ଅଷ୍ଟାଵକ୍ର ଗୀତା ଦଶମୋଽଧ୍ଯାଯଃ

ଵିହାଯ ଵୈରିଣଂ କାମମର୍ଥଂ ଚାନର୍ଥସଙ୍କୁଲମ୍ ।

ଧର୍ମମପ୍ଯେତଯୋର୍ହେତୁଂ ସର୍ଵତ୍ରାନାଦରଂ କୁରୁ ॥ 10-1॥
ସ୍ଵପ୍ନେନ୍ଦ୍ରଜାଲଵତ୍ ପଶ୍ଯ ଦିନାନି ତ୍ରୀଣି ପଞ୍ଚ ଵା ।

ମିତ୍ରକ୍ଷେତ୍ରଧନାଗାରଦାରଦାଯାଦିସମ୍ପଦଃ ॥ 10-2॥
ଯତ୍ର ଯତ୍ର ଭଵେତ୍ତୃଷ୍ଣା ସଂସାରଂ ଵିଦ୍ଧି ତତ୍ର ଵୈ ।

ପ୍ରୌଢଵୈରାଗ୍ଯମାଶ୍ରିତ୍ଯ ଵୀତତୃଷ୍ଣଃ ସୁଖୀ ଭଵ ॥ 10-3॥
ତୃଷ୍ଣାମାତ୍ରାତ୍ମକୋ ବନ୍ଧସ୍ତନ୍ନାଶୋ ମୋକ୍ଷ ଉଚ୍ଯତେ ।

ଭଵାସଂସକ୍ତିମାତ୍ରେଣ ପ୍ରାପ୍ତିତୁଷ୍ଟିର୍ମୁହୁର୍ମୁହୁଃ ॥ 10-4॥
ତ୍ଵମେକଶ୍ଚେତନଃ ଶୁଦ୍ଧୋ ଜଡଂ ଵିଶ୍ଵମସତ୍ତଥା ।

ଅଵିଦ୍ଯାପି ନ କିଞ୍ଚିତ୍ସା କା ବୁଭୁତ୍ସା ତଥାପି ତେ ॥ 10-5॥
ରାଜ୍ଯଂ ସୁତାଃ କଲତ୍ରାଣି ଶରୀରାଣି ସୁଖାନି ଚ ।

ସଂସକ୍ତସ୍ଯାପି ନଷ୍ଟାନି ତଵ ଜନ୍ମନି ଜନ୍ମନି ॥ 10-6॥
ଅଲମର୍ଥେନ କାମେନ ସୁକୃତେନାପି କର୍ମଣା ।

ଏଭ୍ଯଃ ସଂସାରକାନ୍ତାରେ ନ ଵିଶ୍ରାନ୍ତମଭୂନ୍ ମନଃ ॥ 10-7॥
କୃତଂ ନ କତି ଜନ୍ମାନି କାଯେନ ମନସା ଗିରା ।

ଦୁଃଖମାଯାସଦଂ କର୍ମ ତଦଦ୍ଯାପ୍ଯୁପରମ୍ଯତାମ୍ ॥ 10-8॥