॥
തസ്യ ഛിത്വാ തതോ ദേവീ ലീലയൈവ ശരോത്കരാന് ।
ജഘാന തുരഗാന്ബാണൈര്യന്താരം ചൈവ വാജിനാമ് ॥ ൩.൪॥
ചിച്ഛേദ ച ധനുഃ സദ്യോ ധ്വജം ചാതിസമുച്ഛൃതമ് ।
വിവ്യാധ ചൈവ ഗാത്രേഷു ഛിന്നധന്വാനമാശുഗൈഃ ॥ ൩.൫॥
സച്ഛിന്നധന്വാ വിരഥോ ഹതാശ്വോ ഹതസാരഥിഃ ।
അഭ്യധാവത താം ദേവീം ഖഡ്ഗചര്മധരോഽസുരഃ ॥ ൩.൬॥
സിംഹമാഹത്യ ഖഡ്ഗേന തീക്ഷ്ണധാരേണ മൂര്ധനി ।
ആജഘാന ഭുജേ സവ്യേ ദേവീമപ്യതിവേഗവാന് ॥ ൩.൭॥
തസ്യാഃ ഖഡ്ഗോ ഭുജം പ്രാപ്യ പഫാല നൃപനന്ദന ।
തതോ ജഗ്രാഹ ശൂലം സ കോപാദരുണലോചനഃ ॥ ൩.൮॥
ചിക്ഷേപ ച തതസ്തത്തു ഭദ്രകാല്യാം മഹാസുരഃ ।
ജാജ്വല്യമാനം തേജോഭീ രവിബിമ്ബമിവാമ്ബരാത് ॥ ൩.൯॥
ദൃഷ്ട്വാ തദാപതച്ഛൂലം ദേവീ ശൂലമമുഞ്ചത ।
തേന തച്ഛതധാ നീതം ശൂലം സ ച മഹാസുരഃ ॥ ൩.൧൦॥
ഹതേ തസ്മിന്മഹാവീര്യേ മഹിഷസ്യ ചമൂപതൌ ।
ആജഗാമ ഗജാരൂഢശ്ചാമരസ്ത്രിദശാര്ദനഃ ॥ ൩.൧൧॥
സോഽപി ശക്തിം മുമോചാഥ ദേവ്യാസ്താമമ്ബികാ ദ്രുതമ് ।
ഹുങ്കാരാഭിഹതാം ഭൂമൌ പാതയാമാസ നിഷ്പ്രഭാമ് ॥ ൩.൧൨॥
ഭഗ്നാം ശക്തിം നിപതിതാം ദൃഷ്ട്വാ ക്രോധസമന്വിതഃ ।
ചിക്ഷേപ ചാമരഃ ശൂലം ബാണൈസ്തദപി സാച്ഛിനത് ॥ ൩.൧൩॥
തതഃ സിംഹഃ സമുത്പത്യ ഗജകുമ്ഭാന്തരേ സ്ഥിതഃ ।
ബാഹുയുദ്ധേന യുയുധേ തേനോച്ചൈസ്ത്രിദശാരിണാ ॥ ൩.൧൪॥
യുധ്യമാനൌ തതസ്തൌ തു തസ്മാന്നാഗാന്മഹീം ഗതൌ ।
യുയുധാതേഽതിസംരബ്ധൌ പ്രഹാരൈരതിദാരുണൈഃ ॥ ൩.൧൫॥
തതോ വേഗാത് ഖമുത്പത്യ നിപത്യ ച മൃഗാരിണാ ।
കരപ്രഹാരേണ ശിരശ്ചാമരസ്യ പൃഥക് കൃതമ് ॥ ൩.൧൬॥
ഉദഗ്രശ്ച രണേ ദേവ്യാ ശിലാവൃക്ഷാദിഭിര്ഹതഃ ।
ദന്തമുഷ്ടിതലൈശ്ചൈവ കരാലശ്ച നിപാതിതഃ ॥ ൩.൧൭॥
ദേവീ ക്രുദ്ധാ ഗദാപാതൈശ്ചൂര്ണയാമാസ ചോദ്ധതമ് ।
ബാഷ്കലം ഭിന്ദിപാലേന ബാണൈസ്താമ്രം തഥാന്ധകമ് ॥ ൩.൧൮॥
ഉഗ്രാസ്യമുഗ്രവീര്യം ച തഥൈവ ച മഹാഹനുമ് ।
ത്രിനേത്രാ ച ത്രിശൂലേന ജഘാന പരമേശ്വരീ ॥ ൩.൧൯॥
ബിഡാലസ്യാസിനാ കായാത് പാതയാമാസ വൈ ശിരഃ ।
ദുര്ധരം ദുര്മുഖം ചോഭൌ ശരൈര്നിന്യേ യമക്ഷയമ് ॥ ൩.൨൦॥
ഏവം സങ്ക്ഷീയമാണേ തു സ്വസൈന്യേ മഹിഷാസുരഃ ।
മാഹിഷേണ സ്വരൂപേണ ത്രാസയാമാസ താന് ഗണാന് ॥ ൩.൨൧॥
കാംശ്ചിത്തുണ്ഡപ്രഹാരേണ ഖുരക്ഷേപൈസ്തഥാപരാന് ।
ലാങ്ഗൂലതാഡിതാംശ്ചാന്യാന് ശ‍ൃങ്ഗാഭ്യാം ച വിദാരിതാന് ॥ ൩.൨൨॥
വേഗേന കാംശ്ചിദപരാന്നാദേന ഭ്രമണേന ച ।
നിഃശ്വാസപവനേനാന്യാന്പാതയാമാസ ഭൂതലേ ॥ ൩.൨൩॥
നിപാത്യ പ്രമഥാനീകമഭ്യധാവത സോഽസുരഃ ।
സിംഹം ഹന്തും മഹാദേവ്യാഃ കോപം ചക്രേ തതോഽമ്ബികാ ॥ ൩.൨൪॥
സോഽപി കോപാന്മഹാവീര്യഃ ഖുരക്ഷുണ്ണമഹീതലഃ ।
ശ‍ൃങ്ഗാഭ്യാം പര്വതാനുച്ചാംശ്ചിക്ഷേപ ച നനാദ ച ॥ ൩.൨൫॥
വേഗഭ്രമണവിക്ഷുണ്ണാ മഹീ തസ്യ വ്യശീര്യത ।
ലാങ്ഗൂലേനാഹതശ്ചാബ്ധിഃ പ്ലാവയാമാസ സര്വതഃ ॥ ൩.൨൬॥
ധുതശ‍ൃങ്ഗവിഭിന്നാശ്ച ഖണ്ഡം ഖണ്ഡം യയുര്ഘനാഃ ।
ശ്വാസാനിലാസ്താഃ ശതശോ നിപേതുര്നഭസോഽചലാഃ ॥ ൩.൨൭॥
ഇതി ക്രോധസമാധ്മാതമാപതന്തം മഹാസുരമ് ।
ദൃഷ്ട്വാ സാ ചണ്ഡികാ കോപം തദ്വധായ തദാകരോത് ॥ ൩.൨൮॥
സാ ക്ഷിപ്ത്വാ തസ്യ വൈ പാശം തം ബബന്ധ മഹാസുരമ് ।
തത്യാജ മാഹിഷം രൂപം സോഽപി ബദ്ധോ മഹാമൃധേ ॥ ൩.൨൯॥
തതഃ സിംഹോഽഭവത്സദ്യോ യാവത്തസ്യാമ്ബികാ ശിരഃ ।
ഛിനത്തി താവത് പുരുഷഃ ഖഡ്ഗപാണിരദൃശ്യത ॥ ൩.൩൦॥
തത ഏവാശു പുരുഷം ദേവീ ചിച്ഛേദ സായകൈഃ ।
തം ഖഡ്ഗചര്മണാ സാര്ധം തതഃ സോഽഭൂന്മഹാഗജഃ ॥ ൩.൩൧॥
കരേണ ച മഹാസിംഹം തം ചകര്ഷ ജഗര്ജ ച ।
കര്ഷതസ്തു കരം ദേവീ ഖഡ്ഗേന നിരകൃന്തത ॥ ൩.൩൨॥
തതോ മഹാസുരോ ഭൂയോ മാഹിഷം വപുരാസ്ഥിതഃ ।
തഥൈവ ക്ഷോഭയാമാസ ത്രൈലോക്യം സചരാചരമ് ॥ ൩.൩൩॥
തതഃ ക്രുദ്ധാ ജഗന്മാതാ ചണ്ഡികാ പാനമുത്തമമ് ।
പപൌ പുനഃ പുനശ്ചൈവ ജഹാസാരുണലോചനാ ॥ ൩.൩൪॥
നനര്ദ ചാസുരഃ സോഽപി ബലവീര്യമദോദ്ധതഃ ।
വിഷാണാഭ്യാം ച ചിക്ഷേപ ചണ്ഡികാം പ്രതി ഭൂധരാന് ॥ ൩.൩൫॥
സാ ച താന്പ്രഹിതാംസ്തേന ചൂര്ണയന്തീ ശരോത്കരൈഃ ।
ഉവാചതം മദോദ്ധൂതമുഖരാഗാകുലാക്ഷരമ് ॥ ൩.൩൬॥
ദേവ്യുവാച॥ ൩.൩൭॥
ഗര്ജ ഗര്ജ ക്ഷണം മൂഢ മധു യാവത്പിബാമ്യഹമ് ।
മയാ ത്വയി ഹതേഽത്രൈവ ഗര്ജിഷ്യന്ത്യാശു ദേവതാഃ ॥ ൩.൩൮॥
ഋഷിരുവാച ॥ ൩.൩൯॥
ഏവമുക്ത്വാ സമുത്പത്യ സാരൂഢാ തം മഹാസുരമ് ।
പാദേനാക്രമ്യ കണ്ഠേ ച ശൂലേനൈനമതാഡയത് ॥ ൩.൪൦॥
തതഃ സോഽപി പദാക്രാന്തസ്തയാ നിജമുഖാത്തദാ ।
അര്ധനിഷ്ക്രാന്ത ഏവാസീദ്ദേവ്യാ വീര്യേണ സംവൃതഃ ॥ ൩.൪൧॥
അര്ധനിഷ്ക്രാന്ത ഏവാസൌ യുധ്യമാനോ മഹാസുരഃ ।
തയാ മഹാസിനാ ദേവ്യാ ശിരശ്ഛിത്ത്വാ നിപാതിതഃ ॥ ൩.൪൨॥
തതോ ഹാഹാകൃതം സര്വം ദൈത്യസൈന്യം നനാശ തത് ।
പ്രഹര്ഷം ച പരം ജഗ്മുഃ സകലാ ദേവതാഗണാഃ ॥ ൩.൪൩॥
തുഷ്ടുവുസ്താം സുരാ ദേവീം സഹദിവ്യൈര്മഹര്ഷിഭിഃ ।
ജഗുര്ഗന്ധര്വപതയോ നനൃതുശ്ചാപ്സരോഗണാഃ ॥ ൩.൪൪॥
॥ സ്വസ്തി ശ്രീമാര്കണ്ഡേയപുരാണേ സാവര്ണികേ മന്വന്തരേ ദേവീമാഹാത്മ്യേ
മഹിഷാസുരവധോ നാമ തൃതീയോഽധ്യായഃ ॥ ൩॥
ഉവാച൩, അര്ധശ്ലോകാഃ ൪൧, ശ്ലോകാഃ ൪൪, ഏവമാദിതഃ ॥ ൨൧൭॥

। ധ്യാനമ് ।
ഓം കാലാഭ്രാഭാം കടാക്ഷൈരരികുലഭയദാം മൌലിബദ്ധേന്ദുരേഖാം
ശങ്ഖം ചക്രം കൃപാണം ത്രിശിഖമപി കരൈരുദ്വഹന്തീം ത്രിനേത്രാമ് ।
സിംഹസ്കന്ധാധിരൂഢാം ത്രിഭുവനമഖിലം തേജസാ പൂരയന്തീം
ധ്യായേദ്ദുര്ഗാം ജയാഖ്യാം ത്രിദശപരിവൃതാം സേവിതാം സിദ്ധികാമൈഃ ॥
ഓം ഋഷിരുവാച ॥ ൪.൧॥
ശക്രാദയഃ സുരഗണാ നിഹതേഽതിവീര്യേ
തസ്മിന്ദുരാത്മനി സുരാരിബലേ ച ദേവ്യാ ।
താം തുഷ്ടുവുഃ പ്രണതിനമ്രശിരോധരാംസാ
വാഗ്ഭിഃ പ്രഹര്ഷപുലകോദ്ഗമചാരുദേഹാഃ ॥ ൪.൨॥
ദേവ്യാ യയാ തതമിദം ജഗദാത്മശക്ത്യാ
നിഃശേഷദേവഗണശക്തിസമൂഹമൂര്ത്യാ ।
താമമ്ബികാമഖിലദേവമഹര്ഷിപൂജ്യാം
ഭക്ത്യാ നതാഃ സ്മ വിദധാതു ശുഭാനി സാ നഃ ॥ ൪.൩॥
യസ്യാഃ പ്രഭാവമതുലം ഭഗവാനനന്തോ
ബ്രഹ്മാ ഹരശ്ച ന ഹി വക്തുമലം ബലം ച ।
സാ ചണ്ഡികാഖിലജഗത്പരിപാലനായ
നാശായ ചാശുഭഭയസ്യ മതിം കരോതു ॥ ൪.൪॥
യാ ശ്രീഃ സ്വയം സുകൃതിനാം ഭവനേഷ്വലക്ഷ്മീഃ
പാപാത്മനാം കൃതധിയാം ഹൃദയേഷു ബുദ്ധിഃ ।
ശ്രദ്ധാ സതാം കുലജനപ്രഭവസ്യ ലജ്ജാ
താം ത്വാം നതാഃ സ്മ പരിപാലയ ദേവി വിശ്വമ് ॥ ൪.൫॥
കിം വര്ണയാമ തവ രൂപമചിന്ത്യമേതത്
കിഞ്ചാതിവീര്യമസുരക്ഷയകാരി ഭൂരി ।
കിം ചാഹവേഷു ചരിതാനി തവാതി യാനി
സര്വേഷു ദേവ്യസുരദേവഗണാദികേഷു ॥ ൪.൬॥
ഹേതുഃ സമസ്തജഗതാം ത്രിഗുണാപി ദോഷൈ-
ര്ന ജ്ഞായസേ ഹരിഹരാദിഭിരപ്യപാരാ ।
സര്വാശ്രയാഖിലമിദം ജഗദംശഭൂത-
മവ്യാകൃതാ ഹി പരമാ പ്രകൃതിസ്ത്വമാദ്യാ ॥ ൪.൭॥
യസ്യാഃ സമസ്തസുരതാ സമുദീരണേന
തൃപ്തിം പ്രയാതി സകലേഷു മഖേഷു ദേവി ।
സ്വാഹാസി വൈ പിതൃഗണസ്യ ച തൃപ്തിഹേതു-
രുച്ചാര്യസേ ത്വമത ഏവ ജനൈഃ സ്വധാ ച ॥ ൪.൮॥
യാ മുക്തിഹേതുരവിചിന്ത്യമഹാവ്രതാ ത്വം
അഭ്യസ്യസേ സുനിയതേന്ദ്രിയതത്ത്വസാരൈഃ ।
മോക്ഷാര്ഥിഭിര്മുനിഭിരസ്തസമസ്തദോഷൈ-
ര്വിദ്യാസി സാ ഭഗവതീ പരമാ ഹി ദേവി ॥ ൪.൯॥
ശബ്ദാത്മികാ സുവിമലര്ഗ്യജുഷാം നിധാന-
മുദ്ഗീഥരമ്യപദപാഠവതാം ച സാമ്നാമ് ।
ദേവി ത്രയീ ഭഗവതീ ഭവഭാവനായ
വാര്താസി സര്വജഗതാം പരമാര്തിഹന്ത്രീ ॥ ൪.൧൦॥
മേധാസി ദേവി വിദിതാഖിലശാസ്ത്രസാരാ
ദുര്ഗാസി ദുര്ഗഭവസാഗരനൌരസങ്ഗാ ।
ശ്രീഃ കൈടഭാരിഹൃദയൈകകൃതാധിവാസാ
ഗൌരീ ത്വമേവ ശശിമൌലികൃതപ്രതിഷ്ഠാ ॥ ൪.൧൧॥
ഈഷത്സഹാസമമലം പരിപൂര്ണചന്ദ്ര-
ബിമ്ബാനുകാരി കനകോത്തമകാന്തികാന്തമ് ।
അത്യദ്ഭുതം പ്രഹൃതമാത്തരുഷാ തഥാപി
വക്ത്രം വിലോക്യ സഹസാ മഹിഷാസുരേണ ॥ ൪.൧൨॥
ദൃഷ്ട്വാ തു ദേവി കുപിതം ഭ്രുകുടീകരാല-
മുദ്യച്ഛശാങ്കസദൃശച്ഛവി യന്ന സദ്യഃ ।
പ്രാണാന് മുമോച മഹിഷസ്തദതീവ ചിത്രം
കൈര്ജീവ്യതേ ഹി കുപിതാന്തകദര്ശനേന ॥ ൪.൧൩॥
ദേവി പ്രസീദ പരമാ ഭവതീ ഭവായ
സദ്യോ വിനാശയസി കോപവതീ കുലാനി ।
വിജ്ഞാതമേതദധുനൈവ യദസ്തമേത-
ന്നീതം ബലം സുവിപുലം മഹിഷാസുരസ്യ ॥ ൪.൧൪॥
തേ സമ്മതാ ജനപദേഷു ധനാനി തേഷാം
തേഷാം യശാംസി ന ച സീദതി ബന്ധുവര്ഗഃ ।
ധന്യാസ്ത ഏവ നിഭൃതാത്മജഭൃത്യദാരാ
യേഷാം സദാഭ്യുദയദാ ഭവതീ പ്രസന്നാ ॥ ൪.൧൫॥
ധര്മ്യാണി ദേവി സകലാനി സദൈവ കര്മാ-
