অষ্টাবক্র গীতা একাদশোঽধ্যাযঃ

ভাবাভাববিকারশ্চ স্বভাবাদিতি নিশ্চযী ।

নির্বিকারো গতক্লেশঃ সুখেনৈবোপশাম্যতি ॥ 11-1॥
ঈশ্বরঃ সর্বনির্মাতা নেহান্য ইতি নিশ্চযী ।

অন্তর্গলিতসর্বাশঃ শান্তঃ ক্বাপি ন সজ্জতে ॥ 11-2॥
আপদঃ সম্পদঃ কালে দৈবাদেবেতি নিশ্চযী ।

তৃপ্তঃ স্বস্থেন্দ্রিযো নিত্যং ন বাঞ্ছতি ন শোচতি ॥ 11-3॥
সুখদুঃখে জন্মমৃত্যূ দৈবাদেবেতি নিশ্চযী ।

সাধ্যাদর্শী নিরাযাসঃ কুর্বন্নপি ন লিপ্যতে ॥ 11-4॥
চিন্তযা জাযতে দুঃখং নান্যথেহেতি নিশ্চযী ।

তযা হীনঃ সুখী শান্তঃ সর্বত্র গলিতস্পৃহঃ ॥ 11-5॥
নাহং দেহো ন মে দেহো বোধোঽহমিতি নিশ্চযী ।

কৈবল্যমিব সম্প্রাপ্তো ন স্মরত্যকৃতং কৃতম্ ॥ 11-6॥
আব্রহ্মস্তম্বপর্যন্তমহমেবেতি নিশ্চযী ।

নির্বিকল্পঃ শুচিঃ শান্তঃ প্রাপ্তাপ্রাপ্তবিনির্বৃতঃ ॥ 11-7॥
নানাশ্চর্যমিদং বিশ্বং ন কিঞ্চিদিতি নিশ্চযী ।

নির্বাসনঃ স্ফূর্তিমাত্রো ন কিঞ্চিদিব শাম্যতি ॥ 11-8॥