ଅଷ୍ଟାଵକ୍ର ଗୀତା ତ୍ରଯୋଦଶୋଽଧ୍ଯାଯଃ

ଅକିଞ୍ଚନଭଵଂ ସ୍ଵାସ୍ଥ୍ଯଂ କୌପୀନତ୍ଵେଽପି ଦୁର୍ଲଭମ୍ ।

ତ୍ଯାଗାଦାନେ ଵିହାଯାସ୍ମାଦହମାସେ ଯଥାସୁଖମ୍ ॥ 13-1॥
କୁତ୍ରାପି ଖେଦଃ କାଯସ୍ଯ ଜିହ୍ଵା କୁତ୍ରାପି ଖିଦ୍ଯତେ ।

ମନଃ କୁତ୍ରାପି ତତ୍ତ୍ଯକ୍ତ୍ଵା ପୁରୁଷାର୍ଥେ ସ୍ଥିତଃ ସୁଖମ୍ ॥ 13-2॥
କୃତଂ କିମପି ନୈଵ ସ୍ଯାଦ୍ ଇତି ସଞ୍ଚିନ୍ତ୍ଯ ତତ୍ତ୍ଵତଃ ।

ଯଦା ଯତ୍କର୍ତୁମାଯାତି ତତ୍ କୃତ୍ଵାସେ ଯଥାସୁଖମ୍ ॥ 13-3॥
କର୍ମନୈଷ୍କର୍ମ୍ଯନିର୍ବନ୍ଧଭାଵା ଦେହସ୍ଥଯୋଗିନଃ ।

ସଂଯୋଗାଯୋଗଵିରହାଦହମାସେ ଯଥାସୁଖମ୍ ॥ 13-4॥
ଅର୍ଥାନର୍ଥୌ ନ ମେ ସ୍ଥିତ୍ଯା ଗତ୍ଯା ନ ଶଯନେନ ଵା ।

ତିଷ୍ଠନ୍ ଗଚ୍ଛନ୍ ସ୍ଵପନ୍ ତସ୍ମାଦହମାସେ ଯଥାସୁଖମ୍ ॥ 13-5॥
ସ୍ଵପତୋ ନାସ୍ତି ମେ ହାନିଃ ସିଦ୍ଧିର୍ଯତ୍ନଵତୋ ନ ଵା ।

ନାଶୋଲ୍ଲାସୌ ଵିହାଯାସ୍ମାଦହମାସେ ଯଥାସୁଖମ୍ ॥ 13-6॥
ସୁଖାଦିରୂପା ନିଯମଂ ଭାଵେଷ୍ଵାଲୋକ୍ଯ ଭୂରିଶଃ ।

ଶୁଭାଶୁଭେ ଵିହାଯାସ୍ମାଦହମାସେ ଯଥାସୁଖମ୍ ॥ 13-7॥