ണ്യത്യാദൃതഃ പ്രതിദിനം സുകൃതീ കരോതി ।
സ്വര്ഗം പ്രയാതി ച തതോ ഭവതീ പ്രസാദാ-
ല്ലോകത്രയേഽപി ഫലദാ നനു ദേവി തേന ॥ ൪.൧൬॥
ദുര്ഗേ സ്മൃതാ ഹരസി ഭീതിമശേഷജന്തോഃ
സ്വസ്ഥൈഃ സ്മൃതാ മതിമതീവ ശുഭാം ദദാസി ।
ദാരിദ്ര്യദുഃഖഭയഹാരിണി കാ ത്വദന്യാ
സര്വോപകാരകരണായ സദാര്ദ്രചിത്താ ॥ ൪.൧൭॥
ഏഭിര്ഹതൈര്ജഗദുപൈതി സുഖം തഥൈതേ
കുര്വന്തു നാമ നരകായ ചിരായ പാപമ് ।
സങ്ഗ്രാമമൃത്യുമധിഗമ്യ ദിവം പ്രയാന്തു
മത്വേതി നൂനമഹിതാന്വിനിഹംസി ദേവി ॥ ൪.൧൮॥
ദൃഷ്ട്വൈവ കിം ന ഭവതീ പ്രകരോതി ഭസ്മ
സര്വാസുരാനരിഷു യത്പ്രഹിണോഷി ശസ്ത്രമ് ।
ലോകാന്പ്രയാന്തു രിപവോഽപി ഹി ശസ്ത്രപൂതാ
ഇത്ഥം മതിര്ഭവതി തേഷ്വഹിതേഷുസാധ്വീ ॥ ൪.൧൯॥
ഖഡ്ഗപ്രഭാനികരവിസ്ഫുരണൈസ്തഥോഗ്രൈഃ
ശൂലാഗ്രകാന്തിനിവഹേന ദൃശോഽസുരാണാമ് ।
യന്നാഗതാ വിലയമംശുമദിന്ദുഖണ്ഡ-
യോഗ്യാനനം തവ വിലോകയതാം തദേതത് ॥ ൪.൨൦॥
ദുര്വൃത്തവൃത്തശമനം തവ ദേവി ശീലം
രൂപം തഥൈതദവിചിന്ത്യമതുല്യമന്യൈഃ ।
വീര്യം ച ഹന്തൃ ഹൃതദേവപരാക്രമാണാം
വൈരിഷ്വപി പ്രകടിതൈവ ദയാ ത്വയേത്ഥമ് ॥ ൪.൨൧॥
കേനോപമാ ഭവതു തേഽസ്യ പരാക്രമസ്യ
രൂപം ച ശത്രുഭയകാര്യതിഹാരി കുത്ര ।
ചിത്തേ കൃപാ സമരനിഷ്ഠുരതാ ച ദൃഷ്ടാ
ത്വയ്യേവ ദേവി വരദേ ഭുവനത്രയേഽപി ॥ ൪.൨൨॥
ത്രൈലോക്യമേതദഖിലം രിപുനാശനേന
ത്രാതം ത്വയാ സമരമൂര്ധനി തേഽപി ഹത്വാ ।
നീതാ ദിവം രിപുഗണാ ഭയമപ്യപാസ്തമ്
അസ്മാകമുന്മദസുരാരിഭവം നമസ്തേ ॥ ൪.൨൩॥
ശൂലേന പാഹി നോ ദേവി പാഹി ഖഡ്ഗേന ചാമ്ബികേ ।
ഘണ്ടാസ്വനേന നഃ പാഹി ചാപജ്യാനിഃസ്വനേന ച ॥ ൪.൨൪॥
പ്രാച്യാം രക്ഷ പ്രതീച്യാം ച ചണ്ഡികേ രക്ഷ ദക്ഷിണേ ।
ഭ്രാമണേനാത്മശൂലസ്യ ഉത്തരസ്യാം തഥേശ്വരി ॥ ൪.൨൫॥
സൌമ്യാനി യാനി രൂപാണി ത്രൈലോക്യേ വിചരന്തി തേ ।
യാനി ചാത്യന്തഘോരാണി തൈ രക്ഷാസ്മാംസ്തഥാ ഭുവമ് ॥ ൪.൨൬॥
ഖഡ്ഗശൂലഗദാദീനി യാനി ചാസ്ത്രാനി തേഽമ്ബികേ ।
കരപല്ലവസങ്ഗീനി തൈരസ്മാന്രക്ഷ സര്വതഃ ॥ ൪.൨൭॥
ഋഷിരുവാച ॥ ൪.൨൮॥
ഏവം സ്തുതാ സുരൈര്ദിവ്യൈഃ കുസുമൈര്നന്ദനോദ്ഭവൈഃ ।
അര്ചിതാ ജഗതാം ധാത്രീ തഥാ ഗന്ധാനുലേപനൈഃ ॥ ൪.൨൯॥
ഭക്ത്യാ സമസ്തൈസ്ത്രിദശൈര്ദിവ്യൈര്ധൂപൈഃ സുധൂപിതാ ।
പ്രാഹ പ്രസാദസുമുഖീ സമസ്താന് പ്രണതാന് സുരാന് ॥ ൪.൩൦॥
ദേവ്യുവാച॥ ൪.൩൧॥
വ്രിയതാം ത്രിദശാഃ സര്വേ യദസ്മത്തോഽഭിവാഞ്ഛിതമ് ॥ ൪.൩൨॥
ദേവാ ഊചുഃ ॥ ൪.൩൩॥
ഭഗവത്യാ കൃതം സര്വം ന കിഞ്ചിദവശിഷ്യതേ ॥ ൪.൩൪॥
യദയം നിഹതഃ ശത്രുരസ്മാകം മഹിഷാസുരഃ ।
യദി ചാപി വരോ ദേയസ്ത്വയാസ്മാകം മഹേശ്വരി ॥ ൪.൩൫॥
സംസ്മൃതാ സംസ്മൃതാ ത്വം നോ ഹിംസേഥാഃ പരമാപദഃ ।
യശ്ച മര്ത്യഃ സ്തവൈരേഭിസ്ത്വാം സ്തോഷ്യത്യമലാനനേ ॥ ൪.൩൬॥
തസ്യ വിത്തര്ദ്ധിവിഭവൈര്ധനദാരാദിസമ്പദാമ് ।
വൃദ്ധയേഽസ്മത്പ്രസന്നാ ത്വം ഭവേഥാഃ സര്വദാമ്ബികേ ॥ ൪.൩൭॥
ഋഷിരുവാച ॥ ൪.൩൮॥
ഇതി പ്രസാദിതാ ദേവൈര്ജഗതോഽര്ഥേ തഥാത്മനഃ ।
തഥേത്യുക്ത്വാ ഭദ്രകാലീ ബഭൂവാന്തര്ഹിതാ നൃപ ॥ ൪.൩൯॥
ഇത്യേതത്കഥിതം ഭൂപ സമ്ഭൂതാ സാ യഥാ പുരാ ।
ദേവീ ദേവശരീരേഭ്യോ ജഗത്ത്രയഹിതൈഷിണീ ॥ ൪.൪൦॥
പുനശ്ച ഗൌരീദേഹാത്സാ സമുദ്ഭൂതാ യഥാഭവത് ।
വധായ ദുഷ്ടദൈത്യാനാം തഥാ ശുമ്ഭനിശുമ്ഭയോഃ ॥ ൪.൪൧॥
രക്ഷണായ ച ലോകാനാം ദേവാനാമുപകാരിണീ ।
തച്ഛൃണുഷ്വ മയാഖ്യാതം യഥാവത്കഥയാമി തേ ॥ ൪.൪൨॥
। ഹ്രീം ഓം ।
॥ സ്വസ്തി ശ്രീമാര്കണ്ഡേയപുരാണേ സാവര്ണികേ മന്വന്തരേ
ദേവീമാഹാത്മ്യേ ശക്രാദിസ്തുതിര്നാമ ചതുര്ഥോഽധ്യായഃ ॥ ൪॥
ഉവാച൫, അര്ധശ്ലോകൌ ൨, ശ്ലോകാഃ ൩൫, ഏവമാദിതഃ ॥ ൨൫൯॥

വിനിയോഗഃ
അസ്യ ശ്രീ ഉത്തരചരിത്രസ്യ രുദ്ര ഋഷിഃ ।
ശ്രീമഹാസരസ്വതീ ദേവതാ ।
അനുഷ്ടുപ് ഛന്ദഃ । ഭീമാ ശക്തിഃ । ഭ്രാമരീ ബീജമ് ।
സൂര്യസ്തത്ത്വമ് ।
സാമവേദഃ സ്വരൂപമ് । ശ്രീമഹാസരസ്വതീപ്രീത്യര്ഥേ
ഉത്തരചരിത്രപാഠേ വിനിയോഗഃ ।
। ധ്യാനമ് ।
ഘണ്ടാശൂലഹലാനി ശങ്ഖമുസലേ ചക്രം ധനുഃ സായകം
ഹസ്താബ്ജൈര്ദധതീം ഘനാന്തവിലസച്ഛീതാംശുതുല്യപ്രഭാമ് ।
ഗൌരീദേഹസമുദ്ഭവാം ത്രിജഗതാമാധാരഭൂതാം മഹാ-
പൂര്വാമത്ര സരസ്വതീമനുഭജേ ശുമ്ഭാദിദൈത്യാര്ദിനീമ് ॥
ഓം ക്ലീം ഋഷിരുവാച ॥ ൫.൧॥
പുരാ ശുമ്ഭനിശുമ്ഭാഭ്യാമസുരാഭ്യാം ശചീപതേഃ ।
ത്രൈലോക്യം യജ്ഞഭാഗാശ്ച ഹൃതാ മദബലാശ്രയാത് ॥ ൫.൨॥
താവേവ സൂര്യതാം തദ്വദധികാരം തഥൈന്ദവമ് ।
കൌബേരമഥ യാമ്യം ച ചക്രാതേ വരുണസ്യ ച ॥ ൫.൩॥
താവേവ പവനര്ദ്ധിം ച ചക്രതുര്വഹ്നികര്മ ച ।
തതോ ദേവാ വിനിര്ധൂതാ ഭ്രഷ്ടരാജ്യാഃ പരാജിതാഃ ॥ ൫.൪॥
ഹൃതാധികാരാസ്ത്രിദശാസ്താഭ്യാം സര്വേ നിരാകൃതാഃ ।
മഹാസുരാഭ്യാം താം ദേവീം സംസ്മരന്ത്യപരാജിതാമ് ॥ ൫.൫॥
തയാസ്മാകം വരോ ദത്തോ യഥാപത്സു സ്മൃതാഖിലാഃ ।
ഭവതാം നാശയിഷ്യാമി തത്ക്ഷണാത്പരമാപദഃ ॥ ൫.൬॥
ഇതി കൃത്വാ മതിം ദേവാ ഹിമവന്തം നഗേശ്വരമ് ।
ജഗ്മുസ്തത്ര തതോ ദേവീം വിഷ്ണുമായാം പ്രതുഷ്ടുവുഃ ॥ ൫.൭॥
ദേവാ ഊചുഃ ॥ ൫.൮॥
നമോ ദേവ്യൈ മഹാദേവ്യൈ ശിവായൈ സതതം നമഃ ।
നമഃ പ്രകൃത്യൈ ഭദ്രായൈ നിയതാഃ പ്രണതാഃ സ്മ താമ് ॥ ൫.൯॥
രൌദ്രായൈ നമോ നിത്യായൈ ഗൌര്യൈ ധാത്ര്യൈ നമോ നമഃ ।
ജ്യോത്സ്നായൈ ചേന്ദുരൂപിണ്യൈ സുഖായൈ സതതം നമഃ ॥ ൫.൧൦॥
കല്യാണ്യൈ പ്രണതാം വൃദ്ധ്യൈ സിദ്ധ്യൈ കുര്മോ നമോ നമഃ ।
നൈരൃത്യൈ ഭൂഭൃതാം ലക്ഷ്മ്യൈ ശര്വാണ്യൈ തേ നമോ നമഃ ॥ ൫.൧൧॥
ദുര്ഗായൈ ദുര്ഗപാരായൈ സാരായൈ സര്വകാരിണ്യൈ ।
ഖ്യാത്യൈ തഥൈവ കൃഷ്ണായൈ ധൂമ്രായൈ സതതം നമഃ ॥ ൫.൧൨॥
അതിസൌമ്യാതിരൌദ്രായൈ നതാസ്തസ്യൈ നമോ നമഃ ।
നമോ ജഗത്പ്രതിഷ്ഠായൈ ദേവ്യൈ കൃത്യൈ നമോ നമഃ ॥ ൫.൧൩॥
യാ ദേവീ സര്വഭൂതേഷു വിഷ്ണുമായേതി ശബ്ദിതാ ।
നമസ്തസ്യൈ നമസ്തസ്യൈ നമസ്തസ്യൈ നമോ നമഃ ॥ ൫.൧൪-൧൬॥
യാ ദേവീ സര്വഭൂതേഷു ചേതനേത്യഭിധീയതേ ।
നമസ്തസ്യൈ നമസ്തസ്യൈ നമസ്തസ്യൈ നമോ നമഃ ॥ ൫.൧൭-൧൯॥
യാ ദേവീ സര്വഭൂതേഷു ബുദ്ധിരൂപേണ സംസ്ഥിതാ ।
നമസ്തസ്യൈ നമസ്തസ്യൈ നമസ്തസ്യൈ നമോ നമഃ ॥ ൫.൨൦-൨൨॥
യാ ദേവീ സര്വഭൂതേഷു നിദ്രാരൂപേണ സംസ്ഥിതാ ।
നമസ്തസ്യൈ നമസ്തസ്യൈ നമസ്തസ്യൈ നമോ നമഃ ॥ ൫.൨൩-൨൫॥
യാ ദേവീ സര്വഭൂതേഷു ക്ഷുധാരൂപേണ സംസ്ഥിതാ ।
നമസ്തസ്യൈ നമസ്തസ്യൈ നമസ്തസ്യൈ നമോ നമഃ ॥ ൫.൨൬-൨൮॥
യാ ദേവീ സര്വഭൂതേഷു ഛായാരൂപേണ സംസ്ഥിതാ ।
നമസ്തസ്യൈ നമസ്തസ്യൈ നമസ്തസ്യൈ നമോ നമഃ ॥ ൫.൨൯-൩൧॥
യാ ദേവീ സര്വഭൂതേഷു ശക്തിരൂപേണ സംസ്ഥിതാ ।
നമസ്തസ്യൈ നമസ്തസ്യൈ നമസ്തസ്യൈ നമോ നമഃ ॥ ൫.൩൨-൩൪॥
യാ ദേവീ സര്വഭൂതേഷു തൃഷ്ണാരൂപേണ സംസ്ഥിതാ ।
നമസ്തസ്യൈ നമസ്തസ്യൈ നമസ്തസ്യൈ നമോ നമഃ ॥ ൫.൩൫-൩൭॥
യാ ദേവീ സര്വഭൂതേഷു ക്ഷാന്തിരൂപേണ സംസ്ഥിതാ ।
നമസ്തസ്യൈ നമസ്തസ്യൈ നമസ്തസ്യൈ നമോ നമഃ ॥ ൫.൩൮-൪൦॥
യാ ദേവീ സര്വഭൂതേഷു ജാതിരൂപേണ സംസ്ഥിതാ ।
നമസ്തസ്യൈ നമസ്തസ്യൈ നമസ്തസ്യൈ നമോ നമഃ ॥ ൫.൪൧-൪൩॥
യാ ദേവീ സര്വഭൂതേഷു ലജ്ജാരൂപേണ സംസ്ഥിതാ ।
നമസ്തസ്യൈ നമസ്തസ്യൈ നമസ്തസ്യൈ നമോ നമഃ ॥ ൫.൪൪-൪൬॥
യാ ദേവീ സര്വഭൂതേഷു ശാന്തിരൂപേണ സംസ്ഥിതാ ।
നമസ്തസ്യൈ നമസ്തസ്യൈ നമസ്തസ്യൈ നമോ നമഃ ॥ ൫.൪൭-൪൯॥
യാ ദേവീ സര്വഭൂതേഷു ശ്രദ്ധാരൂപേണ സംസ്ഥിതാ ।
നമസ്തസ്യൈ നമസ്തസ്യൈ നമസ്തസ്യൈ നമോ നമഃ ॥ ൫.൫൦-൫൨॥
യാ ദേവീ സര്വഭൂതേഷു കാന്തിരൂപേണ സംസ്ഥിതാ ।
നമസ്തസ്യൈ നമസ്തസ്യൈ നമസ്തസ്യൈ നമോ നമഃ ॥ ൫.൫൩-൫൫॥
യാ ദേവീ സര്വഭൂതേഷു ലക്ഷ്മീരൂപേണ സംസ്ഥിതാ ।
നമസ്തസ്യൈ നമസ്തസ്യൈ നമസ്തസ്യൈ നമോ നമഃ ॥ ൫.൫൬-൫൮॥
യാ ദേവീ സര്വഭൂതേഷു വൃത്തിരൂപേണ സംസ്ഥിതാ ।
നമസ്തസ്യൈ നമസ്തസ്യൈ നമസ്തസ്യൈ നമോ നമഃ ॥ ൫.൫൯-൬൧॥
യാ ദേവീ സര്വഭൂതേഷു സ്മൃതിരൂപേണ സംസ്ഥിതാ ।
നമസ്തസ്യൈ നമസ്തസ്യൈ നമസ്തസ്യൈ നമോ നമഃ ॥ ൫.൬൨-൬൪॥
യാ ദേവീ സര്വഭൂതേഷു ദയാരൂപേണ സംസ്ഥിതാ ।
നമസ്തസ്യൈ നമസ്തസ്യൈ നമസ്തസ്യൈ നമോ നമഃ ॥ ൫.൬൫-൬൭॥
യാ ദേവീ സര്വഭൂതേഷു തുഷ്ടിരൂപേണ സംസ്ഥിതാ ।
നമസ്തസ്യൈ നമസ്തസ്യൈ നമസ്തസ്യൈ നമോ നമഃ ॥ ൫.൬൮-൭൦॥
യാ ദേവീ സര്വഭൂതേഷു മാതൃരൂപേണ സംസ്ഥിതാ ।
