ଅଷ୍ଟାଵକ୍ର ଗୀତା ଵିଂଶତିତମୋଽଧ୍ଯାଯଃ

କ୍ଵ ଭୂତାନି କ୍ଵ ଦେହୋ ଵା କ୍ଵେନ୍ଦ୍ରିଯାଣି କ୍ଵ ଵା ମନଃ ।

କ୍ଵ ଶୂନ୍ଯଂ କ୍ଵ ଚ ନୈରାଶ୍ଯଂ ମତ୍ସ୍ଵରୂପେ ନିରଞ୍ଜନେ ॥ 20-1॥
କ୍ଵ ଶାସ୍ତ୍ରଂ କ୍ଵାତ୍ମଵିଜ୍ଞାନଂ କ୍ଵ ଵା ନିର୍ଵିଷଯଂ ମନଃ ।

କ୍ଵ ତୃପ୍ତିଃ କ୍ଵ ଵିତୃଷ୍ଣାତ୍ଵଂ ଗତଦ୍ଵନ୍ଦ୍ଵସ୍ଯ ମେ ସଦା ॥ 20-2॥
କ୍ଵ ଵିଦ୍ଯା କ୍ଵ ଚ ଵାଵିଦ୍ଯା କ୍ଵାହଂ କ୍ଵେଦଂ ମମ କ୍ଵ ଵା ।

କ୍ଵ ବନ୍ଧଃ କ୍ଵ ଚ ଵା ମୋକ୍ଷଃ ସ୍ଵରୂପସ୍ଯ କ୍ଵ ରୂପିତା ॥ 20-3॥
କ୍ଵ ପ୍ରାରବ୍ଧାନି କର୍ମାଣି ଜୀଵନ୍ମୁକ୍ତିରପି କ୍ଵ ଵା ।

କ୍ଵ ତଦ୍ ଵିଦେହକୈଵଲ୍ଯଂ ନିର୍ଵିଶେଷସ୍ଯ ସର୍ଵଦା ॥ 20-4॥
କ୍ଵ କର୍ତା କ୍ଵ ଚ ଵା ଭୋକ୍ତା ନିଷ୍କ୍ରିଯଂ ସ୍ଫୁରଣଂ କ୍ଵ ଵା ।

କ୍ଵାପରୋକ୍ଷଂ ଫଲଂ ଵା କ୍ଵ ନିଃସ୍ଵଭାଵସ୍ଯ ମେ ସଦା ॥ 20-5॥
କ୍ଵ ଲୋକଂ କ୍ଵ ମୁମୁକ୍ଷୁର୍ଵା କ୍ଵ ଯୋଗୀ ଜ୍ଞାନଵାନ୍ କ୍ଵ ଵା ।

କ୍ଵ ବଦ୍ଧଃ କ୍ଵ ଚ ଵା ମୁକ୍ତଃ ସ୍ଵସ୍ଵରୂପେଽହମଦ୍ଵଯେ ॥ 20-6॥
କ୍ଵ ସୃଷ୍ଟିଃ କ୍ଵ ଚ ସଂହାରଃ କ୍ଵ ସାଧ୍ଯଂ କ୍ଵ ଚ ସାଧନମ୍ ।

କ୍ଵ ସାଧକଃ କ୍ଵ ସିଦ୍ଧିର୍ଵା ସ୍ଵସ୍ଵରୂପେଽହମଦ୍ଵଯେ ॥ 20-7॥
କ୍ଵ ପ୍ରମାତା ପ୍ରମାଣଂ ଵା କ୍ଵ ପ୍ରମେଯଂ କ୍ଵ ଚ ପ୍ରମା ।

କ୍ଵ କିଞ୍ଚିତ୍ କ୍ଵ ନ କିଞ୍ଚିଦ୍ ଵା ସର୍ଵଦା ଵିମଲସ୍ଯ ମେ ॥ 20-8॥
କ୍ଵ ଵିକ୍ଷେପଃ କ୍ଵ ଚୈକାଗ୍ର୍ଯଂ କ୍ଵ ନିର୍ବୋଧଃ କ୍ଵ ମୂଢତା ।

କ୍ଵ ହର୍ଷଃ କ୍ଵ ଵିଷାଦୋ ଵା ସର୍ଵଦା ନିଷ୍କ୍ରିଯସ୍ଯ ମେ ॥ 20-9॥
କ୍ଵ ଚୈଷ ଵ୍ଯଵହାରୋ ଵା କ୍ଵ ଚ ସା ପରମାର୍ଥତା ।

କ୍ଵ ସୁଖଂ କ୍ଵ ଚ ଵା ଦୁଃଖଂ ନିର୍ଵିମର୍ଶସ୍ଯ ମେ ସଦା ॥ 20-10॥
କ୍ଵ ମାଯା କ୍ଵ ଚ ସଂସାରଃ କ୍ଵ ପ୍ରୀତିର୍ଵିରତିଃ କ୍ଵ ଵା ।

କ୍ଵ ଜୀଵଃ କ୍ଵ ଚ ତଦ୍ବ୍ରହ୍ମ ସର୍ଵଦା ଵିମଲସ୍ଯ ମେ ॥ 20-11॥
କ୍ଵ ପ୍ରଵୃତ୍ତିର୍ନିର୍ଵୃତ୍ତିର୍ଵା କ୍ଵ ମୁକ୍ତିଃ କ୍ଵ ଚ ବନ୍ଧନମ୍ ।

କୂଟସ୍ଥନିର୍ଵିଭାଗସ୍ଯ ସ୍ଵସ୍ଥସ୍ଯ ମମ ସର୍ଵଦା ॥ 20-12॥
କ୍ଵୋପଦେଶଃ କ୍ଵ ଵା ଶାସ୍ତ୍ରଂ କ୍ଵ ଶିଷ୍ଯଃ କ୍ଵ ଚ ଵା ଗୁରୁଃ ।

କ୍ଵ ଚାସ୍ତି ପୁରୁଷାର୍ଥୋ ଵା ନିରୁପାଧେଃ ଶିଵସ୍ଯ ମେ ॥ 20-13॥
କ୍ଵ ଚାସ୍ତି କ୍ଵ ଚ ଵା ନାସ୍ତି କ୍ଵାସ୍ତି ଚୈକଂ କ୍ଵ ଚ ଦ୍ଵଯମ୍ ।

ବହୁନାତ୍ର କିମୁକ୍ତେନ କିଞ୍ଚିନ୍ନୋତ୍ତିଷ୍ଠତେ ମମ ॥ 20-14॥
ଇତି ଅଷ୍ଟାଵକ୍ରଗୀତା ସମାପ୍ତା ।