നമസ്തസ്യൈ നമസ്തസ്യൈ നമസ്തസ്യൈ നമോ നമഃ ॥ ൫.൭൧-൭൩॥
യാ ദേവീ സര്വഭൂതേഷു ഭ്രാന്തിരൂപേണ സംസ്ഥിതാ ।
നമസ്തസ്യൈ നമസ്തസ്യൈ നമസ്തസ്യൈ നമോ നമഃ ॥ ൫.൭൪-൭൬॥
ഇന്ദ്രിയാണാമധിഷ്ഠാത്രീ ഭൂതാനാം ചാഖിലേഷു യാ ।
ഭൂതേഷു സതതം തസ്യൈ വ്യാപ്ത്യൈ ദേവ്യൈ നമോ നമഃ ॥ ൫.൭൭॥
ചിതിരൂപേണ യാ കൃത്സ്നമേതദ് വ്യാപ്യ സ്ഥിതാ ജഗത് ।
നമസ്തസ്യൈ നമസ്തസ്യൈ നമസ്തസ്യൈ നമോ നമഃ ॥ ൫.൭൮-൮൦॥
സ്തുതാ സുരൈഃ പൂര്വമഭീഷ്ടസംശ്രയാ-
ത്തഥാ സുരേന്ദ്രേണ ദിനേഷു സേവിതാ ।
കരോതു സാ നഃ ശുഭഹേതുരീശ്വരീ
ശുഭാനി ഭദ്രാണ്യഭിഹന്തു ചാപദഃ ॥ ൫.൮൧॥
യാ സാമ്പ്രതം ചോദ്ധതദൈത്യതാപിതൈ-
രസ്മാഭിരീശാ ച സുരൈര്നമസ്യതേ ।
യാ ച സ്മൃതാ തത്ക്ഷണമേവ ഹന്തി നഃ
സര്വാപദോ ഭക്തിവിനമ്രമൂര്തിഭിഃ ॥ ൫.൮൨॥
ഋഷിരുവാച ॥ ൫.൮൩॥
ഏവം സ്തവാഭിയുക്താനാം ദേവാനാം തത്ര പാര്വതീ ।
സ്നാതുമഭ്യായയൌ തോയേ ജാഹ്നവ്യാ നൃപനന്ദന ॥ ൫.൮൪॥
സാബ്രവീത്താന് സുരാന് സുഭ്രൂര്ഭവദ്ഭിഃ സ്തൂയതേഽത്ര കാ ।
ശരീരകോശതശ്ചാസ്യാഃ സമുദ്ഭൂതാബ്രവീച്ഛിവാ ॥ ൫.൮൫॥
സ്തോത്രം മമൈതത്ക്രിയതേ ശുമ്ഭദൈത്യനിരാകൃതൈഃ ।
ദേവൈഃ സമേതൈഃ സമരേ നിശുമ്ഭേന പരാജിതൈഃ ॥ ൫.൮൬॥
ശരീരകോശാദ്യത്തസ്യാഃ പാര്വത്യാ നിഃസൃതാമ്ബികാ ।
കൌശികീതി സമസ്തേഷു തതോ ലോകേഷു ഗീയതേ ॥ ൫.൮൭॥
തസ്യാം വിനിര്ഗതായാം തു കൃഷ്ണാഭൂത്സാപി പാര്വതീ ।
കാലികേതി സമാഖ്യാതാ ഹിമാചലകൃതാശ്രയാ ॥ ൫.൮൮॥
തതോഽമ്ബികാം പരം രൂപം ബിഭ്രാണാം സുമനോഹരമ് ।
ദദര്ശ ചണ്ഡോ മുണ്ഡശ്ച ഭൃത്യൌ ശുമ്ഭനിശുമ്ഭയോഃ ॥ ൫.൮൯॥
താഭ്യാം ശുമ്ഭായ ചാഖ്യാതാ സാതീവ സുമനോഹരാ ।
കാപ്യാസ്തേ സ്ത്രീ മഹാരാജ ഭാസയന്തീ ഹിമാചലമ് ॥ ൫.൯൦॥
നൈവ താദൃക് ക്വചിദ്രൂപം ദൃഷ്ടം കേനചിദുത്തമമ് ।
ജ്ഞായതാം കാപ്യസൌ ദേവീ ഗൃഹ്യതാം ചാസുരേശ്വര ॥ ൫.൯൧॥
സ്ത്രീരത്നമതിചാര്വങ്ഗീ ദ്യോതയന്തീ ദിശസ്ത്വിഷാ ।
സാ തു തിഷ്ഠതി ദൈത്യേന്ദ്ര താം ഭവാന് ദ്രഷ്ടുമര്ഹതി ॥ ൫.൯൨॥
യാനി രത്നാനി മണയോ ഗജാശ്വാദീനി വൈ പ്രഭോ ।
ത്രൈലോക്യേ തു സമസ്താനി സാമ്പ്രതം ഭാന്തി തേ ഗൃഹേ ॥ ൫.൯൩॥
ഐരാവതഃ സമാനീതോ ഗജരത്നം പുരന്ദരാത് ।
പാരിജാതതരുശ്ചായം തഥൈവോച്ചൈഃശ്രവാ ഹയഃ ॥ ൫.൯൪॥
വിമാനം ഹംസസംയുക്തമേതത്തിഷ്ഠതി തേഽങ്ഗണേ ।
രത്നഭൂതമിഹാനീതം യദാസീദ്വേധസോഽദ്ഭുതമ് ॥ ൫.൯൫॥
നിധിരേഷ മഹാപദ്മഃ സമാനീതോ ധനേശ്വരാത് ।
കിഞ്ജല്കിനീം ദദൌ ചാബ്ധിര്മാലാമമ്ലാനപങ്കജാമ് ॥ ൫.൯൬॥
ഛത്രം തേ വാരുണം ഗേഹേ കാഞ്ചനസ്രാവി തിഷ്ഠതി ।
തഥായം സ്യന്ദനവരോ യഃ പുരാസീത്പ്രജാപതേഃ ॥ ൫.൯൭॥
മൃത്യോരുത്ക്രാന്തിദാ നാമ ശക്തിരീശ ത്വയാ ഹൃതാ ।
പാശഃ സലിലരാജസ്യ ഭ്രാതുസ്തവ പരിഗ്രഹേ ॥ ൫.൯൮॥
നിശുമ്ഭസ്യാബ്ധിജാതാശ്ച സമസ്താ രത്നജാതയഃ ।
വഹ്നിരപി ദദൌ തുഭ്യമഗ്നിശൌചേ ച വാസസീ ॥ ൫.൯൯॥
ഏവം ദൈത്യേന്ദ്ര രത്നാനി സമസ്താന്യാഹൃതാനി തേ ।
സ്ത്രീരത്നമേഷാ കല്യാണീ ത്വയാ കസ്മാന്ന ഗൃഹ്യതേ ॥ ൫.൧൦൦॥
ഋഷിരുവാച ॥ ൫.൧൦൧॥
നിശമ്യേതി വചഃ ശുമ്ഭഃ സ തദാ ചണ്ഡമുണ്ഡയോഃ ।
പ്രേഷയാമാസ സുഗ്രീവം ദൂതം ദേവ്യാ മഹാസുരമ് ॥ ൫.൧൦൨॥
ഇതി ചേതി ച വക്തവ്യാ സാ ഗത്വാ വചനാന്മമ ।
യഥാ ചാഭ്യേതി സമ്പ്രീത്യാ തഥാ കാര്യം ത്വയാ ലഘു ॥ ൫.൧൦൩॥
സ തത്ര ഗത്വാ യത്രാസ്തേ ശൈലോദ്ദേശേഽതിശോഭനേ ।
താം ച ദേവീം തതഃ പ്രാഹ ശ്ലക്ഷ്ണം മധുരയാ ഗിരാ ॥ ൫.൧൦൪॥
ദൂത ഉവാച॥ ൫.൧൦൫॥
ദേവി ദൈത്യേശ്വരഃ ശുമ്ഭസ്ത്രൈലോക്യേ പരമേശ്വരഃ ।
ദൂതോഽഹം പ്രേഷിതസ്തേന ത്വത്സകാശമിഹാഗതഃ ॥ ൫.൧൦൬॥
അവ്യാഹതാജ്ഞഃ സര്വാസു യഃ സദാ ദേവയോനിഷു ।
നിര്ജിതാഖിലദൈത്യാരിഃ സ യദാഹ ശ‍ൃണുഷ്വ തത് ॥ ൫.൧൦൭॥
മമ ത്രൈലോക്യമഖിലം മമ ദേവാ വശാനുഗാഃ ।
യജ്ഞഭാഗാനഹം സര്വാനുപാശ്നാമി പൃഥക് പൃഥക് ॥ ൫.൧൦൮॥
ത്രൈലോക്യേ വരരത്നാനി മമ വശ്യാന്യശേഷതഃ ।
തഥൈവ ഗജരത്നം ച ഹൃതം ദേവേന്ദ്രവാഹനമ് ॥ ൫.൧൦൯॥
ക്ഷീരോദമഥനോദ്ഭൂതമശ്വരത്നം മമാമരൈഃ ।
ഉച്ചൈഃശ്രവസസംജ്ഞം തത്പ്രണിപത്യ സമര്പിതമ് ॥ ൫.൧൧൦॥
യാനി ചാന്യാനി ദേവേഷു ഗന്ധര്വേഷൂരഗേഷു ച ।
രത്നഭൂതാനി ഭൂതാനി താനി മയ്യേവ ശോഭനേ ॥ ൫.൧൧൧॥
സ്ത്രീരത്നഭൂതാം ത്വാം ദേവി ലോകേ മന്യാമഹേ വയമ് ।
സാ ത്വമസ്മാനുപാഗച്ഛ യതോ രത്നഭുജോ വയമ് ॥ ൫.൧൧൨॥
മാം വാ മമാനുജം വാപി നിശുമ്ഭമുരുവിക്രമമ് ।
ഭജ ത്വം ചഞ്ചലാപാങ്ഗി രത്നഭൂതാസി വൈ യതഃ ॥ ൫.൧൧൩॥
പരമൈശ്വര്യമതുലം പ്രാപ്സ്യസേ മത്പരിഗ്രഹാത് ।
ഏതദ്ബുദ്ധ്യാ സമാലോച്യ മത്പരിഗ്രഹതാം വ്രജ ॥ ൫.൧൧൪॥
ഋഷിരുവാച ॥ ൫.൧൧൫॥
ഇത്യുക്താ സാ തദാ ദേവീ ഗമ്ഭീരാന്തഃസ്മിതാ ജഗൌ ।
ദുര്ഗാ ഭഗവതീ ഭദ്രാ യയേദം ധാര്യതേ ജഗത് ॥ ൫.൧൧൬॥
ദേവ്യുവാച॥ ൫.൧൧൭॥
സത്യമുക്തം ത്വയാ നാത്ര മിഥ്യാ കിഞ്ചിത്ത്വയോദിതമ് ।
ത്രൈലോക്യാധിപതിഃ ശുമ്ഭോ നിശുമ്ഭശ്ചാപി താദൃശഃ ॥ ൫.൧൧൮॥
കിം ത്വത്ര യത്പ്രതിജ്ഞാതം മിഥ്യാ തത്ക്രിയതേ കഥമ് ।
ശ്രൂയതാമല്പബുദ്ധിത്വാത്പ്രതിജ്ഞാ യാ കൃതാ പുരാ ॥ ൫.൧൧൯॥
യോ മാം ജയതി സങ്ഗ്രാമേ യോ മേ ദര്പം വ്യപോഹതി ।
യോ മേ പ്രതിബലോ ലോകേ സ മേ ഭര്താ ഭവിഷ്യതി ॥ ൫.൧൨൦॥
തദാഗച്ഛതു ശുമ്ഭോഽത്ര നിശുമ്ഭോ വാ മഹാബലഃ ।
മാം ജിത്വാ കിം ചിരേണാത്ര പാണിം ഗൃഹ്ണാതു മേ ലഘു ॥ ൫.൧൨൧॥
ദൂത ഉവാച॥ ൫.൧൨൨॥
അവലിപ്താസി മൈവം ത്വം ദേവി ബ്രൂഹി മമാഗ്രതഃ ।
ത്രൈലോക്യേ കഃ പുമാംസ്തിഷ്ഠേദഗ്രേ ശുമ്ഭനിശുമ്ഭയോഃ ॥ ൫.൧൨൩॥
അന്യേഷാമപി ദൈത്യാനാം സര്വേ ദേവാ ന വൈ യുധി ।
തിഷ്ഠന്തി സമ്മുഖേ ദേവി കിം പുനഃ സ്ത്രീ ത്വമേകികാ ॥ ൫.൧൨൪॥
ഇന്ദ്രാദ്യാഃ സകലാ ദേവാസ്തസ്ഥുര്യേഷാം ന സംയുഗേ ।
ശുമ്ഭാദീനാം കഥം തേഷാം സ്ത്രീ പ്രയാസ്യസി സമ്മുഖമ് ॥ ൫.൧൨൫॥
സാ ത്വം ഗച്ഛ മയൈവോക്താ പാര്ശ്വം ശുമ്ഭനിശുമ്ഭയോഃ ।
കേശാകര്ഷണനിര്ധൂതഗൌരവാ മാ ഗമിഷ്യസി ॥ ൫.൧൨൬॥
ദേവ്യുവാച॥ ൫.൧൨൭॥
ഏവമേതദ് ബലീ ശുമ്ഭോ നിശുമ്ഭശ്ചാപിതാദൃശഃ ।
കിം കരോമി പ്രതിജ്ഞാ മേ യദനാലോചിതാ പുരാ ॥ ൫.൧൨൮॥
സ ത്വം ഗച്ഛ മയോക്തം തേ യദേതത്സര്വമാദൃതഃ ।
തദാചക്ഷ്വാസുരേന്ദ്രായ സ ച യുക്തം കരോതു യത് ॥ ൫.൧൨൯॥
॥ സ്വസ്തി ശ്രീമാര്കണ്ഡേയപുരാണേ സാവര്ണികേ മന്വന്തരേ ദേവീമാഹാത്മ്യേ
ദേവ്യാ ദൂതസംവാദോ നാമ പഞ്ചമോഽധ്യായഃ ॥ ൫॥
ഉവാച൯, ത്രിപാന്മന്ത്രാഃ ൬൬, ശ്ലോകാഃ ൫൪, ഏവമാദിതഃ ॥ ൩൮൮॥

। ധ്യാനമ് ।
ഓം നാഗാധീശ്വരവിഷ്ടരാം ഫണിഫണോത്തംസോരു രത്നാവലീ-
ഭാസ്വദ്ദേഹലതാം ദിവാകരനിഭാം നേത്രത്രയോദ്ഭാസിതാമ് ।
മാലാകുമ്ഭകപാലനീരജകരാം ചന്ദ്രാര്ധചൂഡാം പരാം
സര്വജ്ഞേശ്വരഭൈരവാങ്ഗനിലയാം പദ്മാവതീം ചിന്തയേ ॥
ഓം ഋഷിരുവാച ॥ ൬.൧॥
ഇത്യാകര്ണ്യ വചോ ദേവ്യാഃ സ ദൂതോഽമര്ഷപൂരിതഃ ।
സമാചഷ്ട സമാഗമ്യ ദൈത്യരാജായ വിസ്തരാത് ॥ ൬.൨॥
തസ്യ ദൂതസ്യ തദ്വാക്യമാകര്ണ്യാസുരരാട് തതഃ ।
സക്രോധഃ പ്രാഹ ദൈത്യാനാമധിപം ധൂമ്രലോചനമ് ॥ ൬.൩॥
ഹേ ധൂമ്രലോചനാശു ത്വം സ്വസൈന്യപരിവാരിതഃ ।
താമാനയ ബലാദ്ദുഷ്ടാം കേശാകര്ഷണവിഹ്വലാമ് ॥ ൬.൪॥
തത്പരിത്രാണദഃ കശ്ചിദ്യദി വോത്തിഷ്ഠതേഽപരഃ ।
സ ഹന്തവ്യോഽമരോ വാപി യക്ഷോ ഗന്ധര്വ ഏവ വാ ॥ ൬.൫॥
ഋഷിരുവാച ॥ ൬.൬॥
തേനാജ്ഞപ്തസ്തതഃ ശീഘ്രം സ ദൈത്യോ ധൂമ്രലോചനഃ ।
വൃതഃ ഷഷ്ട്യാ സഹസ്രാണാമസുരാണാം ദ്രുതം യയൌ ॥ ൬.൭॥
സ ദൃഷ്ട്വാ താം തതോ ദേവീം തുഹിനാചലസംസ്ഥിതാമ് ।
ജഗാദോച്ചൈഃ പ്രയാഹീതി മൂലം ശുമ്ഭനിശുമ്ഭയോഃ ॥ ൬.൮॥
ന ചേത്പ്രീത്യാദ്യ ഭവതീ മദ്ഭര്താരമുപൈഷ്യതി ।
തതോ ബലാന്നയാമ്യേഷ കേശാകര്ഷണവിഹ്വലാമ് ॥ ൬.൯॥
ദേവ്യുവാച॥ ൬.൧൦॥
ദൈത്യേശ്വരേണ പ്രഹിതോ ബലവാന്ബലസംവൃതഃ ।
ബലാന്നയസി മാമേവം തതഃ കിം തേ കരോമ്യഹമ് ॥ ൬.൧൧॥
ഋഷിരുവാച ॥ ൬.൧൨॥
ഇത്യുക്തഃ സോഽഭ്യധാവത്താമസുരോ ധൂമ്രലോചനഃ ।
ഹുങ്കാരേണൈവ തം ഭസ്മ സാ ചകാരാമ്ബികാ തദാ ॥ ൬.൧൩॥
അഥ ക്രുദ്ധം മഹാസൈന്യമസുരാണാം തഥാമ്ബികാ ।
വവര്ഷ സായകൈസ്തീക്ഷ്ണൈസ്തഥാ ശക്തിപരശ്വധൈഃ ॥ ൬.൧൪॥
തതോ ധുതസടഃ കോപാത്കൃത്വാ നാദം സുഭൈരവമ് ।
പപാതാസുരസേനായാം സിംഹോ ദേവ്യാഃ സ്വവാഹനഃ ॥ ൬.൧൫॥
കാംശ്ചിത്കരപ്രഹാരേണ ദൈത്യാനാസ്യേന ചാപരാന് ।
ആക്രാന്ത്യാ ചാധരേണാന്യാന് ജഘാന സ മഹാസുരാന് ॥ ൬.൧൬॥
കേഷാഞ്ചിത്പാടയാമാസ നഖൈഃ കോഷ്ഠാനി കേസരീ ।
തഥാ തലപ്രഹാരേണ ശിരാംസി കൃതവാന്പൃഥക് ॥ ൬.൧൭॥
വിച്ഛിന്നബാഹുശിരസഃ കൃതാസ്തേന തഥാപരേ ।
പപൌ ച രുധിരം കോഷ്ഠാദന്യേഷാം ധുതകേസരഃ ॥ ൬.൧൮॥
ക്ഷണേന തദ്ബലം സര്വം ക്ഷയം നീതം മഹാത്മനാ ।
തേന കേസരിണാ ദേവ്യാ വാഹനേനാതികോപിനാ ॥ ൬.൧൯॥
ശ്രുത്വാ തമസുരം ദേവ്യാ നിഹതം ധൂമ്രലോചനമ് ।
ബലം ച ക്ഷയിതം കൃത്സ്നം ദേവീകേസരിണാ തതഃ ॥ ൬.൨൦॥
ചുകോപ ദൈത്യാധിപതിഃ ശുമ്ഭഃ പ്രസ്ഫുരിതാധരഃ ।
ആജ്ഞാപയാമാസ ച തൌ ചണ്ഡമുണ്ഡൌ മഹാസുരൌ ॥ ൬.൨൧॥
ഹേ ചണ്ഡ ഹേ മുണ്ഡ ബലൈര്ബഹുഭിഃ പരിവാരിതൌ ।
തത്ര ഗച്ഛത ഗത്വാ ച സാ സമാനീയതാം ലഘു ॥ ൬.൨൨॥
കേശേഷ്വാകൃഷ്യ ബദ്ധ്വാ വാ യദി വഃ സംശയോ യുധി ।
തദാശേഷായുധൈഃ സര്വൈരസുരൈര്വിനിഹന്യതാമ് ॥ ൬.൨൩॥
തസ്യാം ഹതായാം ദുഷ്ടായാം സിംഹേ ച വിനിപാതിതേ ।
ശീഘ്രമാഗമ്യതാം ബദ്ധ്വാ ഗൃഹീത്വാ താമഥാമ്ബികാമ് ॥ ൬.൨൪॥
॥ സ്വസ്തി ശ്രീമാര്കണ്ഡേയപുരാണേ സാവര്ണികേ മന്വന്തരേ ദേവീമാഹാത്മ്യേ
ശുമ്ഭനിശുമ്ഭസേനാനീധൂമ്രലോചനവധോ നാമ ഷഷ്ഠോഽധ്യായഃ ॥ ൬॥
ഉവാച൪, ശ്ലോകാഃ ൨൪, ഏവമാദിതഃ ॥ ൪൧൨॥

। ധ്യാനമ് ।
ഓം ധ്യായേയം രത്നപീഠേ ശുകകലപഠിതം ശ‍ൃണ്വതീം ശ്യാമലാങ്ഗീം
ന്യസ്തൈകാംഘ്രിം സരോജേ ശശിശകലധരാം വല്ലകീം വാദയന്തീമ് ।
കല്ഹാരാബദ്ധമാലാം നിയമിതവിലസച്ചോലികാം രത്നവസ്ത്രാം
മാതങ്ഗീ ശങ്കപാത്രാം മധുരമധുമദാം ചിത്രകോദ്ഭാസിഭാലാമ് ॥
ഓം ഋഷിരുവാച ॥ ൭.൧॥
ആജ്ഞപ്താസ്തേ തതോ ദൈത്യാശ്ചണ്ഡമുണ്ഡപുരോഗമാഃ ।
ചതുരങ്ഗബലോപേതാ യയുരഭ്യുദ്യതായുധാഃ ॥ ൭.൨॥
ദദൃശുസ്തേ തതോ ദേവീമീഷദ്ധാസാം വ്യവസ്ഥിതാമ് ।
സിംഹസ്യോപരി ശൈലേന്ദ്രശ‍ൃങ്ഗേ മഹതി കാഞ്ചനേ ॥ ൭.൩॥
തേ ദൃഷ്ട്വാ താം സമാദാതുമുദ്യമം ചക്രുരുദ്യതാഃ ।
ആകൃഷ്ടചാപാസിധരാസ്തഥാന്യേ തത്സമീപഗാഃ ॥ ൭.൪॥
തതഃ കോപം ചകാരോച്ചൈരമ്ബികാ താനരീന്പ്രതി ।
കോപേന ചാസ്യാ വദനം മഷീവര്ണമഭൂത്തദാ ॥ ൭.൫॥
ഭ്രുകുടീകുടിലാത്തസ്യാ ലലാടഫലകാദ്ദ്രുതമ് ।
കാലീ കരാലവദനാ വിനിഷ്ക്രാന്താസിപാശിനീ ॥ ൭.൬॥
വിചിത്രഖട്വാങ്ഗധരാ നരമാലാവിഭൂഷണാ ।
ദ്വീപിചര്മപരീധാനാ ശുഷ്കമാംസാതിഭൈരവാ ॥ ൭.൭॥
അതിവിസ്താരവദനാ ജിഹ്വാലലനഭീഷണാ ।
നിമഗ്നാരക്തനയനാ നാദാപൂരിതദിങ്മുഖാ ॥ ൭.൮॥
സാ വേഗേനാഭിപതിതാ ഘാതയന്തീ മഹാസുരാന് ।
സൈന്യേ തത്ര സുരാരീണാമഭക്ഷയത തദ്ബലമ് ॥ ൭.൯॥
പാര്ഷ്ണിഗ്രാഹാങ്കുശഗ്രാഹയോധഘണ്ടാസമന്വിതാന് ।
സമാദായൈകഹസ്തേന മുഖേ ചിക്ഷേപ വാരണാന് ॥ ൭.൧൦॥
തഥൈവ യോധം തുരഗൈ രഥം സാരഥിനാ സഹ ।
നിക്ഷിപ്യ വക്ത്രേ ദശനൈശ്ചര്വയന്ത്യതിഭൈരവമ് ॥ ൭.൧൧॥
ഏകം ജഗ്രാഹ കേശേഷു ഗ്രീവായാമഥ ചാപരമ് ।
പാദേനാക്രമ്യ ചൈവാന്യമുരസാന്യമപോഥയത് ॥ ൭.൧൨॥
തൈര്മുക്താനി ച ശസ്ത്രാണി മഹാസ്ത്രാണി തഥാസുരൈഃ ।
മുഖേന ജഗ്രാഹ രുഷാ ദശനൈര്മഥിതാന്യപി ॥ ൭.൧൩॥
ബലിനാം തദ്ബലം സര്വമസുരാണാം ദുരാത്മനാമ് ।
മമര്ദാഭക്ഷയച്ചാന്യാനന്യാംശ്ചാതാഡയത്തദാ ॥ ൭.൧൪॥
അസിനാ നിഹതാഃ കേചിത്കേചിത്ഖട്വാങ്ഗതാഡിതാഃ ।
ജഗ്മുര്വിനാശമസുരാ ദന്താഗ്രാഭിഹതാസ്തഥാ ॥ ൭.൧൫॥
ക്ഷണേന തദ്ബലം സര്വമസുരാണാം നിപാതിതമ് ।
ദൃഷ്ട്വാ ചണ്ഡോഽഭിദുദ്രാവ താം കാലീമതിഭീഷണാമ് ॥ ൭.൧൬॥
ശരവര്ഷൈര്മഹാഭീമൈര്ഭീമാക്ഷീം താം മഹാസുരഃ ।
ഛാദയാമാസ ചക്രൈശ്ച മുണ്ഡഃ ക്ഷിപ്തൈഃ സഹസ്രശഃ ॥ ൭.൧൭॥
താനി ചക്രാണ്യനേകാനി വിശമാനാനി തന്മുഖമ് ।
ബഭുര്യഥാര്കബിമ്ബാനി സുബഹൂനി ഘനോദരമ് ॥ ൭.൧൮॥
തതോ ജഹാസാതിരുഷാ ഭീമം ഭൈരവനാദിനീ ।
കാലീ കരാലവദനാ ദുര്ദര്ശദശനോജ്ജ്വലാ ॥ ൭.൧൯॥
ഉത്ഥായ ച മഹാസിംഹം ദേവീ ചണ്ഡമധാവത ।
ഗൃഹീത്വാ ചാസ്യ കേശേഷു ശിരസ്തേനാസിനാച്ഛിനത് ॥ ൭.൨൦॥
അഥ മുണ്ഡോഽഭ്യധാവത്താം ദൃഷ്ട്വാ ചണ്ഡം നിപാതിതമ് ।
തമപ്യപാതയദ്ഭൂമൌ സാ ഖഡ്ഗാഭിഹതം രുഷാ ॥ ൭.൨൧॥
ഹതശേഷം തതഃ സൈന്യം ദൃഷ്ട്വാ ചണ്ഡം നിപാതിതമ് ।
മുണ്ഡം ച സുമഹാവീര്യം ദിശോ ഭേജേ ഭയാതുരമ് ॥ ൭.൨൨॥
ശിരശ്ചണ്ഡസ്യ കാലീ ച ഗൃഹീത്വാ മുണ്ഡമേവ ച ।
പ്രാഹ പ്രചണ്ഡാട്ടഹാസമിശ്രമഭ്യേത്യ ചണ്ഡികാമ് ॥ ൭.൨൩॥
മയാ തവാത്രോപഹൃതൌ ചണ്ഡമുണ്ഡൌ മഹാപശൂ ।
യുദ്ധയജ്ഞേ സ്വയം ശുമ്ഭം നിശുമ്ഭം ച ഹനിഷ്യസി ॥ ൭.൨൪॥
ഋഷിരുവാച ॥ ൭.൨൫॥
താവാനീതൌ തതോ ദൃഷ്ട്വാ ചണ്ഡമുണ്ഡൌ മഹാസുരൌ ।
ഉവാചകാലീം കല്യാണീ ലലിതം ചണ്ഡികാ വചഃ ॥ ൭.൨൬॥
യസ്മാച്ചണ്ഡം ച മുണ്ഡം ച ഗൃഹീത്വാ ത്വമുപാഗതാ ।
ചാമുണ്ഡേതി തതോ ലോകേ ഖ്യാതാ ദേവീ ഭവിഷ്യസി ॥ ൭.൨൭॥
॥ സ്വസ്തി ശ്രീമാര്കണ്ഡേയപുരാണേ സാവര്ണികേ മന്വന്തരേ ദേവീമാഹാത്മ്യേ
ചണ്ഡമുണ്ഡവധോ നാമ സപ്തമോഽധ്യായഃ ॥ ൭॥
ഉവാച൨, ശ്ലോകാഃ ൨൫, ഏവമാദിതഃ ॥ ൪൩൯॥

। ധ്യാനമ് ।
ഓം അരുണാം കരുണാതരങ്ഗിതാക്ഷീം
ധൃതപാശാങ്കുശബാണാചാപഹസ്താമ് ।
അണിമാദിഭിരാവൃതാം മയൂഖൈ-
രഹമിത്യേവ വിഭാവയേ ഭവാനീമ് ॥
ഓം ഋഷിരുവാച ॥ ൮.൧॥
ചണ്ഡേ ച നിഹതേ ദൈത്യേ മുണ്ഡേ ച വിനിപാതിതേ ।
ബഹുലേഷു ച സൈന്യേഷു ക്ഷയിതേഷ്വസുരേശ്വരഃ ॥ ൮.൨॥
തതഃ കോപപരാധീനചേതാഃ ശുമ്ഭഃ പ്രതാപവാന് ।
ഉദ്യോഗം സര്വസൈന്യാനാം ദൈത്യാനാമാദിദേശ ഹ ॥ ൮.൩॥
അദ്യ സര്വബലൈര്ദൈത്യാഃ ഷഡശീതിരുദായുധാഃ ।
കമ്ബൂനാം ചതുരശീതിര്നിര്യാന്തു സ്വബലൈര്വൃതാഃ ॥ ൮.൪॥
കോടിവീര്യാണി പഞ്ചാശദസുരാണാം കുലാനി വൈ ।
ശതം കുലാനി ധൌമ്രാണാം നിര്ഗച്ഛന്തു മമാജ്ഞയാ ॥ ൮.൫॥
കാലകാ ദൌര്ഹൃദാ മൌര്വാഃ കാലികേയാസ്തഥാസുരാഃ ।
യുദ്ധായ സജ്ജാ നിര്യാന്തു ആജ്ഞയാ ത്വരിതാ മമ ॥ ൮.൬॥
ഇത്യാജ്ഞാപ്യാസുരപതിഃ ശുമ്ഭോ ഭൈരവശാസനഃ ।
നിര്ജഗാമ മഹാസൈന്യസഹസ്രൈര്ബഹുഭിര്വൃതഃ ॥ ൮.൭॥
ആയാന്തം ചണ്ഡികാ ദൃഷ്ട്വാ തത്സൈന്യമതിഭീഷണമ് ।
ജ്യാസ്വനൈഃ പൂരയാമാസ ധരണീഗഗനാന്തരമ് ॥ ൮.൮॥
തതഃ സിംഹോ മഹാനാദമതീവ കൃതവാന്നൃപ ।
ഘണ്ടാസ്വനേന താന്നാദാനമ്ബികാ ചോപബൃംഹയത് ॥ ൮.൯॥
ധനുര്ജ്യാസിംഹഘണ്ടാനാം നാദാപൂരിതദിങ്മുഖാ ।
നിനാദൈര്ഭീഷണൈഃ കാലീ ജിഗ്യേ വിസ്താരിതാനനാ ॥ ൮.൧൦॥
തം നിനാദമുപശ്രുത്യ ദൈത്യസൈന്യൈശ്ചതുര്ദിശമ് ।
ദേവീ സിംഹസ്തഥാ കാലീ സരോഷൈഃ പരിവാരിതാഃ ॥ ൮.൧൧॥
ഏതസ്മിന്നന്തരേ ഭൂപ വിനാശായ സുരദ്വിഷാമ് ।
ഭവായാമരസിംഹാനാമതിവീര്യബലാന്വിതാഃ ॥ ൮.൧൨॥
ബ്രഹ്മേശഗുഹവിഷ്ണൂനാം തഥേന്ദ്രസ്യ ച ശക്തയഃ ।
ശരീരേഭ്യോ വിനിഷ്ക്രമ്യ തദ്രൂപൈശ്ചണ്ഡികാം യയുഃ ॥ ൮.൧൩॥
യസ്യ ദേവസ്യ യദ്രൂപം യഥാ ഭൂഷണവാഹനമ് ।
തദ്വദേവ ഹി തച്ഛക്തിരസുരാന്യോദ്ധുമായയൌ ॥ ൮.൧൪॥
ഹംസയുക്തവിമാനാഗ്രേ സാക്ഷസൂത്രകമണ്ഡലുഃ ।
ആയാതാ ബ്രഹ്മണഃ ശക്തിര്ബ്രഹ്മാണീത്യഭിധീയതേ ॥ ൮.൧൫॥
മാഹേശ്വരീ വൃഷാരൂഢാ ത്രിശൂലവരധാരിണീ ।
മഹാഹിവലയാ പ്രാപ്താ ചന്ദ്രരേഖാവിഭൂഷണാ ॥ ൮.൧൬॥
കൌമാരീ ശക്തിഹസ്താ ച മയൂരവരവാഹനാ ।
യോദ്ധുമഭ്യായയൌ ദൈത്യാനമ്ബികാ ഗുഹരൂപിണീ ॥ ൮.൧൭॥
തഥൈവ വൈഷ്ണവീ ശക്തിര്ഗരുഡോപരി സംസ്ഥിതാ ।
ശങ്ഖചക്രഗദാശാര്ങ്ഗഖഡ്ഗഹസ്താഭ്യുപായയൌ ॥ ൮.൧൮॥
യജ്ഞവാരാഹമതുലം രൂപം യാ ബിഭ്രതോ ഹരേഃ ।
ശക്തിഃ സാപ്യായയൌ തത്ര വാരാഹീം ബിഭ്രതീ തനുമ് ॥ ൮.൧൯॥
നാരസിംഹീ നൃസിംഹസ്യ ബിഭ്രതീ സദൃശം വപുഃ ।
പ്രാപ്താ തത്ര സടാക്ഷേപക്ഷിപ്തനക്ഷത്രസംഹതിഃ ॥ ൮.൨൦॥
വജ്രഹസ്താ തഥൈവൈന്ദ്രീ ഗജരാജോപരി സ്ഥിതാ ।
പ്രാപ്താ സഹസ്രനയനാ യഥാ ശക്രസ്തഥൈവ സാ ॥ ൮.൨൧॥
തതഃ പരിവൃതസ്താഭിരീശാനോ ദേവശക്തിഭിഃ ।
ഹന്യന്താമസുരാഃ ശീഘ്രം മമ പ്രീത്യാഹ ചണ്ഡികാമ് ॥ ൮.൨൨॥
തതോ ദേവീശരീരാത്തു വിനിഷ്ക്രാന്താതിഭീഷണാ ।
ചണ്ഡികാ ശക്തിരത്യുഗ്രാ ശിവാശതനിനാദിനീ ॥ ൮.൨൩॥
സാ ചാഹ ധൂമ്രജടിലമീശാനമപരാജിതാ ।
ദൂത ത്വം ഗച്ഛ ഭഗവന് പാര്ശ്വം ശുമ്ഭനിശുമ്ഭയോഃ ॥ ൮.൨൪॥
ബ്രൂഹി ശുമ്ഭം നിശുമ്ഭം ച ദാനവാവതിഗര്വിതൌ ।
യേ ചാന്യേ ദാനവാസ്തത്ര യുദ്ധായ സമുപസ്ഥിതാഃ ॥ ൮.൨൫॥
ത്രൈലോക്യമിന്ദ്രോ ലഭതാം ദേവാഃ സന്തു ഹവിര്ഭുജഃ ।
യൂയം പ്രയാത പാതാലം യദി ജീവിതുമിച്ഛഥ ॥ ൮.൨൬॥
ബലാവലേപാദഥ ചേദ്ഭവന്തോ യുദ്ധകാങ്ക്ഷിണഃ ।
തദാഗച്ഛത തൃപ്യന്തു മച്ഛിവാഃ പിശിതേന വഃ ॥ ൮.൨൭॥
യതോ നിയുക്തോ ദൌത്യേന തയാ ദേവ്യാ ശിവഃ സ്വയമ് ।
ശിവദൂതീതി ലോകേഽസ്മിംസ്തതഃ സാ ഖ്യാതിമാഗതാ ॥ ൮.൨൮॥
തേഽപി ശ്രുത്വാ വചോ ദേവ്യാഃ ശര്വാഖ്യാതം മഹാസുരാഃ ।
അമര്ഷാപൂരിതാ ജഗ്മുര്യത്ര കാത്യായനീ സ്ഥിതാ ॥ ൮.൨൯॥
തതഃ പ്രഥമമേവാഗ്രേ ശരശക്ത്യൃഷ്ടിവൃഷ്ടിഭിഃ ।
വവര്ഷുരുദ്ധതാമര്ഷാസ്താം ദേവീമമരാരയഃ ॥ ൮.൩൦॥
സാ ച താന് പ്രഹിതാന് ബാണാഞ്ഛൂലശക്തിപരശ്വധാന് ।
ചിച്ഛേദ ലീലയാധ്മാതധനുര്മുക്തൈര്മഹേഷുഭിഃ ॥ ൮.൩൧॥
തസ്യാഗ്രതസ്തഥാ കാലീ ശൂലപാതവിദാരിതാന് ।
ഖട്വാങ്ഗപോഥിതാംശ്ചാരീന്കുര്വതീ വ്യചരത്തദാ ॥ ൮.൩൨॥
കമണ്ഡലുജലാക്ഷേപഹതവീര്യാന് ഹതൌജസഃ ।
ബ്രഹ്മാണീ ചാകരോച്ഛത്രൂന്യേന യേന സ്മ ധാവതി ॥ ൮.൩൩॥
മാഹേശ്വരീ ത്രിശൂലേന തഥാ ചക്രേണ വൈഷ്ണവീ ।
ദൈത്യാഞ്ജഘാന കൌമാരീ തഥാ ശക്ത്യാതികോപനാ ॥ ൮.൩൪॥
ഐന്ദ്രീ കുലിശപാതേന ശതശോ ദൈത്യദാനവാഃ ।
പേതുര്വിദാരിതാഃ പൃഥ്വ്യാം രുധിരൌഘപ്രവര്ഷിണഃ ॥ ൮.൩൫॥
തുണ്ഡപ്രഹാരവിധ്വസ്താ ദംഷ്ട്രാഗ്രക്ഷതവക്ഷസഃ ।
വാരാഹമൂര്ത്യാ ന്യപതംശ്ചക്രേണ ച വിദാരിതാഃ ॥ ൮.൩൬॥
നഖൈര്വിദാരിതാംശ്ചാന്യാന് ഭക്ഷയന്തീ മഹാസുരാന് ।
നാരസിംഹീ ചചാരാജൌ നാദാപൂര്ണദിഗമ്ബരാ ॥ ൮.൩൭॥
ചണ്ഡാട്ടഹാസൈരസുരാഃ ശിവദൂത്യഭിദൂഷിതാഃ ।
പേതുഃ പൃഥിവ്യാം പതിതാംസ്താംശ്ചഖാദാഥ സാ തദാ ॥ ൮.൩൮॥
ഇതി മാതൃഗണം ക്രുദ്ധം മര്ദയന്തം മഹാസുരാന് ।
ദൃഷ്ട്വാഭ്യുപായൈര്വിവിധൈര്നേശുര്ദേവാരിസൈനികാഃ ॥ ൮.൩൯॥
പലായനപരാന്ദൃഷ്ട്വാ ദൈത്യാന്മാതൃഗണാര്ദിതാന് ।
യോദ്ധുമഭ്യായയൌ ക്രുദ്ധോ രക്തബീജോ മഹാസുരഃ ॥ ൮.൪൦॥
രക്തബിന്ദുര്യദാ ഭൂമൌ പതത്യസ്യ ശരീരതഃ ।
സമുത്പതതി മേദിന്യാം തത്പ്രമാണോ മഹാസുരഃ ॥ ൮.൪൧॥
യുയുധേ സ ഗദാപാണിരിന്ദ്രശക്ത്യാ മഹാസുരഃ ।
തതശ്ചൈന്ദ്രീ സ്വവജ്രേണ രക്തബീജമതാഡയത് ॥ ൮.൪൨॥
കുലിശേനാഹതസ്യാശു ബഹു സുസ്രാവ ശോണിതമ് ।
സമുത്തസ്ഥുസ്തതോ യോധാസ്തദ്രൂപാസ്തത്പരാക്രമാഃ ॥ ൮.൪൩॥
യാവന്തഃ പതിതാസ്തസ്യ ശരീരാദ്രക്തബിന്ദവഃ ।
താവന്തഃ പുരുഷാ ജാതാസ്തദ്വീര്യബലവിക്രമാഃ ॥ ൮.൪൪॥
തേ ചാപി യുയുധുസ്തത്ര പുരുഷാ രക്തസമ്ഭവാഃ ।
സമം മാതൃഭിരത്യുഗ്രശസ്ത്രപാതാതിഭീഷണമ് ॥ ൮.൪൫॥
പുനശ്ച വജ്രപാതേന ക്ഷതമസ്യ ശിരോ യദാ ।
വവാഹ രക്തം പുരുഷാസ്തതോ ജാതാഃ സഹസ്രശഃ ॥ ൮.൪൬॥
വൈഷ്ണവീ സമരേ ചൈനം ചക്രേണാഭിജഘാന ഹ ।
ഗദയാ താഡയാമാസ ഐന്ദ്രീ തമസുരേശ്വരമ് ॥ ൮.൪൭॥
വൈഷ്ണവീചക്രഭിന്നസ്യ രുധിരസ്രാവസമ്ഭവൈഃ ।
സഹസ്രശോ ജഗദ്വ്യാപ്തം തത്പ്രമാണൈര്മഹാസുരൈഃ ॥ ൮.൪൮॥
ശക്ത്യാ ജഘാന കൌമാരീ വാരാഹീ ച തഥാസിനാ ।
മാഹേശ്വരീ ത്രിശൂലേന രക്തബീജം മഹാസുരമ് ॥ ൮.൪൯॥
സ ചാപി ഗദയാ ദൈത്യഃ സര്വാ ഏവാഹനത് പൃഥക് ।
മാതൄഃ കോപസമാവിഷ്ടോ രക്തബീജോ മഹാസുരഃ ॥ ൮.൫൦॥
തസ്യാഹതസ്യ ബഹുധാ ശക്തിശൂലാദിഭിര്ഭുവി ।
പപാത യോ വൈ രക്തൌഘസ്തേനാസഞ്ഛതശോഽസുരാഃ ॥ ൮.൫൧॥
തൈശ്ചാസുരാസൃക്സമ്ഭൂതൈരസുരൈഃ സകലം ജഗത് ।
വ്യാപ്തമാസീത്തതോ ദേവാ ഭയമാജഗ്മുരുത്തമമ് ॥ ൮.൫൨॥
താന് വിഷണ്ണാന് സുരാന് ദൃഷ്ട്വാ ചണ്ഡികാ പ്രാഹസത്വരമ് ।
ഉവാചകാലീം ചാമുണ്ഡേ വിസ്തീര്ണം വദനം കുരു ॥ ൮.൫൩॥
മച്ഛസ്ത്രപാതസമ്ഭൂതാന് രക്തബിന്ദൂന് മഹാസുരാന് ।
രക്തബിന്ദോഃ പ്രതീച്ഛ ത്വം വക്ത്രേണാനേന വേഗിനാ ॥ ൮.൫൪॥
ഭക്ഷയന്തീ ചര രണേ തദുത്പന്നാന്മഹാസുരാന് ।
ഏവമേഷ ക്ഷയം ദൈത്യഃ ക്ഷേണരക്തോ ഗമിഷ്യതി ॥ ൮.൫൫॥
ഭക്ഷ്യമാണാസ്ത്വയാ ചോഗ്രാ ന ചോത്പത്സ്യന്തി ചാപരേ ।
ഇത്യുക്ത്വാ താം തതോ ദേവീ ശൂലേനാഭിജഘാന തമ് ॥ ൮.൫൬॥
മുഖേന കാലീ ജഗൃഹേ രക്തബീജസ്യ ശോണിതമ് ।
തതോഽസാവാജഘാനാഥ ഗദയാ തത്ര ചണ്ഡികാമ് ॥ ൮.൫൭॥
ന ചാസ്യാ വേദനാം ചക്രേ ഗദാപാതോഽല്പികാമപി ।
തസ്യാഹതസ്യ ദേഹാത്തു ബഹു സുസ്രാവ ശോണിതമ് ॥ ൮.൫൮॥
യതസ്തതസ്തദ്വക്ത്രേണ ചാമുണ്ഡാ സമ്പ്രതീച്ഛതി ।
മുഖേ സമുദ്ഗതാ യേഽസ്യാ രക്തപാതാന്മഹാസുരാഃ ॥ ൮.൫൯॥
താംശ്ചഖാദാഥ ചാമുണ്ഡാ പപൌ തസ്യ ച ശോണിതമ് ।
ദേവീ ശൂലേന വജ്രേണ ബാണൈരസിഭിരൃഷ്ടിഭിഃ ॥ ൮.൬൦॥
ജഘാന രക്തബീജം തം ചാമുണ്ഡാപീതശോണിതമ് ।
സ പപാത മഹീപൃഷ്ഠേ ശസ്ത്രസങ്ഘസമാഹതഃ ॥ ൮.൬൧॥
നീരക്തശ്ച മഹീപാല രക്തബീജോ മഹാസുരഃ ।
തതസ്തേ ഹര്ഷമതുലമവാപുസ്ത്രിദശാ നൃപ ॥ ൮.൬൨॥
തേഷാം മാതൃഗണോ ജാതോ നനര്താസൃങ്മദോദ്ധതഃ ॥ ൮.൬൩॥
॥ സ്വസ്തി ശ്രീമാര്കണ്ഡേയപുരാണേ സാവര്ണികേ മന്വന്തരേ ദേവീമാഹാത്മ്യേ
രക്തബീജവധോ നാമാഷ്ടമോഽധ്യായഃ ॥ ൮॥
ഉവാച൧, അര്ധശ്ലോകഃ ൧, ശ്ലോകാഃ ൬൧, ഏവമാദിതഃ ॥ ൫൦൨॥

। ധ്യാനമ് ।
ഓം ബന്ധൂകകാഞ്ചനനിഭം രുചിരാക്ഷമാലാം
പാശാങ്കുശൌ ച വരദാം നിജബാഹുദണ്ഡൈഃ ।
ബിഭ്രാണമിന്ദുശകലാഭരണം ത്രിനേത്ര-
മര്ധാംബികേശമനിശം വപുരാശ്രയാമി ॥
ഓം രാജോവാച ॥ ൯.൧॥
വിചിത്രമിദമാഖ്യാതം ഭഗവന് ഭവതാ മമ ।
ദേവ്യാശ്ചരിതമാഹാത്മ്യം രക്തബീജവധാശ്രിതമ് ॥ ൯.൨॥
ഭൂയശ്ചേച്ഛാമ്യഹം ശ്രോതും രക്തബീജേ നിപാതിതേ ।
ചകാര ശുമ്ഭോ യത്കര്മ നിശുമ്ഭശ്ചാതികോപനഃ ॥ ൯.൩॥
ഋഷിരുവാച ॥ ൯.൪॥
ചകാര കോപമതുലം രക്തബീജേ നിപാതിതേ ।
ശുമ്ഭാസുരോ നിശുമ്ഭശ്ച ഹതേഷ്വന്യേഷു ചാഹവേ ॥ ൯.൫॥
ഹന്യമാനം മഹാസൈന്യം വിലോക്യാമര്ഷമുദ്വഹന് ।
അഭ്യധാവന്നിശുമ്ഭോഽഥ മുഖ്യയാസുരസേനയാ ॥ ൯.൬॥
തസ്യാഗ്രതസ്തഥാ പൃഷ്ഠേ പാര്ശ്വയോശ്ച മഹാസുരാഃ ।
സന്ദഷ്ടൌഷ്ഠപുടാഃ ക്രുദ്ധാ ഹന്തും ദേവീമുപായയുഃ ॥ ൯.൭॥
ആജഗാമ മഹാവീര്യഃ ശുമ്ഭോഽപി സ്വബലൈര്വൃതഃ ।
നിഹന്തും ചണ്ഡികാം കോപാത്കൃത്വാ യുദ്ധം തു മാതൃഭിഃ ॥ ൯.൮॥
തതോ യുദ്ധമതീവാസീദ്ദേവ്യാ ശുമ്ഭനിശുമ്ഭയോഃ ।
ശരവര്ഷമതീവോഗ്രം മേഘയോരിവ വര്ഷതോഃ ॥ ൯.൯॥
ചിച്ഛേദാസ്താഞ്ഛരാംസ്താഭ്യാം ചണ്ഡികാ സ്വശരോത്കരൈഃ ।
താഡയാമാസ ചാങ്ഗേഷു ശസ്ത്രൌഘൈരസുരേശ്വരൌ ॥ ൯.൧൦॥
നിശുമ്ഭോ നിശിതം ഖഡ്ഗം ചര്മ ചാദായ സുപ്രഭമ് ।
അതാഡയന്മൂര്ധ്നി സിംഹം ദേവ്യാ വാഹനമുത്തമമ് ॥ ൯.൧൧॥
താഡിതേ വാഹനേ ദേവീ ക്ഷുരപ്രേണാസിമുത്തമമ് ।
നിശുമ്ഭസ്യാശു ചിച്ഛേദ ചര്മ ചാപ്യഷ്ടചന്ദ്രകമ് ॥ ൯.൧൨॥
ഛിന്നേ ചര്മണി ഖഡ്ഗേ ച ശക്തിം ചിക്ഷേപ സോഽസുരഃ ।
താമപ്യസ്യ ദ്വിധാ ചക്രേ ചക്രേണാഭിമുഖാഗതാമ് ॥ ൯.൧൩॥
കോപാധ്മാതോ നിശുമ്ഭോഽഥ ശൂലം ജഗ്രാഹ ദാനവഃ ।
ആയാതം മുഷ്ടിപാതേന ദേവീ തച്ചാപ്യചൂര്ണയത് ॥ ൯.൧൪॥
ആവിദ്യാഥ ഗദാം സോഽപി ചിക്ഷേപ ചണ്ഡികാം പ്രതി ।
സാപി ദേവ്യാസ് ത്രിശൂലേന ഭിന്നാ ഭസ്മത്വമാഗതാ ॥ ൯.൧൫॥
തതഃ പരശുഹസ്തം തമായാന്തം ദൈത്യപുങ്ഗവമ് ।
ആഹത്യ ദേവീ ബാണൌഘൈരപാതയത ഭൂതലേ ॥ ൯.൧൬॥
തസ്മിന്നിപതിതേ ഭൂമൌ നിശുമ്ഭേ ഭീമവിക്രമേ ।
ഭ്രാതര്യതീവ സങ്ക്രുദ്ധഃ പ്രയയൌ ഹന്തുമമ്ബികാമ് ॥ ൯.൧൭॥
സ രഥസ്ഥസ്തഥാത്യുച്ചൈര്ഗൃഹീതപരമായുധൈഃ ।
ഭുജൈരഷ്ടാഭിരതുലൈര്വ്യാപ്യാശേഷം ബഭൌ നഭഃ ॥ ൯.൧൮॥
തമായാന്തം സമാലോക്യ ദേവീ ശങ്ഖമവാദയത് ।
ജ്യാശബ്ദം ചാപി ധനുഷശ്ചകാരാതീവ ദുഃസഹമ് ॥ ൯.൧൯॥
പൂരയാമാസ കകുഭോ നിജഘണ്ടാസ്വനേന ച ।
സമസ്തദൈത്യസൈന്യാനാം തേജോവധവിധായിനാ ॥ ൯.൨൦॥
തതഃ സിംഹോ മഹാനാദൈസ്ത്യാജിതേഭമഹാമദൈഃ ।
പൂരയാമാസ ഗഗനം ഗാം തഥൈവ ദിശോ ദശ ॥ ൯.൨൧॥
തതഃ കാലീ സമുത്പത്യ ഗഗനം ക്ഷ്മാമതാഡയത് ।
കരാഭ്യാം തന്നിനാദേന പ്രാക്സ്വനാസ്തേ തിരോഹിതാഃ ॥ ൯.൨൨॥
അട്ടാട്ടഹാസമശിവം ശിവദൂതീ ചകാര ഹ ।
വൈഃ ശബ്ദൈരസുരാസ്ത്രേസുഃ ശുമ്ഭഃ കോപം പരം യയൌ ॥ ൯.൨൩॥
ദുരാത്മംസ്തിഷ്ഠ തിഷ്ഠേതി വ്യാജഹാരാമ്ബികാ യദാ ।
തദാ ജയേത്യഭിഹിതം ദേവൈരാകാശസംസ്ഥിതൈഃ ॥ ൯.൨൪॥
ശുമ്ഭേനാഗത്യ യാ ശക്തിര്മുക്താ ജ്വാലാതിഭീഷണാ ।
ആയാന്തീ വഹ്നികൂടാഭാ സാ നിരസ്താ മഹോല്കയാ ॥ ൯.൨൫॥
സിംഹനാദേന ശുമ്ഭസ്യ വ്യാപ്തം ലോകത്രയാന്തരമ് ।
നിര്ഘാതനിഃസ്വനോ ഘോരോ ജിതവാനവനീപതേ ॥ ൯.൨൬॥
ശുമ്ഭമുക്താഞ്ഛരാന്ദേവീ ശുമ്ഭസ്തത്പ്രഹിതാഞ്ഛരാന് ।
ചിച്ഛേദ സ്വശരൈരുഗ്രൈഃ ശതശോഽഥ സഹസ്രശഃ ॥ ൯.൨൭॥
തതഃ സാ ചണ്ഡികാ ക്രുദ്ധാ ശൂലേനാഭിജഘാന തമ് ।
സ തദാഭിഹതോ ഭൂമൌ മൂര്ച്ഛിതോ നിപപാത ഹ ॥ ൯.൨൮॥
തതോ നിശുമ്ഭഃ സമ്പ്രാപ്യ ചേതനാമാത്തകാര്മുകഃ ।
ആജഘാന ശരൈര്ദേവീം കാലീം കേസരിണം തഥാ ॥ ൯.൨൯॥
പുനശ്ച കൃത്വാ ബാഹൂനാമയുതം ദനുജേശ്വരഃ ।
ചക്രായുധേന ദിതിജശ്ഛാദയാമാസ ചണ്ഡികാമ് ॥ ൯.൩൦॥
തതോ ഭഗവതീ ക്രുദ്ധാ ദുര്ഗാ ദുര്ഗാര്തിനാശിനീ ।
ചിച്ഛേദ ദേവീ ചക്രാണി സ്വശരൈഃ സായകാംശ്ച താന് ॥ ൯.൩൧॥
തതോ നിശുമ്ഭോ വേഗേന ഗദാമാദായ ചണ്ഡികാമ് ।
അഭ്യധാവത വൈ ഹന്തും ദൈത്യസൈന്യസമാവൃതഃ ॥ ൯.൩൨॥
തസ്യാപതത ഏവാശു ഗദാം ചിച്ഛേദ ചണ്ഡികാ ।
ഖഡ്ഗേന ശിതധാരേണ സ ച ശൂലം സമാദദേ ॥ ൯.൩൩॥
ശൂലഹസ്തം സമായാന്തം നിശുമ്ഭമമരാര്ദനമ് ।
ഹൃദി വിവ്യാധ ശൂലേന വേഗാവിദ്ധേന ചണ്ഡികാ ॥ ൯.൩൪॥
ഭിന്നസ്യ തസ്യ ശൂലേന ഹൃദയാന്നിഃസൃതോഽപരഃ ।
മഹാബലോ മഹാവീര്യസ്തിഷ്ഠേതി പുരുഷോ വദന് ॥ ൯.൩൫॥
തസ്യ നിഷ്ക്രാമതോ ദേവീ പ്രഹസ്യ സ്വനവത്തതഃ ।
ശിരശ്ചിച്ഛേദ ഖഡ്ഗേന തതോഽസാവപതദ്ഭുവി ॥ ൯.൩൬॥
തതഃ സിംഹശ്ചഖാദോഗ്രദംഷ്ട്രാക്ഷുണ്ണശിരോധരാന് ।
അസുരാംസ്താംസ്തഥാ കാലീ ശിവദൂതീ തഥാപരാന് ॥ ൯.൩൭॥
കൌമാരീശക്തിനിര്ഭിന്നാഃ കേചിന്നേശുര്മഹാസുരാഃ ।
ബ്രഹ്മാണീമന്ത്രപൂതേന തോയേനാന്യേ നിരാകൃതാഃ ॥ ൯.൩൮॥
മാഹേശ്വരീത്രിശൂലേന ഭിന്നാഃ പേതുസ്തഥാപരേ ।
വാരാഹീതുണ്ഡഘാതേന കേചിച്ചൂര്ണീകൃതാ ഭുവി ॥ ൯.൩൯॥
ഖണ്ഡം ഖണ്ഡം ച ചക്രേണ വൈഷ്ണവ്യാ ദാനവാഃ കൃതാഃ ।
വജ്രേണ ചൈന്ദ്രീഹസ്താഗ്രവിമുക്തേന തഥാപരേ ॥ ൯.൪൦॥
കേചിദ്വിനേശുരസുരാഃ കേചിന്നഷ്ടാ മഹാഹവാത് ।
ഭക്ഷിതാശ്ചാപരേ കാലീശിവദൂതീമൃഗാധിപൈഃ ॥ ൯.൪൧॥
॥ സ്വസ്തി ശ്രീമാര്കണ്ഡേയപുരാണേ സാവര്ണികേ മന്വന്തരേ ദേവീമാഹാത്മ്യേ
നിശുമ്ഭവധോ നാമ നവമോഽധ്യായഃ ॥ ൯॥
ഉവാച൨, അര്ധശ്ലോകാഃ ൩൯, ശ്ലോകാഃ ൪൧, ഏവമാദിതഃ ॥ ൫൪൩॥

। ധ്യാനമ് ।
ഓം ഉത്തപ്തഹേമരുചിരാം രവിചന്ദ്രവഹ്നി-
നേത്രാം ധനുശ്ശരയുതാങ്കുശപാശശൂലമ് ।
രമ്യൈര്ഭുജൈശ്ച ദധതീം ശിവശക്തിരൂപാം
കാമേശ്വരീം ഹൃദി ഭജാമി ധൃതേന്ദുലേഖാമ് ॥
ഓം ഋഷിരുവാച ॥ ൧൦.൧॥
നിശുമ്ഭം നിഹതം ദൃഷ്ട്വാ ഭ്രാതരം പ്രാണസമ്മിതമ് ।
ഹന്യമാനം ബലം ചൈവ ശുമ്ഭഃ ക്രുദ്ധോഽബ്രവീദ്വചഃ ॥ ൧൦.൨॥
ബലാവലേപദുഷ്ടേ ത്വം മാ ദുര്ഗേ ഗര്വമാവഹ ।
അന്യാസാം ബലമാശ്രിത്യ യുദ്ധ്യസേ ചാതിമാനിനീ ॥ ൧൦.൩॥
ദേവ്യുവാച॥ ൧൦.൪॥
ഏകൈവാഹം ജഗത്യത്ര ദ്വിതീയാ കാ മമാപരാ ।
പശ്യൈതാ ദുഷ്ട മയ്യേവ വിശന്ത്യോ മദ്വിഭൂതയഃ ॥ ൧൦.൫॥
തതഃ സമസ്താസ്താ ദേവ്യോ ബ്രഹ്മാണീപ്രമുഖാ ലയമ് ।
തസ്യാ ദേവ്യാസ്തനൌ ജഗ്മുരേകൈവാസീത്തദാമ്ബികാ ॥ ൧൦.൬॥
ദേവ്യുവാച॥ ൧൦.൭॥
അഹം വിഭൂത്യാ ബഹുഭിരിഹ രൂപൈര്യദാസ്ഥിതാ ।
തത്സംഹൃതം മയൈകൈവ തിഷ്ഠാമ്യാജൌ സ്ഥിരോ ഭവ ॥ ൧൦.൮॥
ഋഷിരുവാച ॥ ൧൦.൯॥
തതഃ പ്രവവൃതേ യുദ്ധം ദേവ്യാഃ ശുമ്ഭസ്യ ചോഭയോഃ ।
പശ്യതാം സര്വദേവാനാമസുരാണാം ച ദാരുണമ് ॥ ൧൦.൧൦॥
ശരവര്ഷൈഃ ശിതൈഃ ശസ്ത്രൈസ്തഥാ ചാസ്ത്രൈഃ സുദാരുണൈഃ ।
തയോര്യുദ്ധമഭൂദ്ഭൂയഃ സര്വലോകഭയങ്കരമ് ॥ ൧൦.൧൧॥
ദിവ്യാന്യസ്ത്രാണി ശതശോ മുമുചേ യാന്യഥാമ്ബികാ ।
ബഭഞ്ജ താനി ദൈത്യേന്ദ്രസ്തത്പ്രതീഘാതകര്തൃഭിഃ ॥ ൧൦.൧൨॥
മുക്താനി തേന ചാസ്ത്രാണി ദിവ്യാനി പരമേശ്വരീ ।
ബഭഞ്ജ ലീലയൈവോഗ്രഹുങ്കാരോച്ചാരണാദിഭിഃ ॥ ൧൦.൧൩॥
തതഃ ശരശതൈര്ദേവീമാച്ഛാദയത സോഽസുരഃ ।
സാപി തത്കുപിതാ ദേവീ ധനുശ്ചിച്ഛേദ ചേഷുഭിഃ ॥ ൧൦.൧൪॥
ഛിന്നേ ധനുഷി ദൈത്യേന്ദ്രസ്തഥാ ശക്തിമഥാദദേ ।
ചിച്ഛേദ ദേവീ ചക്രേണ താമപ്യസ്യ കരേ സ്ഥിതാമ് ॥ ൧൦.൧൫॥
തതഃ ഖഡ്ഗമുപാദായ ശതചന്ദ്രം ച ഭാനുമത് ।
അഭ്യധാ വത താം ദേവീം ദൈത്യാനാമധിപേശ്വരഃ ॥ ൧൦.൧൬॥
തസ്യാപതത ഏവാശു ഖഡ്ഗം ചിച്ഛേദ ചണ്ഡികാ ।
ധനുര്മുക്തൈഃ ശിതൈര്ബാണൈശ്ചര്മ ചാര്കകരാമലമ് ।
അശ്വാംശ്ച പാതയാമാസ രഥം സാരഥിനാ സഹ ॥ ൧൦.൧൭॥
ഹതാശ്വഃ സ തദാ ദൈത്യശ്ഛിന്നധന്വാ വിസാരഥിഃ ।
ജഗ്രാഹ മുദ്ഗരം ഘോരമമ്ബികാനിധനോദ്യതഃ ॥ ൧൦.൧൮॥
ചിച്ഛേദാപതതസ്തസ്യ മുദ്ഗരം നിശിതൈഃ ശരൈഃ ।
തഥാപി സോഽഭ്യധാവത്താം മുഷ്ടിമുദ്യമ്യ വേഗവാന് ॥ ൧൦.൧൯॥
സ മുഷ്ടിം പാതയാമാസ ഹൃദയേ ദൈത്യപുങ്ഗവഃ ।
ദേവ്യാസ്തം ചാപി സാ ദേവീ തലേനോരസ്യതാഡയത് ॥ ൧൦.൨൦॥
തലപ്രഹാരാഭിഹതോ നിപപാത മഹീതലേ ।
സ ദൈത്യരാജഃ സഹസാ പുനരേവ തഥോത്ഥിതഃ ॥ ൧൦.൨൧॥
ഉത്പത്യ ച പ്രഗൃഹ്യോച്ചൈര്ദേവീം ഗഗനമാസ്ഥിതഃ ।
തത്രാപി സാ നിരാധാരാ യുയുധേ തേന ചണ്ഡികാ ॥ ൧൦.൨൨॥
നിയുദ്ധം ഖേ തദാ ദൈത്യശ്ചണ്ഡികാ ച പരസ്പരമ് ।
ചക്രതുഃ പ്രഥമം സിദ്ധമുനിവിസ്മയകാരകമ് ॥ ൧൦.൨൩॥
തതോ നിയുദ്ധം സുചിരം കൃത്വാ തേനാമ്ബികാ സഹ ।
ഉത്പാട്യ ഭ്രാമയാമാസ ചിക്ഷേപ ധരണീതലേ ॥ ൧൦.൨൪॥
സ ക്ഷിപ്തോ ധരണീം പ്രാപ്യ മുഷ്ടിമുദ്യമ്യ വേഗവാന് ।
അഭ്യധാവത ദുഷ്ടാത്മാ ചണ്ഡികാനിധനേച്ഛയാ ॥ ൧൦.൨൫॥
തമായാന്തം തതോ ദേവീ സര്വദൈത്യജനേശ്വരമ് ।
ജഗത്യാം പാതയാമാസ ഭിത്ത്വാ ശൂലേന വക്ഷസി ॥ ൧൦.൨൬॥
സ ഗതാസുഃ പപാതോര്വ്യാം ദേവീ ശൂലാഗ്രവിക്ഷതഃ ।
ചാലയന് സകലാം പൃഥ്വീം സാബ്ധിദ്വീപാം സപര്വതാമ് ॥ ൧൦.൨൭॥
തതഃ പ്രസന്നമഖിലം ഹതേ തസ്മിന് ദുരാത്മനി ।
ജഗത്സ്വാസ്ഥ്യമതീവാപ നിര്മലം ചാഭവന്നഭഃ ॥ ൧൦.൨൮॥
ഉത്പാതമേഘാഃ സോല്കാ യേ പ്രാഗാസംസ്തേ ശമം യയുഃ ।
സരിതോ മാര്ഗവാഹിന്യസ്തഥാസംസ്തത്ര പാതിതേ ॥ ൧൦.൨൯॥
തതോ ദേവഗണാഃ സര്വേ ഹര്ഷനിര്ഭരമാനസാഃ ।
ബഭൂവുര്നിഹതേ തസ്മിന് ഗന്ധര്വാ ലലിതം ജഗുഃ ॥ ൧൦.൩൦॥
അവാദയംസ്തഥൈവാന്യേ നനൃതുശ്ചാപ്സരോഗണാഃ ।
വവുഃ പുണ്യാസ്തഥാ വാതാഃ സുപ്രഭോഽഭൂദ്ദിവാകരഃ ॥ ൧൦.൩൧॥
ജജ്വലുശ്ചാഗ്നയഃ ശാന്താഃ ശാന്താ ദിഗ്ജനിതസ്വനാഃ ॥ ൧൦.൩൨॥
॥ സ്വസ്തി ശ്രീമാര്കണ്ഡേയപുരാണേ സാവര്ണികേ മന്വന്തരേ
ദേവീമാഹാത്മ്യേ ശുമ്ഭവധോ നാമ ദശമോഽധ്യായഃ ॥ ൧൦॥

। ധ്യാനമ് ।
ഓം ബാലരവിദ്യുതിമിന്ദുകിരീടാം തുങ്ഗകുചാം നയനത്രയയുക്താമ് ।
സ്മേരമുഖീം വരദാങ്കുശപാശാഭീതികരാം പ്രഭജേ ഭുവനേശീമ് ॥
ഓം ഋഷിരുവാച ॥ ൧൧.൧॥
ദേവ്യാ ഹതേ തത്ര മഹാസുരേന്ദ്രേ
സേന്ദ്രാഃ സുരാ വഹ്നിപുരോഗമാസ്താമ് ।
കാത്യായനീം തുഷ്ടുവുരിഷ്ടലാഭാദ്
വികാശിവക്ത്രാബ്ജവികാശിതാശാഃ ॥ ൧൧.൨॥
ദേവി പ്രപന്നാര്തിഹരേ പ്രസീദ
പ്രസീദ മാതര്ജഗതോഽഖിലസ്യ ।
പ്രസീദ വിശ്വേശ്വരി പാഹി വിശ്വം
ത്വമീശ്വരീ ദേവി ചരാചരസ്യ ॥ ൧൧.൩॥
ആധാരഭൂതാ ജഗതസ്ത്വമേകാ
മഹീസ്വരൂപേണ യതഃ സ്ഥിതാസി ।
അപാം സ്വരൂപസ്ഥിതയാ ത്വയൈത-
ദാപ്യായതേ കൃത്സ്നമലങ്ഘ്യവീര്യേ ॥ ൧൧.൪॥
ത്വം വൈഷ്ണവീശക്തിരനന്തവീര്യാ
വിശ്വസ്യ ബീജം പരമാസി മായാ ।
സമ്മോഹിതം ദേവി സമസ്തമേതത്
ത്വം വൈ പ്രസന്നാ ഭുവി മുക്തിഹേതുഃ ॥ ൧൧.൫॥
വിദ്യാഃ സമസ്താസ്തവ ദേവി ഭേദാഃ
സ്ത്രിയഃ സമസ്താഃ സകലാ ജഗത്സു ।
ത്വയൈകയാ പൂരിതമമ്ബയൈതത്
കാ തേ സ്തുതിഃ സ്തവ്യപരാപരോക്തിഃ ॥ ൧൧.൬॥
സര്വഭൂതാ യദാ ദേവീ ഭുക്തിമുക്തിപ്രദായിനീ ।
ത്വം സ്തുതാ സ്തുതയേ കാ വാ ഭവന്തു പരമോക്തയഃ ॥ ൧൧.൭॥
സര്വസ്യ ബുദ്ധിരൂപേണ ജനസ്യ ഹൃദി സംസ്ഥിതേ ।
സ്വര്ഗാപവര്ഗദേ ദേവി നാരായണി നമോഽസ്തു തേ ॥ ൧൧.൮॥
കലാകാഷ്ഠാദിരൂപേണ പരിണാമപ്രദായിനി ।
വിശ്വസ്യോപരതൌ ശക്തേ നാരായണി നമോഽസ്തു തേ ॥ ൧൧.൯॥
സര്വമങ്ഗലമാങ്ഗല്യേ ശിവേ സര്വാര്ഥസാധികേ ।
ശരണ്യേ ത്ര്യമ്ബകേ ഗൌരി നാരായണി നമോഽസ്തു തേ ॥ ൧൧.൧൦॥
സൃഷ്ടിസ്ഥിതിവിനാശാനാം ശക്തിഭൂതേ സനാതനി ।
ഗുണാശ്രയേ ഗുണമയേ നാരായണി നമോഽസ്തു തേ ॥ ൧൧.൧൧॥
ശരണാഗതദീനാര്തപരിത്രാണപരായണേ ।
സര്വസ്യാര്തിഹരേ ദേവി നാരായണി നമോഽസ്തു തേ ॥ ൧൧.൧൨॥
ഹംസയുക്തവിമാനസ്ഥേ ബ്രഹ്മാണീരൂപധാരിണി ।
കൌശാമ്ഭഃക്ഷരികേ ദേവി നാരായണി നമോഽസ്തു തേ ॥ ൧൧.൧൩॥
ത്രിശൂലചന്ദ്രാഹിധരേ മഹാവൃഷഭവാഹിനി ।
മാഹേശ്വരീസ്വരൂപേണ നാരായണി നമോഽസ്തുതേ ॥ ൧൧.൧൪॥
മയൂരകുക്കുടവൃതേ മഹാശക്തിധരേഽനഘേ ।
കൌമാരീരൂപസംസ്ഥാനേ നാരായണി നമോഽസ്തു തേ ॥ ൧൧.൧൫॥
ശങ്ഖചക്രഗദാശാര്ങ്ഗഗൃഹീതപരമായുധേ ।
പ്രസീദ വൈഷ്ണവീരൂപേ നാരായണി നമോഽസ്തു തേ ॥ ൧൧.൧൬॥
ഗൃഹീതോഗ്രമഹാചക്രേ ദംഷ്ട്രോദ്ധൃതവസുന്ധരേ ।
വരാഹരൂപിണി ശിവേ നാരായണി നമോഽസ്തു തേ ॥ ൧൧.൧൭॥
നൃസിംഹരൂപേണോഗ്രേണ ഹന്തും ദൈത്യാന് കൃതോദ്യമേ ।
ത്രൈലോക്യത്രാണസഹിതേ നാരായണി നമോഽസ്തു തേ ॥ ൧൧.൧൮॥
കിരീടിനി മഹാവജ്രേ സഹസ്രനയനോജ്ജ്വലേ ।
വൃത്രപ്രാണഹരേ ചൈന്ദ്രി നാരായണി നമോഽസ്തു തേ ॥ ൧൧.൧൯॥
ശിവദൂതീസ്വരൂപേണ ഹതദൈത്യമഹാബലേ ।
ഘോരരൂപേ മഹാരാവേ നാരായണി നമോഽസ്തു തേ ॥ ൧൧.൨൦॥
ദംഷ്ട്രാകരാലവദനേ ശിരോമാലാവിഭൂഷണേ ।
ചാമുണ്ഡേ മുണ്ഡമഥനേ നാരായണി നമോഽസ്തു തേ ॥ ൧൧.൨൧॥
ലക്ഷ്മി ലജ്ജേ മഹാവിദ്യേ ശ്രദ്ധേ പുഷ്ടി സ്വധേ ധ്രുവേ ।
മഹാരാത്രി മഹാമായേ നാരായണി നമോഽസ്തു തേ ॥ ൧൧.൨൨॥
മേധേ സരസ്വതി വരേ ഭൂതി ബാഭ്രവി താമസി ।
നിയതേ ത്വം പ്രസീദേശേ നാരായണി നമോഽസ്തുതേ ॥ ൧൧.൨൩॥
സര്വസ്വരൂപേ സര്വേശേ സര്വശക്തിസമന്വിതേ ।
ഭയേഭ്യസ്ത്രാഹി നോ ദേവി ദുര്ഗേ ദേവി നമോഽസ്തു തേ ॥ ൧൧.൨൪॥
ഏതത്തേ വദനം സൌമ്യം ലോചനത്രയഭൂഷിതമ് ।
പാതു നഃ സര്വഭൂതേഭ്യഃ കാത്യായനി നമോഽസ്തു തേ ॥ ൧൧.൨൫॥
ജ്വാലാകരാലമത്യുഗ്രമശേഷാസുരസൂദനമ് ।
ത്രിശൂലം പാതു നോ ഭീതേര്ഭദ്രകാലി നമോഽസ്തു തേ ॥ ൧൧.൨൬॥
ഹിനസ്തി ദൈത്യതേജാംസി സ്വനേനാപൂര്യ യാ ജഗത് ।
സാ ഘണ്ടാ പാതു നോ ദേവി പാപേഭ്യോ നഃ സുതാനിവ ॥ ൧൧.൨൭॥
അസുരാസൃഗ്വസാപങ്കചര്ചിതസ്തേ കരോജ്ജ്വലഃ ।
ശുഭായ ഖഡ്ഗോ ഭവതു ചണ്ഡികേ ത്വാം നതാ വയമ് ॥ ൧൧.൨൮॥
രോഗാനശേഷാനപഹംസി തുഷ്ടാ
രുഷ്ടാ തു കാമാന് സകലാനഭീഷ്ടാന് ।
ത്വാമാശ്രിതാനാം ന വിപന്നരാണാം
ത്വാമാശ്രിതാ ഹ്യാശ്രയതാം പ്രയാന്തി ॥ ൧൧.൨൯॥
ഏതത്കൃതം യത്കദനം ത്വയാദ്യ
ധര്മദ്വിഷാം ദേവി മഹാസുരാണാമ് ।
രൂപൈരനേകൈര്ബഹുധാത്മമൂര്തിം
കൃത്വാമ്ബികേ തത്പ്രകരോതി കാന്യാ ॥ ൧൧.൩൦॥
വിദ്യാസു ശാസ്ത്രേഷു വിവേകദീപേ-
ഷ്വാദ്യേഷു വാക്യേഷു ച കാ ത്വദന്യാ ।
മമത്വഗര്തേഽതിമഹാന്ധകാരേ
വിഭ്രാമയത്യേതദതീവ വിശ്വമ് ॥ ൧൧.൩൧॥
രക്ഷാംസി യത്രോഗ്രവിഷാശ്ച നാഗാ
യത്രാരയോ ദസ്യുബലാനി യത്ര ।
ദാവാനലോ യത്ര തഥാബ്ധിമധ്യേ
തത്ര സ്ഥിതാ ത്വം പരിപാസി വിശ്വമ് ॥ ൧൧.൩൨॥
വിശ്വേശ്വരി ത്വം പരിപാസി വിശ്വം
വിശ്വാത്മികാ ധാരയസീഹ വിശ്വമ് ।
വിശ്വേശവന്ദ്യാ ഭവതീ ഭവന്തി
വിശ്വാശ്രയാ യേ ത്വയി ഭക്തിനമ്രാഃ ॥ ൧൧.൩൩॥
ദേവി പ്രസീദ പരിപാലയ നോഽരിഭീതേ-
ര്നിത്യം യഥാസുരവധാദധുനൈവ സദ്യഃ ।
പാപാനി സര്വജഗതാം പ്രശമം നയാശു
ഉത്പാതപാകജനിതാംശ്ച മഹോപസര്ഗാന് ॥ ൧൧.൩൪॥
പ്രണതാനാം പ്രസീദ ത്വം ദേവി വിശ്വാര്തിഹാരിണി ।
ത്രൈലോക്യവാസിനാമീഡ്യേ ലോകാനാം വരദാ ഭവ ॥ ൧൧.൩൫॥
ദേവ്യുവാച॥ ൧൧.൩൬॥
വരദാഹം സുരഗണാ വരം യന്മനസേച്ഛഥ ।
തം വൃണുധ്വം പ്രയച്ഛാമി ജഗതാമുപകാരകമ് ॥ ൧൧.൩൭॥
ദേവാ ഊചുഃ ॥ ൧൧.൩൮॥
സര്വാബാധാപ്രശമനം ത്രൈലോക്യസ്യാഖിലേശ്വരി ।
ഏവമേവ ത്വയാ കാര്യമസ്മദ്വൈരിവിനാശനമ് ॥ ൧൧.൩൯॥
ദേവ്യുവാച॥ ൧൧.൪൦॥
വൈവസ്വതേഽന്തരേ പ്രാപ്തേ അഷ്ടാവിംശതിമേ യുഗേ ।
ശുമ്ഭോ നിശുമ്ഭശ്ചൈവാന്യാവുത്പത്സ്യേതേ മഹാസുരൌ ॥ ൧൧.൪൧॥
നന്ദഗോപഗൃഹേ ജാതാ യശോദാഗര്ഭസമ്ഭവാ ।
തതസ്തൌ നാശയിഷ്യാമി വിന്ധ്യാചലനിവാസിനീ ॥ ൧൧.൪൨॥
പുനരപ്യതിരൌദ്രേണ രൂപേണ പൃഥിവീതലേ ।
അവതീര്യ ഹനിഷ്യാമി വൈപ്രചിത്താംശ്ച ദാനവാന് ॥ ൧൧.൪൩॥
ഭക്ഷയന്ത്യാശ്ച താനുഗ്രാന് വൈപ്രചിത്താന് മഹാസുരാന് ।
രക്താ ദന്താ ഭവിഷ്യന്തി ദാഡിമീകുസുമോപമാഃ ॥ ൧൧.൪൪॥
തതോ മാം ദേവതാഃ സ്വര്ഗേ മര്ത്യലോകേ ച മാനവാഃ ।
സ്തുവന്തോ വ്യാഹരിഷ്യന്തി സതതം രക്തദന്തികാമ് ॥ ൧൧.൪൫॥
ഭൂയശ്ച ശതവാര്ഷിക്യാമനാവൃഷ്ട്യാമനമ്ഭസി ।
മുനിഭിഃ സംസ്മൃതാ ഭൂമൌ സമ്ഭവിഷ്യാമ്യയോനിജാ ॥ ൧൧.൪൬॥
തതഃ ശതേന നേത്രാണാം നിരീക്ഷിഷ്യാമ്യഹം മുനീന് ।
കീര്തയിഷ്യന്തി മനുജാഃ ശതാക്ഷീമിതി മാം തതഃ ॥ ൧൧.൪൭॥
തതോഽഹമഖിലം ലോകമാത്മദേഹസമുദ്ഭവൈഃ ।
ഭരിഷ്യാമി സുരാഃ ശാകൈരാവൃഷ്ടേഃ പ്രാണധാരകൈഃ ॥ ൧൧.൪൮॥
ശാകമ്ഭരീതി വിഖ്യാതിം തദാ യാസ്യാമ്യഹം ഭുവി ।
തത്രൈവ ച വധിഷ്യാമി ദുര്ഗമാഖ്യം മഹാസുരമ് ॥ ൧൧.൪൯॥
ദുര്ഗാദേവീതി വിഖ്യാതം തന്മേ നാമ ഭവിഷ്യതി ।
പുനശ്ചാഹം യദാ ഭീമം രൂപം കൃത്വാ ഹിമാചലേ ॥ ൧൧.൫൦॥
രക്ഷാംസി ഭക്ഷയിഷ്യാമി മുനീനാം ത്രാണകാരണാത് ।
തദാ മാം മുനയഃ സര്വേ സ്തോഷ്യന്ത്യാനമ്രമൂര്തയഃ ॥ ൧൧.൫൧॥
ഭീമാദേവീതി വിഖ്യാതം തന്മേ നാമ ഭവിഷ്യതി ।
യദാരുണാഖ്യസ്ത്രൈലോക്യേ മഹാബാധാം കരിഷ്യതി ॥ ൧൧.൫൨॥
തദാഹം ഭ്രാമരം രൂപം കൃത്വാസങ്ഖ്യേയഷട്പദമ് ।
ത്രൈലോക്യസ്യ ഹിതാര്ഥായ വധിഷ്യാമി മഹാസുരമ് ॥ ൧൧.൫൩॥
ഭ്രാമരീതി ച മാം ലോകാസ്തദാ സ്തോഷ്യന്തി സര്വതഃ ।
ഇത്ഥം യദാ യദാ ബാധാ ദാനവോത്ഥാ ഭവിഷ്യതി ॥ ൧൧.൫൪॥
തദാ തദാവതീര്യാഹം കരിഷ്യാമ്യരിസങ്ക്ഷയമ് ॥ ൧൧.൫൫॥
॥ സ്വസ്തി ശ്രീമാര്കണ്ഡേയപുരാണേ സാവര്ണികേ മന്വന്തരേ ദേവീമാഹാത്മ്യേ
നാരായണീസ്തുതിര്നാമൈകാദശോഽധ്യായഃ ॥ ൧൧॥
ഉവാച൪, അര്ധശ്ലോകഃ ൧, ശ്ലോകാഃ ൫൦, ഏവമാദിതഃ ॥ ൬൩൦॥

। ധ്യാനമ് ।
ഓം വിദ്യുദ്ധാമസമപ്രഭാം മൃഗപതിസ്കന്ധസ്ഥിതാം ഭീഷണാം
കന്യാഭിഃ കരവാളഖേടവിലസധസ്താഭിരാസേവിതാമ് ।
ഹസ്തൈശ്ചക്രഗദാസിഖേടവിശിഖാംശ്ചാപം ഗുണം തര്ജനീം
ബിഭ്രാണാമനലാത്മികാം ശശിധരാം ദുര്ഗാം ത്രിനേത്രാം ഭജേ ॥
ഓം ദേവ്യുവാച॥ ൧൨.൧॥
ഏഭിഃ സ്തവൈശ്ച മാം നിത്യം സ്തോഷ്യതേ യഃ സമാഹിതഃ ।
തസ്യാഹം സകലാം ബാധാം ശമയിഷ്യാമ്യസംശയമ് ॥ ൧൨.൨॥
മധുകൈടഭനാശം ച മഹിഷാസുരഘാതനമ് ।
കീര്തയിഷ്യന്തി യേ തദ്വദ്വധം ശുമ്ഭനിശുമ്ഭയോഃ ॥ ൧൨.൩॥
അഷ്ടമ്യാം ച ചതുര്ദശ്യാം നവമ്യാം ചൈകചേതസഃ ।
ശ്രോഷ്യന്തി ചൈവ യേ ഭക്ത്യാ മമ മാഹാത്മ്യമുത്തമമ് ॥ ൧൨.൪॥
ന തേഷാം ദുഷ്കൃതം കിഞ്ചിദ്ദുഷ്കൃതോത്ഥാ ന ചാപദഃ ।
ഭവിഷ്യതി ന ദാരിദ്ര്യം ന ചൈവേഷ്ടവിയോജനമ് ॥ ൧൨.൫॥
ശത്രുഭ്യോ ന ഭയം തസ്യ ദസ്യുതോ വാ ന രാജതഃ ।
ന ശസ്ത്രാനലതോയൌഘാത് കദാചിത് സമ്ഭവിഷ്യതി ॥ ൧൨.൬॥
തസ്മാന്മമൈതന്മാഹാത്മ്യം പഠിതവ്യം സമാഹിതൈഃ ।
ശ്രോതവ്യം ച സദാ ഭക്ത്യാ പരം സ്വസ്ത്യയനം മഹത് ॥ ൧൨.൭॥
ഉപസര്ഗാനശേഷാംസ്തു മഹാമാരീസമുദ്ഭവാന് ।
തഥാ ത്രിവിധമുത്പാതം മാഹാത്മ്യം ശമയേന്മമ ॥ ൧൨.൮॥
യത്രൈതത്പഠ്യതേ സമ്യങ്നിത്യമായതനേ മമ ।
സദാ ന തദ്വിമോക്ഷ്യാമി സാന്നിധ്യം തത്ര മേ സ്ഥിതമ് ॥ ൧൨.൯॥
ബലിപ്രദാനേ പൂജായാമഗ്നികാര്യേ മഹോത്സവേ ।
സര്വം മമൈതന്മാഹാത്മ്യമ് ഉച്ചാര്യം ശ്രാവ്യമേവ ച ॥ ൧൨.൧൦॥
ജാനതാജാനതാ വാപി ബലിപൂജാം യഥാ കൃതാമ് ।
പ്രതീക്ഷിഷ്യാമ്യഹം പ്രീത്യാ വഹ്നിഹോമം തഥാകൃതമ് ॥ ൧൨.൧൧॥
ശരത്കാലേ മഹാപൂജാ ക്രിയതേ യാ ച വാര്ഷികീ ।
തസ്യാം മമൈതന്മാഹാത്മ്യം ശ്രുത്വാ ഭക്തിസമന്വിതഃ ॥ ൧൨.൧൨॥
സര്വാബാധാവിനിര്മുക്തോ ധനധാന്യസമന്വിതഃ ।
മനുഷ്യോ മത്പ്രസാദേന ഭവിഷ്യതി ന സംശയഃ ॥ ൧൨.൧൩॥
ശ്രുത്വാ മമൈതന്മാഹാത്മ്യം തഥാ ചോത്പത്തയഃ ശുഭാഃ ।
പരാക്രമം ച യുദ്ധേഷു ജായതേ നിര്ഭയഃ പുമാന് ॥ ൧൨.൧൪॥
രിപവഃ സങ്ക്ഷയം യാന്തി കല്യാണം ചോപപദ്യതേ ।
നന്ദതേ ച കുലം പുംസാം മാഹാത്മ്യം മമ ശ‍ൃണ്വതാമ് ॥ ൧൨.൧൫॥
ശാന്തികര്മണി സര്വത്ര തഥാ ദുഃസ്വപ്നദര്ശനേ ।
ഗ്രഹപീഡാസു ചോഗ്രാസു മാഹാത്മ്യം ശ‍ൃണുയാന്മമ ॥ ൧൨.൧൬॥
ഉപസര്ഗാഃ ശമം യാന്തി ഗ്രഹപീഡാശ്ച ദാരുണാഃ ।
ദുഃസ്വപ്നം ച നൃഭിര്ദൃഷ്ടം സുസ്വപ്നമുപജായതേ ॥ ൧൨.൧൭॥
ബാലഗ്രഹാഭിഭൂതാനാം ബാലാനാം ശാന്തികാരകമ് ।
സങ്ഘാതഭേദേ ച നൃണാം മൈത്രീകരണമുത്തമമ് ॥ ൧൨.൧൮॥
ദുര്വൃത്താനാമശേഷാണാം ബലഹാനികരം പരമ് ।
രക്ഷോഭൂതപിശാചാനാം പഠനാദേവ നാശനമ് ॥ ൧൨.൧൯॥
സര്വം മമൈതന്മാഹാത്മ്യം മമ സന്നിധികാരകമ് ।
പശുപുഷ്പാര്ഘ്യധൂപൈശ്ച ഗന്ധദീപൈസ്തഥോത്തമൈഃ ॥ ൧൨.൨൦॥
വിപ്രാണാം ഭോജനൈര്ഹോമൈഃ പ്രോക്ഷണീയൈരഹര്നിശമ് ।
അന്യൈശ്ച വിവിധൈര്ഭോഗൈഃ പ്രദാനൈര്വത്സരേണ യാ ॥ ൧൨.൨൧॥
പ്രീതിര്മേ ക്രിയതേ സാസ്മിന് സകൃദുച്ചരിതേ ശ്രുതേ ।
ശ്രുതം ഹരതി പാപാനി തഥാരോഗ്യം പ്രയച്ഛതി ॥ ൧൨.൨൨॥
രക്ഷാം കരോതി ഭൂതേഭ്യോ ജന്മനാം കീര്തനം മമ ।
യുദ്ധേഷു ചരിതം യന്മേ ദുഷ്ടദൈത്യനിബര്ഹണമ് ॥ ൧൨.൨൩॥
തസ്മിഞ്ഛ്രുതേ വൈരികൃതം ഭയം പുംസാം ന ജായതേ ।
യുഷ്മാഭിഃ സ്തുതയോ യാശ്ച യാശ്ച ബ്രഹ്മര്ഷിഭിഃ കൃതാഃ ॥ ൧൨.൨൪॥
ബ്രഹ്മണാ ച കൃതാസ്താസ്തു പ്രയച്ഛന്തു ശുഭാം മതിമ് ।
അരണ്യേ പ്രാന്തരേ വാപി ദാവാഗ്നിപരിവാരിതഃ ॥ ൧൨.൨൫॥
ദസ്യുഭിര്വാ വൃതഃ ശൂന്യേ ഗൃഹീതോ വാപി ശത്രുഭിഃ ।
സിംഹവ്യാഘ്രാനുയാതോ വാ വനേ വാ വനഹസ്തിഭിഃ ॥ ൧൨.൨൬॥
രാജ്ഞാ ക്രുദ്ധേന ചാജ്ഞപ്തോ വധ്യോ ബന്ധഗതോഽപി വാ ।
ആഘൂര്ണിതോ വാ വാതേന സ്ഥിതഃ പോതേ മഹാര്ണവേ ॥ ൧൨.൨൭॥
പതത്സു ചാപി ശസ്ത്രേഷു സങ്ഗ്രാമേ ഭൃശദാരുണേ ।
സര്വാബാധാസു ഘോരാസു വേദനാഭ്യര്ദിതോഽപി വാ ॥ ൧൨.൨൮॥
സ്മരന് മമൈതച്ചരിതം നരോ മുച്യേത സങ്കടാത് ।
മമ പ്രഭാവാത്സിംഹാദ്യാ ദസ്യവോ വൈരിണസ്തഥാ ॥ ൧൨.൨൯॥
ദൂരാദേവ പലായന്തേ സ്മരതശ്ചരിതം മമ ॥ ൧൨.൩൦॥
ഋഷിരുവാച ॥ ൧൨.൩൧॥
ഇത്യുക്ത്വാ സാ ഭഗവതീ ചണ്ഡികാ ചണ്ഡവിക്രമാ ॥ ൧൨.൩൨॥
പശ്യതാം സര്വദേവാനാം തത്രൈവാന്തരധീയത ।
തേഽപി ദേവാ നിരാതങ്കാഃ സ്വാധികാരാന്യഥാ പുരാ ॥ ൧൨.൩൩॥
യജ്ഞഭാഗഭുജഃ സര്വേ ചക്രുര്വിനിഹതാരയഃ ।
ദൈത്യാശ്ച ദേവ്യാ നിഹതേ ശുമ്ഭേ ദേവരിപൌ യുധി ॥ ൧൨.൩൪॥
ജഗദ്വിധ്വംസകേ തസ്മിന് മഹോഗ്രേഽതുലവിക്രമേ ।
നിശുമ്ഭേ ച മഹാവീര്യേ ശേഷാഃ പാതാലമായയുഃ ॥ ൧൨.൩൫॥
ഏവം ഭഗവതീ ദേവീ സാ നിത്യാപി പുനഃ പുനഃ ।
സമ്ഭൂയ കുരുതേ ഭൂപ ജഗതഃ പരിപാലനമ് ॥ ൧൨.൩൬॥
തയൈതന്മോഹ്യതേ വിശ്വം സൈവ വിശ്വം പ്രസൂയതേ ।
സാ യാചിതാ ച വിജ്ഞാനം തുഷ്ടാ ഋദ്ധിം പ്രയച്ഛതി ॥ ൧൨.൩൭॥
വ്യാപ്തം തയൈതത്സകലം ബ്രഹ്മാണ്ഡം മനുജേശ്വര ।
മഹാദേവ്യാ മഹാകാലീ മഹാമാരീസ്വരൂപയാ ॥ ൧൨.൩൮॥
സൈവ കാലേ മഹാമാരീ സൈവ സൃഷ്ടിര്ഭവത്യജാ ।
സ്ഥിതിം കരോതി ഭൂതാനാം സൈവ കാലേ സനാതനീ ॥ ൧൨.൩൯॥
ഭവകാലേ നൃണാം സൈവ ലക്ഷ്മീര്വൃദ്ധിപ്രദാ ഗൃഹേ ।
സൈവാഭാവേ തഥാലക്ഷ്മീര്വിനാശായോപജായതേ ॥ ൧൨.൪൦॥
സ്തുതാ സമ്പൂജിതാ പുഷ്പൈര്ഗന്ധധൂപാദിഭിസ്തഥാ ।
ദദാതി വിത്തം പുത്രാംശ്ച മതിം ധര്മേ ഗതിം ശുഭാമ് ॥ ൧൨.൪൧॥
॥ സ്വസ്തി ശ്രീമാര്കണ്ഡേയപുരാണേ സാവര്ണികേ മന്വന്തരേ ദേവീമാഹാത്മ്യേ
ഭഗവതീ വാക്യം ദ്വാദശോഽധ്യായഃ ॥ ൧൨॥
ഉവാച൨, അര്ധശ്ലോകൌ ൨, ശ്ലോകാഃ ൩൭, ഏവമാദിതഃ ॥ ൬൭൧॥

। ധ്യാനമ് ।
ഓം ബാലാര്കമണ്ഡലാഭാസാം ചതുര്ബാഹും ത്രിലോചനാമ് ।
പാശാങ്കുശവരാഭീതിര്ധാരയന്തീം ശിവാം ഭജേ ॥
ഓം ഋഷിരുവാച ॥ ൧൩.൧॥
ഏതത്തേ കഥിതം ഭൂപ ദേവീമാഹാത്മ്യമുത്തമമ് ।
ഏവം പ്രഭാവാ സാ ദേവീ യയേദം ധാര്യതേ ജഗത് ॥ ൧൩.൨॥
വിദ്യാ തഥൈവ ക്രിയതേ ഭഗവദ്വിഷ്ണുമായയാ ।
തയാ ത്വമേഷ വൈശ്യശ്ച തഥൈവാന്യേ വിവേകിനഃ ॥ ൧൩.൩॥
മോഹ്യന്തേ മോഹിതാശ്ചൈവ മോഹമേഷ്യന്തി ചാപരേ ।
താമുപൈഹി മഹാരാജ ശരണം പരമേശ്വരീമ് ॥ ൧൩.൪॥
ആരാധിതാ സൈവ നൃണാം ഭോഗസ്വര്ഗാപവര്ഗദാ ॥ ൧൩.൫॥
മാര്കണ്ഡേയ ഉവാച॥ ൧൩.൬॥
ഇതി തസ്യ വചഃ ശ്രുത്വാ സുരഥഃ സ നരാധിപഃ ॥ ൧൩.൭॥
പ്രണിപത്യ മഹാഭാഗം തമൃഷിം സംശിതവ്രതമ് ।
നിര്വിണ്ണോഽതിമമത്വേന രാജ്യാപഹരണേന ച ॥ ൧൩.൮॥
ജഗാമ സദ്യസ്തപസേ സ ച വൈശ്യോ മഹാമുനേ ।
സന്ദര്ശനാര്ഥമമ്ബായാ നദീപുലിനമാസ്ഥിതഃ ॥ ൧൩.൯॥
സ ച വൈശ്യസ്തപസ്തേപേ ദേവീസൂക്തം പരം ജപന് ।
തൌ തസ്മിന് പുലിനേ ദേവ്യാഃ കൃത്വാ മൂര്തിം മഹീമയീമ് ॥ ൧൩.൧൦॥
അര്ഹണാം ചക്രതുസ്തസ്യാഃ പുഷ്പധൂപാഗ്നിതര്പണൈഃ ।
നിരാഹാരൌ യതാത്മാനൌ തന്മനസ്കൌ സമാഹിതൌ ॥ ൧൩.൧൧॥
ദദതുസ്തൌ ബലിം ചൈവ നിജഗാത്രാസൃഗുക്ഷിതമ് ।
ഏവം സമാരാധയതോസ്ത്രിഭിര്വര്ഷൈര്യതാത്മനോഃ ॥ ൧൩.൧൨॥
പരിതുഷ്ടാ ജഗദ്ധാത്രീ പ്രത്യക്ഷം പ്രാഹ ചണ്ഡികാ ॥ ൧൩.൧൩॥
ദേവ്യുവാച॥ ൧൩.൧൪॥
യത്പ്രാര്ഥ്യതേ ത്വയാ ഭൂപ ത്വയാ ച കുലനന്ദന ।
മത്തസ്തത്പ്രാപ്യതാം സര്വം പരിതുഷ്ടാ ദദാമിതേ ॥ ൧൩.൧൫॥
മാര്കണ്ഡേയ ഉവാച॥ ൧൩.൧൬॥
തതോ വവ്രേ നൃപോ രാജ്യമവിഭ്രംശ്യന്യജന്മനി ।
അത്രൈവ ച നിജം രാജ്യം ഹതശത്രുബലം ബലാത് ॥ ൧൩.൧൭॥
സോഽപി വൈശ്യസ്തതോ ജ്ഞാനം വവ്രേ നിര്വിണ്ണമാനസഃ ।
മമേത്യഹമിതി പ്രാജ്ഞഃ സങ്ഗവിച്യുതികാരകമ് ॥ ൧൩.൧൮॥
ദേവ്യുവാച॥ ൧൩.൧൯॥
സ്വല്പൈരഹോഭിര്നൃപതേ സ്വം രാജ്യം പ്രാപ്സ്യതേ ഭവാന് ॥ ൧൩.൨൦॥
ഹത്വാ രിപൂനസ്ഖലിതം തവ തത്ര ഭവിഷ്യതി ॥ ൧൩.൨൧॥
മൃതശ്ച ഭൂയഃ സമ്പ്രാപ്യ ജന്മ ദേവാദ്വിവസ്വതഃ ॥ ൧൩.൨൨॥
സാവര്ണികോ മനുര്നാമ ഭവാന്ഭുവി ഭവിഷ്യതി ॥ ൧൩.൨൩॥
വൈശ്യവര്യ ത്വയാ യശ്ച വരോഽസ്മത്തോഽഭിവാഞ്ഛിതഃ ॥ ൧൩.൨൪॥
തം പ്രയച്ഛാമി സംസിദ്ധ്യൈ തവ ജ്ഞാനം ഭവിഷ്യതി ॥ ൧൩.൨൫॥
മാര്കണ്ഡേയ ഉവാച॥ ൧൩.൨൬॥
ഇതി ദത്ത്വാ തയോര്ദേവീ യഥാഭിലഷിതം വരമ് ॥ ൧൩.൨൭॥
ബഭൂവാന്തര്ഹിതാ സദ്യോ ഭക്ത്യാ താഭ്യാമഭിഷ്ടുതാ ।
ഏവം ദേവ്യാ വരം ലബ്ധ്വാ സുരഥഃ ക്ഷത്രിയര്ഷഭഃ ॥ ൧൩.൨൮॥
സൂര്യാജ്ജന്മ സമാസാദ്യ സാവര്ണിര്ഭവിതാ മനുഃ ॥ ൧൩.൨൯॥
ഏവം ദേവ്യാ വരം ലബ്ധ്വാ സുരഥഃ ക്ഷത്രിയര്ഷഭഃ ।
സൂര്യാജ്ജന്മ സമാസാദ്യ സാവര്ണിര്ഭവിതാ മനുഃ ॥ ക്ലീം ഓം ॥
॥ സ്വസ്തി ശ്രീമാര്കണ്ഡേയപുരാണേ സാവര്ണികേ മന്വന്തരേ ദേവീമാഹാത്മ്യേ
സുരഥവൈശ്യയോര്വരപ്രദാനം നാമ ത്രയോദശോഽധ്യായഃ ॥ ൧൩॥
ഉവാച൬, അര്ധശ്ലോകാഃ ൧൧, ശ്ലോകാഃ ൧൨, ഏവമാദിതഃ ॥ ൭൦൦॥
സമസ്താ ഉവാചമന്ത്രാഃ ൫൭, അര്ധശ്ലോകാഃ ൪൨, ശ്ലോകാഃ ൫൩൫, അവദാനാനി ൬൬ ॥
॥ ശ്രീസപ്തശതീദേവീമാഹാത്മ്യം സമാപ്തമ് ॥
॥ ഓം തത് സത് ഓം ॥

ഓം അപരാധശതം കൃത്വാ ജഗദമ്ബേതി ചോച്ചരേത് ।
യാം ഗതിം സമവാപ്നോതി ന താം ബ്രഹ്മാദയഃ സുരാഃ ॥ ൧॥
സാപരാധോഽസ്മി ശരണം പ്രാപ്തസ്ത്വാം ജഗദമ്ബികേ ।
ഇദാനീമനുകമ്പ്യോഽഹം യഥേച്ഛസി തഥാ കുരു ॥ ൨॥
അജ്ഞാനാദ്വിസ്മൃതേര്ഭ്രാന്ത്യാ യന്ന്യൂനമധികം കൃതമ് ।
തത്സര്വം ക്ഷമ്യതാം ദേവി പ്രസീദ പരമേശ്വരി ॥ ൩॥
കാമേശ്വരി ജഗന്മാതഃ സച്ചിദാനന്ദവിഗ്രഹേ ।
ഗൃഹാണാര്ചാമിമാം പ്രീത്യാ പ്രസീദ പരമേശ്വരി ॥ ൪॥
സര്വരൂപമയീ ദേവീ സര്വം ദേവീമയം ജഗത് ।
അതോഽഹം വിശ്വരൂപാം ത്വാം നമാമി പരമേശ്വരീമ് ॥ ൫॥
യദക്ഷരം പരിഭ്രഷ്ടം മാത്രാഹീനഞ്ച യദ്ഭവേത് ।
പൂര്ണം ഭവതു തത് സര്വം ത്വത്പ്രസാദാന്മഹേശ്വരി ॥ ൬॥
യദത്ര പാഠേ ജഗദമ്ബികേ മയാ
വിസര്ഗബിന്ദ്വക്ഷരഹീനമീരിതമ് ।
തദസ്തു സമ്പൂര്ണതമം പ്രസാദതഃ
സങ്കല്പസിദ്ധിശ്ച സദൈവ ജായതാമ് ॥ ൭॥
യന്മാത്രാബിന്ദുബിന്ദുദ്വിതയപദപദദ്വന്ദ്വവര്ണാദിഹീനം
ഭക്ത്യാഭക്ത്യാനുപൂര്വം പ്രസഭകൃതിവശാത് വ്യക്തമവ്യക്തമമ്ബ ।
മോഹാദജ്ഞാനതോ വാ പഠിതമപഠിതം സാമ്പ്രതം തേ സ്തവേഽസ്മിന്
തത് സര്വം സാങ്ഗമാസ്താം ഭഗവതി വരദേ ത്വത്പ്രസാദാത് പ്രസീദ ॥ ൮॥
പ്രസീദ ഭഗവത്യമ്ബ പ്രസീദ ഭക്തവത്സലേ ।
പ്രസാദം കുരു മേ ദേവി ദുര്ഗേ ദേവി നമോഽസ്തു തേ ॥ ൯॥
॥ ഇതി അപരാധക്ഷമാപണസ്തോത്രം സമാപ്തമ് ॥

ഓം അഹം രുദ്രേഭിര്വസുഭിശ്ചരാമ്യഹ-
മാദിത്യൈരുത വിശ്വദേവൈഃ ।
അഹം മിത്രാവരുണോഭാ ബിഭര്മ്യഹ-
മിന്ദ്രാഗ്നീ അഹമശ്വിനോഭാ ॥ ൧॥
അഹം സോമമാഹനസം ബിഭര്മ്യഹം
ത്വഷ്ടാരമുത പൂഷണം ഭഗമ് ।
അഹം ദധാമി ദ്രവിണം ഹവിഷ്മതേ
സുപ്രാവ്യേ യജമാനായ സുന്വതേ ॥ ൨॥
അഹം രാഷ്ട്രീ സങ്ഗമനീ വസൂനാം
ചികിതുഷീ പ്രഥമാ യജ്ഞിയാനാമ് ।
താം മാ ദേവാ വ്യദധുഃ പുരുത്രാ
ഭൂരിസ്ഥാത്രാം ഭൂര്യാവേശയന്തീമ് ॥ ൩॥
മയാ സോ അന്നമത്തി യോ വിപശ്യതി
യഃ പ്രാണിതി യ ഈം ശ‍ൃണോത്യുക്തമ് ।
അമന്തവോ മാം ത ഉപക്ഷിയന്തി
ശ്രുധി ശ്രുത ശ്രദ്ധിവം തേ വദാമി ॥ ൪॥
അഹമേവ സ്വയമിദം വദാമി ജുഷ്ടം
ദേവേഭിരുത മാനുഷേഭിഃ ।
യം കാമയേ തം തമുഗ്രം കൃണോമി
തം ബ്രഹ്മാണം തമൃഷിം തം സുമേധാമ് ॥ ൫॥
അഹം രുദ്രായ ധനുരാ തനോമി
ബ്രഹ്മദ്വിഷേ ശരവേ ഹന്തവാ ഉ ।
അഹം ജനായ സമദം കൃണോമ്യഹം
ദ്യാവാപൃഥിവീ ആ വിവേശ ॥ ൬॥
അഹം സുവേ പിതരമസ്യ മൂര്ധന്
മമ യോനിരപ്സ്വന്തഃ സമുദ്രേ ।
തതോ വി തിഷ്ഠേ ഭുവനാനു വിശ്വോ-
താമൂം ദ്യാം വര്ഷ്മണോപ സ്പൃശാമി ॥ ൭॥
അഹമേവ വാത ഇവ പ്ര വാമ്യാ-
രഭമാണാ ഭുവനാനി വിശ്വാ ।
പരോ ദിവാ പര ഏനാ പൃഥിവ്യൈ-
താവതീ മഹിനാ സം ബഭൂവ ॥ ൮॥
॥ ഇതി ഋഗ്വേദോക്തം ദേവീസൂക്തം സമാപ്തമ് ॥
॥ ഓം തത് സത് ഓം ॥